LUKAS 12

Pir bwe ow

(Mat. 10:26-27)

1Eras aemfes ara, ow arkenakut ajarewsiemfesen. Aram bwey aramaman aamjipipiremfesen. Yesusam atakam e amamkawi ow, bap aotawefen. “Car e Parisi ow e abibit roti pimicima. E ow e pir aemesas, bare bibit roti inim awcawor ara. 2Bare, ow e bapwirimtiwas takas umuton aoporcemes. Owam e curuw atakam takas jen ajikurumcemes. 3Ar e jiwic aman atawfokom atakam, jokam jen aojicemes. Owam, e kamar aman atawfokom curuw atakam, e ajarewsiapcemes ow bipu atakam aofakaytawcemes.”

Omar

(Mat. 10:28-31)

4“Awapokom owa. Jakaperey. Asmat ow, ow acatiwcemes. E nat, ar ow acatiwces, ar e ow bwemojurusum asan opok. Bare, car asmat ow omar arapok. 5Do nat, e car omar bwe ipic atakam car aotawmin. E ipic ow acatiwcow, ar e ow neraka aman biwim fakas epcom. Atakamnak car aotawmin. E ipic omar mameey. 6Ow sok kanim lima ajiwar, uang sen jamnuknakas ajititcemes. Allah nat, e sok takas binip manim opok cowok aemcema. 7Allah, e cakus fin aporsipor amsom. Inimas ara, car omar arapok. Car penting ara. E sok arke nat, penting opok.”

Yesus atakam, ow bipu botaw

(Mat. 10:32-33, 12:32, 10:19-20)

8“Jakaperey. Ow e wun ow bipu atakam aotawcesnew, ‘Dor Yesus mamkawi,’ inim aecesnew, bare e Asmat Anakat Ajaworemef Ipic, Allah amalaikat bipu atakam aotawcema. ‘A ow doras ara,’ inim aecema. 9E nat, ow e wun ow bipu atakam aotawcesnew, ‘E Yesus nomsom opok,’ inim aecesnew, bare doram Allah amalaikat bipu atakam aotawcimin, ‘A ow doras opok,’ inim aecimin. 10Ow, e Asmat Anakat Ajaworemef Ipic atakam aotawces, Allah e dosa akokoromosomcema. E nat, ow cemew atakam Roh Kudus aotawces, bare Allah e dosa bakokoromosom opokut aemcema. 11Ow, car sembahyang cem aman atakam mamsakamtiw ow bipunew, kepala kanim ow bipunew, kepala awut ow bipunew, ajijimtawcan, e atep ajitcokomas, bi binip jirow arapok. E atakam atawcokomasam, bi binip jirow arapok. 12E Roh Kudus, bare e jofay cowok, e atakam atawcokomas, bi binip car atetamceman.” Yesus inim aeefen.

Pok awut ipic jenkor aememef

13Barewen. E ow arke aman, jipic cowok, atakam, Yesus aotawefen. “Guru. E dorepwec, e daricipic damir aafef bakan ajiamesef pok, sey do baseyetam, jirmec bajirimey.” Inim aeefen. 14Yesus nat, atakam e ipic, aotawefen. “Dor e ca salah atakam basakamtiw ipicnew, e capok baseye ipicnew, catewemfan?” Inim aeefen. 15Yesus masirin, atakam e ow aotawefen. “Pimicima. Pok sinomcokom. Pok awut momom, bare e pok aramat ipic ow jiwne batamemawaras opok.” Inim aeefen. 16Bare, aramat ipic baposomtew atakam e ow aotawefen. “Jipic cowok pok arkeen. Aram e akebun pok awutnakuten. 17Aramat ipic masirin, bi binipin aceceremefen. ‘Dor ucim pok emcey? E dokebun pok batewapom cem, bare awut opok.’ Inim bi binip aceceremefen. 18Aramat ipic masirin, atakam aotawefen. ‘Dor e dopok batewapom cem takas ajumtiwcimin. Dor masirin cem awut arke aoeapomcimin. Bare, dor e dogandum eke takasam, e dopokam, e cem aman atawapomcimin. 19Eras aemkurumcey masirin, dor e dojak aman atakam aotawcimin. “Dor pok arke ara. E pok tahuniwin aatamomopawarcimin. Bare, dor ses bapnawar aemin. Dor amos pokam, bwiam, desen bapnawar aemin. Doram jak akat emapawarmin.” Inim aecimin.’ E ipic inim aeefen. 20Allah nat, atakam e ipic aotawefen. ‘Or bi binip opok ipic. Wow iram ara, or damir aafcemem. E akenemawirim pok, ca tewetces?’ Inim aeefen. 21Bare, wun ow e arop pok apotomapomcemes. E nat, ar Allah e akat apormaras bapotomapom opok. Inim ow, e baposomtew atakam atawminas awcawor aemcemes.” Yesus inim aeefen.

