Zakariya 12
12
Kutxhatxhiswa ka Jerusalema
1Mhaka ya dipswi da Mkoma txitimwi ka Israyeli. Mkoma wu a nawulutako nzuma, a vangako makhato a mafu, a thelako moya mndani ka m'thu, a womba tiya:
2Wonani, ni na maha ti to Jerusalema, eva digombe di di dhedherekisako otshe matiko ale ma ngadi ranganyeta, ngu toneto kambe ni ka Judha, mbimo yile va no randela Jerusalema, ve mu wukela. 3Ka ditshiku donedo, ku na maheka tito, ni teka Jerusalema eva dirigwi do nemela ka otshe matiko; votshe vale va no di rwala, ngu ditshuri, va na phwaraselwa, se otshe matiko a ha mafuni ma na patana me di wukela. 4Ka ditshiku donedo, kuwomba Mkoma, ni na dhukisa otshe mahantxhi, ni kuxangisa vagadhi va ona; se maso angu ma na wonetela txitimwi ka nyumba ya ka Judha, kambe ni na maha ti to otshe mahantxhi a matiko a kona meva mabhofu. 5Sekoko vathangeli va ka Judha va na kha vona timbiluni kwawe: Vahanyi va Jerusalema ngu vona i ku mtamo wangu, se Mkoma wa Mabutho a Tiyimbi, Njizimu txawe. 6Ka ditshiku donedo, ni na veka vathangeli va ka Judha va txi nga dikala di turako hahatshi ka tikhuni, ni ku nga dituro hagari ka milumbi; se ngu txinene ni txibhabha vona va na lovisa votshe vathu vale va ku madhawani kwawe, kembe Jerusalema a na aketwa ka wukhalo wakwe, kona Jerusalema kupune.
7Se kukhata, Mkoma a na hulukisa matenda a ka Judha, ku mahela tito, wudhundo wa nyumba ya Dhavhidha ni wudhundo wa vaaki va Jerusalema, wu si guletwi kupinda wa ka Judha. 8Ka ditshiku donedo, Mkoma a na vhikela vahanyi va Jerusalema, se awule hagari kwawe a no humbwa ka ditshiku donedo, a na nga Dhavhidha, kambe nyumba ya Dhavhidha yi na nga Txizimu, kufana ni Ngelozi ya Mkoma, masoni kwawe. 9Se ka ditshiku donedo, ku na maheka tito, ni na lava kukhundumusa otshe matiko ale ma nota wukela Jerusalema.
10 # Wona ni ka: Joh. 19:37; Mtu. 1:7. Se ni na thela Moya wa wumbilu ni wa mikombelo txitimwi ka nyumba ya ka Dhavhidha, ni txitimwi ka vaaki va Jerusalema; va na wonetela kwangu, ani va nga ni thola; kambe va na m'dilela ku nga vo dilela mwanana wammweyo dwe; kambe va na dila ngu txiviti ngu mhaka yakwe, kufana ni tile ku diliswako tona mwanana wa matiwula. 11Ka ditshiku dile, Jerusalema ku nava ni huwa ya hombe, nga huwa ya Hadhad-Rimoni, mkovani ka Megidhu. 12Se ditiko di na dila, lihunzu ni lihunzu ka wukhwalo wa lona; lihunzu la nyumba ya ka Dhavhidha ka wukhalo wa lona, vasikati vawe, ka wukhalo wawe, ni lihunzu la nyumba ya ka Nathani, ka wukhalo wa lona, ni vasikati vawe ka wukhalo wawe; 13lihunzu la nyumba ya ka Levhi, ka wukhalo wa lona, ni vasikati vawe, ka wukhalo wawe; lihunzu la ka Simeyi, ka wukhalo wa lona, ni vasikati vawe ka wukhalo wawe. 14Totshe timwani tihunzu, lihunzu ni lihunzu ka wukhalo wa lona, ni vasikati vawe ka wukhalo wawe.
Currently Selected:
Zakariya 12: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
