YOHANES 20

E ek jip fi aemamesef

(Mat. 28:1-8; Mrk. 16:1-8; Luk. 24:1-12)

1Bare, Hari Minggu tam, iram fak, e Maria Magdalena e ek jip asan ameremefen. Aram jo bapuames opok arawen. Aramat cowocam, e ek jip imwi akapimapomfes ek, arpuak asan asorapef aporefen. 2Inimas ar e Simon Petrusam, e wun Yesus mamkawi ipicam, e aemapfes asanpu je aatef. Bare, Yesus e awun mamkawi ipic cowok damos awut ajiomawiri. Er e ipic ara. E cowocam atakam e ipic jamnuk aotawef. “Ow e Tuhan sumu ipic e ek jip aman atowomisfes. Daram e ow e sumu ipic tewapomfes asan namsom opok.” Inim aeef.

3Bare, Petrusam, e wun Yesus mamkawi ipicam, ajisfes, wunam e ek jip asan ajisosfes. 4E ipic jamnuk je akac aatfes. E nat, e wun Yesus mamkawi ipic je foro aatef. Inimas ar e ek jip asan bap a takam jaremef. E Petrus masirin, asep ajaremef. 5E wun ipic jimas ajiramesef, wunam ek jip manmok apemimef. Aram e Yesus sumu ipic biram ajiktiwfes picin, desen asuramesef aporef. Ar nat, e ek jip bafiw opok. 6Bare, Simon Petrus e ipic fa asoromef. Aram erasan ajaremef, wunam e ek jip afiwemef. Aram e picin desen asuramesef aporef. 7Aram e Yesus kus biram ajiktiwfes picin asuramesef aporef. E picin nat, e wun picin cowkon memames opok aporef. Aram arop asan afonomamesef. 8E wun Yesus mamkawi ipicam e ek jip afiwemef. Ar e ek jip asan bap ajaremef ipic ara. Ar e picin desen asuramesef aporef, wunam ar e Yesus aojaworsitefas atakam, asicimef. 9(E Alkitab e Yesus bojaworsit atakam atawma. E nat, e ow, e atakam jen bajikurum opok aemfes.) 10Bare, e Yesus mamkawi ipic jamnuk cem aojisosfes.

Yesus, Maria Magdalena bipu ajisemef

(Mat. 28:9-10; Mrk. 16:9-11)

11Bare. Maria e ek jip cesen aememefen. Aram bwec abwecefen. Bwec cowocbwecmepaw, aram jimas ajiramesef, wunam e ek jip aman apemimefen. 12Aram malaikat jamnuk pakaian fwesak ajimapfes aporefen. Aram e Yesus bap aemamesef asanpu aemapfesen. E wun malaikat e Yesus kus aemamesef asanpu aemapefen. E wun masirin, e kamtar aemamesef asanpu aemapefen. 13E malaikatam atakam Maria aotawfesen. “Or ucim bwec abwecmem?” Inim aefesen. Aramat cowoc masirin, “Ow e doTuhan sumu ipic ateweres. Doram ar e sumu ipic atewapomeres asan nomsom opok.” Inim aeefen. 14Inim atakam aotawef masirin, bin afiremefen. Aram Yesus erasan aememef aporefen. E nat, ar e aememef ipic, Yesus opok inim arawen. 15Yesus masirin, atakam e cowoc aotawefen. “Or ucim bwec abwecmem?. O ca ipic apowmem?” Inim aeefen. E aramat cowoc nat, e ipic, e kebun kerja ipic inim arawen. Inimas ar atakam, “Or e Yesus sumu ipic ateweremnew, or e atewapomerem asan, atakam botawcan. Dor masirin, e sumu ipic aotewcimin.” Inim aeefen. 16Yesus masirin, atakam e aramat cowoc aotawefen. “Maria!” Inim aeefen. E aramat cowoc masirin, bin afiremef, wunam Ibrani atakam e Yesus aotawefen. “Rabuni!” Inim aeefen. (“Rabuni” daratakam juw buwumtew, “Guru” ara.) 17E Yesusam, “Dor e doricipic asan baptomet opok. Inimas oram ban do bomosom arapok. E nat, or e do mamkawi ow asan mamjisosey, wunam atakam e ow mamotawey. ‘E Yesus atakam, “Dor e doricipic asan aaptometcimin. Dor e dorAllah asan aaptometcimin. Aramat ipic e caricipicam, e carAllaham, ara,” inim aema.’ Or inim mameey.” Yesus inim aeefen. 18Bare, e Maria Magdalena e Yesus mamkawi ow asan ajisosef, wunam, “Tuhan bi emcaporey,” inim aeef. Aram e Yesus atakam e aramat cowoc aotawefas e ow aotawef.

