YOHANES 10

Domba baposomtew atakam

1Yesusam atakam aootawef. “Atakamnak ara, ow e domba asan pagar jimasap bafiw opok aemces, wunam ar e pagar ajitneyces, bare e ow domba osom ow ara. Ar kawey pok ces bwetaw ow ara. 2E nat, e pagar jimasap afiwcemar ipic, domba manmok batiw ipic ara. 3E jimasap manmok batiw ipicam, e jimasap, e domba manmok batiw ipic apayimtamcema. E dombaam e amanmok batiw ipic atakam jen ajimes. E ipicam e adomba juwas aporsipor ajijitawcema. Ar masirin, e domba e cesen bap ajaromatcema. 4Ar e domba takas afimisimkurumcow, ar e domba bap ajaromatcema. E adombaam e ipic atakam amsom. Inimas ar e ipic fa asoromomatcemes. 5E dombaam kawey ipic fa bwemsoromomat asan opok. Aram kawey ow atakam amsom opok. Inimas ar kawey ow aporces, omar ajisoscemes.” 6Yesus inim baposomtew atakam e ow aotawef. E ow nat, e atawef atakam jen baji opok.

Yesus e domba manmok batiw ipic akat ara

7Bare, Yesus atakam e ow aootawef. “Atakamnak ara, dor e domba asan jimasap inim cimin awamcey ara. 8Dor asep aenawof. Wun ow nat, bap aenawfes. E bap ow takas osom ow ara. Aram kawey pok ces bwetaw ow ara. E domba nat, e ow atakam jen baji opok aemfes. 9Dor e jimasap inim cimin ara. E jimasap afiwces ow ajoremcemes. E ow e domba asan pagar afiwa aecemes inim cimin ara. Aram e cesen afisa aecemes inim cimin ara. Wunam ar fumin akat aana aecemes inim cimin ara. 10E osom ow, pok osomam, ow sanaw bwetiwam, pok bafakamam, inim cowok bwem aenawcemes. Do nat, jiwnenak, ow batetam aenawof. Er e jiwneas anakat ara.”

11“Doram e domba manmok batiw ipic akat awamcey ara. E domba manmok batiw ipic akat, e adomba damir baftam aememama. 12E wun gaji kerja ow nat, domba manmok batiw ownak opok. Aram domba aramat ow opok. Inimas ar wasan juwur aporces, omar ajisoscemes. Aram e domba bakan ajioscemes. E wasan juwur masirin, e wun domba aawumtowopcemes. Aram e domba takas awumtiwcemes. 13Ar gaji kerja ow cowok ara. Inimas ar e domba binip opok aemcemes.”

14-15“Bare, dor e domba manmok batiw ipic akat awamcey ara. Doricipic aram dor amsom. Doram e doricipic nomsom. Inimasam dor e dodomba namsom. E dodombaam dor amsom. Doram e dodomba damir baftam aememamin. 16Doram wun domba arke awomcey. E domba nat, awames domba asan pagar bafiw opok. Doram e domba bafimim jak aseremomamin. Aram doratakam jen ajicemes. Aram arasan domba cowkon takas aememcemes. Wunam dor e domba takas amanmok batiw ipic dorop aememcimin.”

17“Dor damir aafcimin, wunam aojaworsitcimin. Inimas doricipic damos dor ajiomaman. 18Dor damir baf pwicak aemamin ayaw, ow dor bwemcatiw asan opok. Do nat damir baf akat aemamin. Dor damir akat aporcey, bare damir aafcimin. Doram bojaworsit akat aporcey, aojaworsitcimin. Eram e doricipic jirmec ajirimfanas jipu ara.” Yesus inim aeef.

19E Yahudi owam inim atakam aporfes, wunam atakam awutnakut aoamtawfes. 20Wun ow arke atakam, “Dat e ipic jak aman awap. Ar jayic ara. Caram aratakam jen ajimokom, ucim inimaram?” Inim aefes. 21E wun ow nat, “E dat jak aman awapes ow, inim atakam bwemtaw asan opok. Datam manmok kapi ow manmok bwemteremtam asan opok.” Inim aefes.

