Matewu 12

Jesu ni Sabbata

(Marku 2:23-28; Luka 6:1-5)

1Ngu yoneyo mbimo, Jesu a to tshawunyeta ngu hagari ka tithembwe ta fulaho, ngu ditshiku da Sabbata; se vagondiswa vakwe va ti ni nzala, veza ve khata kufunya maphumbu ve dya. 2Aniko mbimo yi Vafarisi va nga ti wona, va to mu gela va txi kha vona: “Hinga wona, vagondiswa vako va maha ti ti si dinganiko kumahwa ngu Sabbata.” 3Ene a to khene kwawe: “Kasi kha ma gonda ati ti nga mahwa ngu Dhavhidha ditshiku di a nga pfa nzala, ene ni va a nga ti navo kani? 4Ti to ene a wulelisite kutxani nyumbani ka Txizimu, e dya mapawu a mphaxo, aawa ma nga ti si faneli kudyiwa ngu ngene ni va a nga ti navo, kambe ma ti fanela kudyiwa ngu vaphaxeli vokha, kani? 5Mwendo kha ma gonda mu ka Mlayo ti to ngu ditshiku da Sabbata vaphaxeli va ndaka Mlayo wa Sabbata amu Dithepeleni, va si mani mnandu kani? 6Sekoko, ni khani kwanu: Wa ho kona hawa awu i ku wa hombe kupinda Dithepele. 7#Wona ni ka: Mat. 9:13; Hos. 6:6. Idiku anu mo di ziva dipswi di di wombako tito: Ni dhunda wumbilu, i si nga mphaxo, nga mi sa ninga mnandu ava va nga mbi onha. 8Nguko Mwanana wa M'thu i Mkoma kambe wa yona Sabbata.”

Jesu ni m'thu wa dianza do oma

(Marku 3:1-6; Luka 6:6-11)

9Se ngako a di khukhile nguho, a to ya wulela disinagogani kwawe. 10Konemo ku ti ni m'thu wo khwanyela dianza. Va to wotisa Jesu, ngu ku mu duka va txi kha vona: “Ina ta tumetiswa kuhanyisa ngu ditshiku da Sabbata kani?” 11Ene a ti khene kwawe: “I mani hagari kwanu, awu a ku a di ni nvuta, yi txi wela diphalani ngu ditshiku da Sabbata, asi yi ñoliko a txi yi humisa kani? 12Lisima muni li ku ni nvuta kupinda m'thu kani? Ngu toneto, ta tumetiswa kumaha ta tinene ngu ditshiku da Sabbata.” 13Se a to gela m'thu wule a txi khene: “Nawuluta dianza.” Ene a to di nawuluta, di so hanya kufana ni dimwani. 14Aniko Vafarisi va to huma veya txikungoni kasi kuya langana ti to va na m'dayisa kutxani.

M'thu wo sawulwa ngu Txizimu

15Jesu a di ti zivile, a to khukha ka wukhalo wule. Vavangi va to mu londetela, se ene e va hanyisa votshe, 16na a txi va laya ti to va si mu nuweli. 17Kasi kutatiseka ati Txizimu txi nga womba ngu mprofeti Isaya, txi txi kha txona:

18“Atxiya ngu txona Txithumi txangu,

ni nga txi sawula,

i ku txo randeka kwangu,

atxiya mbilu yangu yi txi tsakelako.

Ni na veka Moya wangu txitimwi kwakwe,

a na txhumayela kulamula kwangu ko lulama

ka otshe matiko.

19Kha na mbi henya ni kukwangula.

Dipswi dakwe kha di na mbi pfiwa mu mitendelani.

20Litshava li li nga thidyaka, kha na mbi li funya.

Kha na mbi tima ngoti ya dilambu,

ayi yi tuvikako,

kala e ninga mtamo wa kuxula ka wululami.

21Matiko ma na themba ditina dakwe.”

Jesu ni Sathani

(Marku 3:20-30; Luka 11:14-23)

22“Sekoko, va to neha kwakwe m'thu wa madhimoni, i nga ti dibhofu ni txiduma. Ene a to mu hanyisa, se awu wa txiduma e khata kuwombawomba ni kuwona.” 23Dibutho dotshe di to xamala di txi kha dona:

“Ina awu hi nga ene Mwanana wa Dhavhidha kani?”

24Aniko Vafarisi, ngako va txi pfa eto, va to kha vona:

“Awuwa kha toveli madhimoni i si nga ngu mtamo wa Bhelzebhule, i ku mkoma wa mimoya yo biha.”

25Kambe Jesu, ngu kuziva mialakanyo yawe, a to khene kwawe: “Mfumo wuhi ni wuhi wu ti bhandako ngu hagari wu txi ti lwisa wu na hasuka; ni didhoropa dihi ni dihi di ti bhandako ngu hagari di ti lwisa, mwendo mwaya wuhi ni wuhi wu ti bhandako ngu hagari wu ti lwisa kha wu na kutsana. 26Ngu toneto, ngako Sathani a txi tovela Sathani, a ti bhandile ngu hagari, se mfumo wakwe wu na tsanisa kutxani, kani? 27Sekoko, ngako ni txi tovela madhimoni ngu mtamo wa Bhelzebhule, valondeteli vanu va ma tovela ngu mtamo wa mani kani? Ngu toneto, vona va na va i di valamuli vanu. 28Aniko ngako ni txi tovela madhimoni ngu Moya wa Txizimu, kha ditshuri Mfumo wa Txizimu wu hokile kwanu.

