AEMAWIRISAS 5

Ananiasin Safira atakam

1Jipic cowok nat, juwas Ananias arawen. Arem juwas Safira arawen. Aramat ipic, acapinmi, uang juw auwumtewetefen. 2E wun uang arop atewetefen. Ar e wun uang masirin, e atakam botaw batewosom ow atetamefen. Aremam inimas amsom arawen. 3Petrus nat, atakam aotawefen. “Ananias. Iblis e ojak aman ucimas sarimfiwan? Or e capinmi auwumteweterem uang, wun aotasimapomaterem. Inimas or suw atakam Roh Kudus aotawerem. 4Amet ara, e capinmi uang buwumtewet opok aemapawirim, e capinmi oras araman. Wunam e capinmi uang auwumteweterem, e uang oras araman. O jopom inimas bwem atakam asakamtiwerem? Or e suw atakam asmat ow botaw opok. Or e suw atakam Allah aotawerem.” Inim aeefen. 5Bare, Ananias inim atakam jen ajief cowok masirin, aneyjuamesef, wunam damir aafefen. Inim atakam jen ajifes ow takas masirin, omar awutnakut aefesen. 6Barewen. Ay ow e cem afiwfes, wunam e damir ipic, picin manam ajikfesen. Ar atowomisfes, wunam awuapomfesen.

7Bare, arem jam mamincop ajiwar aemapef masirin, e cem afiwefen. Aram e armipic damir aafef bapor opok aemefen. 8Petrus masirin, atakam e cowoc aotawefen. “Atakam botawcan. Car e capinmi uang juw auwumtewetorokom, inim uang aranew?” Inim aeefen. E cowoc masirin, “Owo, inim uang araman.” Inim aeefen. 9Petrus masirin, “Ca jopom ormipiccin, e Roh Tuhan bwempor, atakam aamsakamorokom? Ormipic wuapomeres ow e cesen awamces. Aram or atowomiscemenes.” Inim aeefen. 10Bare, e cowoc Petrus bweypu asarimneyjuamesef, wunam damir aafefen. E ay ow masirin, e cem afiwfesen. Ar e cowoc damir aafef aporfes, wunam cesen atowomisfesen. Ar armipiccin jow afirimapomfesen. 11Bare, Yesus basicim barewsi ow takasam, e inim atakam jen ajifes ow takasam, omar awutnakut aefesen.

Junum bweas

12Barewen. E atakam botaw batewosom ow junum bweas arke e ow bipu aemfesen. E Yesus basicim ow takasam Salomo cemko ajarewsia ajimpesen. 13E mami owam, e ow asicimfesen. E nat, aram e ow cowkon bemap omar aefesen. 14E Tuhan basicim owam kayimin akakayiemfesen. Er owerowam, cepesam, arkenakut arawen. 15Inimas ara, ow, dam ow arke e bokot jofpu atowomisfes, wunam e arisi bwes asan tonam, e atepen tonam, atatiwfesen. Ar, Petrus erasan ajrcow, e jipir e dam ow dam ton boporneyames, inim jak aseremomfesen. 16E Yerusalem jamam samat ow arkeam aenawfesen. Aram e dam owam, e jak aman dat afiwa aefes owam, atowocenfesen. Bare, e ow takas ajaworemfesen.

Ow e atakam botaw batewosom ow ajurusumfes

17Barewen. E Allah atakam mamtaw tugas ipic awutam, e amamkawi ow takasam, asitfesen. Aram takas Saduki mamkawi ow arawen. Bare, ar icim awutnakut afesfesen. 18Aram e atakam botaw batewosom ow ban akimomfes, wunam e pemerintah penjara aman atiwimfesen. 19Iram ara nat, Tuhan malaikat, e penjara jimasap apayimef, wunam ar e atakam botaw batewosom ow atowomisefen. Aram atakam aotawefen. 20“Caram cey. E Allah cem mamfiwemey. E ay jiwneas atakam takas e ow mamotawkurumey.” Inim aeefen. 21Bare, e atakam botaw batewosom ow, e atakam jen ajifes, wunam e Allah cem tamnakap afiwemfesen. Aram atakam amememtamfesen. Bare, e Allah atakam mamtaw tugas ipic awutam, e amamkawi ow takasam, aenawfesen. Ar e atakam mamsakam owam, e Israel ownucur ow takasam, aaramsimfesen. Ar masirin, ow, e penjara aman aemapfes atakam botaw batewosom ow batew, jirmec ajirimfesen. 22E polisi ow nat, e penjara ameremfesen. Aram e atakam botaw batewosom ow abi opok aporfesen. Ar masirin, aofasifes, wunam atakam aotawfesen. 23“E penjara cem jimasap takas kunci faknakut apororom. E manmok batiw owam e jimasap takas cesen aememeres apororom. E nat, e jimasap apayimorom, e cem aman, ow opok cowok apororom.” Inim aefesen. 24E Allah cem polisi komandan ipicam, e Allah atakam mamtaw ow awutam, inim atakam jen ajifesen. Ar masirin, e atakam botaw batewosom ow, ocenak asan jisosfesnew, inim bi binip awut aceceremfesen. 25Jipic cowok nat, aenawefen. Aram atakam e ow aotawefen. “E penjara atiwimfokom ow, e Allah cem aman awamces. Ar ow atakam amememtamames.” Inim aeefen.

