YOHANES 9

Yesus manmok kapi ipic manmok ateremtamef

1Bare. Yesus aojaref. Aojaref, aram manmok kapi ipic aporef. E ipic manmok kapi, jak aman ewomisef. 2E Yesus mamkawi owam jonow atowporfes. “Guru. Awap ipic manmok kapi jak aman ewomisefas, dosa ca emef? Awap ipic aranew? Aricipicin arosowoc aranew?” Inim aefes. 3E Yesus masirin, “E ipic manmok kapi jak aman ewomisefas arop dosa opok. Aram aricipicin arosowoc dosaas opok. E nat, Allah, e afakas baporomtam aemef. Ar e ipic manmok bateremtam aemef. Inimas ara, e ipic manmok kapi jak aman ewomisef. 4Dar e dor atewenamfan ipic akerjaas jok bwemtamji. Aram jo aticema. Ow jiwic aman kerja bwemem asan opok. Inim aeef. 5Dor awames capinmi aemapmin ara, dor a capinmi ow sere aseremtamamin.” Inim aeef.

6Inim aeef masirin, bese, capinmi ajinemef. Aram e bese se aartamef. Wunam ar e se e ipic manmok aaramapomef. 7Yesus masirin, atakam e ipic aotawef. “Or e bwi asan juwas Siloam jisosey. (‘Siloam’ daratakam juw buwumtew, ‘batewnemas’ ara.) Oram e omanmok bwi bacicikimey.” Inim aeef. Bare, aramat ipic ajisosef, wunam e amanmok bwi acicikimef. E amanmok masirin, atereyef. Aram manmok akatipic ateremenawef.

8E ipic acem sotop owam, e ipic ametnak uang janim aanimawiri aporfes owam, jonow atowporfes. “Awap ipic e uang janim manim aemapawiri ipic aranew?” Inim aefes. 9E wun ow atakam, “Ar e ipic araman,” inim aefes. E wun ow masirin, “Ar e ipic opok. E nat, ar e ipic bi awcawor ara.” Inim aefes. E manmok kapi aemapawiri ipic nat, “Dor e ipic araman.” Inim aeef. 10E ow masirin, jonow e ipic atowporfes. “E omanmok atereyor nat, ucim inimaram?” Inim aefes. 11E ipicam, “Jipic juwas Yesus beseam, seam, aartamor, wunam e se e domanmok aaramapoman. Aram atakam aotawan, ‘E Siloam jisosey. Oram e omanmok bwi bacicikimey.’ Inim aean. Dor masirin ajisosey, wunam e domanmok bwi acicikimey. Wunam e domanmok atereyor.” Inim aeef. 12E ow masirin, “E Yesus onakaram?” Inim aefes. E ipicam, “Doram nomsom opok.” Inim aeef.

Parisi ow e ipic manmok ateremefas, jonow atowfes

13Bare, e ow e manmok kapi aemapawiri ipic e Parisi owpu atowocenfes. 14E Yesus e beseam, seam, aartamef, wunam e ipic manmok ateremtamef jofay, bare Ses Ban Jo ara. 15E Parisi owam jonow e ipic aotowporfes. “E omanmok atereyor nat, ucim inimaram?” Inim aefes. E ipic masirin, “E Yesus se e domanmok aaramapoman. Dor masirin, e domanmok bwi acicikimey. Doram wow manmok atiwmin.” Inim aeef.

16E wun Parisi ow masirin, “E inimas aemor ipic a Ses Ban Jo jirmec ji bwe opok ara. Inimas Allah e ipic batewenam opok apormom ara.” Inim aefes. E wun ow nat, “Dosa ipic, inim junum bweas bwem nat, ucimaram?” Inim aefes. Bare, e ow e aramat ipic aemefas, atakam aamtawfes. 17E owam atakam e manmok kapi ipic aotawfes. “Or e ipic e omanmok ateremtaman atakam atawmem. E ipic nat, ca ipicam? Or ucim atakam atawmem?” Inim aefes. E ipic masirin, “Bare, e ipic Allah atakam botaw ipicut araman.” Inim aeef.

