LUKAS 13

Ay bi binip bacecerem

1E jofay cowokam, ow, atakam, Yesus aotawfesen. “Galilea ow, pok, Allah acatitamfes ara, Pilatus, e ow acatiwef.” Inim aefesen. 2Yesus masirin, “E cabi binip nat, ‘E Galilea ow, dosa awut ara, wunam e wun Galilea ow dosa awut opok. Inimas e ow inim ajurusemfes.’ Car inim bi binip aceceremamokom aranew? 3Jakaperey. Inimas opok. Car dosa bak bapayem opok aemcokom, bare caram takas inim cowok ajurusemcomokom. 4Wunam, e Siloam opnakut cem aneyjuamesef, ow delapan belas ajiwar aneykomtiwtotorefen. E cabi binip nat, ‘E ow salah awut ara, wunam e wun Yerusalem ow salah awut opok.’ Car inim bi binip aceceremamokom aranew? 5Jakaperey. Inimas opok. Car dosa bak bapayem opok aemcokom, bare caram takas inim cowok ajurusemcomokom.” Yesus inim aeefen.

Os, anakat bape opok baposomtew atakam

6Yesus masirin, inim baposomtew atakam atawef. “Jipic cowok os juwas ‘arā’ aomomefen. E arā os e aranggur kebun wowoc aememefen. Jofay ara, aramat ipic e arā os, anakat epen basupor aapenefen. E arā os nat, anakat opok cowok aporefen. 7Aramat ipic masirin atakam, e anggur kebun kerja bwemtam ipic, aotawefen. ‘Jakaperey. Tahun mamincop ajiwar, dor a arā os, anakat epen basupor, aenawa aeof. E nat, anakat opok cowok apora aeof. E os nat, ucim desen bakamjirimemaram? Bare bamatiwey.’ Inim aeefen. 8E kebun kerja bwemtam ipic nat, ‘Tuan. E os, awap tahunnakapam, inim batakamememerec. Dor e ospu jif batakamnanasimtiw. Doram, e os baworom pok, e os bopanpu batakamtatiw. 9E aenawcow tahun, anakat apetepcow, bare akat ara. E nat, anakat bapetep opok aemcow, bamatiwces.’ Inim aeefen.” Yesus inim baposomtew atakam atawefen.

Yesus, asan pwicak cowoc, Ses Ban Jo ajaworomtewef

10Barewen. Ses Ban Jo ara, Yesus sembahyang cem aman atakam amememtamefen. 11Erasan ara, cowoc cowok aemapefen. Dat e cowoc tahun delapan belas ajiwar aomomawirien. E datam e cowoc asan pwicak aemapomawirien. Inimas ar ase sayit ara. Ar emtow bwemsitem asan opok. 12Bare, Yesus e cowoc aporefen. Aram e cowoc ajateefen. Ajateef masirin, atakam aotawefen. “Or asan pwicak boemap opok.” Inim aeefen. 13Aramat ipicam ban e cowoc dam ton atatiwefen. E cowoc masirin, emtow asarimsitemefen. Aram Allah asicimefen. 14E sembahyang cem kepala ipic nat, jak amop apwimemefen. Ar e Yesus e asan pwicak cowoc, Ses Ban Jo, dam ajaworomtewef aporefen. Aram atakam erasan aememfes ow arke aotawefen. “Kerja jo, bare enam ajiwar ara. Car e jo enam ajiwar, dam bawor, mamenewey. Ca nat, Ses Ban Jo dam bawor bwenaw arapok.” Inim aeefen. 15Tuhan masirin, atakam e ipic aotawefen. “Car pir bwe ow ara! Ses Ban Jo ara, car takas, e casapinew, e cakeledainew, e cum pok asusurumtotorcomokom. Caram e binatang cesen atowomiscomokom. Aram bwi ban atowoneycomokom. 16Awamec cowoc, bare Abraham urpis ara. Iblis nat, a cowoc tahun delapan belas ajiwar acajikapawiri. Bare, dor a cowoc Ses Ban Jo asurumtamamin araman.” Inim aeefen. 17Inim atakam atawef ara, e atakam aamtawfes ow takas, namke akayemfesen. Bare, ow takasam e Yesus akatnakut aemefas aporfes, wunam jak akat aememfesen.