Yesus e amamkawi ow bipu ajiemef

(Mat. 28:16-20; Mrk. 16:14-18; Luk. 24:36-49)

19Bare. Er Hari Minggu ara. Iram ara, e Yesus mamkawi ow, cem cowokut aemapfes. Ar e Yahudi ow omar aefes. Inimas aram e jimasap takas manam fak akakamimapomfes. Yesusam aenawef, wunam e ow wasec ajiwtereyemef. Aram atakam e ow aotawef. “Allah asan akat car baomcan.” Inim aeef. 20Inim atakam atawef masirin, aramat ipic e abanam, e arasporam, e ow aporomef. E aramat ipic ajamkawifes ow e Tuhan bi aporfes, aram jak akat aememfes.

21Bare, Yesus atakam e ow aootawef. “Allah, asan akat car baomcan. Bare, doricipic dor atewenamfan. Doram inim cimin cowok car e asanin asanin atewosomamin.” Inim aeef. 22Aramat ipic inim atakam atawef masirin, bwe fo e ow aemtamef. Aram atakam e ow aotawef. “E Roh Kudus mamtewettotorey. 23Car ow adosa, bi binip ajiwosomcokom, Allaham e ow adosa, bi binip ajiwosomcema. Ca nat, ow adosa, bi binip biwosom opok aecokom, Allaham e ow adosa bi binip biwosom opok aemcema.” Inim aeef.

Yesusam, Tomasam, atakam

24Tomas, e Yesus mamkawi ow dua belas ajiwar wun ipic cowok ara. (E awun juwas “Kapomipic” ara.) Bap ara, Yesus e ow aenawomef, Tomas erasan opok. 25E wun Yesus mamkawi owam atakam Tomas aotawfes. “Dar Tuhan bi emcapororom.” Inim aefes. E Tomas nat, “Dor e ban seyfinim jof bapor opok emcey, wunam dor e dobanef e seyfinim jof bajimom opok emcey, wunam e doban e aspor jofpu bajimom opok emcey, bare dor e Yesus aojaworsitoras atakam, basicim opok aemcimin.” Inim aeef.

26Bare, bar delapan ajiwar aemapfes, e Yesus mamkawi ow, e cem aman aoemapfes. Tomasam e ow akac aemapfes. E cem jimasap takasam fak akakamimapomfes. E nat, Yesus aenawef, wunam e ow wasec atereyemef. “Allah asan akat car baomcan.” Inim aeef. 27Aramat ipic masirin, atakam Tomas aotawef. “E obanef arasan jimomey. E doban baporey. E oban bajuromtopomey, wunam e oban e doraspor jofpu jimomey. Oram bi binip arke arapok. E aojaworsiteyas atakam basicimey.” Yesus inim aeef. 28Tomas masirin, atakam Yesus aotawef. “Or doTuhan ara. Oram dorAllah ara.” Inim aeef. 29E Yesus masirin, “Or e dobi apormem. Inimas asicimamenem. Or inimas aranew? Bare, wun ow e dobi bapor opokut aemcemenes. E nat, aram dor asicimcemenes. E ow, bare, asan akatnak aemapcemes.” Inim aeef.

A surat atakam ucimasaram?

30Bare, Yesus wun junum bweas arke e amamkawi ow bipu aemef. Do nat, e junum bweas takas a surat bweapomkurum opok. 31E Allah Aeremtewef Ipic, bare Yesus ara. Aram Allah atiw ara. Car e Yesus asicimcokom, caram jiwnenak aatamemawarcomokom. Eras e aramat ipic aemefas ara. Dor car jiwne batamemawar akat ara. Inimas dor a junum bweas atakam, a surat aeapomamin.

Currently Selected:

YOHANES 20: LAICNS

Highlight

Copy