YOHANES 14

Yesus e Allah asanpu baysos bokotpu ara

1“Caram jak pwicak arapok. Allah basicimey. Doram basicimcan. 2E doricipic cem jowse arke ara. Eras atakamnak opok ayaw, dor atakam car emeotawfin. Doram carasan bakenemtitam ajisoscimin. 3Dor carasan bakenemtitam ajisoscey, wunam dor aofasineycimin. Car dorasan aofasimotometcimin. Inimas caram e aemapcey asan akac aemapcomom. 4Dor e ajisoscey asan e bokot jof caram camsom.” Inim aeef.

5Tomas masirin, “Tuhan. Dar e ajisoscem asan damsom opok. Inimas oratakam, E bokot jof caram camsom, inim emem nat, ucim inimaram?” Inim aeef. 6Yesus masirin, atakam e aramat ipic aotawef. “Dor e Allah asan baysos bokotpu awapey ara. Doram e atakamnak baporomtam ipic awapey ara. Doram e jiwnenak batatam ipic awapey ara. E dor ajamkawimenes ow cowok, e Allah asan ajisoscemes. 7Caram dor camsomnew, doricipicam camsom. Bare, wow ajiwar caram aramat ipic camsom. Caram abi emeporfokom.”

8E Filipus masirin, “Tuhan. E oricipic bi baporomtamcarowey. Inimas dar jak akatnakut aemapcomom.” Inim aeef. 9E Yesusam, “Filipus. Dor tareynakut akac car aemapawirum. E nat, dor camsom opoknew? Bare, e dobi aporfenes ow, e doricipic biam emcaporfes. Inimas e atakam atawmem, ‘E oricipic bi baporomtamcarowey,’ ucim inimaram? 10Doram, doricipicam, ow cowok inim awcawor ara. Car Inim atakam basicim opoknew? E dor atakam aotawminas, bare dorop atakam opok. E doricipicam, doram, ow cowok inim awcawor araman. Inimas e aemaminas e doricipic aemamaras ara. 11Bare, doram, doricipicam, ow cowok inim awcawor ara. Car e atawmin atakam basicim opoknew, e aemamin junum bweas baporey. Wunam dor basicimcan. 12Atakamnak ara, e dor asicimamenes ow, e aemaminas jipu acowoycemes. Wunam, dor e doricipic asan aojisoscimin. Inimas e ow aemcesas, bare awut inim ara. E aemaminas masirin, kanim ara. 13Caram do mamkawi ow awamcokom. Inimas car janim dor aanimcenokom, dor eras takas car aemtamcimin. Dor eras aemtamcey, ow, doricipic akatnakut ara, inimas aporcemes. 14Car do mamkawi ow awamcokom. Inimas e janim dor aanimcenokomas takas aemtamcimin.”

Yesus e Roh Kudus aneycowas, atakam aotawef

15“Car damos dor ajiomamenokomnew, caram e dojirmec ji aecomokom. 16Doram janim e doricipic aanimcimin. Aramat ipic masirin, wun jak fak bemapomtam ipic car atewnemtamceman. E ipicam car cowkon aatamemapawarcema. 17Er e Roh Kudus ara. Aramat ipic, e atakamnak car amememtamceman. Awames capinmias jak asinomames ow e aramat ipic bapor opok aemames. Aram e aramat ipic amsom opok. Inimas Allah, e aramat ipic e ow bwemtetam asan opok. E nat, aramat ipic cadam sotop awamec. Aram e cajak aman aemapcema. Inimas car e aramat ipic camsom ara.”

18“Dor car manma jiwi inim cimin bakan bwemjios asan opok. Doram cadampu aofasicimin. 19Bar arke opoknakap, awames capinmi ow, e dobi bapor opok aemcemenes. Car ara nat, e dobi aoporcemenokom. Dor aojaworsitcimin. Inimas caram jiwnenak aatamemapawarcomokom. 20Doram, doricipicam, ow cowok inim awcawor ara. Caram, doram, ow cowok inim awcawor ara. Bare, e Roh Kudus aenawcow jofay, car inimas aporkurumcomokom. 21Ow e dojirmec amsom aemamesnew, wunam e jirmec ji aemesnew, ar damos dor ajiomamenes ow ara. Doricipicam, e damos dor ajiomamenes ow, damos ajiomcema. Doram damos e ow ajiomcimin. Doram e ow dampu ameromcimin.” Yesus inim aeef.

22Yudasam atakam Yesus aotawef. “Tuhan. Or dadampu ameromcarowem, wunam or awames capinmias jak asinomames ow dampu bamerom opok, ucim inimaram?” Inim aeef. (E Yudas, Yudas Iskariot opok. Ar wun ipic juwas Yudas ara.) 23E Yesus masirin, “Ow damos dor ajiomcenesnew, ar doratakam ji aecemes. Doricipicam damos e ow ajiomcema. Doricipicam, doram, e ow aenawomcomom, wunam dar e ow cowkon aemapcomom. 24E damos dor bajiom opok ow, doratakam ji bwe opok aemames. E jen ajimokom atakam, bare doratakam opok. Er doricipic atakam ara. Aramat ipicam dor atewemfan.”

25“Dor car cowkon aemapmin ara, dor a atakam car aotawmin. 26Doram janim e doricipic aanimcimin. Inimas aramat ipic e jak fak bemapomtam ipic atewenamcema. Er e Roh Kudus ara. E Roh Kudus e atakam takas car amememtamceman. Aram, e atakam car aotawfinas takas, bi binip car aotetamceman. 27Caram jak akat emaptotorey. Dor e jak akat emamin ciminas car atatamtotormin. E atatamamin jak akat, awames capinmi atatamamaras cimin opok. Bare, caram jak pwicak arapok. Omaram arapok. 28Dor atakam car aotawfin. ‘Dor ajisoscimin, wunam dor car aoenawomcimin,’ inim aeof. Caram inim atakam jen ajifokom. Bare, doricipic awut ara. Dor masirin kanim ara. Doram e doricipic asan ajisoscimin. Inimas caram damosnak dor ajiomfenokom ayaw, caram jak akat emeemapfokom. 29Dor e aemceyas atakam bap car aotawfin. Asep jofay masirin, dor inimas aemcey, caram dor asicimcemenokom. 30Bare, awames capinmi aomomamar ipic aenawcema. Inimas dor atakam car boamtaw jirow opok aemcimin. E ipic nat, jirmec dor bwemjirim asan opok. 31Dor damos e doricipic ajiomamin. Doram e doricipic jirmec ajirimamanas takas ji aemin. Awames capinmi owam inimas baporces. Dey bare. Bajisosmoc.”

Currently Selected:

YOHANES 14: LAICNS

Highlight

Copy