Allah jirey bwe

(Mat. 6:25-34)

22Yesus masirin, atakam e amamkawi ow aotawefen. “Inimas ara, caram jakaperey. E aancokom amos pok, car tetakay mememas ara. E nat, e aancokomas, bi binip jirow arapok. Caram e cadam ajimomcokom pakaian, bi binip jirow arapok.

23Tetakay memem, bare penting awut ara. Amos pok nat, penting awut opok. Asmat dam penting awut ara. Pakaian nat, penting awut opok. 24E sok juwas onok manmok tiwporey. Ar pok akan batewapom opok. Aram amos bajow opok. Ar gudangnew, wun pok cemnew, bare opok. Allah nat, pok e sok atatamama. Bare, car penting awutut ara. E sok nat, penting awut opok. 25Ow, pok bi binip jirow aceceremcesnew, aram e adamir aafces jofay, bar cowoknakapam bwemotasimenem asan opok. 26Car e kanimnakapas bwemem asan opok apormokomnew, car e wunas ucim bi binip jirow aceceremamokom? 27Caram e tawar esakam manmok batiwporey. Ar kerja opok. Aram pakaian bakekem opok. Ca nat, jakaperey. Raja Salomo, bare akatnakut aememefen. Aramat ipic nat, pakaian e tawar esakam inim akatipic, bajimom opok cowok arawen. 28Bare, e wasan pok, won awamces. Asep jofay masirin, ow e pok jis afamtiwcemes. Allah nat, e pok akatipic aemapomef. Bare, aramat ipic pakaian car atetamceman araman— e ca basicimkurum opok owam ara. 29Caram e aancokomas bi binip awut arapok. Caram eras jak pwicak arapok. 30E Allah amsom opok ow takas, eras bi binip awut aceceremames. E nat, caricipic e aancokomas takasam, e ajimomcokom pakaian takasam, bare amsom ara. 31Ca nat, e Allah Pemerintah bi binip awut baceceremey. Allah masirin, e wunas takas car atetamceman.”

Pok anakat

(Mat. 6:19-21)

32E dor ajamkawimenokom ow mamincopa. Omar arapok. Caricipic e aPemerintah Asan akatas, ca batetam akat arawen. 33Car e capok, uang buwumtewetey. Car e uang masirin, e asan pwicak ow mamtetamey. Caram carop jiwne epcom uang ese inim cimin basitotorey. E capok anakat, e onam op cem tawapomattotorey. E pok bwemajimkurum asan opok. Osom owam e pok sotop bwemmesem asan opok. 34Bare, car e capok asan bemap, jak aseremapmokom.

Manmok mamsirimapawarey

35“Caram manmok cowok inim mamsirimapawarey. E capakaianam inim mamomopawarey. E capelitaam inim batereyapawarces. 36Caram kerja bwemtam ow inim cimin aatamemawarey. E kerja bwemtam ow akerja aramat ipic owersey pokbwi cem ajisosefen. E ow, e aramat ipic bafasi manmok asirimapfesen. Aram afasicow, wunam e jimasap kay kay emcow, e ow masirin, e jimasap asarimpajimtewtamcemes. 37E aramat ipic afasicow, wunam akerja bwemtam ow a manmok basirimap aporcow, bare e ow kerja bwemtam ow asan akat aemapcemes. Atakamnak ara, e aramat ipic, pok batowomattam ipic inim pakaian ajimomcema. Aram e ow amos memen cenes bemap atakam aotawcema. Ar masirin, amos pok e ow atowomattamcema. 38E kerja aramat ipic iramnaknew, iram faknew, inim aenawcow, wunam e akerja bwemtam ow manmok basirimap aporcow, bare e ow asan akat ara. 39Jakaperey. Cem aramat ipic e osom ipic aenawef jam amsom ayaw, aram manmok atiwapef. E osom ipic, e cem jiwi bajumtewasin. 40Caram manmok inim sirimapey. Car, ‘E Asmat Anakat Ajaworemef Ipic wow bwenaw opok,’ inim bi binip aceceremcokom jofay, bare e jofay aramat ipic aenawcema.” Yesus inim aeefen.

