Eksodha 2

Kuvelekwa ka Mosi

1Wamwamna wokari wa nyumba ya ka Levhi, a to ya teka msikati wa nyumba ya ka Levhi. 2#Wona ni ka: Mith. 7:20; Vaheb. 11:23. Wamsikatiyo, a to mana txirumbu e veleka mwanana wa mfana, ngako a di woni ti to mwanana wa kona mbwo tshura, a to msisa ngu txipimo txa mitxima yiraru. 3Ngako a nga mbi sikota ku msisa mbimo yo lapha, a to teka disexita da milala e di kopola ngu dibumba ni mraka, se e sisa ka dona mwanana, eya di pfhomeka mu ka makhagala, likasani ka mnambo. 4Se ndiyakwe mwanana wule wa mfana a ti ti dingilila a di kule nyana, a txi wonetela ati ti no humelela kwakwe.

5Se mwanana wa Faro wa dihorana, a to relela eya mnamboni, kasiku eya samba, na kuve sithumi sakwe sa vavasikati si ti tsimbila-tsimbila likasani ka mnambo. Konako a to wona disexita hagari ka makhagala, e ruma mmweyo wa sithumi sakwe, ti to eya di teka. 6A to di tula, e wona mwanana: I ti mwanana wa mfana a nga txi dila. Nguko mxanisekela, a to womba, a txi khene:

“Awuwa i mwanana wa mfana, wa Muhebheru!”

7Sekoko ndiya ya mwanana wule wa mfana a to khene ka mwana Faro wa dihorana:

“Wa ti lava ti to ni tsula ni ya kudhanela wamsikati wa Muhebheru, awu a nota kuwunjela mfana wuwa kani?”

8Se mwanana wa Faro wa dihorana a to mxamula, a txi khene: “Tsula.”

Se awule wa dihorana a to tsula a txi ya dhana mame wa mwanana. 9Sekoko mwanana wa Faro wa dihorana a ti khene kwakwe:

“Teka mfana wuwa u txi ya muwunja e kula; ni nata kuninga hakhelo ya kona.”

Se awule wamsikati a to teka mwanana wule wa mfana eya muwunja. 10Se mbimo yi mfana a nga kula, a to mteka e m'heleketa ka mwanana wa Faro, awule a nga ya mu amukela, e mmaha mwanana wakwe; se a to mraya ditina daku#2:10 Ti wombako ku kuthavisa. i Mosi, a txi khene:

“Nguko ni m'humisile matini.”

Mosi e tutuma ditikoni ka Egipta

11 # Wona ni ka: Mith. 7:23-29; Vaheb. 11:24. Ka masiku oneyo, Mosi i di wa hombe a to huma kasiku eya wona va ka kwawe; ahale a nga wona mathumelo awe o nemela, txitimwi kwawe; a to wona kambe Muegipta wokari a nga txi peka mmweyo wa mwanawe wa Muhebheru. 12Se Mosi a to rumaruma kheno ni kheno, asi woni m'thu hafuhi, a to daya Muegipta wule, e mtumbeta mafuni. 13Mangwanani ka kona, a to engeta a txi huma aha a nga ya wona majaha mambidi a Vahebheru va txi lwa, ene a to angula wule a nga vhuka mkwawe a txi khene:

“Ngu kutxani u txi peka mwananu kani?”

14Ene a to xamula a txi khene:

“I mani a nga kuveka kumaha#2:14 Mwendo: mthangeli. wa hombe, ni mthethisi hagari kwathu kani? Se u lava ku ni daya nani, nga kule nyamnova u nga daya Muegipta kani?”

Sekoko Mosi a to dhuka, a txi khene: “Mhaka yi zivilwe!” 15#Wona ni ka: Mith. 7:29; Vaheb. 11:27. Faro a di engisile mhakeyo, a to ruma ti to Mosi a txi ñolwa kasi ku e m'daya. Aniko Mosi a to thava masoni ka Faro, e tsula ditikoni ka Midhiyani, amu a nga ya zumba hafuhi ni txisima.

16Se Jetro, mphaxeli wa Midhiyani a ti ni mtxhanu wa vanana ni vambidi vamahorana. Vona va to ya kuya reka mati, ve tata mikawu kasi kuninga mitxhambi ya tate wawe yi sela. 17Sekoko kutota vadyisi va txi ta va tutumisa hale; kambe Mosi a to khukha, a txi va emela, e ninga mati mitxhambi yawe yi sela. 18Vona va to tshumela ve tsula ka tate wawe, awu a nga ya va wotisa, a txi khene:

“Ngu kutxani nyamsi mi kuluveta kuwuya kani?”

19Vona va to xamula va txi kha vona:

“Wamwamna wokari wa Muegipta a hi emete ka vadyisi, a txi hi vhuna kambe kureka mati, aawa mitxhambi yathu yi nga sela.”

20Tate wawe Jetro a to va wotisa, a txi khene: “Ahani ene kani?” Mi mlekete txani a txi tsula eyo wamwamna kani? M'dhaneni e ta dya sakudya ni nathu.

21Mosi a to tumela kuzumba m'tini ka Jetro, awu a nga ninga Mosi, Zipora, mwanana wakwe wa dihorana kasiku e tekana nayo. 22#Wona ni ka: Mith. 7:29. Sekoko Zipora a to veleka mwanana wa mfana, awu ene Mosi a nga mraya ditina daku ngene Gerisoni,#2:22 Ti wombako ku wa kuta. nguko a ti khene:

“Ni mluveli ditikoni ka vane.”

23Ku to maheka taku, msana ka masiku awa, a txifa mfumeli wa Egipta; vanana va ka Israyeli va to maneka va di kuxuphekani ka hombe, ngu mhaka ya wukhumbi wawe; va to dila, se huwa yawe yi to kwela yi txi hoka ka Txizimu. 24#Wona ni ka: Gen. 15:13-14. Se Txizimu txi engisile kudila kwawe, Txizimu txi to alakanya txitumelelano txi txi nga txi maha ni Abrahamu, ni Isaake ni Jakobe. 25Se Txizimu txi woni wukhumbi wa vanana va ka Israyeli, Txizimu txi to va pfela wusiwana.

Currently Selected:

Eksodha 2: BEC2016

Highlight

Copy