YOHANES 19

Pilatus, Yesus damir baf, atakam asakamtiwef

(Mat. 27:13-31; Mrk. 15:6-20; Luk. 23:13-25)

1Bare. E Pilatus, ow, Yesus omop baf jirmec ajirimef. E ow masirin, e Yesus atewfes, wunam omop aaffes. 2E tentara owam fa epcom sinim atewfes, wunam kus bamapom biwnam asiapomfes. Ar masirin, e biwnam Yesus kus ajimapomfes. Aram esakam baju jirow Yesus atamwimemfes. 3E ow masirin, aramat ipic bipu ameroma aefes, wunam atakam atawa aefes. “Yahudi ow araja ipic akatenem! Selamato!” Inim aea aefes. Aram Yesus ak aempoa aefes.

4E Pilatusam e cesen aofisef, wunam atakam e Yahudi ow aotawef. “Jakaperey. Dor awamec ipic e cabipu aofimisimcimin. Car, dor e ipic salah opok apormin, inimas aporcomokom.” Inim aeef. 5Bare, e Yesus e cesen afisef. Ar e fa epcom kus bamapom biwnam e akus ajumwisef. Aram e esakam baju jirow ametemtamwijisef. E Pilatusam atakam e ow aotawef. “Jakaperey. Aramat ipic ar ara.” Inim aeef. 6E Allah atakam mamtaw tugas ow awutam, e Allah cem manmok batiw owam, e aramat ipic aporfes. Ar masirin, atakam afakaytawfes. “E ipic salib os op bacatopomey! E ipic salib os op bacatopomey!” Inim aea aefes. E Pilatus masirin, atakam e ow aotawef. “Dor a ipic salah opok apormin. Inimas caram ar salib os op carma bacatopomey.” Inim aeef. 7E Yahudi owam, “Awamec ipic atakam atawef. ‘Dor Allah atiw ara.’ Inim aeef. Da nat, jirmec awompom. E jirmec, inim atakam botaw ipic bacatiw, atakam atawma.” Inim aefes. 8E Pilatusam inim atakam jen ajief ara, omar awut aeef. 9Aramat ipic masirin, e Gubernur cem aofiwef, wunam jonow Yesus aotowporef. “Or ocenak asan ewenawfem?” Inim aeef. E Yesus nat, atep bajit opokut. 10E Pilatus masirin, “Or atep do bajit opok aranew? Dor o bafimisimtam fakas awomcey. Doram o salib os op bacatopom fakas awomcey. Or inimas omsom opoknew?” Inim aeef. 11E Yesusam, “Allah or do bwem fakas or batetam opok ayaw, or inim fakas momom opok cowok aemamem. Inimas ara, e dor or aotasimemtaman ipic, bare salah awut inim. Or ara masirin, salah kanim inim.” Inim aeef. 12Pilatus inim atakam jen ajief ara, ar Yesus bafimisimtam den emporef. E Yahudi ow nat, atakam afakaytawfes. “Awamec ipic atakam, ‘Do raja ipic ara,’ inim aeef. Inim atakam botaw ow, e raja Kaisar ajewew ow ara. Or awamec ipic afimisimtamcem or e Kaisar ajowow ipic opok ara.” Inim aefes. 13Pilatus inim atakam jen ajief ara, ar Yesus e cesen atowomisef. E Pilatus masirin, e ow atakam basakamtiw asan afiwapef. E asan juwas “Ek aturumtiwfes cemsan.” Ibrani atakam, e asan juwas “Gabata.” 14Eras aemfes, bare jopok emtow tometapef. Ajofay afayamescow, aram Bakamsow Pokbwi jofay ara. E Pilatusam atakam e Yahudi ow aotawef. “Jakaperey. E caraja ipic awamec ara!” Inim aeef. 15E ow masirin, “A ipic batewey. A ipic batewey. E salib os op bacatopomey!” Inim aefes. E Pilatusam, “Dor e caraja ipic salib os op bacatopom aranew?” Inim aeef. E Allah atakam mamtaw tugas ow awut masirin, “Kaisar cowok daraja ipic ara. Da wun raja opok.” Inim aefes. 16Bare, Pilatus, e Yesus salib os op bacatopom e ow aotasimemtamef.