18E Yahudi ow, e ipic manmok kapi jak aman ewomisef, wunam e manmok aotereyef, inim atakam jen ajifes. E nat, ar inim atakam basicim opokut. Inimas ar e ipic arisepes ajatefes. 19Aram jonow e arisepes atowporfes. “Awamec ipic catiw aranew? Caratakam, ‘E datiw manmok kapi jak aman ewomisef,’ inim aefokom. Ar awamec ipic aranew? E ipic nat, wow manmok atiwma. Ucim inimaram?” Inim aefes. 20E arisepes masirin, “Aramat ipic e datiw araman. Aram manmok kapi jak aman ewomisef araman. 21E nat, wow ajiwar manmok atiwma. Ucim inimaramnew? Daram e amanmok ateremor ipicam damsom opok. Caram jonow e aramat ipic carma towporey. Ar esepen jiwi opok. Aram atakam arma atawcema.” Inim aefes. 22Bap ara, e Yahudi ow atakam aamsakamfes. “Ow atakam atawces, ‘E Yesus, e Allah Aeremtewef Ipic ara,’ inim aeces, dar e ow e sembahyang cem bafimisimamoc.” Inim aefes. E ipic arisepesam inim atakam aporfes. Inimas ar e atakam e Yahudi ow aotawfes. 23E atakam ara, “Ar esepen jiwi opok. Jonow aramat ipic carma towporey.” Inim aefes.

24Bare, e Yahudi ow e manmok kapi aemapawiri ipic aojatefes. “Allah manmok tiwap. Inimas atakamnak otawcarowey. Dar e Yesus dosa ipic apormom ara.” Inim aefes. 25E manmok kapi aemapawiri ipic masirin, “E Yesus dosa ipic aranew, dosa ipic opoknew, doram nomsom opok. E nat, dor manmok kapi aemapawiru. Wow masirin, dor manmok atiwmin. Dor inimas nomsom anakat ara.” Inim aeef.

26E owam, “E ipic or ucimas aeman? Ar e omanmok atereman, ucimas emor?” Inim aefes. 27E ipic masirin, “Bare, dor atakam car emcaotawey. Ca nat, e atakam jen baji opok. Car e atakam jen boji ucim inimaram? Caram e ipic mamkawi akat aranew?” Inim aeef. 28E ow masirin, cemew atakam e manmok kapi aemapawiri ipic aotawfes. “Or e ipic ajamkawimem ara. Da nat, Musa atakam ajamkawimom ow ara. 29Allah, atakam, Musa aotawef araman. Daram inimas namsom. E nat, e ipic aewenawef asan namsom opok.” Inim aefes.

30E manmok kapi aemapawiri ipicam atakam e ow aootawef. “E ipic domanmok atereman. E nat, car e ipic e aewenawef asan camsom opok. Bare, dor e atawmokom atakam junum awut aemin. 31Allah, dosa ow janim aanimcesas, jen baji opok aemcema. E nat, ow Allah asicimcesam, aratakam ji aecesam, bare Allah e ow janim aanimcesas jen ajicema. Dar inimas namsom. 32Ametnak ara, ow manmok kapi jak aman ewomisef ipic amanmok baterem, bare opok cowok. A ipic nat, inimas cowok aemor. 33Allah a ipic batewenam opok ayaw, ar inimas bwemem asan opok.” Inim aeef. 34E ow masirin, “Ajisamesfem ara, oram dosa ipic anakat aemamesfem. Or masirin, atakam dar mamememtamut arawe?” Inim aefes. Bare, ar e manmok kapi aemapawiri ipic, e Allah cem aotewerisimfes.

Bi binip jiwic ow, manmok kapi ow inim cimin ara

35Bare, Yesus, e ow, e manmok kapi aemapawiri ipic aotewerisimfes, atakam jen ajief. Ar masirin, e ipic apowtewef. Apowtewef masirin, ar jonow e aramat ipic atowporef. “Or e Asmat Anakat Ajaworemef Ipic basicim open?” Inim aeef. 36E ipic masirin, “Tuan. E Asmat Anakat Ajaworemef Ipic ca ipicam?” Dor e ipic basicim akat ara. Inim aeef. 37E Yesusam, “Or e ipic bi emcaporerem. Ar e atakam or aotawman ipic ara.” Inim aeef. 38E ipic masirin, “Tuhan. Dor or asicimamin.” Inim aeef. Ar masirin, e Yesus bipu jine onok aneyotapef. 39E Yesus atakam, “Dor, ow e adosa umuton baporomtam, awames capinmi aneyof. Dor e manmok kapi inim cimin ow, e amanmok baterem inim cimin, aneyof. Doram e manmok atiwmes inim cimin ow, manmok kapi bemapom inim cimin, aneyof.” Inim aeef. 40Bare, wun Parisi ow e Yesus cowkon aememfes. Aram e atakam jen ajifes. Ar masirin, atakam e aramat ipic aotawfes. “Daram manmok kapi ow inim cimin arawe?” Inim aefes. 41E Yesus masirin, “Car manmok kapi inim cimin aememamokom ayaw, dor e cadosa, atakam basakamtiw opok. E nat, car atakam, ‘Dar manmok atiwmom ara,’ inim aemokom. Inimas car dosa awompokom ara.” Inim aeef.

Currently Selected:

YOHANES 9: LAICNS

Highlight

Copy