YOHANES 11

Lasarus damir aafef

1Bare. Jipic juwas Lasarus dam ajowef. Ar kota Betania ipic ara. E kota, Mariaam, arupic juwas Martaam, akota ara. 2Bap ara, e Maria, minyak wangi, e Tuhan bwey aokomnemef. Wunam aramat cowoc e afin, e Yesus bwey aerewef. E Maria, e dam ajowef ipic juwas Lasarus, atarsowoc ara. 3Bare, e atarsepes ow Yesuspu atewosomfes. “ ‘Tuhan. E damos ajiemamem ipic dam awutnakut awames,’ inim mameey.” Inim aefes.

4Bare, e Yesus inim atakam jen ajief ara, aram atakam aotawef. “E Lasarus dam awames, aram damiras opok. Er ow Allah akatnakut baporomtamas ara. Inimas, ow e Allah atiwam akatnakut aporcemes.” Inim aeef. 5Bare, e Yesus damos e Martaam, e aromwesam, e Lasarusam, ajiomef. 6E nat, aramat ipic e Lasarus dam awames atakam jen ajief, ar bar jamnuk aoememef. 7Bar jamnuk aoememef masirin, atakam e amamkawi ow aotawef. “Dey. E Yudea capinmi bajisosmoc.” Inim aeef.

8E amamkawi ow masirin, “Guru. Jowon cowok, e Yahudi ow, ek e odampu bajimirokopom aemfenes. Or masirin, erasan ucimas ajisoscemnew?” Inim aefes. 9E Yesusam, “Bar cowok aram jam dua belas ajiwar ara. Ow jok ajarcesnew, ar awames capinmi sereas aporcemes. Inimas pok, e abweybi bapomot opok aemcema. 10E nat, iram sereas opok ara. Inimas ow iram ajarcesnew, pok e bweybi aapomotcema.” Inim aeef. 11Wunam Yesus wun atakam aotawef. “E dajowow ipic juwas Lasarus, bare isi emcapwitamesef. Do nat, aramat ipic bajitim ajisoscimin.” Inim aeef.

12E Yesus mamkawi ow masirin, “Tuhan. Aramat ipic isi apwitamesefnew, aram arma ajaworsitcema.” Inim aefes. 13Bare, Yesus, e Lasarus damir aafefas atakam atawef. E nat, aramat ow, e Yesus, e Lasarus desen isi pwitamesef atakam atawef inim ara. 14Yesus masirin, atakam umuton e ow aotawef. “E Lasarus, bare damir emcaafef. 15Dor erasan akan bakos opok aemof ara, eras car do basicimas ara. Inimas dor erasan memem opok ameof, jak akat aememamin. Dey. Dar Lasarus e asan jisosmoc.” Inim aeef. 16Tomas masirin, atakam e wun Yesus mamkawi ow aotawef. “Daram bajisosmoc. Daram e aramat ipic damir akac baf.” Inim aeef. (Bare, e Tomas e wun juwas Kapomipic ara.)

Yesus, ow bajaworomsumutumtam ipic ara

17Bare, e Yesus erasan ajaremef ara, e Lasarus sumu ipic, e kubur aman bar empat ajiwar emcaemamesef. Yesusam inimas aporef. 18Yerusalem capinmi memem, wunam Baitania capinmi ajiwar bajarem, aram kilometer tiga ajiwar ara. 19Yahudi ow arke e Martaam, Mariaam, ameromfes. Ar e arowtipic damir aafef atakam jen ajifes, wunam ar jak akat e cepes jamnuk bemapom ameromfes. 20E Martaam e Yesus aenawef atakam jen ajief ara, ar aramat ipic biamnuk memamtew ajisef. E Maria nat, e cem aman aemapef. 21Bare, e Marta atakam Yesus aotawef. “Tuhan. Or arasan emem ayaw, e dorowtipic damir bwemaf asan opok. 22E nat, Allah, e janim aanimcemas, or atetamceman apormin ara.” Inim aeef. 23Yesusam atakam e cowoc aotawef. “E orowtipic aojaworsitcema.” Inim aeef. 24E Marta masirin, “E Asepnak Jofay e damir ow takas aojaworsitces ara, e aramat ipicam aojaworsitcema. Dor inimas nomsom.” Inim aeef. 25E Yesusam, “Dor ow bajaworomsumutumtam ipic awamcey ara. Doram jiwnenak batatam ipic awamcey ara. E dor asicimamenes ow damir aafces, aram jiwnenak aatamemawarcemes. 26E dor asicimamenes tetakay ow, damir opok cowok aemcemes. Or a atakam basicim open?” Inim aeef. 27E Marta masirin, “Tuhan. Or e Allah Aeremtewef Ipic araman. Or Allah atiw araman. Or awames capinmi baneyap manmok afeawirum ipic araman. Dor inim atakam asicimamin ara.” Inim aeef.

