Matewu 13

Txidinganiso txa mphayi

(Marku 4:1-9; Luka 8:4-8)

1Ka dile ditshiku, Jesu a to huma ngu nyumbani eya khalahatsha hafuhi ni linene. 2#Wona ni ka: Luk. 5:1-3. Se ku to tshangana masoni kwakwe dibutho da hombe ngutu da vathu, ahawa a nga za e wulela ngalavani eya khalahatsha ka yona, na dotshe dibutho di di emile mabambe. 3Se a to va gela timhaka ta tingi ngu sidinganiso, a txi khene:

“Wonani mphayi a to huma a txi ya phaya. 4Mbimo yi a nga ti phaya, yimwani mbewu yi to wela ha nzila, se si ta sinyana si ta yi jokotela. 5Yimwani mbewu yi to wela ha wukhaloni ka marigwi, ahawa ku nga ti si nga ni mafu amangi; se yi mila ngu txikuluveta, nguko mafu ma ti sa tshima. 6Aniko mbimo yi ditambo di nga huma, mbewu yi to hya ngu lisani, yi oma, nguko yi si nga ni mikuluti. 7Yimwani mbewu yi to wela hagari ka mipa, se mipa yi txi kula kumweko nayo, yi so yi kura. 8Yimwani, ngu kugwitisa, yi to wela ka mafu amanene yi veleka mihando: Nyingi yimweyo yi veleka dizana, yimwani mtxhanu wa magumi ni dimwedo, yimwani makumararu.

9Awule a ku ni tinzeve to engisa, a na engise!”

Txhamuselo ya sidinganiso

(Marku 4:10-12; Luka 8:9-10)

10Vagondiswa va to mtshuketela hafuhi, va txi kha vona:

“Njitxani u txi va wombawombela ngu sidinganiso kani?” 11Se ene a to va xamula a txi khene. “Nguko anu mi ningilwe kuziva misisalo ya Mfumo wa nzumani, aniko vona kha va ningwa txilo. 12Nguko awule a ku naso, a na ningwa kasiku e tatiselwa; aniko awule a si nga naso, a na tekelwa hambi ni sile a ku naso. 13Ngu toneto, ni wombako navo ngu sidinganiso; nguko va wona, aniko kha va wonisisi; va engisa aniko kha va engisisi ni kupimisa. 14Ti na tatiseka atiya ti nga wombwa ngu mprofeti Isaya, a nga khene:

‘Mi na engisa walo ngu tinzeve, aniko kha mi na mbi ti mana;

mi na wona ngu maso, aniko kha mi na mbi ti wonisisa.’

15Nguko timbilu ta vathu vava ti bangile,

kambe tinzeve tawe ti tsivekile,

maso awe ma vhalekile,

kasiku va si woni ngu maso,

va si engisi ngu tinzeve,

va si pimisi ngu timbilu tawe,

va nga thuka ve hunduluka ve mana kuhanyiswa.”

16 # Wona ni ka: Luk. 10:23-24. “Kambe ma katekile maso anu, nguko ma wona, ni tinzeve tanu nguko ta engisa. 17Nguko ngu ditshuri na mi gela ni khani: Vaprofeti vavangi ni valulami, va navete kuwona ati mi ti wonako, aniko kha va ti wona; va navete kuengisa ati mi ti engisako, aniko kha va engisa.”

Jesu a txhamusela txidinganiso txa mphayi

(Marku 4:13-20; Luka 8:11-15)

