YOHANES 12

Maria minyak wangi Yesus bwey ton aokomnemef

(Mat. 26:6-13; Mrk. 14:3-9)

1Bare, e Bakamsow Pokbwi bwem opok bar enam ajiwar aemamesef, Yesus e kota Baitani ajisosef. E Baitani, e Yesus e damir aafef ipic juwas Lasarus ajaworomsumutumef asan ara. 2Erasan ara, ow amos pok Yesus ajewtamfes. Lasarusam, wun owam, Yesusam, e amos pok memen akac aemapfes. Marta masirin, amos pok e ow atatamef. 3Mariaam, minyak wangi anakat juwas narwastu, setengah kilogramnew, atowomiwef. E minyak harga awutnakutas ara. Bare, e Maria e minyak e Yesus bwey bak ton aokomnemef, wunam e akus fin e bwey aerewef. E minyak pinimam e cem aman awutnakut aemtepef. 4E wun Yesus mamkawi ipic juwas Yudas Iskariot erasanam aemapef. Er e Yesus e jokmen ow aotasimemtamcow ipic ara. Aram atakam aotawef. 5“E minyak harga, uang dinar tiga ratus ajiwar ara. Ow, e minyak, kawey ow batetam, wunam e minyak uang batewet, inimas bwemji. Ar masirin, e uang e pok opok ow batetamji. Ar inimas bwem opok nat, ucim inimaram?” Inim aeef. 6Ar inim atakam atawef nat, ar e pok opok ow sawes akat boworpor opok. E nat, ar osom ipic ara. Ar Yesusam, amamkawi owam, e aruang ese manmok batiwtam ipic ara. Aram e uang osom aea ajimep.

7E Yesusam atakam aotawef. “Aramat cowoc inimas baemerec. E aemamanas, e do damir aafcey jofayas ara. 8E pok opok ow cadam sotop aatamemapawarcemes. Do nat, cadam sotop bwematamemapawar asan opok.” Inim aeef.

Ow Lasarus bacatiw at aetiwfes

9Yahudi ow arkenakutam, “E Yesus Betani awamec,” inim atakam jen ajifes. Ar masirin, aramat ipic bi bapor ajisosfes. E nat, ar e Yesus bi bapor cowok baysos opok. Aram e Yesus ajaworomsumutumef ipic juwas Lasarus bi bapor ajisosfes. 10-11Yahudi ow arke e Lasarus aojaworsitef atakam, atakamnak aporfes. Inimas ar e Allah atakam mamtaw tugas ow awut atakam ji boe opok aemfes. E nat, ar Yesus asicimfes. E Allah atakam mamtaw kepala owam inimas aporfes, wunam e Lasarus bacatiw at aetiwfes.

Yesus keledai bak ton Yerusalem ajarapef

(Mat. 21:1-11; Mrk. 11:1-11; Luk. 19:28-40)

12Bare, ajofay ara, e pokbwi bwem aapenawfes ow arkenakut, atakam jen ajifes. “Yesus a Yerusalem apenawem.” Inim atakam jen ajifes. 13E ow masirin, jusun po inim awcaworas atowomtotorfes, wunam Yesus biamnuk memamtew aapenfes. Aram atakam afakaytawa aefes. “Dormomo! Tuhan asan akat e atewenamamar ipic baomcow! Aramat ipic e Israel raja ipic ara. Asan akat baemapcow!” Inim aefes. 14Yesusam ay keledai cowok apowtewef, wunam ar e keledai bak ton atometapef. Er e Alkitab atakam jipu ara:

15“Kota Sion aemapmokom owa. Caram omar arapok.

Jakaperey. E caraja ipic enawem. Ar ay keledai bak ton aemapma.”

E Alkitab atakam inim aema. 16Bap ara, e Yesus mamkawi ow, e Yesus aemefas amsomnak opok. E nat, asep jofay, Allah e Yesus onam op aotowotometef. E jofay ara, e Yesus mamkawi ow e Alkitab atakam, bi binip acomomfes. Ar masirin, e ow e Yesus aomfesas, e Alkitab atakam jipu aporfes.

