MATIUS 26

Ow Yesus bacatiw atakam aamtawfes

(Mrk. 14:1-2; Luk. 22:1-2; Yoh. 11:45-53)

1Bare, Yesus inim atakam aotawkurumef. Inim atakam aotawkurumef masirin, aram atakam e amamkawi ow aotawef. 2“E Bakamsow Pokbwi jowan aemcemes. Car inimas camsom. E jofay ara, ow, e Asmat Anakat Ajaworemef Ipic salib os op bacatopom, aotasimemtamcemes.” Inim aeef.

3Bare, e Allah atakam mamtaw tugas ow awutam, e Yahudi ownucuram, e Allah atakam mamtaw tugas ipic awut juwas Kayafas acemut ajarewsiapfes. 4E ow, Yesus, ban curuw bakimom, wunam bacatiw, at aetiwfes. 5E ow nat, “Dar eras bwem a pokbwi aman aropok. E mami ow owen da bamoasin.” Inim aefes.

Cowoc cowok minyak wangi Yesus kus aokomnemef

(Mrk. 14:3-9; Yoh. 12:1-8)

6Bare, Yesus kota Betani aemapef ara, ar jipic juwas Simon acem ajiwapef. Bap ara, e ipic penyakit kusta ipic aemapef. 7Yesus e cem aman aemapef ara, cowoc cowok, ek botol, aramat ipicu atowocenef. E ek juwas “pualam” ara. Bare, e botol, minyak wangi epcom. E minyak harga awutnakut ara. Aramat ipicam amos cowocanmepaw, e cowoc, e minyak aramat ipic kus aokomnemef. 8E mamkawi owam inimas aporfes. “A cowoc e minyak aokomosomamar nat, ucimaram? 9Ar e minyak, uang auwumtewetcow, uang awutut atewetcema. E uang masirin, e pok opok ow batetam, bare akat ara.” Inim aefes. 10Yesusam inim atakam aporef. Ar masirin, “Car a cowoc ucim pok ajurusumamokom? E aemtamamanas, bare akat cowok ara. 11E pok opok ow cadam sotop aatamemapawarcemes. Do nat, cadam sotop batamemapawar opok. 12A cowoc a minyak a dodam aokomnemama, er a dodam e awerem bajiwtatiwas ara. 13Atakamnak ara, ow a Atakam Akat e asanin asanin acacapiomces, ow e cowoc aemtamamanas inim atakam jen ajicemes.” Yesus inim aeef.

Yudas, Yesus, jokmen ow botasimemtam aememef

(Mrk. 14:10-11; Luk. 22:3-6)

14Bare. E Yesus mamkawi ow dua belas ajiwar aramaman jipic cowok juwas Yudas Iskariot ara. Aramat ipic e Allah atakam mamtaw tugas ow awutpu aapenef. 15“Dor e Yesus car aotasimemtamcin, car ucim pok tetamcenokom?” Inim aeef. E ow masirin, uang perak tiga puluh ajiwar e ipic atetamfes. 16E jofay ajiwar, e Yudas, e Yesus, e ow botasimemtam asan akat, apowporef.

Yesusam, e amamkawi owam, e Bakamsow Pokbwi amos akac aemenfes

(Mrk. 14:12-21; Luk. 22:7-14,21-23; Yoh. 13:21-30)

17Bare. E Bibit Opok Roti Pokbwi bap jofay aenawef. E Yesus mamkawi owam aramat ipic aenawomfes. Aram atakam aotawfes. “Or e Bakamsow Pokbwi ocenak asan emencem Dar e pokbwi pok bakenem.” Inim aefes. 18Aramat ipic masirin, “E kota, jipic cowok mammerporey. Atakamam e ipic mamotawey. E guru atakam, E damir aafcey jofay, bare sotopnakap ara. Doram, e domamkawi owam, e Bakamsow Pokbwi, e ocem aancomom. Inim mameey.” Yesus inim aeef. 19Bare, e mamkawi ow, e Yesus atakam ji aefes. Ar e Bakamsow Pokbwi pok akenemfes.

