Matewu 21

Jesu ngako e wulela ngu wudhumo Jerusalema

(Marku 11:1-11; Luka 19:28-40; Johani 12:12-19)

1Ngako va di hafuhi ni Jerusalema, na se va di hokile Bhetfage, mmangoni ka Miolivha, Jesu a to ruma vambidi ka vagondiswa vakwe. 2A txi va gela ku khene: “Tsulani ka m'ti wule wu ku masoni kwanu; konaho mi na ya mana mbongola ya makati, yi nga sungwa, na yi di ni tximbongolana. Yi thukunyuleni mi txi wuya nayo. 3Ngako m'thu a txi mi angula to kari, mi na khanu: ‘Mkoma wa ti lava’, kambe a na kuluveta ku ti wuyisa.”

4Totsheleleto ti mahekile kasi kutatiseka ati ti nga wombwa ngu mprofeti, a nga khene:

5“Gelani dihorana da Siyoni, mi txi khanu:

Ndiyo wata Mkoma wako wa kuthutha,

a di gadhile mbongola, yi ku ni tximbongolana, txi i ku mwanana wa yona.”

6Se vagondiswa va to tsula, veya mahisa tona ti Jesu a nga va gelisa tona. 7Va to wuyisa mbongola ni tximbongolana, ve kapeka tinguwo txitimwi ka tona, se ve mu gadhisa. 8Se vathu votala ngutu, va txi ateta tinguwo tawe ha nzila, vamwani va txi ganga matshanzu a mindonga, ve ma atetela ha nzila. 9#Wona ni ka: Mas. 118:25,26. Dibutho dile da vathu va nga ti thangela masoni kwakwe, ni vale va nga ti londetela ngu msana, va ti ti embelela va txi kha vona:

“Hozana ka Mwanana wa Dhavhidha!

A na dhumiswe awu a tako ngu ditina da Mkoma!

Hozana txitimwi nzumani!”

10Se mbimo yi Jesu a nga wulela Jerusalema, didhoropa dotshelele di to dhuka, vathu va txi kha vona: “I mani wuwa kani?” 11Dibutho di txi angula, di txi kha dona: “Awuwa i Jesu, mprofeti wa Nazareta ka Galileya.”

Jesu a txi basisa Dithepele

(Marku 11:15-19; Luka 19:45-48; Johani 2:13-22)

12Se Jesu a to wulela Dithepeleni, e tovela votshe va va nga txi xavisa, ni votshe va va nga ti xava, e hangalasa timeza ta vatxitxi va timale, ni madhando a vale va nga ti xavisa situvane. 13A txi khene kwawe: “Ti bhatwe ku kha vona: ‘Nyumba yangu yi na dhanwa ku i nyumba ya kukhongelela ka yona.’ Kambe anu mi yi maha wubaramelo wa makhamba!”

14Va to tshuketela kwakwe, kona Dithepeleni mule, mabhofu ni silima sa minenge, se ene a txi va hanyisa. 15Ngu mhaka ya sixamaliso si a nga ti si maha, ni vanana va nga ti embelela Dithepeleni va txi kha vona: “Hozana ka Mwanana wa Dhavhidha,” vaphaxeli va hombe ni vabhali va to henya, 16#Wona ni ka: Mas. 8:2 (LXX). va txi mu gela ku kha vona: “Ina wa tipfa ti va wombako kani?” Jesu a to xamula a txi khene: “Ina! Kasi kha mi nzi kugonda ti taku: ‘Ka mapswi a txisofu txa vanana vavadotho ni txa tikekere u ti lulamisete wudhumo, kani?’ ” 17Msana keto, a to khukha a txi va siya, e huma didhoropani e tsula Bhetaniya, ahawa a nga ya otela kona.

Mkuwu wa kwa mbi na mihando

(Marku 11:12-14,20-24)

18Mbimo yi Jesu a nga ti wuya didhoropani, ni mixo ngutu, a to pfa nzala. 19Se a to wona mkuwu hafuhi ni nzila, a txi wu tshuketela, aniko kha mana txilo ka wona, hahanze ka mazokoro. Konaho, a to womba, a txi khene: “Yi nge ngadi yi velekwa mihando kwako!” Se kunukunuko mkuwu wu so oma. 20Vagondiswa, ngu kuwona tiya, va to diwuka va txi kha vona: “Ti mahisile kutxani mkuwu kukuluveta wu txi oma, kani?” 21Jesu a xamute a txi khene: “Kha ditshuri na mi gela ku khani: Ngako mi di ni likholo, mi si kanakani, kha mi na mbi maha dwe, ati ni nga maha ani ka mkuwu wuwa, hambi idiku mi khanu ka mmango wuwa: ‘Khunuka eho u txi ti tshotsha lineneni’, ti na maheka. 22Se sotshe si mi no kombela ngu kukholwa, na mi txi khongela, mi na si amukela.”

