YOHANES 13

Yesus e amamkawi ow bwey bwi acicikemef

1Bare, e Bakamsow Pokbwi jofay sotopnakap asisienawef. Yesusam awames capinmi bakan bajios, wunam e aricipic asan bafasitomet, sotopnakap aporef. E wun awames capinmi ow, Yesus ajamkawiawiris. Yesusam damos e ow ajiomawiri. Ar e damir aafef jofay ajiwar damos e ow ajiomawiri.

2Bare. Yesusam, e wun owam, iram amos aanesmepes. Bap ara, e Iblis, bi binip e Yudas atetamef. E Yudas masirin, Yesus e jokmen ow botasimemtam bi binip aceceremef. (E Yudas, e Simon Iskariot atiw ara.) 3Bap ara, Allah, pok takas, e Yesus ban ton momomkurum emcatetamef. Yesusam, inimas amsom. Ametnak ara, ar Allah bipu ewneyef. Wunam, ar aramat ipic bipu aofasitometcema. Aram inimas amsom. 4Inimas ara, aramat ipic e amos aanesmepes asan asitemef. Ar masirin, e abaju afortiwef, wunam handuk e usin bip ajikapomef. 5Aram, bwi, loyang, aokomsemef, wunam ar e amamkawi ow bwey bwi acicikimtotoref. Ar masirin, e usin bip ajikapomef handuk, e bwey aerewtotoref. 6E Yesusam, e Simon Petrus bipu aememef. E Petrus masirin, “Tuhan. Oram dobwey bwi bacicikim aranew?” Inim aeef.

7E Yesusam, “Or wow aemaminas omsom opok. Asep jofay nat, or inimas omsom aememcemem.” Inim aeef. 8E Petrus, “Or e dobwey bwi bacicikim arapok!” Inim aeef. E Yesus masirin, “Dor e obwey bwi bacicikim opok aemcey, bare or domamkawi ipic opok ara.” Inim aeef. 9E Simon Petrusam, “Tuhan. Or e dobwey cowok bwi bacicikim arapok. E dobanam e dokusam bwi takas bacicikimkurumcan.” Inim aeef.

10Yesus masirin, atakam e aramat ipic aotawef. “E bwi abwieres ow, e adam takas bwi bobwim arapok. E adam anakat takas, bare orom ara. Ar e abwey cowok bwi bacicikimces. Bare, car akat ara. Car ponow opok. E nat, e ca wun ipic cowok, aram akat opok.” Inim aeef. 11(E wun ipic, Yesus e jokmen ow botasimemtam aememef. Yesusam inimas amsom. Inimas Yesus atakam, “Car akat ara. E nat, e ca wun ipic cowok, aram akat opok.” Inim aeef.)

12Bare, e Yesus e ow bwey bwi acicikimef masirin, ar e abaju aotamwief. Wunam ar e amos aanesmepes asan aoneypwikapef. Aram atakam e ow aotawef. “E dor car aemaminas camsom open? 13Caram atakam dor aotawmenokom, ‘Guru,’ inim aemenokom. Caram, ‘Tuhan,’ inim aemenokom. E atakam atawmenokomas, bare atakamnak ara. Dor inimas awamcey ara. 14Dor e caTuhan awamcey ara. Doram e caGuru awamcey ara. Bare, dor e cabwey bwi acicikimamin. Inimas caram e cabwey caramaman mamcicikimawarey. 15Dor car inimas acowomtamamin. Caram e car aemaminas jipu cowok mamcowoyawarey. 16Atakamnak ara, kerja bwemtam ipic awut ara, wunam e kerja aramat ipic kanim ara, bare inimas opok. Er masirin, e baysos ipic awut ara, wunam e ipic batewosom ipic kanim ara, bare inimasam opok. 17Car eras camsom ara. Bare, car e atakam ji aecokom, asan akat aemapcomokom.”

18“E atawmin atakam, car takas opok. Dor e aereremtawof ow nomsom. E nat, e Alkitab atakam ara, ‘E amos akac aemena ajimpan ipic ajurusumfan.’ Inim aema. Bare, ow e Alkitab atakam jipu acowoycemes. 19Dor a atakam bap car aotawmin. Wunam asep jofay, e ipic eras aemcan, caram dor e Allah Aeremtewef Ipic ara, inim atakam asicimcomokom. 20Atakamnak ara, ow e dor atewosomof ow atowomiwces, aram dor atowomiwcemenes. Wunam, e dor atowomiwcenes ow, e do tewosomfan ipic atowomiwcemes.” Yesus inim aeef.

