LUKAS 14

Yesus, dam sisipi ipic, Ses Ban Jo ajaworomtewef

1Barewen. Ses Ban Jo ara, Yesus, Parisi kepala ipic cowok acem, amos akac memen, ajisosefen. E erasan aemapfes ow, manmok Yesus asirimopfesen. 2Bare, dam sisipi ipic e Yesus abipu aememefen. 3Yesusam jonow e Allah Jirmec mamememtam owam, e Parisi owam, atowporefen. “Ses Ban Jo, asan pwicak ow dam baworomtam, e Allah Jirmec bopowas aranew? Opoknew?” Inim aeefen. 4E ow nat, jokon cowok ajiapfesen. Yesus masirin, e dam sisipi ipic ban ajimomefen. Aram e ipic ajaworomtewefen. 5Yesus masirin, atakam e ow aotawefen. “Car takas, e catiperesnew, e casapinew, Ses Ban Jo, sumur bwi deyjusecesnew, bare car ar asarimjimtewcomokom araman.” Inim aeefen. 6E ow nat, aratakam atep bwemjit asan opok arawen.

Jaki ow aturan akat

7Yesusam, e jaki ow aporefen. Inimas ar baposomtew atakam e ow aotawefen. 8“Ow car ower bajuwamat pokbwi akac memen ajatecan, car e ow awut asan bemap arapok. E ajatefan ipic wun ow awut ajateef openow. Car masirin, ow kanim inim ara openow. 9E car ajatefan ipic, e cabipu bwenawasin. ‘Or basitey. Awamec ipic arasan baemapcow.’ Ar inim atakam car botawasin. Inim atakam car aotawcan, car e pwicak asan aemapcomokom. Wunam namke akayapcomokom. 10E nat, ow car pokbwi akac memen ajatecan, e pwicak asan emapey. E cem aramat ipic masirin, atakam car botaw aenawomceman openow. ‘Aya. E ow awut asan emapey.’ ” Inim aeceman openow. Inimas ar car e wun jaki ow takas bipu asicimceman. 11“Allah e arma batawsicim ow namke akamemcema. E nat, ar e arma batawsicim opok ow asicimcema.” Yesus inim aeefen. 12Yesusam atakam e amos akac memen ajateef ipic aotawefen. “Or jok pokbwi aemcemnew, iram pokbwi aemcemnew, e ojowow bayte arapok. E orepcewesam, orewcewesam, orowcamwe owam, bayte arapok. E ocem sotop wun ow, pok awut ow ara openow. E owam bayte arapok. E ow or pomatam bojateasin. 13Or pokbwi aemcem, e pok opok owam, e japow owam, e ci ci ajijarmes owam, e manmok kapi owam, mamjateey. 14E ow or pomatam bwemem asan opok. Inimas or asan akat aemapcemem. Ow tarowat aojaworsitces jofay, Allah or pomatam aemceman.”

Pokbwi awut baposomtew atakam

(Mat. 22:1-10)