Jesu a txi wotiswa ngu mtamo wakwe

(Marku 11:27-33; Luka 20:1-8)

23Msana keto, a to wulela Dithepeleni. Mbimo yi ene a nga ti gondisa, vaphaxeli va hombe ni madhota a ditiko va to mu yela va txi ya kha vona kwakwe: “U wu mana hani mtamo wa kumaha tiya kani? I mani a nga kuninga mtamo wo ngeto kani?” 24Jesu a va angute a txi khene: “Nanani ni lava ku mi mahela txiwotiso, se ngako mi txi ni xamula ka txona, anani ni na mi gela ti to ni maha tiya ngu mtamo muni. 25Mtamo wa kubhabhatisa ka Johani wuta ngu hani kani? Wu ta ngu nzumani mwendo wuta ngu ka vathu kani?” Aniko vona va to khata kualakanya timbiluni kwawe va txi “Ngako hi txi angula tito: ‘Wu ta ngu nzumani’, a na hi wotisa tito: ‘Njani hi nga mbi kholwa kani?’ 26Se hi txi angula ti to khathu: ‘Wu ta ngu ka vathu’ hi thava kuwukelwa ngu dibutho, nguko votshe va kholwa ti to Johani i mprofeti.” 27Se va to angula ka Jesu va txi kha vona: “Kha hi ti zivi.” Sekoko, nene a nje khene: “Nanani kha ni na mbi mi gela ti to ni maha tiya ngu mtamo muni.”

Txifananiso txa vanana vambidi

28“Mi yi wonisa kutxani mhaka yiya kani? M'thu wokari a ti ni vanana vambidi. A txi gela mkoma wa kona, a txi khene: ‘Mwanangu, tsula nyamsi u ya thuma thembweni ka mivhinya’. 29Aniko ene a to angula a txi khene: ‘Kha ni ti lavi’. Kambe ngu msana a to ti laya se e tsula. 30A di yite ka mnanda wa kona, a to mu gela nene toneto, se ene e xamula a txi khene: ‘Ina, ni na tsula, tata’. Kambe kha tsula. 31Se i mani ka vona va vavambidi, awu a nga maha kuranda ka tate wakwe, kani?” Se vona va txi kha vona: “Ngu wule wo khata.” Jesu a to va gela a txi khene: “Ngu ditshuri nanani na mi gela: Vakhupisi ni magelegele va na mi thangela kuwulela Mfumoni ka Txizimu. 32Nguko Johani a tile kwanu a ta mi gondisa nzila ya kululama, kambe kha ma kholwa ngu ngene, kasi vakhupisi ni magelelegele va khotwe ngu ngene; kasi anu, hambiko mi nga wona tiya, kha ma sikota kuhunduluka mi txi kholwa ngu ngene.”

Txidinganiso txa vadimi

(Marku 12:1-12; Luka 20:9-19)

33“Engisani txidinganiso tximwani: A ti ti ho m'thu, i nga ti di nyamne wa m'ti, awu a nga phaya mivhinya e yi bhiyela ngu libhiyo la mindonga, a txi kelela nzeka ya kukamela ka yona mihando yakwe, e aka txitezi, ngu msana a txi ningela thembwe yiya ka vadimi, se ene a txi teka dipfhumba da kuendela ditikoni ka kule. 34Mbimo yi ku nga hoka nyango ya kuelula, a to ruma sithumi sakwe ka vadimi kasi kuya amukela mitxelo yakwe. 35Aniko vadimi va to ñola sithumi, ve peka mmweyo, ve daya mmwani, se wa wuraru ve mu balisela ngu marigwi. 36Se ene a to engeta e ruma simwani sithumi, sasingi ngutu kupinda so khata, aniko ka vonavo ni vona, va to va mahela tonati va nga maha ka va vo khata. 37Se nyamne wa m'ti e za e ruma mwanana wakwe apune, a txi khene: ‘Va nava ni txithavo ngu ngene.’ 38Aniko vadimi, mbimo yi va nga wona mwanana wakwe, va to langana va txi kha vona: ‘Awuwa ngene i ku m'dyi wa thomba. He m'dayeni, hi na sala ni thomba yakwe.’ 39Se va to mñola, ve mu ruruvisa ve mu yisa hahanze ka thembwe ya mivhinya, ve m'daya. 40Ngako a txi ta nyamne wa mivhinya yile a nata maha txani ngu vathu vale va vadimi kani?” 41Vona va to angula va txi kha vona: “A na va fuvisa vathuvo vo biha, senikoko a na ningela thembwe ya mivhinya ka vamwani vadimi, ava va na ku mu wuyisela mihando yakwe ngu nyango yi yi lavekako.”

42 # Wona ni ka: Mas. 118:22-23. Jesu a to va gela a txi khene: “Kasi kha ma gonda ka Mibhalo ti taku: ‘Dirigwi dile di nga lambwa ngu vaaki di tshumete di maha dirigwi da hombe do tsanisa. Atiya ti mahilwe ngu Mkoma kambe ta xamalisa masoni kwathu.’ 43Ngu toneto, na mi gela ku khani: Mfumo wa Txizimu wu na thaviswa kwanu, wu ningelwa ka dimwani ditiko, adi di no sikota kuhumisa mihando ya wona. 44[Awule a no wela txitimwi ka dirigwi diya a na bhandekela e khatukela; awule a no welwa ngu dona, a na phwaraselwa.”]

45Vaphaxeli va hombe ni Vafarisi, ngako va txi engisa sidinganiso sakwe, va to ti mana ti to a womba-womba ngu vona. 46Se va ti lava ku mñola, aniko va to thava dibutho da vathu, nguko vona va ti ti m'ziva nga mprofeti.

Currently Selected:

Matewu 21: BEC2016

Highlight

Copy