AEMAWIRISAS 4

Petrusam, Yohanesam, e atakam mamsakam ow bipu aememfes

1-2Barewen. Petrusam, Yohanesam, atakam e ajarewsiemfes ow amememtamfesen. “Yesus aojaworsitef. Inimas e damir owam aojaworsitcemes.” Inim aefesen. Aram atakam aotawfes ara, e Allah atakam mamtaw tugas owam, e Allah cem polisi kepala ipicam, e Saduki owam, aenawfesen. Aram e atakam aporfesen. Inimas jak amop aememfesen. 3E ow masirin, e atakam botaw batewosom ipic jamnuk ban akimomfesen. Ar jo jiwic aporfes, inimas e ipic jamnuk penjara cem aman ajiwtewapomfesen. Ar ajofay ajiwar, e penjara cem aman aemapfesen. 4E Petrusin Yohanes aratakam jen ajifes ow aman, wun ow arke Yesus asicimfesen. E asicimfes ow kayimin akakayiemfesen. Aram owerow takas, lima ribu ajiwarnew aememfesen.

5Barewen. Ajofay ara, e Yahudi kepala owam, e ownucur owam, e Allah Jirmec mamememtam owam, Yerusalem ajarewsiapfesen. 6E Allah atakam mamtaw tugas ipic awut juwas Hanasam, Kayafasam, Yohanesam, Aleksandaram, e Allah atakam mamtaw tugas ipic awut asamat ow takasam, erasan ajarewsiapfesen. 7Aram e atakam botaw batewosom ipic jamnuk, e wasec asumemfes, wunam jonow atowporfesen. “E aemfokomas, e fakas, ca tetamfan? E aemfokomas jirmec ca jirimfan?” Inim aefesen. 8Bare, e Roh Kudus e Petrus aomomkurumefen. Inimas Petrus e ow atep ajitefen. “Kepala owam, ownucur owam, awapokom ara. 9Dar e japow ipic asan akat aomfom. Car masirin, e ajaworemef fakas, wow jonow dar atowpormarowokom. 10Bare, e Nasaret ipic juwas Yesus Kristus afakas, e japow ipic ajaworomtewef. Car, e Yesus, salib os op acatopomfokom. Allah nat, e ipic aojaworomsumutumef. Bare, e ipic afakas, awamec japow ipic ajaworomtewef. Car awamcokom ow takasam, Israel ow takasam, inim atakam jen pajikurumey. 11E Alkitab atakam ara:

‘E ca cem bweapom ow, ek cowok pwicak aporfokom, wunam e ek aeremtiwfokom. E ek nat, cem ek penting awutnakut aemamesef.’

Inim aema. E ek, bare Yesus ara. 12Wun ipic asmat ow bwemjortew asan opok. Allah, wun awames capinmi ipic, asmat bajortew ipic batewem opok.?” Petrus inim aeefen.

13Petrusam, Yohanesam, jak fak ow arawen. Ar ara nat, sekolah bwe awut opoknakap ow arawen. Ar mami ow cowok arawen. E atakam mamsakam ow inimas aporfes, wunam junum aefesen. Ar e ipic jamnuk, Yesus ajamkawiawiris ow aporfesen. 14E ajaworemef ipicam e ipic jamnuk cowkon aememfesen. E owam inimas aporfes masirin, ar atep bwemjit asan opoken. 15E ow e ipic jamnuk e atakam mamsakam ow asan bafis jirmec ajirimfesen. Ar masirin, aramaman jonow aamtowfesen. 16“Dar e ipic jamnuk ucim pok emcom? Atakamnak ara, ar junum bweas awutnakut aemfes. E Yerusalem ow takasam, inim atakam jen emcajifes. Daram inimas bwempacin asan opok. 17Dar e ipic jamnuk Yesus atakam wun ow bootaw acuw aatmoc. Wun ow e atakam jen bajiasin.” Inim aefesen. 18Bare, e ow, e ipic jamnuk ajatefes, wunam atakam aotawfesen. “Car e Yesus atakam bootaw arapok. Car e atakam wun ow momememtam arapok.” Inim aefesen. 19E Petrusin Yohanes nat, atep ajitfesen. “Allah, dar caratakam ji bwe, wunam aratakam bopow, inimas akat open? Bi binip carma ceceremey. 20Dar ara nat, e aporawirum pokam, e jen ajiawirum atakamam, kawey ow atakam botaw, bwemkorompim asan opok.” Inim aefesen. 21-22E ipic ajaworemef, bare junum bweas arawen. Aram umur tahun empat puluham, wun tahun bokayimam, inim ajiwar arawen. E ow arke eras aporfesen. Inimas Allah asicimfesen. E atakam mamsakam ow masirin, e ow omar aefesen. Inimas ar e ipic jamnuk desen jokmen atakam aotawfes, wunam asurumfesen. Aram e ipic jamnuk bwemjurusum asan opoken.