15E amos akac aemenef ipic cowok e atakam jen ajief ara, ar atakam Yesus aotawefen. “E Allah Pemerintah Asan amos aances ow, bare asan akat ara.” Inim aeefen. 16Yesus nat, atakam e ipic aotawefen. “Jofay ara, jipic cowok, pokbwi awutut aemefen. Aram ow arke ajateefen. 17E pokbwi sotopnakap aporef ara, ar e akerja bwemtam ipic, e ajateef ow atakam botawtam, atewosomefen. ‘Caram dey. Pokbwi pok emcafafaykurumapomorom, inim eey.’ Inim aeefen. 18E ajateef ow takas nat, pir aomtotorfesen. E bap ipic, atakam e kerja bwemtam ipic aotawefen. ‘Dor capinmi jititof. Dor e capinmi basupor baysos aemin. Dor e pokbwi bwenaw opok arew. Inim mamotawey.’ Inim aeefen. 19E wun ajateef ipicam atakam aotawefen. ‘Dor sapi sepuluh ajiwar jititof. Dor e sapi boworpor aemin. Dor bwenaw opok arew. Inim mamotawey.’ Inim aeefen. 20E wun ajateef ipicam atakam aotawefen. ‘Dor petew jepen ajiwemamin. Inimas dor bwemenaw asan opok.’ Inim aeefen. 21E kerja bwemtam ipic masirin, aofasiefen. Aram inim atakam e kerja aramat ipic aotawefen. E cem aramat ipic masirin, jak amop apwiapefen. Aram atakam e akerja bwemtam ipic aotawefen. ‘Or awames kota e bokot jof awut takasam, e bokot jof kanim takasam, jisosey, wunam e pok opok owam, e japow owam, e manmok kapi owam, e ci ci ajijarmes owam, arasan towotnawey.’ Inim aeefen. 22E kerja bwemtam ipic aofasief, wunam atakam aotawefen. ‘Tuan. E ataweremas, bare emcaemey. E nat, e ocem, asan fi awames.’ Inim aeefen. 23E cem aramat ipic masirin, atakam, e kerja bwemtam ipic aotawefen. Oram cey. E kota cesen bokot jofam, e wasan bokot jofam, baysosey. Erasan ow, e docem bafiw, atakam fak botawey. Dor e docem, ow imwinakap bapitiap akat ara. 24Or e doratakam jen pajiey. E bap ajateof ow, e dopokbwi pok memen opok cowok aemcemes. Inim aeefen.” Yesus inim baposomtew atakam aotawefen.

Yesus mamkawi ow memem

(Mat. 10:37-38)

25Barewen. Ow arkenakut e Yesus akac ajarfesen. Aramat ipicam e ow, bin ajiromef, wunam atakam aotawefen. 26“Jipic cowok do mamkawi akat aporcow, aram damos awutnakut bajiomcan. Ar dor aenawomcannew, e nat, ar e aricipicam, e arosowocam, e aremam, e atiperesam, e arepcewesam, e arewcewesam, e atarsepesam, damos kanim inim opok ajiomcownew, bare ar domamkawi ipic bwememem asan opok. Wunam damos arma kanim inim opok aemcow, ar domamkawi ipic, bwememem asan opok. 27Ow arop salib batawtotor opok aemces, wunam dor mamkawi opok aemces, bare ar domamkawi ow bwememem asan opok. 28Bare, car cem awut bweapom aememcokom, car atakamneypwikapcomokom, wunam e cem bweapomkurum pok baytit uang, arke epen atakamporcomokom. 29Car inimas opok aemcokom, wunam e cem fasis ajijirimnemkurumcokom, car e cem bwemeapom asan opok arew. Eras aporces ow masirin, car uc asawuomceman. 30Aram atakam aotawcemes. ‘Ewamec ipic cem fasis emejijirimapomef. E nat, ar e cem bwemeapomkurum asan opok.’ Inim aecemes. 31Wunam raja ipic, wun raja ipic owec bamo ememcow, ar atakamneypwikapcema, wunam bi binip aceceremcema. E atentara ow sepuluh ribu ajiwar ara. E owec bamo enawcow raja ipic atentara ow nat, dua puluh ribu ajiwar ara. Inimas aporcow, ar bi binip aceceremcema. ‘Dor e raja bakumimosom aranew? Opoknew?’ Inim bi binip atakamceceremcema. 32Opok aporcow, ar e wun raja damasan opok aporcow, ar atakam botawpor ow e rajapu atewosomcema. ‘Dor pay bwe akat ara. Dor ucim pok o tetamcey?’ Inim aecema. 33Inimasam ara, ow e aras takas bakan bajios opok aemces, ar domamkawi ow bwememem asan opok.”

Jema opok garam

(Mat. 5:13; Mrk. 9:50)

34“Garam bare akat ara. E nat, garam jema opok aemamescow, ow e garam jemaas bwemokenemapom asan opok. 35E pwicak garam, bare pok akan baworomas opok. Aram e wun pok akan baworom pok bartamas opok. Ow e garam ajiwosomcemes. Bare, jen fo ow a atakam jen bajices.” Yesus inim aeefen.

Currently Selected:

LUKAS 14: LAICNS

Highlight

Copy