20Iram ara masirin, aramat ipicam, e mamkawi ow dua belas ajiwaram, amos memen aneypwikapfes. 21Amos cowocanmepesaw, aramat ipic atakam atawef. “Atakamnak ara, e ca wun ipic cowok dor e jokmen ow aotasimemtamceman.” Inim aeef. 22E owam jak pwicak aemaptotorfes. Ar masirin, jonow aramat ipic atowtotorfes. “Tuhan. E atakam atawmem ipic, dor opok openow?” Inim aetotorfes. 23Aramat ipic masirin, “Amos, bwi dorcin sotanmom ipic cowok, e jokmen ow aotasimemtamceman. 24E Asmat Anakat Ajaworemef Ipic damir aafcema. Er e Alkitab atakam jipu ara. E nat, e aramat ipic, e jokmen ow aotasimemtamcow ipic, asan pwicaknakut aemapcema. E ipic bajisames opok ayaw, bare ar asan akat ara.” Inim aeef. 25E Yesus, e jokmen ow aotasimemtamcow ipic juwas Yudas, atakamam atawef. “Guru. Er dor aranew?” Inim aeef. Yesus masirin. “Bare, er e atawmem atakam jipu ara.” Inim aeef.

Tuhan Perjamuan

(Mrk. 14:22-26; Luk. 22:15-20; 1Kor. 11:23-25)

26Bare, e ow amos memen aemapfes ara, Yesusam amos atewef. Aram terima kasih atakam Allah aotawef. Ar e amos akokomef, wunam e amamkawi ow sey aseyetamef. “A amos bateweney. A dodam das ara.” Inim aeef. 27Aramat ipic masirin, gelas anggur bwi epcom atewef. Terima kasih atakam Allah aotawef. Wunam e gelas bwi e ow sey aseyetamef. “Car takas a bwi paney. 28A bwi dores ara. Ametnak ara, Allah asmat ow bajortew atayi aeef. Dores ow arke bajortew airineycema. E dores, e Allah atayi aefas, atakamnak aporomtamcema. E dores airineycow, ar ow arke adosa bakokoromosomtamas ara. 29Ca nat, jakaperey. Wow ajiwar, dor a anggur bwi boan opok— dor ay anggur bwi e doricipic aPemerintah Asan car akac aoancom jofay ajiwara.” Yesus inim aeef. 30E ow masirin, Allah basicim so aefes. Allah basicim so aefes masirin, e sikon juwas Saitun aapenfes.

Petrus e Yesus apacincowas

31Bare. Yesus atakam e ow aotawef. “E Alkitab atakam, ‘Dor e domba manmok batiw ipic acatiwcimin. E domba masirin, apacayoscemes.’ Inim aema. Inimas ara, wow iram car takas do mamkawi akorompimcemenokom. 32E nat, Allah dor aojaworomsumutumcan, dor Galilea capinmi bap ajisoscimin. Car masirin, asep aapenawcomokom.” Inim aeef. 33Petrus masirin, atakam aramat ipic aotawef. “E wun ow takas or mamkawi akorompimcenesnew, do nat, opok.” Inim aeef. 34Yesus masirin, “Atakamnak ara, wow iram or atakam bar mamincop bap atawescemen, ‘Dor e Yesus nomsom opok,’ inim ajiescemem. E ayam jipic masirin, atakam asep akoreyescema.” Inim aeef. 35Petrus masirin, “Ow orcin akac acatiwcemarowos openow. Do nat, ‘Dor e Yesus nomsom opok,’ inim baji opok cowok aecimin.” Inim aeef. E mamkawi ow takasam inim atakam cowok aotawfes.

Yesus janim Allah aanimef

(Mrk. 14:32-42; Luk. 22:39-46)

36Bare. Yesusam, e mamkawi owam, asan juwas Getsemanipu ajisosfes. Aramat ipic masirin, “Car arasan inim atakamemapey. Dor masirin, erasan janim Allah aanimcimin.” Inim aeef. 37Aramat ipic masirin, Petrusam, Sebedeus atiperes jamnukam, atowocenef. Aram jak pwicak aememefen. Bare, ar jak opoknak cowok aememefen. 38Aram atakam e ow aotawefen. “Do jak pwicaknakut aememamin— dor damir badamirafken inim awcawor ara. Ca nat, arasan inim atakamemapey. Wunam manmok dor akac tiwapey.” Inim aeefen. 39Aram bap kanimnakap aapenefen. Wunam bi fop aneyjirapefen. Aram janim Allah aanimefen. “Diwi. Akat aporcem, dor bajurusem arapok. E nat, e akat aporminas jipu bwem arapok. E akat apormemas jipu cowok emey.” Inim aeefen.