17Bap ara, Yesus e Lasarus e awerem aman bafis jirmec ajirimef, wunam ar e Lasarus aojaworomsumutumef. E Yesus inimas aemef ara, wun owam akac aememfes. Asep ara masirin, e ow e Yesus aemefas, atakam kawey ow aotawfes. 18Ow arkeam, e Yesus e junum bweas aemef, atakam jen ajifes. Inimas e ow arke e Yesus biamnuk aemamtewfes. 19E Parisi owam aramaman atakam aamtawfes. “Jakaperey. Dar fak opok openow. Ow takas e aramat ipic ajamkawimes!” Inim aefes.

Wun Yunani samat ow Yesus apowfes

20Bare, e Yerusalem pokbwi bwem aapenawfes ow, Allah basicim aapenawfes. E wun ow, bare Yunani samat ow ara. 21E Yunani ow, e kota Betsaida ipic juwas Filipus ameromfes. (E kota, Galilea capinmi kota ara.) E owam atakam Filipus aotawfes. “Dar e Yesus bi bapor.” Inim aefes. 22E Filipus masirin, e atakam Andreas aotawef. E Andreasin Filipus masirin, e Yesus ameromfes, wunam e atakam Yesus aotawfes.

23E Yesusam atakam e ow aotawef. “Allah e Asmat Anakat Ajaworemef Ipic, e onam op asan akatnakut batowotomet jofay, bare sotop ara. 24Atakamnak ara, ow gandum eke se aman aapomcemes. E eke masirin, junuw aemapcema. E eke inimas bwem opok aemcow, ar aporsipor, eke cowoknakap aemapawarcema. E nat, e eke junuw aemapcow, ar akan ajitcema. Wunam eke arke apecema. 25Asmat owam tetakay batamemawar bi binip awut aceceremces, ar jiwne opok aemcemes. E nat, ow awames capinmi tetakay batamemawar bi binip opok aemces, ar e onam op jiwnenak aatamemapawarcemes. 26Ow kerja do bwemtam akat aeces, aram do bajamkawicenes. Inimas e ow, e aememcey asan, dor akac aememcomom. Doricipicam e do kerja bwemtam ow, ow akat atakam atawcema.”

Yesus e damir aafcowas atakam aotawef

27“Bare, dor jak pwicak aemapmin. Do nat, ucim atakam atawcey? ‘Diwi. Dor Bajurusum arapok,’ Inim atakam atawceynew? Do nat, inim atakam bataw opokut aemcimin. Doram bajurusum aenawof araman. 28Diwi. Ow, ‘Tuhan Allah akatnakut ara,’ inim atakam baotawcenes.” Yesus inim aeef. Allah masirin, e onam op, atakam aotawnemef. “Dor akatnakutas aemof. Inimas ow, dor akatnakut, atakam aotawfenes. Doram inimas aoemcimin.” Inim aeef. 29E erasan aememfes ow arke, e atakam jen ajifes. Ar masirin, “E wir ara,” inim aefes. E wun ow masirin, “Malaikat atakam a aramat ipic aotawma.” Inim aefes.

30E Yesusam, “E Allah e tawnemamar atakam, doras opok. E caras ara. 31Allah, a asmat ow e dosa aemfesas jipu siksa bwem, inim atakam basakamtiw jofay, bare emcaenawef. Aram awames capinmi aomomamar ipic akumimosomcema. 32Ow dor e salib os op atewtopomcenes, dor ow takas do bwenawom ajatecimin.” Inim aeef. 33Yesus inim atakam atawef ara, ar e salib os op damir aafcowas, atakam e ow aotawef ara.

