YOHANES 18

Jokmen ow Yesus ban akimomfes

(Mat. 26:47-56; Mrk. 14:43-50; Luk. 22:47-53)

1Yesus inim atakam atawef masirin, aram, amamkawi owam, e jo kanim juwas Kidron poman aokorjirfes. Erasan eke epcom os kebun asan ara. Aramat ipicam, amamkawi owam, e kebun asan aapjesfes. 2Bap ara, Yesusam, amamkawi owam, bar arke erasan akac ajara aefes. Inimas e Yesus e jokmen ow aotasimemtamcow ipic juwas Yudas, e asan amsom ara. 3E Allah atakam mamtaw tugas ow awutam, e Parisi owam, Allah cem manmok batiw ow, jirmec ajirimfes. E Yudas masirin, e manmok batiw owam, tentara ow arkeam, e kebun asan bap ajaromatef. E ow, lentera arkeam, sos pok arkeam, foro pok arkeam, inimas atowomtotorfes. 4Yesusam e ow ar aemcesas takas amsom. Inimas Yesus ajisef, wunam atakam e ow aotawef. “Car ca ipic apowmokom?” Inim aeef. 5E ow masirin, “Dar e Nasaret ipic juwas Yesus apowmom.” Inim aefes. E Yesus masirin, “Dor awamcey ara,” inim aeef. Bare, e Yesus e jokmen ow aotasimemtamcow ipic juwas Yudas, e ow cowkon aememef. 6-7E Yesus, “Dor awamcey ara,” inim aeef ara, bare, e ow aotasifes, wunam cenes aneyjuamesfes. Inimas aramat ipic jonow e ow aotowporef. “Car ca ipic apowmokom?” Inim aeef. E ow masirin, “Dar e Nasaret ipic juwas Yesus apowmom.” Inim aefes. 8E Yesusam, “Dor atakam emcaotawey. Dor awamcey ara. Car dor apowmenokomnew, a dor ajamkawimenes ow, inim bajisosces.” Inim aeef. 9Bap ara, Yesus atakam Allah aotawef, “E atatamfenem ow bapakapios opok cowok aemfes,” inim aeef. Inimas e atakam, “A dor ajamkawimenes ow bajisosces,” bare, e bap atakam atawefas jipu ara.

10E Simon Petrusam owec parang atowomef. Ar e parang asumtewef, wunam ar e Allah atakam mamtaw tugas ipic awut akerja bwemtam ipic e bo jenmak asakamnemef. E kerja bwemtam ipic juwas Malkus ara. 11Yesusam atakam e Petrus aotawef. “E parang e ese aman bocumnemey. Doricipic, dor inim bajurusem, atakam asakamtiwef. Obi binip nat, ‘E Yesus inim bajurusum pwicak ara,’ inim bi binip aceceremamemnew?” Yesus inim aeef.

Yesus, Hanas bipu aememef

12Bare, e tentara owam, e akepala ipicam, e Allah cem manmok batiw owam, Yesus ban akimomfes. Aram Yesus ban manam ajikapomfes. 13Aram e Yesus, e Hanas bipu atowomosfes. Ar e Hanas, e Kayafas anapwec aporfes ara. E tahun ara, e Kayafas, e Allah atakam mamtaw ipic awut tugas aemef. 14E Kayafasam ametnak atakam atawef, “Jipic cowok, a ow takas damir aaftamcow, wunam e dasamat ow takas damir baf opok, bare akat ara.” Inim atakam atawef.

Petrus, Yesus apacinef

(Mat. 26:69-70; Mrk. 14:66-68; Luk. 22:55-57)

15Simon Petrusam, wun Yesus mamkawi ipic cowokam, e Yesus fa asatfes. Bare, e Allah atakam mamtaw tugas ipic awut, e wun Yesus mamkawi ipic amsom ara. Inimas e ipic, e Yesus e Allah atakam mamtaw tugas ipic awut cemsan pagar aman, akac afiwemef. 16E Petrus nat, e cesen aememef. Ar e jimasappu aememef. E Allah atakam mamtaw tugas ipic awut e wun Yesus mamkawi ipic amsom. E Yesus mamkawi ipic e cesen afisef. Aram atakam e jimasap manmok batiw cowoc aotawef. Ar masirin, e Petrus atowomiwef. 17E jimasap manmok batiw cowoc masirin, atakam Petrus aotawef. “Oram e ipic amamkawi ipic ara openow.” Inim aeef. E Petrus nat, “Ba! Dor inimas opok.” Inim aeef. 18E cem kerja bwemtam owam, e Allah cem manmok batiw owam, dam jufu aememfes. Inimas ar jis atowokomfes. Aram jisis jisanam ajifes. E Petrusam e ow jisanam akac ajifes.