18“Ngu konaho engisani kha kwati txidinganiso txa mphayi. 19Ngako m'thu a txi engisa dipswi da Mfumo, asi di engisisi, kuta m'bihi e ta fukula asile si nga ti phayilwe mbiluni kwakwe; awuwa njifananiso txa mbewu ya kuwela ha nzila. 20Awule a nga amukela mbewu ha wukhaloni ka marigwi, ngu wule a engisako dipswi ngu txikuluveta ni kutsaka, aniko wo ziva ku di amukela ka txonetxo txikhati, 21kambe ene apune kha na mikoloti, kha tsana: Ngako ku txi ta kupandiseka mwendo kuxaniseka ngu mhaka ya dipswi, wa kuluveta e rereka. 22Awule a nga amukela mbewu hagari ka mipa, ngu wule a engisako dipswi, aniko sithikamezo sa ditiko ni kuxengwa ngu tithomba, sa kama dipswi kasi di si veleki mihando. 23Ani wule a nga amukela mbewu ka mafu amanene, ngu wule a engisako dipswi, e di veketa; eyo ngene a velekako mihando, ahawa a txi veleka dizana, ahawa mtxhanu wa magumi ni dimwedo, ahawa makumararu.”

Txidinganiso txa Fulaho ni nyasavari

24Jesu a to va mahela tximwani txidinganiso, a txi khene:

“Mfumo wa nzumani wu fana ni m'thu a nga phaya mbewu ya yinene thembweni kwakwe. 25Aniko, hagari ka wusiku, vathu, va di otete, a tile mlala wakwe a ta phaya nyasavari hagari ka fulaho, se ngu msana e huma. 26Mbimo yi fulaho yi nga mila yi txi veleka, ku to humelela nyasavari nene. 27Se sithumi si to ya gela nyamne wa m'ti si txi kha sona: ‘Nyamne wathu, ina hi nga mbewu ya yinene u nga phaya thembweni kwako kani? Se a humela hani nyasavari, kani?’

28Ene a to xamula a txi khene: ‘Mlala a nga maha eto.’

Se sithumi si nje kha sona kwakwe: ‘Wa ti lava kani hi tsula hi ya dulela nyasavari kani?’

29Ene e va xamula a txi khene: ‘Ahim-him, nguko mi nga, ma thavisa nyasavari, mi thuka mi pata ni fulako mi dula.’ 30Si lekeni si txi kula ngu wumbidi wa sona kala kuelulani. Se ngu txikhati txa kuelula, nata gela vaeluli ni txi khani: ‘Dulelani nyasavari, kuthanga, mi msungelela ngu tinyanda, kasi e hiswa; aniko fulaho yi theleteleni txisangalani kwangu.’ ”

Mbewu ya txinapi

(Marku 4:30-32; Luka 13:18-19)

31Se a to va mahela kambe tximwani txidinganiso a txi khene:

“Mfumo wa nzumani wu fana ni mbewu ya txinapi, ayi m'thu wokari a nga yi teka, e yi phaya thembweni kwakwe. 32I mbewu ya yidotho ngutu ka totshe timbewu, aniko msana ka kuva yi di kute, yi maha tximilwa txa hombe kupinda sotshe similwa sa thembweni, yi txi kula yi maha mndonga, ahawa koza hambi sinyana sa nzuma si ta zumba madhavini ka wona.”

Mtshumbelo

(Luka 13:20-21)

33Se a to engeta e va gela tximwani txidinganiso a txi khene:

“Mfumo wa nzumani wu fana ni mtshumbelo, awu wamsikati wokari a wu tekako e wu pata mu ka mipimo yiraru ya mpupu, kala kuza sotshe si vila.”

Txigelo txa kuthumiswa ka sidinganiso

(Marku 4:33-34)

34Totshe timhaka tiya Jesu a ti wombile ngu sifananiso ka dibutho; a ti si va geli txilo, na i si nga ngu sifananiso; 35#Wona ni ka: Mas. 78:2. kasi kutatiseka ati ti nga wombwa ngu mprofeti, a nga khene:

“Ni na tula txisofu txangu

ni womba-womba ngu sidinganiso;

ni nuwela timhaka ti ti nga ti sisilwe

kukhukhela kumahwani ka ditiko.”

Jesu e txhamusela txidinganiso txa nyasavari

36Sekoko ngako a di lekile mabutho, Jesu a to wulela nyumbani. Se vagondiswa vakwe ve tshuketela hafuhi kwakwe, va txi kha vona.

“Hi txhamusele txidinganiso txa nyasafari wa thembweni.”