Yesus bwec abwecef

28E aramat cowoc inim aeef masirin, ar e aromwes juwas Maria bayte ajisosef. Aram e Maria atakam arpuak asan aotawef. “E Guru awamec. Or ajateman.” Inim aeef. 29E Maria inim atakam jen ajief, aram asarimsitef. Aram e Yesus bipu ameromef. 30E Yesusam e cemsan bajarem opok. Ar e apem inim emapef. Aram Marta biamnuk aemamtewfes asan cowok ara. 31Bare, Yahudi owam e Maria e cem aman akac aemapfes. Ar jak akat e aramat cowoc bemapom aemapfes. Aram e Maria asarimsitef aporfes. Aram aramat cowoc a cem afisef aporfes. Ar masirin, e afa asoromfes. Ar e Maria e awerem asan bwec babwec ajisosef inim ara. 32E aramat cowoc nat, e Yesus aemapef asan ajaremef. Aram Yesus bi aporef. Ar Yesus bi aporef masirin, e abipu bi fop aneyjiapef. “Tuhan. Or arasan emem ayaw, e dorowtipic damir bwemaf asan opok.” Inim aeef. 33E aramat cowocam bwec abwecef. E ajamjarfes Yahudi owam bwec abwecfes. E Yesusam e ow e bwec abwecfes aporef. Inimas aram jak pwicak awutnakut aememef. 34Atakamam aotawef. “Car e Lasarus sumu ipic onak asan jiwtatiwfokom.” Inim aeef. E ow masirin, “Tuhan. Oram dey, baporey.” Inim aefes. 35Bare, Yesus bwec abwecef. 36E Yahudi owam atakam atawfes. “Jakaperey. E aramat ipic e Lasarus damos awutnakut ajiomef.” Inim aefes. 37E wun Yahudi ow nat, “Aramat ipic e manmok kapi ipic manmok ateremef. Bare, jowan e Lasarus dam awutnakut ajowef. A Yesus nat, Lasarus baworomtew fakas aomomef ara openow. Aram e Lasarus ajaworomtewef ayaw, e Lasarus damir baf opok.” Inim aefes.

Lasarus aojaworsitef

38Bare, Yesus jak pwicak awutnakut aoememef, wunam e awerem asanpu ameromef. E awerem, bare ek jip ara. Bap ara, ow, ek petam awut e jip imwi emcakapimapomfes. 39Yesusam atakam aotawef. “E ek petam bapwepweremosomey.” Inim aeef. E damir aafef ipic atarsowoc juwas Marta nat, atakam Yesus aotawef. “Tuhan. E Lasarus nat, damir bar empat ajiwar aemamesef. Inimas aram pinim awutut ara.” Inim aeef. 40E Yesus masirin, “Dor atakam or emcaotawey. ‘Or asicimcem, or e Allah akatnakutas aporcemem.’ ” Inim aeef.

