Matewu 11

Xamulo ya Jesu ka Vagondiswa va Johani Mubhabhatisi

(Luka 7:18-35)

1Ngako Jesu a di gwitile kuleletela timhaka tiya ka vagondiswa vakwe va digumi ni vambidi, a to khukha konaho e tsula a txi ya gondisa ni kutxhumayela mitini ka ditiko dawe. 2Se ngako Johani a di engisile mu ku khotelwani kwakwe, ta mithumo ya Kristu, a to rumela vagondiswa vakwe kuya wotisa kwakwe va txi kha vona: 3“Ngawe, kani, awu a nota, mwendo hi ngadi hi txi na verela mmwani kani?” 4Se Jesu a txi angula, a ti khene kwawe: “Tsulani mi ya gela Johani ati mi ti engisako ni ti mi ti wonako: 5Mabhofu ma wona; sidiya sa tsimbila; vatshekela va basiswa; maphanzeve ma engisa; vakufa va wuswa ve hanya; sisiwana sa txhumayelwa Evhangeli. 6Se a katekile wule a no mbi mana txikhuvekiso kwangu.” 7Sekoko, ngako vona va di tsute, Jesu a khatile kuwombawomba ngu Johani ka vathu, a txi khene: “Njitxani mi nga ya txi wona txiwulani kani? Litshava li li dekadekiswako ngu moya kani? 8Se nji txani mi nga ya txi wona kani? M'thu wo ambala tinguwo totshura ngutu kani? Aniko ava va ambalako tinguwo totshura ngutu va zumba tinyumbani ka vafumeli. 9Se mi ti ya wona txani kani? Mprofeti kani? Ina! Ani na mi gela, awu a pinda mprofeti. 10Nguko, awu ngene a wombwako ngu Mibhalo yi yi ku kha yona: ‘Wona, na rumela mtumi wangu masoni kwako, awu wu fanelako ku kulongisela nzila masoni kwako.’ ”

11“Kha ditshuri na mi gela: Hagari ka vanana va va nga velekwa ngu wamsikati, kha ka maneka wa hombe wo pinda Johani Mubhabhatisi. Aniko awule i ku wam'dotho ngutu Mfumoni ka nzumani, mbwa hombe ngutu kupinda ene. 12#Wona ni ka: Luk. 16:16. Kukhukhela ka masiku a Johani Mubhabhatisi kala konakuwa, Mfumoni ka nzumani ku wulelwa ngu mtamo, se va mtamo ngu vona va wu manako. 13Nguko vaprofeti votshe ni Mlayo va to profeta kala Johani eta. 14Ngako mi txi lava kutumela, Johani ngene Elija, awu va nga ti kha vona a nata. 15Awu a ku ni tinzeve to engisa a na engise!”

16“Vathu va liveleko liya ni na va fananisa ni txani kani? Va fana ni vanana va nga khalahatsha ha mtendelani, va txi vangelana diguwa va txi kha vona: 17‘Hi mi vetete misengele, aniko kha ma sinya; hi embelete tindando ta masaluko, aniko kha ma dila.’ ”

18“Nguko a tile Johani, asi dyi, asi seli, va txi kha vona: ‘Ana ni madhimoni.’ 19A tile Mwanana wa M'thu, wa dya, wa sela, se va kha vona: ‘Wonani nyalimitoyo ni didevi, mngana wa vakhupisi ni vaonhi.’ Aniko wuzivi wa Txizimu wu kombisile kululama ka wona ngu mithumo ya wona.”

Madhoropa a ku ambi lava kuhunduluka

(Luka 10:13-15)

20Sekoko, Jesu a to khata kusola madhoropa awa a nga ti mahile ka ona sidiwukiso sakwe so tala, nguko ma sa hunduluka, a txi khene: 21“Dikhombo dako, Korazini! Dikhombo dako, Bhetsayidha! Nguko sidiwukiso si si nga mahwa kwanu, idiku si ti mahilwe madhoropani ka Tiro ni Sidhoni, nga va di kombile kale kuhunduluka kwawe, ngu kuambala masaka ni kutola dikhuma. 22Ngu konaho, na mi gela ku khani: Ti nata hehuka ngutu ka Tiro ni Sidhoni kupinda anu, ka ditshiku da kulamulwa. 23Se awe Kapernawume, u na guletwa u txi hokiswa nzumani kani? Lambi! U na txhikiswa diphalani ka vafi. Nguko sidiwukiso si si nga mahwa kwako, idiku si ti ko mahwa Sodhoma, didhoropa donedo ngadi ti ngadi ho kala nyamsi. 24#Wona ni ka: Mat. 10:15; Luk. 10:12. Ngu konaho, ni khani: Ti na hehukela ditiko da Sodhoma, kupinda awe, ka ditshiku da kulamulwa.”

Ngonani kwangu mi ta humula

(Luka 10:21-22)

25Ka yoneyo mbimo, Jesu a txi khene: “Na ku bonga, awe Tata, Mkoma wa nzuma ni mafu, nguko u sisile timhaka tiya ka vazivi ni ka titxhari u txi ti wonekisa ka vavadotho. 26Ina, awe Tata, nguko eto ti mahekile ngu kuranda kwako. 27#Wona ni ka: Joh. 1:18; 3:35; 10:15. Sotshe simaha ni ningilwe ngu Tate wangu; se kuwalo m'thu wu a zivako Mwanana, hahanze ka Tate; ngu toneto, kuwalo m'thu wu a zivako Tate, hahanze ka Mwanana ni wule ene Mwanana a ti lavako ku mu tulela. 28Ngonani kwangu, motshenu mi nga karala, mi nemelwako ngu mrwalo, ani ni na mi humuta. 29Tekani mpakato wangu, mi txi gonda ngu ngani, ani ni ku wo thutha ni wa mbilu ya kutiveka hahatshi, mi na mana kuhumula mihefemuloni kwanu. 30Nguko mpakato wu ni mi ningako wa hehuka, ani mrwalo wa kona wa rwaleka.”

Currently Selected:

Matewu 11: BEC2016

Highlight

Copy