Zakariya 10
10
Txizimu txa thembisa kuhanyisa vathu va txona
1Kombelani mati a nzuma ka Mkoma, ngu mbimo ya nzuma ya mbimo ya kudima; Mkoma ngene a nga va nga kukeluka, a na va ninga mati a nzuma, ni similwa ka thembwe ya mmwani ni mmwani. 2Nguko sithombe sa sizimu si womba-womba ta walo, se vahuteteli va tolovela kuwona makuhu ni kutxhamusela miloro ya walo, va thavelelana ngu ta kwa mbi nyawula; ngu toneto, va tsimbilisa ku nga tinvuta, va txi xaniseka, nguko kha ku nga ni m'dyisi.
3Kuhenya kwangu ka tura kuwukela vadyisi, se ni na tsayisa vamabhongwe; kambe Mkoma wa Mabutho a Tiyimbi a na endela mtxhambi wakwe, i ku nyumba ya ka Judha, se a na va maha ku nga dihantxhi dakwe do thaviseka yimbini. 4Ku na huma ngu ka Judha dirigwi da magwito, phande, wulaho wa yimbi, kumweko ni otshe masotxhwa. 5Se va na nga tindena ti ganyatako valala va tona, amu ka madhaka a tinzilani, kulwani, va wulelako kulwani ngu madhakani ka tinzila, ve tshinda valala, nguko Mkoma a na va navo, se vona va na thela tingana vale va tsimbilako va di gadhile mahantxhi.
6Se ni na tsanisa nyumba ya ka Judha,
ni hanyisa nyumba ya Josefa,
ni na tshumela ni va phaya,
nguko ni va pfete wusiwana;
se va na nga kha ni khali ku va lamba;
nguko ani ngani Mkoma, Txizimu txawe,
kambe ni na va engisa.
7Se va ka Efrayime va na nga tindena,
mbilu yawe yi na tsaka
nga va to sela vhinya,
se vanana vawe va na wona ve tsaka,
timbilu tawe ti na tsakela Mkoma.
8Ani ni na va dhana ngu mloti, ni va sengeleta,
nguko ni va tirute,
se va na talelana, nga tile va nga ti talisile tona.
9Se ani ni na va phaya hagari ka vathu,
va na ni alakanya ka makhalo a kule;
va na zumba kona ni vanana vawe,
kambe va na wuya.
10Nguko ni na va wuyisa ngu ditikoni ka Egipta, ni va sengeleta ngu Asiriya;
ni va tisa ka ditiko da Gileyadhi ni da Libhanoni,
kambe kha ku na mbi maneka wukhalo wo va lumba.
11Ene a na txhatuka linene ngu kukarateka,
se a na peka mavimbi a linene,
kambe kotshe kutshima ka minambo ku na oma,
sekoko kutikulisa ka Asiriya ku na wiswa,
ni ndonga ya Egipta yi na khukha.
12Se ani ni na va tsanisa ka Mkoma,
kambe va na tsimbila ditinani kwakwe,
kuwomba Mkoma.
Currently Selected:
Zakariya 10: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