40Aramat ipic masirin, e mamkawi owpu aofasienefen. Aram e ow isi aemamesfes aporefen. “Petrus. Car jam cowoknakap manmok dor akac bwemtiwap asan opoknew? 41Caram manmok inim mamtiwapawarey. Janim Allah inim mamanimawarey. Iblis car dosa bwem bacajijimtawasin. Car Allah atakam ji bwe, jak aseremapmokom ara. E nat, ca dam kumit ara.” Inim aeefen. 42Bare, aramat ipic aoapenefen. Wunam janim Allah aoanimefen. “Diwi. Or dor bajurusem akat aporcem, e orakatas jipu emey.” Inim aeefen. 43Aramat ipic masirin, e owpu aofasienawefen. Ar e ow isi aoemamesfes aoporefen. E ow isi manmok awutnakut arawen.

44Aramat ipic masirin, e ow bakan aojiosefen. Aram bar mamincop ajiwar janim Allah aoanimefen. Ar e bap janim aanimefas cowok aoanimefen. 45Aramat ipic masirin, e mamkawi ow aofasienawefen. Aram atakam e ow aotawefen. “Car isi awamsokomnew? Car ses aanmokomnew? Do wow ara. Jipic cowok e Asmat Anakat Ajaworemef Ipic e dosa ow aotasimemtamama. 46Caram basitey. Bajisosmoc. E dor aotasimemtamcan ipic aenawmar ara.” Inim aeefen.

Ow Yesus ban akimomfes

(Mrk. 14:43-50; Luk. 22:47-53; Yoh. 18:3-12)

47Yesus atakam cowocemtawmepaw, Yudas akan aakenawef. Ar e Yesus mamkawi ow duabelas ajiwar wun ipic cowok ara. Ow arkenakutam ar akac aenawfes. Ar owec parangam, warim pokam, atowotnawfes. E Allah atakam mamtaw tugas ow awutam, e Yahudi ownucuram, inimas jirmec ajirimfes. 48Bap ara, e Yesus aotasimemtamcow ipic, atakam, e ow arke, aotawef. “E ak aafopcey ipic, bare e ipic ara. Ar ban mamkimomey.” Inim aeef. 49Bare, e Yudas, e Yesuspu akan ameromef. “Guru. Selamato.” Inim aeef. Amat ipic masirin, Yesus ak aafopef. 50Yesus masirin, atakam aramat ipic aotawef. “Aya. Bare, e aenawmemas emey.” Inim aeef. E ow masirin, Yesus aenawomfes. Ar aramat ipic ban akimomfes. Aram aramat ipic ban faknakut aomosomfes. 51E Yesus akac aememef ipic cowok, owec parang asumtewef. Ar masirin, e Allah atakam mamtaw tugas ipic awut akerja bwemtam ipic jenmak asakamnemef. 52Yesus masirin, atakam e ipic aotawef. “E owec parang e ese botewapomey. Ow owec parang atewces, aram owec parang damir aafcemes. 53Dor e doricipic do bajortew janim aanimceynew, aramat ipic, malaikat arkenakut atewenamcema. Or inimas omsom opoknew? 54E nat, a ow aemamesas, e Alkitab atakam jipu ara. Allah, malaikat atewenamcownew, awamces ow e Alkitab atakam jipuas bwemem asan opok.” Inim aeef.

55Yesusam atakam e ow arke asarimotawef. “Car owec parangam, warim pokam, do batew, atowotnawmokom ucimaram? Ca nat, do pok ces bwetaw ipic inim aranew? Join join dor e Allah cem aman aemapa aeof, wunam atakam amememtama aeof. Ca nat, ban do bakimop opokut aema aefenokom.” Inim aeef. 56Bare, e aemfesas takas, e Allah atakam botaw ow surat aeapomfes atakam jipu bwemas ara. Bare, e Yesus mamkawi ow takas, aramat ipic bakan ajifes. Aram omar ajisosfes.

Yesus, atakam mamsakam ow awut bipu aememef

(Mrk. 14:53-65; Luk. 22:54-55,63-71; Yoh. 18:13-14,19-24)

57Bare, e Yesus atewfes ow, aramat ipic, e Allah atakam mamtaw tugas ipic awut juwas Kayafaspu atowomosfesen. Erasan ara, e Allah atakam mamememtam owam, e ownucur owam, emcajarewsiapfesen. 58Petrusam, e Allah atakam mamtaw tugas ipic awut acemsanpu, damasan opok Yesus fa asoromefen. Aramat ipic e cem afiwef, wunam ar e Allah cem manmok batiw ow cowkon ajamemapefen. Ar ow e Yesus aemcesas baporen.