37Ene a to xamula a txi khene:

“Awule a phayako mbewu ya yinene ngu Mwanana wa M'thu; 38thembwe ngu ditiko; mbewu ya yinene ngu vanana va Mfumo; nyasavari ngu vanana va m'bihi. 39Mlala wu a nga phaya nyasavari ngu Sathani; kuelula ngu kugumani ka ditiko; ani vaeluli ngu tingelozi. 40Kufana ni kuleya nyasavari a wungeletelwako e hiswa ngu mndilo, ngu toneto ti no mahwa kugumani ka ditiko. 41Mwanana wa M'thu a na rumela tingelozi takwe, ati ti no thavisa ka Mfumo wakwe votshe va i ku vakhuvekisi ni votshe va va mahako to biha, 42ti na va tshotsha mu mdhikilani ka mndilo, ahawa ku no va i di ka kudila ni kugegeresela ka makwasa. 43Se valulami va na phatima nga ditambo Mfumoni ka Tate wawe. Awu a ku ni tinzeve a na engise!”

Thomba yi nga siswa

44“Mfumo wa nzumani wu fana ni txuma txi txi nga siswa thembweni kokari, txuma txi m'thu a nga txi tumbula, se e engeta e txi sisa. Kambe kutsakani kwakwe, a to tsula eya xavisa sotshe si a ku naso e xava thembwe yile.

Diperola

45Mfumo wa nzumani kambe wu fana ni wule a thumelako dibhindu, awu a tsimbilako a txi hodha tidhayimana totshura. 46Se a di mani dhayimana yimweyo ya dibhindu da hombe, a to tsula eya xavisa sotshe si a ku naso, kasi ku ta yi xava.”

Likoka

47“Mfumo wa nzumani kambe wu fana ni likoka, li nga nawulutwa lineneni, li sengeletako totshe tixaka ta sihaka. 48Se ngako li di tate, vakoki va ndinda ve li yisa mabambe, ve khalahatsha ve sawulela sa sinene, ve si sengeleta amu siyani kwawe; se asi i ku so biha, ve si tshotsha kule. 49Ngu toneto, ti no maheka kugumani ka ditiko: Tingelozi ti na huma ti tekela ava vo biha hagari ka va vo lulama. 50Ti na va tshotsha mdhikilani ka hombe ka mndilo wo tura, koneyo ku nava i di ka kudila ni kugegeresela ka makwasa.”

Simaha sa kale ni sa siphya

51“Se Jesu a to khene ka vagondiswa vakwe:

Mi ti mani totshe timhaka tiya kani?”

Se va nje kha vona kwakwe: “Ina!”

52Se a to va gela kambe a txi khene:

“Ngu toneto, m'bhali wuhi ni wuhi a nga gondiswa timhaka ta Mfumo wa nzumani, a fana ni wu i ku nyamne wa m'ti, awuwa, ka txuma txakwe, a humisako sasiphya ni sa kale.”

Jesu kha amukelwa kwati Nazareta

(Marku 6:1-6; Luka 4:16-30)

53Ngako Jesu a di gwitile kuwomba sidinganiso siya, a to khukha konaho. 54Se a di hokile ditikoni kwawe, a ti gondisa masinagogani kwawe, ahawa koza ve xamala, va txi kha vona:

“Ene a kumana hani kuziva kuwa ni sidiwukiso siya kani? 55Kasi hi nga ene mwanana wa m'vati kani? Mame wakwe hi nga ene wu a dhanwako ku i Mariya kani? Ni vanawe hi nga vona va Jakobe, ni Josefa, ni Simoni, ni Judha, kani? 56Ni tindiyakwe kha ti nga ho totshelele kona hawa kani? Se totshe tiya a ku nato ti ta ngu hani kani?”

57Se vona ve khuveka ngu ngene. Aniko Jesu a to khene kwawe:

“Mprofeti, ditikoni kwawe ni nyumbani kwawe, kha ningwi txithavo.”

58Se kha maha sidiwukiso so tala aho, ngu mhaka ya ku ambi tumela kwawe.

Currently Selected:

Matewu 13: BEC2016

Highlight

Copy