Yesus basicim ow janim Allah aanimfes

23E ow, e Petrusam, Yohanesam, asurumfes ara, e ipic jamnuk ajowowpu ajisosfesen. Wunam, ar e Allah atakam mamtaw tugas ow awutam, e ownucuram, e otawfes atakam, ajowow aotawfesen. 24E ow inim atakam jen ajifes masirin, bi binip cawor, janim Allah aanimfesen. “Tuhan. Or e onam opam, e capinmiam, e jicupum bwiam, e pokin pokin takasam, akenemapomkurumfem. 25Or darafas ducur ipic juwas Daud, atakam botaw, jirmec ajirimfem. Aram okerja bwemtam ipic ara. E Roh Kudusam, e Daud, inim atakam bi binip atetamefen:

‘E Yahudi opok samat, ucim jokmen atakam atawfes? E owam, ucim atakam desen aamsakamfes?

26A capinmi raja ow jewew at aetiwfes. A kepala owam ajarewsiemfes. Ar e Tuhanam, e Aeremtewef Ipicam, owec bamo aememfes.’

Daud inim aeefen. 27Atakamnak ara, Herodesam, Pontius Pilatusam, e Yahudi opok samatam, e Israel ow takasam, awames kota ajarewsiemfes. Aram Yesus bajurusum at aetiwfes. Bare, Yesus, e okerja bwemtam ipic tarowat ara. Or e ipic aeremtewfem. 28E ow, e bap atakam asakamtiwfemas bwem, ajarewsiemfes. Bare, or fak ipic ara. Oram inimas bwem akat aporfem. Inimas ara, inim atakam basakamtiw, bare oras araman. 29Tuhan. Wow ara, or e atawmes jokmen atakam aporey. Oram e okerja bwemtam ow, e oratakam botaw, jak fak mamtetamey. 30Oram, e ofakas mamporomey, wunam dam ow mamjaworomtawey. E okerja bwemtam ipic tarowat, bare Yesus ara. Or aramat ipic afakas mamtetamcarowey. Inimas dar junum bweas aemcomom.” E Yesus mamkawi ow inim janim aanimfesen. 31Inim janim aanimfes masirin, e ajarewsiapfes cem awawarimefen. Roh Kudusam e ow aomomkurumefen. E ow masirin, Allah atakam, jak fak epcom aotawfesen.

Yesus basicim ow, asan akat aemapfes

32E Yesus asicimfes ow takas bi binip cowok aomomfesen. E ow, “A pok doropas ara,” inim baji opok cowok arawen. E nat, e pok takas cowkon aomomfesen. 33E atakam botaw batewosom ow, e Tuhan Yesus ajaworsitefas, atemen faknakut aatamfesen. Allaham e ow asan akat cowok atetamefen. 34E ow aman, pok opok ow, bare opok cowok arawen. Capinmi aramat ow takasan, cem aramat ow takasam, eras uang auwumtewa ajiawirisen. Aram e uang atewa ajiawiris, 35wunam e atakam botaw batewosom ow bweypu atatiwa ajiawiris. E batewosom ow masirin, e uang, e pok opok ow aseyetama ajiawiris.

36Lewi ipicam cowok juwas Yusuf inimas aemefen. Ar Siprus capinmi ajisamesef ipic arawen. E atakam botaw batewosom ow, e ipic, wun juwas Barnabas aamfesen. “Barnabas” daratakam juw buwumtew, “Ow jak fak bwem ipic” arawen. 37Aramat ipicam capinmi aomomefen. Aram e capinmi, uang auwumtewef, wunam e uang e atakam botaw batewosom ow bweypu atatiwefen.

Currently Selected:

AEMAWIRISAS 4: LAICNS

Highlight

Copy