Genesisi 23

Kufa ni kutshotshwa ka Sara

1Sara a hanyile 127 wa malembe, aawa ngu ona malembe a kuhanya ka Sara 2se a fete Keriyate-Aribhe, i ku Hebroni, ditikoni ka Kanana. Abrahamu a to ya maha tifanelo ta madila ni kusaluka. 3Ngu msana, Abrahamu a to khukha ahawa mfi a nga ti kona eya womba ka vanana va Heti, a txi khene:

4 # Wona ni ka: Vaheb. 11:9,13; Mith. 7:16. “Hagari kwanu ani ni muwuyi, ni mluveli, ni kombela wukhalo, kasi ku nave mathithani ko ni lumba, tito, ni na tshotsha kona mfi wangu.”

5Vanana va Heti va to xamula ka Abrahamu, va txi kha vona:

6“Hi engise, awe nyamne wathu: Awe u didhota da Txizimu hagari kwathu; tshotsha mfi wako ka diphala di i ku da lisima ka maphala athu; ni wammweyo kwathu kha na mbi kulambela diphala dakwe, kuva u tshotsha mfi wako ka dona.”

7Sekoko Abrahamu a to khukha a txi ema, e nama masoni ka vathu va ditiko, i ku vanana va Heti. 8A txi va gela ku khene:

“Ngako ti txi mi tsakela ku ni teka mfi wangu ni txi ya mtshotsha, ni vhuneni ngu kuya ni kombelela ka Efroni, mwana Zowari, 9kasi ku a txi ni ninga diphala da Makipela, di kuho ngu magwito ka thembwe yakwe, a txi ni xavisela ngu mtengo wo dingana, di na maha diyiva do tshotsha ka dona, hagari kwanu.”

10Sekoko Efroni, a ti khalahatshile hagari ka vanana va Heti, konako Efroni, Muheti, a to xamula ka Abrahamu, na va txi mu engisa vanana va Heti, i ku votshe vale va nga ti wulela ngu ha txikeni ka didhoropa dakwe, a txi khene:

11“Ahim-him, awe nyamne wangu, ni engise. Ani na kuninga thembwe, kumweko ni diphala di di ku ka yona, ni kuninga sotshe siya, masoni ka vanana va vathu vangu. Tshotsha mfi wako.”

12Sekoko Abrahamu a to nama masoni ka vathu va ditiko 13a txi womba ka Efroni, na a txi engiswa ngu vathu va ditiko, a txi khene:

“Na kombela u txi ni engisa. Ni na kuninga male ya kuxava thembwe, yi amukele, se ni na ya tshotsha kona mfi wangu.”

14Efroni a to xamula a txi khene:

15“Nyamne wangu, ni engise: Thembwe ya kuteka 400 wa maxekele a silivhela, nji txani txonetxo hagari kwangu ni nawe kani? Tshotsha koneho mfi wako.”

16A di ti pfite eto Abrahamu ngu ka Efroni, Abrahamu a to mpimela male ya silivhela, yi a nga yi womba masoni ka vanana va Heti, ya 400 wa maxekele a silivhela, male yi nga ti ti thumiswa ka vaxavisi.

17Ngu toneto, thembwe ya Efroni, yi nga ti ti Makipela, masoni ka Mambre, thembwe ni diphala di di kuho ka yona, ni yotshe mindonga yi yi nga ti ti ho, mndani ka mihingano ya kona 18si to tsaniswa kulumba Abrahamu, masoni ka vanana va Heti, ka votshe vale va nga ti ti wulela ngu ha txikeni ka didhoropa dakwe.

19Ngu msana, Abrahamu a to tshotsha msikati wakwe Sara, ka diphala di di ku thembweni ka Makipela, masoni ka Mambre, i ku Hebroni, ditikoni ka Kanana. 20Ngu toneto, ngu vanana va Heti, ku to tsaniswa ka Abrahamu kulumbwa ngu thembwe, ni diphala di di nga ti ti ka yona, kuva wukhalo wo tshotshela kona vafi.

Currently Selected:

Genesisi 23: BEC2016

Highlight

Copy