E Allah atakam mamtaw ipic awut jonow Yesus atowef

(Mat. 26:69-70; Mrk. 14:66-68; Luk. 22:55-57)

19Bare, E Allah atakam mamtaw tugas ipic awut, jonow Yesus atowef. Ar e amamkawi owam, e amememtamef atakamam, jonow Yesus atowef. 20E Yesus masirin, atep ajitef. “Dor atakam ow bipu umuton atawawiru. Doram a jo afafayawiri, e sembahyang cem amanam, e Allah cem amanam, atakam atawawiru. Erasan e Yahudi ow takas barewsiap asan ara. Doram curuw atakam botaw opok cowok. 21Or jonow dor atowmenem nat, ucim inimaram? Jonow e doratakam jen ajiawiris ow mamtowporey. E ow e atakam atawawiruas amsom.” Yesus inim aeef. 22Yesus inim atakam atawef masirin, erasan aememef Allah cem manmok batiw ipic, Yesus e ak aempoef. E ipicam, “Or Allah atakam mamtaw tugas ipic awut inim atep ajitmemnew?” Inim aeef. 23E Yesus masirin, “Dor pwicak atakam atawminnew, oram e pwicak atakam umuton otawcan. E nat, dor akat atakam atawminnew, or a dorak ucimas empowmenem?” Inim aeef.

24Bare, e Hanas, ow e Yesus e ban manam epcom, e Kayafaspu batowocen, jirmec ajirimef. E Kayafas, e Allah atakam mamtaw tugas ipic awut ara.

Petrus, Yesus aopacinef

(Mat. 26:71-75, 27:11-14; Mrk. 14:69-72; Luk. 22:58-62)

25Bare. Simon Petrus, e jisis jisanam cowocjimepaw, e wun owam jonow aramat ipic atowporfes. “Oram awamec ipic mamkawi ipic ara openow.” Inim aefes. E Petrus nat, apacinef. “Dor inimas opok.” Inim aeef. 26E Allah atakam mamtaw tugas ipic awut akerja bwemtam ipic cowok, erasan aememef. Ar e Petrus jenmak asakamnemef ipic ajowow ipic ara. Aram atakam atawef. “E kebun asan ara, dor or e Yesus cowkon aememesmem aporesmin ara openow.” Inim aeef. 27E Petrus nat, aopacinef. Aopacinef masirin, e ayam jipic atakam akokoreyef.

Yesus, Pilatus bipu aememef

(Mat. 27:1-2; Mrk. 15:1-5; Luk. 23:1-5)

28Bare, e Yahudi ow, e Yesus, e Kayafas cem atowomisfes. Wunam ar aramat ipic e gubernur cem atowocenfes. Er tam iram fak ara. E Yahudi ow nat, e cem bafiw opok. Ar e Bakamsow Pokbwi memen akat aefes. Inimas ar e aragama karowas bwem pwicak arawen. 29E Pilatusam inimas aporef. Aramat ipic masirin, e cesen afisef, wunam atakam e ow aotawef. “Awamec ipic ucim pwicakas aemef? Car ucim atakam atawmokom?” Inim aeef. 30E ow masirin, “A ipic pwicakas bwem opok ayaw, dar ar or bwemotasimemtam asan opok.” Inim aefes. 31E Pilatus masirin, “Caram e ipic batewey. Wunam e asalah, e cajirmec jipu, atakam carma aamsakamey.” Inim aeef. E Yahudi ow nat, atakam e Pilatus aotawfes. “E da Yahudi ow, ow bacatiw atakam mamsakam, bare karow ara.” Inim aefes. 32Bapam ara, Yesus atakam atawef, “Dor inim damir aafcimin,” inim aeef. E ow aemfesas masirin, e Yesus atawefas jipu ara. 33Bare, e Pilatus e acem aofiwef. Ar masirin, e Yesus ajateef. Aram jonow e aramat ipic atowef. “Or e Yahudi ow araja ipic aranew?” Inim aeef. 34E Yesus masirin, “E jonow atowpormenemas nat, orop bi binipas aranew? Kawey ow doratakam or aotawfenesnew?” Inim aeef. 35E Pilatus, “Dor Yahudi ipic opok. E osamat owam, e Allah atakam mamtaw tugas ow awutam, or aotasimemtamenes. Or ucimas emfem?” Inim aeef. 36E Yesusam, “Dor awames capinmi raja ipic opok. Dor awames capinmi raja ipic aememof ayaw, e dokerja bwemtam ow owen emcaamoeres. Ow dor e Yahudi ow botasimemtamasin. Do nat, awames capinmi raja ow inim cimin opok.” Inim aeef. 37E Pilatus masirin, “O nat, raja ipic aranew?” Inim aeef. E Yesusam, “Or dor raja ipic atakam aotawmenem, bare atakamnak ara. Dor, atakamnak, ow botaw, awames capinmi aneyof. Dor atakamnak, ow botaw ajisamesof. E atakamnakto aememames ow doratakam jen ajimes.” Inim aeef. 38E Pilatus nat, “Atakamnak nat, ucim inimaram?” Inim aeef.

Ow Yesus bacatiw atakam aamsakamtiwfes

E Pilatus inim atakam atawef masirin, ar e cesen aofisef. Aram atakam e Yahudi ow aotawef. “Dor awamec ipic salah opok apormin ara. 39Tahunin tahunin ara, e Bakamsow Pokbwi jofay, dor penjara cem aman bemap ipic cowok, car afimisimtama ajimop. Er e catareyas jipu ara. Car nat, dor a Yahudi ow araja ipic car bafimisimtam akat open?” Inim aeef. 40E ow masirin atakam afakaytawfes. “Or awamec ipic bafimisimtam arapok. E Barabas bafimisimtamey.” Inim aefes. E Barabas nat, pok ces bwetaw ipic ara.

Currently Selected:

YOHANES 18: LAICNS

Highlight

Copy