Genesisi 24

Msikati wo lumba Isaake

1Abrahamu koko a ti ti kumbile ngutu, a ti ni malembe o tala; se Mkoma a katekisile Abrahamu ka totshe. 2Abrahamu a to khene ka txithumi txakwe txa kale txa ha m'tini, a txi txi nga ti fumela sotshe si a nga ti naso:

“Veka dianza dako hahatshi ka dithumbi dangu, 3kasi ku ni txi ku xambanyisa ngu Mkoma, Txizimu txa nzuma ni mafu, ti to u nga thuke u txi lowolela msikati mwanana wangu, hagari ka mahorana a Vakanana, ava ni nga zumba hagari kwawe; 4aniko u na tsula ka maxaka angu, eyo u na ya lowolela msikati mwanana wangu Isaake.”

5Txithumi txi wombile tiya kwakwe:

“Kutilava wamsikati kha tumeli kuwuya ni nani ka diya ditiko; ina ti na laveka ku ni txi tshumeta mwanana wako wa dijaha ka ditiko di awe u dhawukelako ka dona kani?”

6Abrahamu a mxamute, a txi khene:

“Ti wonele! U nga tshumete mwanana wangu u txi tsula kheyo! 7Mkoma, Txizimu txa nzuma, awu a nga ni teka nyumbani ka tate wangu ditikoni mu ni nga velekelwa kona, awu a nga ni gela ngu kuxambanya a txi khene: Ni na ningela ditiko diya ka liveleko lako, ene a na ruma ngelozi yakwe masoni kwako, se u na ya lowolela kheyo msikati mwanana wangu. 8Ngako wamsikati asi ti lavi ku kulondeta, u na va u si nga ni mnandu ka txixambanyo txako; aniko, u nga teke mwanana wangu u txi myisa kheyo.”

9Sekoko txithumi txi to veka dianza hahatshi ka dithumbi da Abrahamu nyamne wa txona, txi txi mxambanyela mhakeyo. 10Txithumi txi to teka digumi da makamelu ka mtxhambi wa makamelu a nyamne wa txona, se txi txi teka simaha ka sotshe sa sinene, asi nyamne wakwe a nga ti naso manzani kwakwe; txi tsula naso#24:10 i ku Siriya, ka minambo yimbidi. Mesopotamiya, ka didhoropa da Nahori. 11Awule wa txithumi a to khizamisa makamelu, me humula hahanze ka didhoropa, hafuhi ni txisima, ni minova, ka mbimo yi vavasikati va humako va txi ya reka mati. 12Eyo ene a to kombela, a txi khene:

“Mkoma, Txizimu txa nyamne wangu Abrahamu, na ku kombela taku u txi ni vhune nyamsi, u txi mmahela wumbilu nyamne wangu Abrahamu.” 13Wona taku ni emile hafuhi ni txisima txa mati, kambe vanana vamahorana va vathu va didhoropa diya, va huma ku ta reka mati. 14Maha tito, awule ni womba kwakwe ni txi khani: “Weketa lidhuwa ni na sela mati”; se ene a txi ni xamula a txi khene: “Sela, kambe ni na ninga ni ona makamelu ako me sela, a nave wu u nga mlongisela, kuva msikati wa txithumi txako Isaake; se ka toneto, ni na ti wona to, u mahete wumbilu nyamne wangu Abrahamu.”

15A txi ngadi e womba-womba, ku to bwaka Rebheka, mwana Bhetuweli, wa mwana Milka, msikati wa Nahori, mwanawe wa Abrahamu, a di ni lidhuwa hadikata. 16Muhoraneyo Rebheka a ti ti tshurile ngutu, i ti ti mbiri, a ti sanzi kutekwa ngu wamwamna; ene a to relela txisimani, e tata lidhuwa lakwe, e kwelela. 17Sekoko txithumi txi to tutuma txi hingeta Rebheka, txi txi kha txona:

“Hi nga niha ni sela ka kudotho matiyo lidhuwanimo kwako.” 18Se ene a to khene: “Sela, awe nyamne wangu.” A to kuluveta e weketa lidhuwa manzani kwakwe, awule wa txithumi e sela. 19A di gwitile ku mninga e sela, muhorana a to khene:

“Ni na reka kambe mati ni txi ninga makamelu ako otshe, me sela.”

20Kunukunuko, a to thela lidhuwa la mati mkawuni, a txi tshumela kambe eya reka mati, e ta ninga otshe makamelu ma txi sela. 21Awule wa wamwamna a ti ti mu wonisisa, a di malate, kasi kuwona tito, Txizimu txi katekisile mwendo kha txa di katekisa dipfhumba dakwe.

22Mbimo yi makamelu ma nga gwita kusela mati, wamwamna a to teka txikurufu txa nzalama, txa hafu ya dixekele kunemela ka txona, a txi mnameka ha thonvuni, ni masinda mambidi, a digumi da maxekele kunemela ka ona, a txi mu ambalisa mawokoni kwakwe. 23Se a txi wotisa muhorana ku khene:

“U mwanana wa mani kani? Na ku kombela u txi ni gela. Ina m'tini ka tate wako ku na ni wukhalo wa kudingana kuotela athu kani?”