59E Allah atakam mamtaw tugas ow awutam, e atakam mamsakam ow awutam, Yesus bacatiw, inim atakam mamsakam akat arawen. Inimas ar suw atemen ow janim aanimfes. Ar e ow, “E Yesus inim pwicakas aeef,” bajitotor akat arawen. 60Suw atemen bwe ow arkeam aenawa aefesen. E nat, e atemen aefesas, Yesus bacatiwas opok. Asep ara masirin, jipic jamnuk aenawfesen. 61Aram atakam atawfes. “E Yesus atakam, ‘Dor a Allah cem bajumtiwam, bar mamincop boapomam, inim fakas awomcey ara.’ Inim aeef,” E jipic jamnuk inim aefesen.

62E Allah atakam mamtaw tugas ipic awut masirin, asitefen. Atakamam Yesus aotawefen. “Awamces ow, or salah atakam atawmes. O nat, e ow atep bajit opoknew?” Inim aeefen. 63Yesus nat, jokon cowok ajiemefen. E Allah atakam mamtaw tugas ipic awut masirin, atakam aramat ipic aotawefen. “Dor e jiwne Allah juwas ajiemamin. Inimas dor jirmec or ajirimamin. Atakam da otawcarowey. Or e Allah Aeremtewef Ipic open? Or Allah atiw open?” Inim aeefen. 64Yesus masirin, “Bare, dor e atawmem atakam jipu ara. Do nat, atakam car takas aotawmin. Wow jofay ajiwar, car e Asmat Anakat Ajaworemef Ipic, e faknakut Allah ban bo jamam bemap, aporcomokom. Caram aramat ipic, e onam op jak ton memem boney aporcomokom.” Inim aeefen. 65E Allah atakam mamtaw tugas ipic awut masirin, e apakaian akamosomefen. Atakamam atawefen. “E ipic Allah awcawor arawen. Inimas ar pwicak atakam awut atawma. Dar atemen atakam jen boji arapok. Car wow e pwicak atakam atawmaras jen ajimokom. 66Ca nat, ucim atakam asakamtiwmokom.” Inim aeefen. E ow masirin, “E ipic pwicakas aemama. Damir baafcow.” Inim aefesen.

67Bare, e ow bese aramat ipic bi ajiokopomfesen. Aram ban fon aramat ipic aemfesen. Wun ow masirin, aramat ipic ak aempofesen. 68“Or e Allah Aeremtewef Ipicut ara. Omop ca afan? Atakam otawcarowey.” Inim aefesen.

Petrus, Yesus apacinef

(Mrk. 14:66-72; Luk. 22:56-62; Yoh. 18:15-18,25-27)

69Bare, Petrus e cesen aemapefen. Kerja bwemtam cowoc masirin, aramat aenawomefen. Aram atakam aramat ipic aotawefen. “Oram e Galilea ipic juwas Yesus akac aemawirukum.” Inim aeefen. 70E Petrus nat, e ow takas bipu apacinefen. “E atakam atawmemas nomsom opok.” Inim aeefen. 71Aramat ipic masirin, e jimasappu ajarefen. Wun kerja bwemtam cowocam aramat ipic aporefen. Aram atakam erasan aememfes ow aotawefen. “Awamec ipic e Nasaret ipic juwas Yesus akac aememawiris.” Inim aeefen. 72Aramat ipic masirin, aopacinefen. “Pate opok cowok. Allah manmok tiwap. Dor e ipic nomsom opok.” Inim aeefen. 73Asep ara masirin, e erasan aememfes ow, Petrus aenawomfesen. Aram atakam aramat ipic aotawfesen. “Oram e ow ajowow ipic araman. E atawmem atakam e ow atakam cawor apormom ara.” Inim aefesen. 74Petrus masirin, “Pate opok cowok. Allah manmok tiwap. Bare, dor e Yesus nomsom opok.” Inim aeefen. Barewen. Ayam jipic asarimkoreyefen. 75Bap ara, Yesus atakam Petrus aotawefen. “Or atakam bar mamincop bap aotawescemen, ‘Dor e Yesus nomsom opok,’ inim ajiescemem. E ayam jipic masirin, atakam asep akoreyescema.” Inim aeefen. Bare, Petrus e atakam, bi binip acomomefen. Ar masirin, cesen afisef, wunam bwec awutut abwecefen.

Currently Selected:

MATIUS 26: LAICNS

Highlight

Copy