“Car wun ipic cowok, dor, e jokmen ow aotasimemtamceman”

(Mat. 26:20-25; Mrk. 14:17-21; Luk. 22:21-23)

21Yesus inim atakam atawef masirin, jak pwicak awutnakut aememef. Aram, “Atakamnak ara, ca wun ipic cowok dor e jokmen ow aotasimemtamceman.” Inim aeef. 22E Yesus mamkawi ow, e aramat ipic atakam otawef ipic amsom opok. Inimas ar manmok aamtiwtotorfes. 23Bare, Yesus, e wun mamkawi ipic cowok damos awut ajiomawiri. E jofayam, e ipic, Yesus cowkon aemapfes. 24Simon Petrusam bi waci e ipic aemef. Eras e ipic, “E ca ipicam?” inim jonow Yesus boportowporas ara.

25E ipic masirin, Yesus sotop asisiapef, wunam jonow atowef. “Tuhan. E or jokmen ow aotasimemtamcan ipic cam?” Inim aeef. 26E Yesusam, “Dor a roti a piring bwi asotewcimin, wunam e ipic atetamcimin.” Inim aeef. Bare, Yesus, roti kanim atawef, wunam e roti e piring bwi asotewef. Ar masirin, e roti, Yudas atetamef. (E Yudas, Simon Iskariot atiw ara.) 27Bare, e Yudas e amos aemenef. E amos aemenef, masirin, Iblis e Yudas jak aman afiwapef. Yesusam atakam e Yudas aotawef. “E aemcemas sarimnakap mamemey.” Inim aeef. 28E nat, erasan aemapfes ow takas, e Yesus atakam Yudas aotawefas, bi binip arke aceceremfes. Yesus inim atakam jopom atawefnew? Bare, e ow amsom opok. 29E Yudas e ow aruang ese manmok batiw ipic ara. Inimas e wun ow bi binip aceceremfes. “Yesus e Yudas e pokbwi amos pok bajitnew, uang e pok opok ow batetamnew, inim atakam atawmar ara openow.” Inim bi binip aceceremfes. 30Bare, e Yudas e Yesus atetamef amos atewenef. Atewenef masirin, cesen afisef. Er iram ara.

Ay jirmec

31E Yudas afisef masirin, Yesus atakam atawef. “Wow, Allah, e Asmat Anakat Ajaworemef Ipic akatnakut ara, inimas aporomtamcema. E Asmat Anakat Ajaworemef Ipic aemcowas, e Allaham akatnakut ara, inimas aporomtamcema. 32E aramat ipic aemcowas, e Allah akatnakut ara, inimas aporomtamcow, bare Allaham e aramat ipic akatnakut ara, inimas aporomtamcema. Allaham eras sarimnakap aemcema. 33Tiperesa. Dor arasan, bar arke opoknakap car cowkon aememcimin. Car masirin, dor apowporcemenokom. E nat, dor atakam e Yahudi ow aotawofas, wowam car aotawmin. ‘Car e ajisoscey asan, bwemjisos asan opok.’ Inim aeof. 34Bare, doram wow ay jirmec car ajirimamin. Car damos caramaman mamamey. E dor damos car ajiomaminas inim cimin mamamey. 35Ow, car damos aamjiamamokomas aporces, aram car domamkawi ow aporcenes.” Yesus inim aeef.

Yesus e Petrus apacincowas, atakam aotawef

(Mat. 26:31-35; Mrk. 14:27-31; Luk. 22:31-34)

36Bare, e Simon Petrus atakam Yesus aotawef. “Tuhan. Or ocenak asan jisoscem?” Inim aeef. E Yesus masirin, “Or wow e ajisoscey asan, bwemjamjisos asan opok. E nat, asep jofay oram erasan ajisoscemem.” Inim aeef. 37E Petrusam, “Tuhan. Dor wow or bwemjamjisos asan opok nat, ucimaram? Ow dor omamkawi ipic aporcenes, wunam dor acatiwcenes, bare akat ara.” Inim aeef. 38E Yesus, “Ow or domamkawi ipic aporcenes, wunam or acatiwcenes, or inimas akat aranew? Atakamnak ara, or atakam bar mamincop aotawcem, ‘Dor e Yesus nomsom opok,’ inim aecem, bare ayam jipic akoreycema.” Inim aeef.

Currently Selected:

YOHANES 13: LAICNS

Highlight

Copy