Ow Yesus salib os atewtopomfes

(Mat. 27:45-56; Mrk. 15:33-41; Luk. 23:44-49)

E ow masirin, e Yesus atewfes. 17Yesusam e salib os sop atatiwef, wunam asan juwas “Damir Kus Asan” atowocenef. Ibrani atakam masirin, e asan juwas “Golgota.” 18Erasan ara, e ow wun ipic jamnuk salib os op atewtopomfes. Ar e wun ipic e Yesus bopim jamam arop salib os op atewtopomfes. Aram e wun ipic e Yesus tamopim jamam arop salib os op atewtopomfes. Yesus masirin, e ipic jamnuk wowoc aemtepefen. 19Pilatusam tulis aeapomef, wunam ar ow e tulis aeapomefas e salib os op batewtopom jirmec ajirimef. E tulis aeapomefas atakam, “A ipic e Nasaret samat ipic juwas Yesus ara. Ar e Yahudi ow araja ipic ara,” inim atakam tulis aeapomef. 20E Yesus salib os op atewtopomfes asan e kota sotop ara. E tulis aeefas, Ibrani atakamam, Latin atakamam, Yunani atakamam, ara. Inimas Yahudi ow arke e atakam baca aemfes. 21Inimas ara, e Yahudi Allah atakam mamtaw tugas ow awut, atakam e Pilatus aotawfes. “Or, ‘Ar a Yahudi ow araja ipic ara,’ inim atakam tulis bweapom arapok. E nat, ‘A ipic atakam, “Dor Yahudi ow araja ipic ara,” inim aeef.’ Inim atakam tulis eapomey.” Inim aefes. 22E Pilatus nat, “E tulis aeapomey atakam inim baemaperec.” Inim aeef.

23Bare, e tentara ow, e Yesus, salib os op atewtopomfes ara, ar e apakaian atawfes. Ar masirin, e pakaian, empat ajiwar aseyamtiwfes. E tentara aporsipor, cowok teweta, cowok teweta, inim aefes. Aram e aman baju jirow atewfes. Ametnak ara, e baju asifes ow, kain bini cowokut asifes. Inimas e baju bip jamnuk cowkon bakopom opok baju ara. 24E tentara owam inimas aporfes, wunam atakam aramaman aamtawfes. “Dar e baju bakakam arapok. E nat, ek kanim baneyjiwitiwtotormoc. Er e baju atewetcow ipic baporomtamas ara.” Inim aefes. Erasam e Alkitab atakam jipu ara:

“Ar e dopakaian sey aseyamatfes. Aram e dobaju batewet, ek kanim aneyjiwitiwtotorfes.”

E Alkitab inim aema. Bare, e tentara owam inimas cowok aemfes. 25Yesus arosowocam, arosowoc aromwesam, Klopas arem juwas Mariaam, Maria Magdalenaam, e Yesus salib os sotop aememfes. 26Yesus, e arosowoc erasan aememef aporef. Bare, aramat ipic damos awut e amamkawi ipic cowok ajiomawiri. Ar e ipic e arosowoc sotop aememef aporef. Ar masirin, “Enew. Jakaperey. A ipic otiw baememcow.” Inim aeef. 27Yesus masirin, atakam e mamkawi ipic aotawef. “Jakaperey. A cowoc orosowoc baememcow.” Inim aeef. Bare, e jofay ajiwar, e mamkawi ipic e cowoc e acem atowomiwef.

Yesus damir aafef

(Mat. 27:45-56; Mrk. 15:33-41; Luk. 23:44-49)

28Bare. Yesus, e Allah jirmec ajirimefas takas, afafaykurumef aporef. Ar masirin, “Do bwito.” Inim aeef. Eras e Alkitab atakam jipu ara. 29Erasan, bwi bowapomas cowok aemapef. E bwi bowapomas aman asesak anggur bwi ara. Owam bwi basirijiw pok atewfes, wunam e pok e anggur bwi asotewfes. Ar masirin, e pok wakan inim cimin pok juwas hisop bip aatamsimapomfes, wunam e pok Yesus bweyofpu ajoromtomettemtamfes. 30Yesusam, e anggur bwi so so aomokopef. Ar masirin, “Dor e Allah jirmec ajirimfinas emefafaykurumey.” Inim aeef. Aramat ipic masirin, jimas ajiritepef, wunam damir aafef.