24Muhorana a to xamula, a txi khene:

“Ani ni mwanana wa Bhetuweli, awu a nga velekwa ngu Milka ni Nahori.” 25Se a txi sanzekela mapswi a ku khene: “Ani kwathu diho diphunde, ni lihawu la lingi, ni wukhalo wa kuotela ka wona.”

26Sekoko wamwamna a to khizama a txi khozela Mkoma, Txizimu, 27a txi khene:

“A na dhumiswe Mkoma, Txizimu txa Abrahamu, nyamne wangu, nguko ene Mkoma kha leka kukomba wunene wakwe ni kuthembeka kwakwe ka nyamne wangu, a txi ni heleketa ngu nzila yo lulama m'tini ka maxaka a nyamne wangu.”

28Muhorana a to tutuma a txi ya xawutela m'tini ka mwamwakwe, ati ti nga maheka. 29Rebheka a ti ni ndiya yi nga ti dhanwa ku i Labani. Se Labhani, a txi hingeta wamwamna txisimani. 30Ngako a di woni txikurufu ha thonvuni, ni masinda mawokoni ka ndiyakwe, a txi engisa mapswi a Rebheka ndiyakwe, a ku khene: “Awuwa wamwamna a wombile tiya ni tiya kwangu. Labhani a to tsula ka dizambido, a txi ya di mana di di emile kumweko ni makamelu, hafuhi ni txisima.” 31A txi ya m'gela ku khene:

“Wulela awe u nga katekiswa ngu Mkoma. U zumbela txani hahanzeho kani? Ni ku lulamisete nyumba ni wukhalo wa makamelu.”

32Sekoko wamwamna a to wulela nyumbani. Se Labhani a to ya txhatxha makamelu, a txi ma ninga diphunde ni lihawu, a txi wuyisa ka wule wa wamwamna mati a kusamba minenge, ene ni vavamna vale a nga ti navo. 33Se va to m'vekela sakudya, kambe ene a ti khene:

“Kha ni na kudya, ni sinzi kuwomba ti ni telako tona, i ku mhaka ya dipfhumba dangu.” Konaho, Labhani a to khene: “Womba.” 34Sekoko ene a ti khene:

“Ani ni txithumi txa Abrahamu.” 35Mkoma a katekisile ngutu nyamne wangu, e maha nyatithombe wa hombe:

A mningile tinvuta ni tihomu, silivhela ni nzalama, sithumi sa txiwamna ni sa txisikati, makamelu ni timbongola.” 36“Sara, i ku msikati wa nyamne wangu, kukumbani kwakwe, a m'velekete mwanana, awu a nga mninga yotshe thomba yakwe.” 37Ene nyamne wangu a ni xambanyisile, a txi khene: “U nga thuke u txi lowolela mwanana wangu msikati, hagari ka mahorana a vanana va Vakanana, avava ni nga aka ditikoni kwawe.” 38“Aniko tsula ka nyumba ya tate wangu, se koneyo u na ya tekela mwanana wangu msikati, wa lixaka la ka kwathu.” 39Sekoko ani ni ti khani ka nyamne wangu: “Eneyo wamsikati a txi lamba kuwuya ni nani, ni na maha txani kani?” Ene a ni xamute, a txi khene: 40“Mkoma, awu ni tsimbilako ngu mlayo wakwe, a na rumela ngelozi yakwe kumweko ni nawe a txi katekisa dipfhumba dako, u na ya tekela kona mwanana wangu msikati, wa lixaka la ka kwathu, muwa nyumbani ka tate wangu. 41Sekoko konaho u na va u di thusekile ka txixambanyo txi u nga ni mahela, ngako u txi hoka ka maxaka angu. Se ngako va txi lamba ku kuninga msikati, u txi wuya nayo. Konaho u na va u di thusekile kambe ka txixambanyo txi u nga ni mahela.”

42Ngako ni di bwakile ha txisimani nyamsi ni khongete ni txi khani: “Mkoma, Txizimu txa nyamne wangu Abrahamu, ngako u di katekisile mhaka yangu, ayi ni endelako yona konkuwa,” 43ni wone, ni ho hawa ha txisimani ka mati. Muhorana wu a no bwaka, a txi tela ku ta reka mati, ngako ni txi m'gela ku khani: “Hi nga niha mati amadotho o sela,” 44a txi ni xamula, a txi khene: “Sela, se ni na ti wona ti to ngene msikati wu Mkoma a nga lulamisela mwanana wa nyamne wangu Abrahamu.” 45Ni sanzi kugwita kumaha mkombelo wuwa mbiluni kwangu, konako ku to bwaka Rebheka, a di ni lidhuwa lakwe hadikata. Ene a to relela txisimani a txi reka mati. Se ani ni ti khani kwakwe: “Hi ngani ha mati amadotho o sela.” 46Ene a to kuluveta kuweketa lidhuwa lakwe ngu hadikata, a txi khene: “Sela, se ni na reka o ninga makamelu ako ni ona me sela.” Ni di sete, a to ma ninga me sela ni ona makamelu.