Kerja bwemtam ow

(Mat. 24:45-51)

41Petrus masirin, “Tuhan. E atawmem baposomtew atakam, daras cowok aranew? Ow takas arasnew?” Inim aeefen. 42E Tuhan masirin, “E anakat kerja bwemtam ipicam, e bi binip epcom kerja bwemtam ipicam, ucim ipicam? E akerja aramat ipic, e ipic, e acem mandor ipic atewemcema. E wun kerja bwemtam ow, amos memen aemapa aeces, e ipicam, amos pok, e ow aseyetama aecema. 43E kerja aramat ipic aenawcow, wunam e akerja bwemtam ipic inimas bwem aporcow, bare e kerja bwemtam ipic asan akat aemapcema. 44Atakamnak ara, e kerja aramat ipic, e ipic, e apok takas manmok batiw atewemcema. 45E nat, e kerja bwemtam ipic bi binip aceceremcow, ‘E dokerja aramat ipic basarimenaw opok,’ inim bi binip aceceremcow, wunam ar e wun kerja bwemtam owam, kerja bwemtam cepesam, omop aafcow, wunam pok paknam aancow, wunam jokmen bwi jayic ememcow, 46bare, e jofay e kerja aramat ipic aofasicema. E kerja bwemtam ipicam bi binip aceceremcema. ‘E kerja aramat ipic wow bofasi opok openow.’ Inim aecema. E nat, e jofay cowok e kerja aramat ipic aofasicema. Aram e kerja bwemtam ipic acatiwcema. Aram e ipic e Allah basicim opok ow asan atewapomcema. 47Kerja bwemtam ipic, e kerja aramat ipic atakam jen desen ajicow, wunam ar e pok bakenem opokam, e atakam ji bwe opokam, inim aemcow, bare e kerja aramat ipic e ipic omop awutut aafcema. 48E nat, e kerja aramat ipic atakam amsom opok ipic, omop bafas aemcow, bare e kerja aramat ipic, e ipic omop kanim aafcema. Allah, awutas, wun ow atetamama. Bare, aram awutas, janim e ow aoanimama. Allaham manmok batiwas awut wun ow atetamama. Bare, aram eras manmok batiw anakat janim aanimama.”

A capinmi, ow damos mamjiom capinmi opok

(Mat. 10:34-36)

49“Dor a capinmi sos bafamtiw aneyof. E jismak emcaurumef ayaw, bare dor jak akat ara. 50Ow dor ajurusumcemenes. E eras aemcenes jofay ajiwar, dor jak pwicaknakut aememcimin. 51Caram, ‘E Yesus, a capinmi, ow damos mamjiom capinmi bemapom aneyef,’ inim bi binip aceceremamokom openow. Do nat, inimas bwem baney opok. Dor a capinmi, ow atakam mamtaw capinmi, aemapomamin. 52Wow jofay ajiwar emamesor, cem cowok, ow lima ajiwar atakam aamtawcemes. Ow mamincop, e juw jamnuk aoamtawcemes. E juw jamnukam, e ow mamincop aoamtawcemes. 53Aricipicam e atiw aoamtawcema. E atiwam e aricipic aoamtawcema. Arosowocam e apores aoamtawcema. E aporesam e arosowoc aoamtawcema. Asokam e anin aoamtawcema. E aninam e asok aoamtawcema.” Yesus inim aeefen.

E Allah wow aemamesas bi binip bacecerem

(Mat. 16:2-3)

54Barewen. Yesus atakam e ow arke aootawefen. “Car e jo basapiney asan, jak bwenaw aporcokom, car, ‘Te aneycema,’ inim aecomokom. Bare, aram eras aemcema. 55Wunam, car fo e selatan ewfwimenawcow aporcokom, ‘Wow jo amop demawarcema,’ inim aecomokom. Bare, aram eras aemcema. 56Car bare, pir bwe ow ara. Car a capinmiasam, e onam opasam, camsom ara. Ca nat, e Allah wow aemamaras camsom opok, ucimaram?”

Ow damos mamempor

(Mat. 5:25-26)

57“Caram akatas bwem, atakam carma basakamtiw opok, ucimaram? 58Ow atakam car aporsipor aotawcan, ‘Or inim salah aemfan,’ inim aecannew, wunam ar car pemerintah bipu atowomoscannew, bare car e bowsec e ow damos mamemporey. E ow, car, salah atakam basakamtiw ipic bipu ban bacajimtewasin. E salah atakam basakamtiw ipicam car e polisi ow botasimemtamasin. E polisi owam car e penjara cem bafimimasin. 59Bare, car e penjara cem aman aemapawarcomokom— e pok abwitamkurumcokom jofay ajiwar ara.” Yesus inim aeefen.

Currently Selected:

LUKAS 12: LAICNS

Highlight

Copy