Jipic cowok urin Yesus amittopomef

31E jofay, bare Hari Jumat ara. Er e Ses Ban Jo pok bafafaytiw jofay ara. E to aenawcow Ses Ban Jo, e Bakamsow Pokbwi jofayam ara. Inimas ar hari awut ara. E Yahudi owam, e jofay, awut hari aporfes. Inimas ar e sumu ow, e salib os op bwemtep pwicaken. Ar masirin, Pilatus, ow, e salib os op aemtepfes ow kamtar bajakamtopomtotor jirmec bajirimtam, janim aanimfes. (Eras e ow basarimdamirafas ara.) Aram Pilatus, ow, e sumu ow bataw jirmec bajirimtam, janim aanimfes. 32Inimas e tentara ow aenawfes, wunam ar e Yesus salib os op akac aemtepef ipic cowok akamtar jamnuk takas ajakamtopomfes. Ar masirin, e wun ipicam akamtar ajakamtopomfes. 33Aram Yesuspu ameromfes. E nat, ar e Yesus damir emcaafef aporfes, wunam ar e akamtar bajakamtopom opok. 34E wun tentara ipic cowok nat, urin e Yesus asporpu amittopomef. Amittopomef masirin, esam, bwiam, juw auwuomisef. 35E eras manmok atiwef ipic, inim atemen aatamef. E atemenam, bare atakamnak ara. Aramat ipicam e atemen aatamefas, atakamnak apormar ara. Aram car e atemen atakam basicim akat aemama. Inimas ar eras atemen car aatamaman. 36-37Bare, e Alkitab atakam, “Ar e dam emake bajakamtopom opok cowok, aemcemes.” Wunam, “Ar e urin amittopomces ipic manmok atiwemcemes.” E Alkitab inim aema. E ow aemfesasam e Alkitab atakam jipu cowok ara.

Ow Yesus sumu ipic, ek jip aman ajiwtatiwfes

(Mat. 27:57-61; Mrk. 15:42-47; Luk. 23:50-56)

38Bare, kota Arimatea ipic juwas Yusuf e Pilatus ameromef. Ar e Yesus sumu ipic batew, janim e aramat ipic aanimef. (E Yusuf, Yesus mamkawi ipic ara. E nat, ar e Yahudi ow omar aeef. Inimas ar curuw ajamkawief.) Bare, e Pilatus e Yusuf janim aanimefas atetamef. Inimas e Yusuf e Yesus salib asanpu aapenef, wunam e sumu ipic atewef. 39Nikodemusam erasan ajamjamenef. Bap ara, aramat ipic, os capi pok juwas muram, wun pinim akat pok juwas gaharuam, aartamef. Ar e pokam erasan atowomosef. E pok, kilogram tiga puluh ajiwar aranew. (E Nikodemus, e bapnak Yesuspu iram ameromesmep ipic ara.) 40Bare, e ipic jamnukam e Yesus sumu ipic atewfes. Ar masirin, kain akat e sumu ipicam, e pinim akat pokam, cowkon, biram ajiktiwfes. 41E Yesus salib os op acatopomfes asan, bare eke epcom os kebun asan ara. E kebun asan, jepen asifes ek jip aemapef. E ek jip, sumu ow bajiwtatiw asan ara. E nat, er ayas ara. Oram sumu ow e ek jip aman bajiwtatiw opok aemfes. 42E Yusufam, Nikodemusam, e Yahudi ow Ses Ban Jo sotopnakap aporfes. Aram e ek jip sotop aporfes. Inimas ar Yesus sumu ipic erasan ajiwtatiwfes.

Currently Selected:

YOHANES 19: LAICNS

Highlight

Copy