47Sekoko ni to mu wotisa ni txi khani: U mwanana wa mani kani? Ene a ni xamute a txi khene: “Ni mwanana wa Bhetuweli, mwana Nahori ni Milka.” Sekoko ni to nameka phera ha thonvuni kwakwe, ni txi mu ambeka masinda mawokoni kwakwe. 48Se ni to khizama ni txi khozela Mkoma, Txizimu txa nyamne wangu Abrahamu, awu a nga ni komba nzila yo lulama, kasi ku ta teka mwanana wa dihorana wa Nahori, mwanawe nyamne wangu, kufela ku e maha msikati wa mwanana wakwe. 49Ngu toneto, ngako mi txi ti lava kuvhuna nyamne wangu ngu wumbilu ni ditshuri, ni geleni, ngako mi si ti tsakeli, ni geleni kambe, kasiku ni tshumela, ni teka nzila ya txinene mwendo ya txibhabha.

50Sekoko Labhani ni Bhetuweli va to xamula, va txi kha vona:

“Dipswi diya di ta ngu ka Mkoma, kha hi sikoti kuangula dimwani dipswi kwako, hahanze ka tile ene a ti tsakelako. 51Ndiyo Rebheka a masoni kwako; mteke u txi tsula nayo; a nave ene msikati wa mwanana wa nyamne wako, madingano ni ti Mkoma a nga womba.”

52Se ngako txithumi txa Abrahamu txi di engisile mapswi awa, txi to khizama hahatshi, txi khozela Mkoma. 53Se awu wa txithumi a di humisile#24:53 Mwendo: siya sa lisima. siya sa silivhela, ni sa nzalama, ni tinguwo, a to si ningela ka Rebheka; e ninga kambe ndiyakwe Labhani ni mame wakwe, sihiwa sa lisima la hombe. 54Sekoko va to dya ve sela, ene ni majaha awa a nga ti kumweko nawo, va txi otela konaho wusiku wonewo. Mangwanani ka kona, ngako va di wukile, awule wa txithumi a to khene:

“Ni lekeni ni tsula ka nyamne wangu.”

55Sekoko Labhani, ndiya ya Rebheka, ni mame wakwe, va to kha vona:

“Hi kombela mbiri yi txi sala ni nathu amu ka digumi da masiku; ngu msana a na tsula.” 56Awule wa txithumi a to khene:

“Mi nga laveni ku ni sweta, nguko Mkoma a katekisile dipfhumba dangu; ni lekeni ni txi tshumelela ka nyamne wangu.”

57Vona va to kha vona:

“He dhaneni mbiri hi ta engisa ati yi lavako tona.”

58Va to dhana Rebheka va txi ta kha vona:

“Wa ti lava kutsula ni wu wamwamna kani?”

Ene a ti khene: “Ni na tsula!”

59Sekoko va to mtumelela mwanawe Rebheka, e tsula ni pheleketi yakwe, ni txithumi txa Abrahamu, ni vavamna vale. 60Va to katekisa Rebheka, va txi kha vona kwakwe:

“Awe ndiyathu veleka

magumi a mazana a magumi a mazana,

liveleko lako li na xule valala va lona.”

61Sekoko a to khukha Rebheka ni tipheleketi takwe, ve gadha makamelu, va txi londisa awule wamwamna, txithumi txa Abrahamu txi to teka Rebheka, txi tsula nayo.

62Sekoko Isaake a ti khukhile ka wukhalo wa txisima txa Lahayi-Royi, e ta aka ditikoni ka Negebhe. 63Se Isaake a to huma#24:63 Mwendo: kupimisa. ni minova eya mpetoni kuya khongela; ngako a di gute maso, a to wona makamelu ma txi bwaka. 64Rebheka nene ngako a di gute maso a to wona Isaake, se e txhika ngu ha dikameluni. 65Sekoko a to wotisa ka txithumi txa Abrahamu, a txi khene:

“I mani wule wa wamwamna a tako ngu mpetoni, a txi hi hingeta kani?”

Awule wa txithumi a to khene: “I nyamne wangu.”

Sekoko a to teka nguwo, a txi ti fenengeta khoheni.

66Txithumi txi to xawutela ka Isaake, totshe ti txi nga ti thuma. 67Isaake a to wuleta Rebheka nyumbani ka mame wakwe, Sara, a txi mu amukela Rebheka kuva msikati wakwe, a txi mranda. Se Isaake a to mana mthaveleli wa mbilu yakwe, ene se a nga ti fetwe ngu mame wakwe.

Currently Selected:

Genesisi 24: BEC2016

Highlight

Copy