26Bare, e komandan ipicam, apolisi owam, ajisosfesen. Ar e atakam botaw batewosom ow atewfesen. E nat, ar e ow arke, ek adampu bajimir, omar aefesen. Inimas ar e atakam botaw batewosom ow serow atewfesen. 27Aram e atakam botaw batewosom ow e atakam mamsakam ow bipu atowocenfesen. E Allah atakam mamtaw tugas ipic awut masirin, e ow aoworporefen. 28“Dar car e jipic atawef atakam mamememtam, acuw awutnakut emeatfonom. Car ara nat, e caratakam, e Yerusalem takas emefufumomatfokom. Caram atakam aotawfokom, ‘E Allah atakam mamtaw tugas ipic awutam, amamkawi ow takasam, e Yesus acatiwfes.’ Inim aefokom.” E Allah atakam mamtaw tugas ipic awut inim aeefen. 29Petrusam, e wun atakam botaw batewosom owam, atep ajitfesen. “Dar Allah atakam ji bwe akat ara. Dar asmat atakam ji bwe opok. 30Car e Yesus os op atewtopomfokom. Inimas car aramat ipic acatiwfokom. Darafas arAllah nat, aramat ipic ajaworomsumutumef. 31Allaham, dosa bak bapayem bi binip e Israel ow batetam akat arawen. Aram e ow dosa bakokoromosomtam akat arawen. Inimas ar e Yesus e aban bo jamam atewemef. 32Dar eras atemen aatamamom ow ara. E Roh Kudusam eras atemen batam ipic ara. Allaham, e Roh Kudus, aratakam ji bwe ow atetamef.” Inim aefesen. 33E atakam mamsakam ow nat, inim atakam jen ajifesen. Bare, aram namcan awutnakut aatfesen. Ar e atakam botaw batewosom ow bacatiw atakam atawfesen.

34E nat, Parisi ipic cowok juwas Gamaliel, Allah Jirmec mamememtam ipic arawen. Ow takas e ipic asicimawirisen. Bare, aramat ipic e atakam mamsakam ow bipu asitef, wunam, “E atakam botaw batewosom ow cesen kanimnakap batakamtowomisey.” Inim aeefen. 35Ar masirin, atakam e atakam mamsakam ow aotawefen. “Awapokom Israel owa. Awamces ow aemcokomas pimicima. 36Ametnak ara, Teudas asitef. Aramat ipic atakam, ‘Dor ow awutut,’ inim aeef. Owerowam empat ratus ajiwarnew, e ipic ajamkawifes. E nat, wun ow e ipic acatiwfes. Amamkawi owam takas apacayosfes. Bare, aram apakapiosfes. 37Asep ara masirin, e Galilea ipic juwas Yudas asitef. Er e sensus aemfes jofay ara. Aramat ipic, ow arke a mamkawi acajimtawef. E nat, wun ow aramat ipicam acatiwfes. Amamkawi owam takas apacayosfes. 38Dor masirin, a wow aemamesas, atakam, car botaw aemin. Car e ow bapakapiemey. Car e ow bwem arapok. E aratakamam, apok bwemasam, asmat ow aras aranew, arma apakapioscema. 39E nat, er Allah aras aranew, car e ow bwemkumimosom asan opok. Caram Allahcin owec aamocomokom openow.” Gamaliel inim aeefen. Bare, e atakam mamsakam ow, aratakam jen ajifesen. 40Ar masirin, e atakam botaw batewosom ow ajatefesen. Aram omop aaffes, wunam jirmec ajirimfesen. “Car e Yesus atawef atakam, bootaw opok cowoka.” Inim aefesen. Aram e ow amirimosomfesen. 41Bare, e atakam botaw batewosom ow, e atakam mamsakam ow asan afasiosfesen. Bap ara, Allah e atakam botaw batewosom ow, ow tarowat aporefen. Inimas ar e ow e Yesus kerja bwemtam, wunam bajurusem, inim jirmec ajirimefen. E atakam botaw batewosom owam inimas aporfesen. Ar masirin, jak akat aememfesen. 42Aram join fafayawiri, e Allah cem amanam, e cemnak amanam, e Yesus Kristus atakam aotawa ajiawirisen. Aram e Atakam Akat acacapioma ajiawirisen.

Currently Selected:

AEMAWIRISAS 5: LAICNS

Highlight

Copy