Yahudi ow Yesus atakam aopowfes

22Bare, ametnak ara, ow, e Allah cem akenemapomfesen. E Allah cem akenemapomfes bi binip bacecerem pokbwi jofayam aenawef. E Yerusalem owam e pokbwi aemfes. E jofay aram jufu bwi enemtepef ara. 23Yesusam e Allah cem aman ajaref. E ajaref asan juwas Salomo Cemko ara. 24E Yahudi owam e Yesus fumi aamwiciromfes, wunam atakam aotawfes. “Or e Allah Aeremtewef Ipic aranew, or e ipic opoknew, daram namsom opok. Or e aemamemas, atakam umuton opok atawmem. Or inim atakam umuton opok, ucim jofay ajiwar atawcem? Or e Allah Aeremtewef Ipic anakat aranew, atakam umuton otawcarowey.” Inim aefes.

25E Yesus atakam, “Dor atakam car emcaotawfin. Ca nat, doratakam basicim opok. Bare, doricipic e afakas atetamfan. Dor masirin, junum bweas aemamin. E junum bweas, e Allah dor atewenamfan inim baporomas ara. 26Car dodomba opok. Inimas car do basicim opok aemamokom. 27E dodomba e doratakam jen ajimes. Doram e dodomba nomsom. Aram dor ajamkawimenes. 28Doram e jiwnenak batamemawaras e dodomba atatamamin. Ar masirin, daniwis bemap opok cowok aemapawarcemes. Owam, e domba, e doban ton, ces bwemetaw asan opok. 29E doricipic e domba dor atatamfan. Aramat ipicam awutnakut ara. Wun ow takas kanim ara. Inimas ow e domba e doricipic ban ton ces bwemetaw asan opok. 30Doram, doricipicam, bare awcawor ara.” Inim aeef.

31Bare, e Yahudi ow, ek, e Yesus dampu bajimir aotawfes. 32Yesus masirin, atakam e ow aotawef. “Doricipic, akatas arke bwem, jirmec ajirimfan. Dor masirin, e akatas, e cabipu aemamin. Inimas car ek bajimir emenokom, ucim akat pok emaminaram?” Inim aeef. 33E Yahudi ow masirin, “Dar ek e odampu bajimir aemenom ara, er akatas emamem opok. O nat, Allah pwicak atakam atawmem. Or desen asmat ipic cowok ara. E nat, oratakam, ‘Dor Allah ara,’ inim aemem. Inimas dar ek e odampu bajimir aemenom ara.” Inim aefes. 34E Yesus masirin, “Ow, Allah atakam, e caragama Jirmec Surat aman aeapomfes. E Allah e wun atakam, ‘Dor atakam car aotawfin, “Car allah ara,” inim aeof.’ Allah inim atakam atawef. 35Bare, Allah atakam e ow aotawef, ‘Car allah ara,’ inim aeef. Daram e Alkitab atakam, bounumtiwas opok apormom. 36Bare, doricipic dor aeremtewfan. Aram dor awames capinmi atewnamfan. Wunam, dor atakam aotawmin ara, ‘Dor Allah atiw ara,’ inim aemin. Caram inimatakam apormokom, wunam, ‘Or Allah pwicak atakam atawmem,’ inim aemokom. Car inim atakam nat, ucim inimaram? 37Dor e doricipic jirmec ajirimfanas bwem opoknew, bare caram doratakam basicim arapok. 38Car doratakam basicim opok openow. E nat, dor e doricipic jirmec ajirimfanas aemaminnew, car e aemaminas atakam basicimey. Inimas car doricipicam, doram, ow cowok inim awcawor aporcomokom. Caram eras camsom aemapcomokom.” Yesus inim aeef. 39E ow inim atakam aporfes, wunam ar Yesus ban bakimom aoemporfes. Yesus nat, e ow bakan ajiemef.

40Bare, Yesus e Yordan jo poman aojiref. Ar e Yohanes bwi abwimef asan ajisosef. Aram erasan tarey pwiciri aemapef. 41Ow arkeam aramat ipic ameromfes. Aram atakam atawfes. “E Yohanes, junum bweas bwem opok. E nat, e Yohanes, e Yesus, atakam atawef. E atakam atawefas takas, bare atakamnak apormom ara.” Inim aefes. 42Bare, erasan ow arke, Yesus asicimfes.

Currently Selected:

YOHANES 10: LAICNS

Highlight

Copy