LUKAS 11

Janim Allah manim

(Mat. 6:9-13, 7:7-11)

1Barewen. Jofay ara, Yesus, wun asan aememefen. Aram janim Allah aanimefen. Janim manim akariemef masirin, e amamkawi ipic cowok atakam aotawefen. “Tuhan. Janim, Allah, manim, mamememtamcarowey— Yohanes e amamkawi ow amememtamef inim cimina.” Inim aeefen. 2Aramat ipic masirin, atakam e ow aotawefen. “Car janim Allah aanimcokom, inim atakam mamotawey:

‘Diwi. Ow, e ojuwas akatnakut baporcenes. E oPemerintah baenawcow.

3E jo atamfafaycow, e dajak banapitapas amos mamtetamcarowey.

4Dar, ow e aomforowos pwicakas, binip ajiwosomamom. Inimas ara, oram e dadosa, binip biwosomey.

Or, Iblis dar dosa bwem bacajijimtawpor, batetam arapok.’ Inim janim mamanimey.”

Yesus inim aeefen. 5Aramat ipicam atakam e ow aotawefen. “Car wun ipic cowok iramnak e ajowow ipic cem ajisoscow, wunam inim atakam aotawcow, ‘Ay. Amos bokor mamincop tetamcan. 6Dojowow ipic a bowsec aamsesma. Ar e docem aemapma. Do nat, a batetam amos, bare opok cowok,’ inim aecow, 7e amos aramat ipic atakam e ipic aotawcema. ‘Or do bajurusum arapok. Jimasap emcakapimey. Doram, dotiperesam, bare isi. Do nat, basit opok. Dor pok or bwemtetam asan opok.’ Inim aecema. 8Jakaperey. Aramat ipic, e pok janim manim ipic, ajowow ipic aporcema. E nat, aram basit wunam e ipic pok batetam, bare opok ara. E nat, e aramat ipic, e ipic janim bar arke manim aporcema. Inimas ar e janim aanimcowas takas atetamcema. 9Jakaperey. Janim mamanimey. Allah masirin, e janim aanimcokomas aemtamceman. Eras mampowporey. Car masirin, e apowporcokomas atewcomokom. Jimasap mamkakajumey. Allah masirin, e jimasap car apayimtamcema. 10E janim aanimames ow takas, e janim aanimamesas atewmes. E apowpormes ow, e apowpormesas atewmes. Allah, e jimasap bakakajum ow, e jimasap apayimtamama. 11Car jiwi epcom ow, e cajiwi amos janim car aanimcannew, car ek e jiwi batetam open? Ar enam janim car aanimcannew, car amer e jiwi batetam open? 12Ar ayam ok janim aanimcannew, car anokos e jiwi batetam open? 13Bare, car takas dosa ow ara. Ca nat, e catiperes akat pok batetam camsom. Bare, caricipic onam op awap. Aramat ipicam, e Roh Kudus, e janim aanimces ow, atetamcema araman.” Yesus inim aeefen.

Beelsebul atakam

(Mat. 13:22-30; Mrk. 3:20-27)

14Barewen. Okor dat, jipic cowok jak aman aemapawirien. Inimas e ipic okor ipic aememawirien. Jofay ara, Yesus e dat e ipic jak aman aotewerisimefen. E dat e ipic jak aman ewfisef, e ipic atakam aotawefen. E ow arke inimas aporfes, aram junum awut aefesen. 15Wun ow nat, atakam aotawfesen. “E Beelsebul, dat takas akepala ipic ara. E Beelsebul, e fakas ewamec ipic atetamama. Inimas e ipic dat aotewerisimama.” Inim aefesen. 16Wun ow masirin, aramat ipic faknak epen bwempor aemfesen. Inimas ar aramat ipic, onam op junum bweas, a baporomtam janim fak aanimfesen. 17Aramat ipic nat, e ow bi binip amsomen. Inimas ar atakam e ow aotawefen. “Samat cowok aramaman owen aamoces, aram aanioscemes. Cem owam araman owen aamoces, aram apacayoscemes. 18Car atakam atawmokom, ‘Beelsebul e fakas ewamec ipic atetamama. Inimas e ipic dat aotewerisimama.’ Inim aemokom. E nat, Iblis, e atiperes aotewerisimcownew, bare aramaman owen aamocemes. Inimas e Iblisam, ajowowam, apacayoscemes. 19Car atakam, ‘E Beelsebul e fakas ewamec ipic atetamama. Inimas ar dat aotewerisimama.’ Inim aemokom. E nat, e camamkawi ow e dat aotewerisimcemes. E dat botewerisim fakas e ow ca tetamama? Bare, e camamkawi ow e atawmokom atakam, atakamnak opok aporomtamcemes. 20Do nat, e Allah fakas epcom, dat aotewerisimaminnew, bare Allah Pemerintah carasan emcaenawor.”