29M'thu a nga wulelisa kutxani nyumbani ka ndena, e tekela simaha sa yona, a sa thanga ngu ku yi sunga kani? Ngu kona a no sikota kuhanda sotshe nyumbani.

30Awu asi emiko ni nani, walwa ni nani; ani wu asi sengeletiko ni nani, wa hangalasa.” 31“Ngu konaho ni khani kwanu: Vathu va na divalelwa sotshe sionho ni sotshe siruko, kambe kuruka Moya wo Sawuleka kha ku na mbi divalelwa. 32#Wona ni ka: Luk. 12:10. Wuhi ni wuhi a wombawombako kubiha ngu Mwanana wa M'thu, a na divalelwa; aniko wuhi ni wuhi a wukelako Moya wo Sawuleka, kha na mbi divalelwa, hambi ka yiya mbimo, hambi ka mbimo yi yi tako.”

Mndonga ni mihando ya wona

(Luka 6:43-45)

33“Mi txi womba ti to mndonga wuwa mbunene, mihando ya wona ni yona njinene, mwendo kambe mi txi womba ti to mndonga wuwa wu bihile, mihando ya wona ni yona yi bihile; nguko mndonga wu ziwa ngu mihando ya wona. 34#Wona ni ka: Mat. 3:7; 23:33; 15:18; Luk. 3:7; 6:45. Lixaka la timamba,#12:34 Timamba: Lixaka la minyoka ya tshofu ngutu, yi txi luma m'thu kha sweli kufa. mi nga sikotisa kutxani kuwomba ditshuri, na mi di vabihi kani? Nguko txisofu txi womba-womba ti ti nga tala mbiluni. 35M'thu wamnene a humisa sa sinene ngu ka thomba yakwe ya yinene; kasi m'thu wa tshofu, a humisa sobiha ngu ka thomba yakwe yo biha.

36Ngu toneto, na mi gela ku khani: Totshe timhaka ta walo, ati va wombawombako vathu, va na ya ti xamulela ngu tona ka ditshiku da kuthethisa. 37Nguko ngu ditshiku da kuthethiswa, Txizimu txi na lamula ti to u wamnene mwendo u wo biha madingano ni mapswi ako.”

Txikombelo txo maha txidiwukiso

(Marku 8:11-12; Luka 11:29-32)

38Sekoko konaho vabhali vokari ni Vafarisi va to kha vona kwakwe:

“M'gondisi, hi lava kuwona txikombiso txo mahwa ngu ngawe.”

39Se ene a to va xamula a txi khene:

“Liveleko la tshofu ni la wugango li lava txikombiso, aniko kha li na mbi ningwa tximwani txikombiso, hahanze ka txikombiso txa mprofeti Jona. 40Kufana ni Jona a nga zumba mndani ka txihaka masiku mararu ni wusiku wa kona, nene Mwanana wa M'thu a na zumba mndani ka mafu masiku mararu ni wusiku wa kona. 41Vathu va liveleko liya, va nata abaniswa, ngu kuwuka ka vathu va Ninivha, ka ditshiku da kuthethiswa, nguko vona va hundulukile ngu kuengisa kutxhumayela ka Jona. Kasi aho kona hawa wa hombe kupinda Jona. 42Mfumeli wa wamsikati wa kuta ngu wulambwe, a nata ngu distsiku da kuthethiswa kumweko ni liveleko liya, a txi li kambula, nguko ene a tile ngu magemeta-mitshi ka mafu ku ta pfa wuzivi wa Solomoni. Kasi waho kona hawa, wa hombe kupinda Solomoni.”

Kuwuya ka moya wa nzambwa

(Luka 11:24-26)

43“Ngako moya wa nzambwa wu txi huma ngu ka m'thu, wu tutumela txiwulani kuya lava wukhalo wo humula, aniko kha wu wu mani. 44Sekoko, wutxi kha wona: ‘Ni na tshumela ni txi ya nyumbani kwangu, amu ni nga huma ngu kona.’ Mbimo yi wu nga bwaka, wu to yi mana yi di diphanga, yi di hiyetwe yi tshuriselwa. 45Sekoko moya wule wu to ya dhana yimwani mimoya ya mtxhanu ni yimbidi, ya nzambwa ngutu kupinda wona, se yi wulela yi zumba konemo. Se mazumbelo o gwitisa a m'thu wule ma na pinda o khata ngu kubiha. Ku na mahisa toneto ka lona liveleko liya la tshofu.”

Maxaka a Jesu

(Marku 3:31-35; Luka 8:19-21)

46Mbimo yi ene a nga ti womba-womba ka dibutho, mame wakwe Jesu ni vanawe va to ema ngu hahanze, va txi lava kuwombawomba nayo. 47Mmwani a to ya mu gela a txi khene:

“Mame wako ni vananu va emile hahanze, va lava kuwombawomba ni nawe.” #12:47 Ka yimwani Mibhalo kha di ngaho divesi diya.

48Jesu a to khene ka wu a nga m'zivisa:

“I mani mame wangu ni vanathu kani?”

49A to nawuluta diwoko e xungameta vagondiswa vakwe, a txi khene:

“Mame wangu ni vanathu ngu vona vava. 50Nguko wuhi ni wuhi a no maha kuranda ka Tate wangu a ku nzumani, ngene i ku mwanathu ni ndiyangu ni mame wangu.”

Currently Selected:

Matewu 12: BEC2016

Highlight

Copy