YOHANES 17

Yesus, e amamkawi ow, janim Allah aanimtamef

1Yesus inim atakam atawef masirin, manmok e onam op atiwtometemef. Aram atakam aootawef. “Diwi. E atakam atawfem jofay, bare emeenawor. Or e otiw arakatnakutas, ow baporomtamey. Inimas e otiw, e orakatnakutasam, ow aporomtamcema. 2Or wun ow e otiw mamkawi jirmec ajirimfem. Oram e otiw e jiwnenak batamemawaras, e ow batatam, akat aefem. Inimas oram asmat ow takas jirmec bajirimkurum fakas e otiw atetamfem. 3E Allah anakat, bare or cowok ara. Dor masirin, e atewnemfenem ipic juwas Yesus Kristus ara. Wun ow, oram, doram, amsom ara. Bare, e ow jiwnenak aatamemawarcemes. 4Dor e jirmec ajirimfenem kerja, emeemkurumof. Inimas dor e orakatnakutas awames capinmi ow aporomtamof. 5Diwi. Ametnak ara, dar a capinmi bakenemtiw opok aemfom, or dorakatnakutas e obipu aporomfem. Wowam, e dorakatnakutas e obipu inim cowok boporomey.”

6“Or a wun awames capinmi ow do mamkawi jirmec ajirimfem. E ow orow aememfes, wunam or e ow do mamkawi jirmec ajirimfem. Dor masirin, oratakam e ow amememtamof. E owam oratakam ji aefes. 7E aomomaminas takasam, e atakam atawminas takasam, bare e atatamfenemas cowok ara. E owam inimas apormes. 8Doram e aotawfenem atakam e ow aotawof. E owam e atakam jen ajifes. Ar dor e odampu ewenawof, inim atakam atakamnak aporfes. Aram or dor atewnemfenem, inim atakam asicimfes.”

9“Doram e ow janim or aanimtamamin. E ow oras ara. Or masirin, e ow dor atatamfenem. Wun ow nat, or amsom opok. Dor e ow janim or manim opok. 10E dorow takas, aram orow ara. E orow takas, aram dorow ara. E ow akatas aemames. Inimas ow dorakatnakutasam apormes. 11Dor awames capinmi boemap opok aemcimin. E ow nat, awames capinmi aoemapcemes. Dor e odampu aoenawcimin. Diwi, tarowat ipic aketenem. Or fak ipic ara. Oram e ofakas dor atetamfenem. Bare, or e ow manmok mamtiwemey. Inimas e ow, bi binip cowok aceceremcemes— e dar bi binip cowok aceceremamomas inim cimina. 12Bare, or e ofakas atetamfenem. Inimas dor e ow cowkon aemapawiru ara, dor e ow manmok atiwawiru. Doram e ow mantem aemawiru. E ow masirin, bapakapios opok aemfes. Jipic cowoknakap apakapioscema. Er e daniwis aemamescow ipic ara. Eras e Alkitab atakam jipu ara. 13Bare, dor sarim inim or aenawomcimin. Doram jak akatnakut ara. Doram e ow e dojak akatnakut inim cimin bemapom aemin. Inimas dor awames capinmi aemapmin ara, dor a atakam atawmin. 14Doram oratakam e ow aotawof. Do nat, awames capinmias mamkawi opok. E owam awames capinmias mamkawi opok. Inimas awames capinmi ajamkawimes ow, bifan e ow afayomames. 15Dor or e ow, e onam op capinmi aynam batowotomet, inim janim or manim opok aemin. Do nat, or e Jursumec Ipic bakikim janim or aanimamin. Ar e ow bajurusumasin. 16Dor awames capinmias mamkawi opok. E owam awames capinmias mamkawi opok. 17E ow oratakam jen bajices. Or masirin, e ow oratakam ji bwekurum, jak akat mamseremtamey. Oratakam, bare atakamnak ara. 18Or dor awames capinmi atewnemfenem. Doram e ow awames capinmi asanin asanin, e aemfenemas inim cimin atewosomof. 19Dor oratakam ji aemin. Eras e ow asan akat bomas ara. Eram e ow oratakam ji bwekurumas ara.”

20“Dor a ow cowok janim or manim opok. Wun owam a ow aratakam jen ajimes, wunam dor asicimamenes. Dor masirin, e owam janim or aanimtamamin. 21Diwi. E ow takas bi binip cowkon baceceremces. Oram, doram, ow cowok inim awcawor ara. Aram, dar ow cowok inim awcawor baememcarowos. Inimas aemcarowos, e or amsom opok ow, or dor atewnemfenem, inim atakam asicimcemes. 22Bare, oram, doram, bi binip cowkon aceceremamom. Doram e ow inim bi binip cowkon bacecerem, akat aemin. Inimas ara, dor e atetamfenem asan akatnakutas, e owam atetamof. 23Doram, e owam, ow cowok inim awcawor aememamom. Oram, doram, ow cowok inim awcawor aememamom. Bare, e owam bi binip cowoknak baceceremces. Inimas aemces, e or amsom opok ow, or atewnemfenem, inim atakam atakamnak aporcemes. Aram or damos e dor ajamkawimenes ow ajiomamem, aporcemes— or damos dor ajiomamenem inim cimin ara.”

24“Ametnak ara, dar a capinmi bakenemtiw opok ara, or damos dor ajiomfenem. Inimas or asan akatnakut atetamfenem. Wun, ow dor ajamkawimenes. Oram e ow, dor atetamfenem. Doram e ow e dorakatnakutas bapor, akat aemin. Inimas ara, dor e ow e aemapcey asan akac bemap, akat aemin. 25Diwi tarowat ipic akatenem. Awames capinmi ow or amsom opok. Do nat, or nomsom. Or dor atewnemfenem. E dor ajamkawimenes owam inim atakam atakamnak aporfes. 26Or damos dor ajiomamenem. Doram e ow inim cimin damos aramaman mamjiom akat aemin. Doram, e owam, ow cowok inim awcawor memem akat aemin. Inimas ara, dor oratakam e ow amememtamof. Doram oratakam e ow aomememtamcimin.” Yesus inim aeef.

Currently Selected:

YOHANES 17: LAICNS

Highlight

Copy