Matewu 20
20
Sitthumi sa thembwe ya mivhina
1“Ngu koneho, Mfumo wa nzumani wu fana ni nyamne wa m'ti, awu a nga huma i di ngadi mixo ngutu, kasi kuya thola sithumi sa kuya thuma thembweni kwakwe ka mivhinya. 2Se a di tumelelani ni sithumi ngu muholo wa didhenari dimwedo ngu ditshiku, a to va rumela thembweni kwakwe. 3Se e huma ngu txikhati txa wuraru, e wona vamwani va nga ti ha mtendelani ka m'ti, nava si thumi txilo. 4Se a to khene kwawe: ‘Tsulani na nanu thembweni kwangu ka mivhinya, ni na mi ninga muholo wu wu fanelako. Nivona va to tsula’ 5Se a txi engeta e huma ngu txikhati txa wutxhanu ni tximwetxo, ni txikhati txa wutxhanu ni mune, e mahisa toneto. 6A di humile ngu txikhati txa wugumi ni tximwetxo, a to engeta e mana vamwanyani, va nga ti emile, a txi khene kwawe: ‘Njitxani mi txi zumba hawa, ditshiku dotshe, mi si thumi txilo kani?’ 7Vona va to mu xamula va txi kha vona: ‘Nguko kha ha tholwa ngu m'thu.’
Se ene a nje khene: ‘Tsulani na nanu thembweni kwangu ka mivhinya.’
8Na ku txi khata kumaha minova, nyamne wa thembwe ya mivhinya, a to gela mxayisi wa tithomba takwe a txi khene: ‘Dhana sithumi u txi si holela nthumo wa sona, aniko u na khata ngu vale vo gwitisa, kala u txi ya gwitisa ngu vale vo khata.’ 9Ngako va di bwakile va va nga tholwa ngu txikhati txa wugumi ni tximwetxo, va to amukela male ya didhenari, m'thu ni m'thu. 10Se va di bwakile avale vo khata, va ti ti alakanya ti to va na hola male ya kupindisa, aniko ni vona va to amukela didhenari dimwedo m'thu ni m'thu. 11Mbimo yi va nga holelwa, va to khata kukalala ka nyamne wa m'ti, va txi kha vona: 12‘Ava vo gwitisa, va thumile txikhati tximwetxo dwe, aniko ni vona u va ningile hakhelo yimweyo ni nathu hi nga timisela mikaralo ya ditshiku dotshe, hi txihya ngu lisani.’ 13Aniko ene a to xamula a txi khene ka mmweyo wawe: ‘Ani kha ni ku dyeleli, mngana wangu; kasi kha ha tumelelana male ya didhenari kani? 14Ngu toneto, teka si si kulumbako, u txi tsula. Ni maha ati ni ti lavako ka wu wo gwitisa kufana ni kwako. 15Ina kasi kha ni nga ni fanelo yo maha kuranda kwangu ngu si i ku sangu kani? Mwendo awe wo va u di ni diso do biha, ngu kuva ani ni di wamnene kani?’ 16Se ngu toneto, ava i ku vo gwitisa va na va i di vo khata, ani va i ku vo khata va na va i di vo gwitisa.”
Jesu e zivisa kambe ngu kufa ni kuwuka kwakwe
(Marku 10:32-34; Luka 18:31-34)
17Se ngako Jesu a txi kwela eya Jerusalema, a to teka vagondiswa vakwe va digumi ni vambidi, ngu phuho, a txi va gela ku khene: 18“Wonani, konkuwa ha kwela hi ya Jerusalema, se Mwanana wa M'thu a na ningelwa ka vaphaxeli va hombe ni ka vabhali. Vona va na lamula ti to e dawa, 19va na mningela ka vamatiko, kasiku ve mu ruketela ni ku mu kwapela ni ku mu bethela ha txihambanoni. Aniko ene ngu ditshiku da wuraru a na wuka.”
Txikombelo txa mame wa vanana va Zebhedhewu
(Marku 10:35-45)
20Sekoko, mame wa vanana wa Zebhedhewu, a to mtshuketela a di ni vanana vakwe, a txi mu khizamela, kasi kumaha txikombelo. 21Jesu a to mu wotisa a txi khene: “U lava txani kani?”
Ene a to mu xamula a txi khene:
“Maha ti to vanana va vangu vavambidi ve zumba Mfumoni kwako, mmweyo txineneni kwako, mmwani txibhabha kwako.” 22Aniko Jesu a to mu xamula a txi khene:
“Kha mi txi zivi txi mi kombelako. Ina mi nga sikota kusela digombe da wuvi di ni no sela, kani?”
Vona va to xamula va txi kha vona kwakwe: “Hi nga sikota.” 23Ene a to khene kwakwe:
“Ina, mi na sela digombe dangu. Aniko kukhalahatsha txineneni kwangu mwendo txibhabha kwangu, kha ti nga mtamoni kwangu; aniko ti na mahelwa avale Tate wangu a nga va lulamisela.”
24Ngako vale va digumi va di ti pfite, va to henyela avale va vambidi va mkoma ni mnanda. 25#Wona ni ka: Luk. 22:25-26. Jesu a to va dhana a txi khene kwawe: “Ma tiziva ti to vafumeli va matiko va fuma ngu mtamo, se vahombe va kona va zumba ngu kudyiseta vathu. 26#Wona ni ka: Mat. 23:11; Mar. 9:35; Luk. 22:26. Aniko ti nga maheke eto hagari kwanu, aniko awule a lavako kumaha wa hombe, hagari kwanu, a na ti mahe txithumi txhanu; 27ani wu a lavako kumaha wo khata hagari kwanu, a na mahe khumbi yanu. 28Nga toneto, Mwanana wa M'thu nene, kha tela ku ta thumelwa, aniko a tete ku ta thumela, ni kuningela wutomi wakwe, kasi kutirula vavangi.”
Jesu e kalamukisa mabhofu mambidi Jeriko
(Marku 10:46-52; Luka 18:35-43)
29Mbimo yi va nga ti huma ngu Jeriko, dibutho da vathu vavangi di to mu londisela. 30Konako mabhofu mambidi ma nga ti khalahatshile hafuhi ni nzila, mbimo yi ma nga engisa ti to Jesu wa pinda, ma to khata kukwangula ma txi kha ona:
“Mkoma Mwana Dhavhidha, hi pfele wusiwana!”
31Se dibutho di ti ti va kawuka kasiku ve malala, aniko vona va to kwangula ngutu, va txi kha vona:
“Mkoma Mwana Dhavhidha, hi pfele wusiwana!”
32Se Jesu a to ema e va dhana, a txi khene kwawe:
“Mi lava ti to ni maha txani kwanu kani?”
33Vona va to angula va txi kha vona: “Mkoma maha ti to maso athu ma txi tuleka!”
34Jesu ngu kutalelwa ngu wumbilu, a to va gwesa mu ka maso awe, kunukunuko vona va to tshumela ve wona, se ve mu londisa.
Currently Selected:
Matewu 20: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