34E ow arkeam atakam e Yesus aotawfes. “Dar e daragama Jirmec surat atakam jen ajifom ara, ‘E Allah Aeremtewef Ipic jiwne aatamemawarcema.’ Inim atakam jen ajifom. E atawmem atakam nat, ‘Ow e Asmat Anakat Ajaworemef Ipic salib os op atewtopomcemes,’ inim aemem. E Asmat Anakat Ajaworemef Ipic nat, ca ipicam?” Inim aefes. 35E Yesus masirin, “E sereas e cadampu aemapawirin. E nat, ar bar arke opok cadampu aemapceman. Car e sereas e carasan apormokom, caram bajarey. Car e bowsec jiwic aman mememasin. E Jiwic aman ajarmes ow, e ajarmes asan bwempor asan opok. 36Wow e sereas e cadampu aemapman. E nat, ar ajisoscema. Inimas caram wow e sereas basicimey. Car masirin, jiwic aman boemap opok ow aemapcomokom.” Inim aeef.

Wun ow Yesus basicim opok

Yesus inim atakam atawef masirin, ajisosef. Aram acukapef. 37Ametnak ara, aramat ipic junum bweas arke e ow bipu aemef. E nat, e ow e aramat ipic basicim opokut aemfes. 38Er e Allah atakam botaw ipic juwas Yesaya e atawef atakam jipu ara:

“Tuhan. Ow e atemen aatamfomas basicim opokut aemames.

Aram e ofakas bapor opokut aemames.”

Yesaya inim aeefen. 39-40E Yesayaam wun atakam atawefen:

“E Allah atakam, ‘Dor ow manmok kapi inim cimin aemapomof.

Doram bi binip jiwic e ow atetamof. E ow e amanmok, anakatas baporasin. Aram bi binip umuton baceceremasin. Aram e pwicakas bak bapayemasin. Doram e ow bajortawasin.’ Allah inim aeef.”

E Yesaya inim atakam atawefen. Inimas e ow e Yesus bwemsicim asan opok. 41E Yesaya e Yesus akatnakut aporefen. Inimas ar inim atakam atawefen. Bare, ar e Yesus atakam atawefen.

42Bare, e wun Yahudi kepala ow arkeam e Yesus asicimfes. Aramat ow nat, e Parisi ow aporfes. Inimas ar e Yesus asicimfesas, atakam kawey ow botaw opok aemfes. E Parisi ow, ar sembahyang cem bafiw, acuw batasin. 43Bare, e Yahudi kepala ow, asmat ow, a basicim, bi binip awutut aceceremfes. E nat, ar Allah a basicim, bi binip kanim inim aceceremfes.

E Yesus atawef atakam, ow adosa, umuton aporomtamcema

44Bare, Yesus atakam awut afakaytawef. “E dor asicimamenes ow, dor cowok basicim opok aemames. Aram e atewenamfan ipic asicimames. 45E dobi apormenes ow, e dor atewenamfan ipic biam apormes. 46Dor sereas anakat ara. Dor awames capinmi aneyofas, aram e dor asicimamenes ow jiwic aman boemapasin. 47Wun ow e doratakam jen ajimes, wunam ar e doratakam ji bwe opok aemes. Do nat, e ow adosa atakam basakatiw opok. Dor asmat dosa, atakam basakamtiw baney opok. Do nat, asmat ow bajortew aneyof. 48Wun ow dor aotpemamenes. Ar doratakam ji bwe opok aemes. E nat, e atawof atakam, e Asepnak Jofay, e ow adosa umuton aporomtamcema. 49E atawof atakam dorop atakam opok. E nat, doricipic atewenamfan. Aramat ipic e atakam atawofasam, e afasimofasam, jirmec dor ajirimfan. 50Ow e doricipic jirmec ajirimfan atakam ji aeces, aram jiwnenak aatamemawarcemes. Dor inimas nomsom. Inimas ara, dor e doricipic aotawfan atakam cowok aootawcimin.” Yesus inim aeef.

Currently Selected:

YOHANES 12: LAICNS

Highlight

Copy