AEMAWIRISAS 3

Japow ipic ajaworemef

1Barewen. Jofay ara, Petrusam, Yohanesam, Allah cem ajisosfesen. Er e jam tiga sembahyang arawen. 2Erasan ar, ow, japow ipic atowomfes aporfesen. E ipic jak aman ewomisef, ar japow arawen. Join aatamfafayawiri e ow e ipic e Allah cem jimasappu, inim atewapoma ajiawirisen. E jimasap juwas “Akat” ara. E japow ipic masirin, e Allah cem bafiw ow, uang janim aanima ajiawirien. 3Aramat ipic, e Petrusam, e Yohanesam, e Allah cem afiwfes aporef, wunam uang janim aanimefen. 4Petrusam, Yohanesam, e ipic manmok atiwemfesen. Atakamam aotawfesen. “Manmok da tiwcarowey.” Inim aefesen. 5E japow ipic masirin, e ipic jamnuk manmok atiwapefen. Ar e ow pok a batetam, inim arawen. 6E Petrus masirin, atakam aotawefen. “Dor uang opok cowok awamcey ara. E awomceyas nat, or atetamamin. Bare, Yesus Kristus e Nasaret ipic ara. Aram odam baworomtam fakas aomomamar ara. Inimas oram bajarey.” Petrus inim aeefen. 7Petrus masirin, e japow ipic e ban bo ajimomef, wunam asumutumefen. Bare, e japow ipic, e kamtaram, e bwey komanam, fak asarimememefen. 8Aram asopiemef, wunam acowojarefen. Ar masirin, e Petrusam, e Yohanesam, e Allah cem akac afiwfesen. Aram ajarefen. Aram asosopiefen. Aram Allah asicimefen. 9Bare, e ow takas, e ipic ajarefam, Allah asicimefam, inim manmok atiwemfesen. 10Ar e ipic, e Allah cem jimasap juwas “Akat,” uang janim aanima ajiawiri ipic aporfesen. Aram e ipic, e aemefas aporfes wunam junum awut aefesen. Aram okon aaknamifesen. 11E ipic e Petrusam, e Yohanesam, becer ajipirefen. E ow takasam, e ipic mamincoppu asarimsayenfesen. E asan, cemko juwas “Salomo” arawen. Bare, e ow takas junum awutnakut aefesen.

Petrus, Allah cem aman acacapiomef

12Petrus inimas aporef masirin, atakam aotawefen. “Awamcokom Israel owa. Car awamec ipic e aemamaras, ucim junumam? Car ucim manmok dar atiwmarowokom? Car e darop fakasnew, e darop akatasnew, e ipic ajaworomtewmom, inim ara openow. 13Allah, Abrahamam, Ishakam, Yakubam, darafas ducuram, bare arAllah ara. E Allaham akerja bwemtam ipic op asimtomtemtamef. E ipic Yesus ara. Caram e ipic Pilatus aotasimemtamfokom. Pilatus masirin, e ipic basurumtam atakam asakamtiwef. Ca nat ipic Pilatus bipu apacinfokom. 14E ipic, bare tarowatam, atakam, ara. Ca nat, aramat ipic apacinfokom. Car masirin, Pilatus sanaw bwetiw ipic cowok, car basurumtam, janim aanimfokom. 15Wunam car e jiwnenak batetam ipic acatiwfokom. Allah nat, e ipic aojaworomsumutumef. Daram eras manmok atiwfom. 16Bare, a japow ipic e Yesus asicimama. Inimas Yesus e ipic jak aemtamama. Caram e ipic manmok atiwmokom ara. E ipicam camsom ara. Ar Yesus asicimama. Inimas Yesus e ipic dam tarowat e cabipu aemtamama.”

17“Awamcokom owa. Caram, e cakepala owam, jen aememfokom. Inimas car e pwicakas e Yesus aemfokom. Dor inimas apormin ara. 18Ametnak ara nat, Allah, atakam, e aratakam botaw ow, aotawefen. ‘E Aeremtewof Ipic ajurusemcema.’ Inim aeefen. E owam inim atakam kawey ow aotawfesen. Jepen ara masirin, Allah e atakam aotawefas jipu aemkurumef. 19Inimas caram dosa bak mampayemtotorey. Caram Allahpu mamfasienawey. Allah masirin, e cadosa akokoromosomtamceman. 20Inimas Tuhan jak akatasam atetamceman. Aram Yesus aotewnemcema. Ametnakam ara, ar aramat ipic aeremtewefen. 21Yesusam e onam op atakamemapcema— Allah e pok takas, ayas aoemcow jofay ajiwara. Bap ara, Allah inim atakam, aratakam botaw tarowat ow, aotawefen. E ow masirin, inim atakam kawey ow aotawfesen. 22E Musaam inim atakam aotawefen. ‘Bare, Allah caTuhan ara. Aramat Ipic, aratakam botaw ipic, car atewenamtamceman. Doram Allah atakam botaw ipic ara. E ipicam dor inim awcawor aememcema. Aram cajipic ara. Bare, caram aratakam takas jen mamjikurumey. 23Wun ow e Allah atakam botaw ipic atakam ji bwe opok aemcemes. Allah masirin, e ow e Allah arow aman apakapimosomcema.’ Musa inim aeefen. 24E ametnak Allah atakam aotawfes ow takas, e wow apormomas, bare atakam emcaotawfesen. E bap atakam botaw ipic juwas Samuel arawen. E wun atakam botaw ow masirin, asep arawen. 25Bare, car e Allah atakam botaw ow arurpis ara. Allaham atayi e darafas ow aeefen. Ar atakam Abraham aotawefen. ‘E orurpis sin asiawarces ow, asan akat, e samat aomcemes.’ Inim aeefen. E atayi aeefas, bare carasam ara. 26Bare, Allah, akerja bwemtam ipic ajaworomsumutumef. Aram aramat ipic car e cadosa bak bafirim atewnemef. Eras car asan akat batetamas ara.” Petrus inim aeefen.

Currently Selected:

AEMAWIRISAS 3: LAICNS

Highlight

Copy