41Inimas ara, e ow e ek petam apwepweremosomfes. Yesus masirin, manmok op atiwef, wunam atakam aotawef. “Diwi. Or e doratakam aotawminas jen ajimem. Terima kasih. 42Or e doratakam takas jen ajiawarmem. Dor inimas nomsom. E nat, dor awamces ow arke apormin. Inimas dor a atakam or aotawmin. Eras a ow, or dor atewenamfenem baporomas ara. E ow inimas basicimces.” Inim aeef. 43Ar inim atakam aotawef masirin, atakam awut afakaytawef. “Lasarus. Ajisey.” Inim aeef. 44Bare, e damir aafef ipic ajisef. Bap ara, ow e sumu ipic banam, bweyam, biam, picin biram ajiktiwfes. Ajisef ara, ar e picin epcom ajisef. Yesus masirin, atakam erasan aememfes ow aotawef. “E picin biram basurumey. Aramat ipic asan akat e acem ajisoscow.” Inim aeef.

Ow Yesus bacatiw at aetiwfes

(Mat. 26:1-5; Mrk. 14:1-2; Luk. 22:1-2)

45E Maria ameromfes Yahudi ow arke, e Yesus aemefas aporfes. Inimas ar aramat ipic asicimfes. 46E wun Yahudi ow nat, e Parisi ow ameromfes, wunam e Yesus aemefas atakam e ow aotawfes. 47Inimas ara, e Allah atakam mamtaw tugas ow awutam, e Parisi owam, e Yahudi capinmi kepala ow barewsiap, janim aanimfes. Aram atakam e ow aotawfes. “E Yesus junum bweas arke aemama. Da nat, ucimas aemcom? 48Dar e ipic desen soromemcom, ow takas e ipic asicimcemes. E Roma samat owam aenawcemes. Ar e darAllah cem ajumporsomtiwkurumcemes. Aram, e dapemerintah ajumnemcemes.” Inim aefes.

49E wun ipic cowok juwas Kayafas ara. E tahun ara, ar Allah atakam mamtaw ipic awut tugas aemef. Aramat ipic atakam e ow aotawef. “Caram camsom opok cowok. 50Jipic cowok, a ow takas damir baftamnew, wunam e dasamat ow takas damir baf opoknew, bare akat ara. Eras, car asan akat bwemtamas ara. E nat, car inimas camsom opok.” Inim aeef. 51E atawef atakam, bare arop atakam opok. E nat, e tahun ara, ar Allah atakam mamtaw ipic awut tugas aemef. Inimas ar e Yesus, e Yahudi samat ow, damir aaftamcowas, atakam aotawef. 52E Yesus damir aaftamcowas, e Yahudi samatas cowok opok. Allah, e samatin samatin ow, atiperes memem akat arawen. Aram e atiperes takas, ow samat cowok baramsimapom akat arawen. E Yesus damir aaftamcowasam, inim bwemas ara. Bare, e Kayafas eras atakamam aotawef. 53Inimas ara, e jofay ajiwar, e Yahudi ow e Yesus bacatiw at aetiwfes.

54Inimas ara, Yesus e Yahudi ow capinmi umuton bojar opok aemef. Ar e capinmi bakan ajiosef, wunam kota juwas Efraim ajaremef. Er e cem opok capinmi sotop ara. Erasan ara, aramat ipic e mamkawi ow akac aemapfes.

55Bare, e Yahudi pokbwi juwas Bakamsow Pokbwi jofay sotop asisienawef. E samatin samatin ow arke, e pokbwi jofay sotop aporfes. Ar masirin, e pwicakas aemtotorfes bemosom, e Yerusalem ajisosfes. Eras e Yahudi agama tareyas jipu ara. 56E owam e Yesus apowporfes. Ar e Allah cem aman ememfes, wunam atakam aamtawfes. “Car ucim bi binip aceceremamokom? E aramat ipic a pokbwi bwenaw opok openow.” Inim aefes. 57Bap ara, e Allah atakam mamtaw tugas ow awutam, e Parisi owam, jirmec emejirimfes. “Ow, e Yesus asan aporces, atakam dar baotawcarowos. Dar e ipic ban bakimomji.” Inim aefes.

Currently Selected:

YOHANES 11: LAICNS

Highlight

Copy