Sesawi eke baposomtew atakam

(Mat. 13:31-32; Mrk. 4:30-32)

18Aramat ipic masirin, atakam aotawefen. “Allah Pemerintah ucimas awcaworaram? Dor e Allah Pemerintah awcaworas, ucim atakam otawcey? 19Ar eke kanimnakap awcawor ara. Jipic cowok e eke atewcow, wunam e akebun atewapomcow, bare akan ajitcema. Aram os kari inim aememcema. Sokam co e pom aecemes.” Inim aeefen.

Bibit roti baposomtew atakam

(Mat. 13:33)

20Aramat ipic masirin, atakam aotawefen. “Dor e Allah Pemerintah awcaworas, ucim inimas aoemcey. 21Ar bibit roti awcawor ara. Cowoc cowok e bibit roti atewefen. Aram tepung awut atwefen. Ar masirin, e bibit rotiam e tepungam aartamtiwefen. Inimas e tepung takas apepeefen.” Yesus inim aeefen.

E sat jimasap

(Mat. 7:13-14,21-23)

22Barewen. Yesus Yerusalem bin ajiemefen. Aram e bowsec kotain kotain ajarema aeefen. Aram samatin samatin cemsan ajarema aeefen. Ar e ow atakam amememtama aeefen. 23Jipic cowokam jonow e aramat ipic atowporefen. “Tuhan. E ajoremces ow, arke open?” Inim aeefen. E aramat ipic masirin, atakam e ow aotawefen. 24“E sat jimasap bafiw, jec awut awuey. Bare, caram e doratakam jen pajiey. Ow arke e jimasap bafiw empormes opok. 25Cem aramat ipic asitcow, wunam e jimasap akapimapomcow, car e cesen aememcomokom. Caram e jimasap akakajumcomokom, wunam atakam aotawcomokom. ‘Tuhan. E jimasap da payimtamcarowey.’ Inim aecomokom. Aramat ipic nat, atep ajitceman. ‘Car nomsom opok. Car ocenak asan ewenawmokom?’ Inim aeceman. 26Car masirin, ‘Dar amosam, bwiam, or akac emeanfom. Oram atakam e dacapinmi ememememtamfem.’ Inim aecomokom. 27Aramat ipic nat, atakam car aotawceman. ‘Car nomsom opok. Car dosa bwemawar ow ara. Caram a do awamcey asan memem arapok. Caram baysosey.’ Inim aeceman. 28Erasan ara, car Abrahamam, Ishakam, Yakubam, e Allah atakam botaw ow takasam, e Allah Pemerintah Asan bemap aporcomokom. E nat, Allah car e cesen ajiwisimcema. Inimas aporcokom, car bwec abweccomokom. Caram dam jen ajicomokom. 29Ow, e capinmiin capinmiin ewinawcemes. Aram e Allah Pemerintah Asan, amos memen aneypwikapcemes. 30Jakaperey. Wun kanim ow, ow awut aoememcemes. Wun awut owam, kanim ow aoememcemes.” Yesus inim aeefen.

Yesus e Yerusalem ow aemawirias, jak pwicak aememef

(Mat. 23:37-39)

31Barewen. E jofay cowok ara, Parisi ow, Yesuspu aenawfes, wunam atakam, aramat ipic aotawfesen. “Or wun asan baysosey. Arasan memem arapok. Herodes, or bacatiwen.” Inim aefesen. 32Yesus masirin, atakam e ow aotawefen. “Car e Herodespu mamjisosey. Car doratakam e tot bot ipic mamotawtamcan. ‘E Yesus atakam, “Dor wowam, toam, ow jak aman dat aotewerisimamin. Doram dam ow ajaworomtawmin. Jowon ara masirin, e dokerjaas aemtiwkurumcimin.” Inim aeor.’ Inim atakam e aramat ipic mamotawtamcan. 33E nat, dor wowam, toam, jowonam, aojisoscimin. Ow, Allah atakam botaw ipic wun asan bacatiw arapok. E Yerusalem cowok ara.”

34“Yerusalem owa. Allah e aratakam botaw ow car atawenama aema. Ca nat, e ow acatiwa aemokom. Caram ek e ow dampu ajimira aemokom. Ayam arwas e ajiwi e kep atawanimapomcema. Doram bar arke e catiperes inim cimin batawanimapom jak aseremema aeof. Car ara masirin, inimas pwicak aemfokom. 35Jakaperey. Allah e carasan bakan ajicema. Asep jofay car atakam aotawcomokom. ‘Tuhan, asan akat, e atewnamamar ipic baomcow!’ Inim aecomokom. Ca nat e jofay ajiwar e dobi bopor opok aemcomokom.” Yesus inim aeefen.

Currently Selected:

LUKAS 13: LAICNS

Highlight

Copy