21“Fak ipic, foro pok takasnakut omomcow, wunam e arop cem, manmok atiwcow, bare e apok takas asan akat aemapcemes. 22E nat, faknakut ipic, e ipic owen aamocow, wunam ar e ipic akumimosomcow, aram e ipic jirey aeef foro pok takas atewcema. Aram e ipic pok ces aetewcema, wunam e pok takas, wun ow aseyetamcema.”

23“E do mamkawi opok ow, doratakam aopowmes. Ow kawey ow dor mamkawi mamememtam opok aeces, ar e kawey ow apacamosomcemes.”

Dat, asmat ipic jak aman bofiwap

(Mat. 12:43-45)

24“Dat, ow jak aman afiscow, e wasan acowojarcema. Ar ses ban apowcema. Ar e ses ban asan baporomtew opok emcow, ar atakam aotawcema. ‘Dor e afisof cem aofiwapcimin.’ Inim aecema. 25Erasan aofasicow, ar e jak aman afisef ipic, cem inim awcawor aporcema. Ow e cem aman awaramtiwfes. Aram e cem pok takas atawkenemapomfes. 26E dat masirin, aojisoscema, wunam wun dat tujuh ajiwar ametemtowotnawcema. E dat tujuh ajiwar, bare jokmen awutut ara. E bap dat, bare jokmen awut apok. Bare e dat takas, e ipic jak aman afiwcemes. Aram erasan aemapcemes. E ipic masirin, asan pwicaknakut aememcema. Bap ara, asan pwicak kanim pwiciri aemapawiri.” Yesus inim aeefen.

Asan akat ow

27Yesus inim atakam atawef ara, cowoc cowok, e ow arke aman, atakam aotawefen. “E or ajispetiwfan wunam aw anamfan cowoc, bare asan akat ara!” Inim aeefen. 28Yesus nat, atakam aotawefen. “E asan akatnakut ow, bare e Allah atakam jen ajimes wunam ji aemes ow ara!” Inim aeefen.

Junum bweas bapor janim manim arapok

(Mat. 12:38-42)

29Barewen. E ow arke, Yesus dam sotopnakap aememfes ara, aramat ipic, atakam aotawefen. “A awaniemames ow, bare fasi ow ara. Ar junum bweas bapor, janim aanimames. Allah nat, wun junum bweas, awapes ow baporomtam opok aemcema. Ar e Yunus aemefas, inim cimin junum bweas cowok aporomtamcema. 30Allah e Yunus e Niniwe baysos jirmec ajirimefen. E Yunus aemefas, junum bweas arawen. E junum bweas, Allah e Yunus jirmec ajirimefas, e Niniwe ow inim baporomtamas arawen. Bare, e Asmat Anakat Ajaworemef Ipic, e Yunus aemefas, inim cimin aemcema. 31Wunam, selatan capinmi raja cowoc, e Solomo bi binip umuton atakam jen baji, e dawon opokut capinmi ewenawefen. E Solomo, bare kanim ara. Arasan nat, awutnak ipic awamec. Inimas ara, Allah e awaniemames ow adosa atakam basakamtiw jofay aenawcow, e cowocam asitcema, wunam awapes ow, ow fasi ara, inim atakam atawcema. 32E Niniwe owam, e Yunus e acacapiomefas jen ajifes, wunam e dosa bak apayemfesen. E Yunus bare kanim ara. Arasan nat, awutnak ipic awamec. Inimas ara, Allah e awaniemames ow adosa atakam basakamtiw jofay aenawcow, e Niniwe owam asitcemes, wunam awapes ow, ow fasi ara, inim atakam atawcemes.”

Pelita

(Mat. 5:15, 6:22-23)

33“Ow pelita ateremapomces, ar e pelita cem camannew, ember amannew, bwemtewapom asan opok. E nat, ar e pelita meja ton atewapomcemes. Inimas e cem afiwces ow, e sereas aporcemes. 34E camanmok nat, e cadam apelita inim cimin ara. E camanmok akat aranew, bare e cabi binipam takas sere ara. E nat, e camanmok pwicak aranew, bare e cabi binipam takas jiwic ara. 35Bare, caram pimicima. E sereas, jiwic boemasin. 36E cadam takas sere aranew, wunam jiwic opok cowoknew, bare sere anakat aemcema. Ar, pelita, car aseremtiwceman inim cimin ara.” Yesus inim aeefen.

