Zakariya 11
11
Kuxulwa ka vafumeli va timbiti
1Awe Libhanoni tula matimba ako,
kasi ku mndilo wu na tshokomisa mikedhari.
2Dilani anu mikipresi,
nguko mikedhari yi wite,
nguko ayile yo tshura ngutu ya fuviswa;
dilani anu mikusu ya Bhasani,
nguko txitinga txo khwela txa hoxotwa.
3Ndidedo dipswi da huwa ya vadyisi,
nguko wudhundo wawe wa fuviswa!
Dipswi da kubhonga ka singonyamwana,
nguko kutikulisa ka Jordhani kufuvisilwe!
Vadyisi vambidi
4A womba tiya Mkoma, Txizimu txangu:
Dyisa tinvuta ti tiyako kudawani, 5eto vaxavi va tona va dayako, na va si thavi kumana mnandu; ni vaxavisi va tona va ku kha vona: A na bongwe Mkoma, nguko ni fumisilwe, hambi vadyisi va tona kha va tsetsi tinvuta tile. 6Kha ditshuri kha ni na mbi ngadi ni pfela wusiwana vahanyi va ditiko diya, kuwomba Mkoma, aniko wona taku ni na ningela vathu, mmwani ni mmwani manzani ka mkwawe, ni ka dianza da mfumeli wakwe; vona va na onhetela mafu, kambe kha ni na mbi va txhatxhisa manzani kwawe.
7Se ani ni na dyisa tinvuta tile tiyako kudawani, tinvuta ta mtxhambi ta wusiwana; se ni to teka tindonga timbidi: Ndonga yimweyo ni to yi raya ku khani Wunene, se yimwani ni yi raya ku khani Kupfana; se ni to dyisa tinvuta. 8Ni hoxotile vadyisi vararu ngu mtxima wumwewo, nguko moya wangu wu ti va henyete, ni moya wa tona wu to swihala ngu ngani. 9Se ani ni ti khani: Na mbi ngadi ni txi mi dyisa kambe; ayi yifako, yi na fe, ayi yi fuviswako, ti nave, se atile ti no sala ti nadye, yimwani ni yimwani yi nadye nyama ya yimwani.
10Se ni to teka ndonga yangu yi i ku Wunene, ni funya, kasi kutxhatxha txitumelelano txangu, atxi ni nga ti txi mahile ni votshe vathu vava. 11Se txitumelelano txi funyilwe ka dona ditshiku dile, mtxhambi wule wa wusiwana wu nga ti ti ni verela, wu ti zivisile toneto, ti to edo i ti ti dipswi da Mkoma. 12#Wona ni ka: Mat. 27:9-10. Se ni txi khani ka tona:
Ngako mi txi ti wona ti txi mi tsakisa, ni ningeni si si ni lumbako, i si nga tona, lekani. Se va to ni pimela hakhelo yangu, ya magumi mararu a male ya silivhela.
13Se Mkoma a to ni gela tiya:
Mtengo wuwa ni nga thembiswa wona ngu vona, wu ningeleni ka muwumbi wa tikhadi. Se ni to teka magumi mararu a silivhela ni ya yi ningela ka muwumbi, Nyumbani ka Mkoma.
14Sekoko ni to funya ndonga yangu ya wumbidi, yi i ku Kupfana, ti to ni hangalasa wuxaka hagari ka Judha ni Israyeli.
15Se Mkoma a to khene kwangu:
Ti tekele kambe wukhalo wa m'dyisi wa kwa mbi vhuna txilo. 16Nguko wona taku ni na wusa m'dyisi ditikoni, awu a no mbi xola ti ti lovako, kha na mbi londeta yile yo mwalala, kha na mbi thuma yile yo lwala, hambi kudyisa yile yi hanyako kha kwati; aniko a na dya nyama ya yile yo nona, kambe a na sotela ni syala sa kona.
17Dikhombo ka m'dyisi wa kwa mbi vhuna txilo, a lekako mtxhambi; ditxhari di na wela txitimwi ka diwoko dakwe, ni txitimwi ka diso dakwe da txinene, diwoko dakwe di na oma dotshe, ni diso dakwe da txinene di na fa.
Currently Selected:
Zakariya 11: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