Yesus e Parisi owam, e Allah Jirmec mamememtam owam, asalah, atakam aotawef

(Mat. 23:1-36; Mrk. 12:38-40)

37Yesus, inim atakam aotawkurumef masirin, Parisi ipic, atakam e aramat ipic aotawefen. “Dey. Amos dorcin akac memen.” Inim aeefen. Yesus masirin, e acem afiwef, wunam amos memen apwikapefen. 38E Parisi ipic nat, e Yesus ban bwi batakamcicikem opok aporefen. Inimas junum aeefen. 39E Tuhan masirin, atakam e ipic aotawefen. “E ca Parisi ow, e mok cesenam, e piring cesenam, bwi acicikimcomokom. E cajak aman nat, jokmenas awutut ara. Caram paknam awutut ara. 40Car jen ow awapokom ara. Allah, e cesenas akenemapomef. Ar amanasam akenemapomef araman. 41Ca nat, e co pok amanas, e asan pwicak ow, mamtetamey. E caco pok takas masirin, orom inim cimin aemapcemes. 42E ca Parisi ow, bare ajurusapcomokom. Car e sērēām, e iricam, e cīncīn sayuranam, persepuluhan Allah atatamcomokom. Ca nat, ow tarowat mememam, Allah damos bajiomam, bare bi binip bacecerem opok aemcomokom. Eras nat, bi binip mamceceremcerey. E wunasam binip manimem arapok. 43E ca Parisi ow, bare ajurusapcomokom. E sembahyang cem aman ara, car e bap ow asan bemap jak aserememamokom. E pasar asan ara, caram ow, “selamato” car baji, jak aserememamokom. 44Bare, ajurusapcomokom. Car tanda opok awerem inim cimin ara. E awerem bwey ajipiremces ow, e awerem bapor opok aemcemes.” Yesus inim aeefen.

45Allah Jirmec mamememtam ipic cowok masirin, atakam e aramat ipic aotawefen. “Guru. Inim atakam atawmem ara, oram dar cemew atakam aotawmem.” Inim aeefen. 46Yesus masirin, “E ca Allah Jirmec mamememtam owam ajurusapcomokom. Car juturnakut pok kawey ow sop atatiwcomokom. Ca nat, e pok akac bataw, bare opok cowok aemcomokom. 47Bare, ajurusapcomokom. E carafas e Allah atakam botaw ow acatiwfes. Caram e acatiwfes ow awerem cem aeapomfokom. 48Inimas ara, car e carafas ow aemfesas, akat aemokom ara. Ar e ow acatiwfes. Caram e damir ow awerem cem aeapomfokom. 49Allah, bare bi binip umuton ara. Aram atakam aotawef ara, ‘Dor e doratakam botaw owam, doratakam botaw batewosom owam, e owpu atewosomcimin. E ow masirin, e wun atewosomcimin ow acatiwcemes. Aram wun ajurusumcemes.’ Inim aeefen. 50Allah a capinmi akenemtiwef jofay ajiwar, ow e Allah atakam botaw ow acatiwa aefes. Inimas ara, Allah, e ow ajokmenas jipu, siksa awaniemames ow aomcema. 51Bap ara, e ow Habel acatiwfesen. Asep ara masirin, ar Sakaria acatiwfesen. Ar e Sakaria, e Allah pok jis bafamtam jowseam, e Allah cemam, e wowoc acatiwfesen. Jakaperey. Allah, e ow aemawiris jokmenas jipu, siksa awaniemames ow aemcema.

52E ca Allah Jirmec mamememtam ow, bare ajurusemcomokom. Car e atakamnak acukumtiwmokom. Caram e atakam ji bwe pwicak aemokom, wunam car e atakam jen baji akat ow, botaw opok aemokom ara.” Inim aeefen.

53Yesusam erasan ewjisosef ara, e Allah Jirmec mamememtam owam, e Parisi owam, Yesus atakam pwicak aotawfesen. Aram jonow arkenakut e aramat ipic atowfesen. 54Er, e aramat ipic kari bwetiwas arawen. Ar asalah atakam epen jen baji aemfesen.

Currently Selected:

LUKAS 11: LAICNS

Highlight

Copy