Eksodha 1
1
Sixaniso sa va ka Israyeli ditikoni ka Egipta
1 # Wona ni ka: Gen. 46:8-27. Aawa koko, ngu ona matina a vanana va ka Israyeli, avale va nga wulela ditikoni ka Egipta, kumweko ni Jakobe, mmwani ni mmwani ni ngamu yakwe: 2Rubheni, ni Simiyoni, ni Levhi, ni Judha, 3ni Isakari, ni Zebhuloni, ni Bhenjamini, 4ni Dhani, ni Naftali, ni Gadhi, ni Aseri. 5Votshe va nyumba ya ka Jakobe, i ti ti mtxhanu wa magumi ni mambidi a vathu. Kambe Josefa a ti ti maneka a di Egipta ngu kale.
6Ngako koko Josefa a di fite, ni votshe vanawe, ni lotshe liveleko la mbimo yoneyo, 7#Wona ni ka: Mith. 7:17. vanana va ka Israyeli va to velekelana ve anda ngutu; kambe va manekile va txi tala, ni kuva ni mtamo, aha koza ditiko da Egipta di txi tala ngutu ngu vona.
8 # Wona ni ka: Mith. 7:18. Msana keto, ku to humelela mfumeli wamphya ditikoni ka Egipta, awu a nga ti sa m'ziva Josefa. 9Eyo a to khene ka vathu vakwe:
“Wonani ti to vathu vava, i ku vanana va ka Israyeli mbavangi, kambe va ni mtamo ngutu kupinda athu. 10#Wona ni ka: Mith. 7:19. He thumiseni wutxhari kasiku hi si va leki ve anda, nguko hahanze ka toneto, ka mbimo ya yimbi, va na tatisa mtengo wa valala vathu, va txi hi lwisa, ngu msana va txi huma mu ditikoni.”
11Se Vaegipta va to veka vahombe va#1:11 Mwendo: mithumo. tihunzu, ti to ve xupha Vaisrayeli, ngu mithumo ya txibhalo. Va to akela Faro madhoropa a Pitomi, ni Ramusesi, amu ku nga ti ni ko veketela kona silo sakwe. 12Aniko, hambiko Vaegipta va nga ti va xupha, Vaisrayeli va manekile va txi anda ni kukula; se Vaegipta va to karateka ngutu ngu mhaka ya vanana va Israyeli. 13Se Vaegipta va to thumisa vanana va ka Israyeli ngu tshofu; 14ngu kumaha keto, va to va pfisa kupanda kuhanyani kwawe, ngu wukhumbi wo nemela, ngu kuvhuva txitsowo ni kubhaka sitini, mithumo yo hambana-hambana, ya tithembweni ni mithumo yotshe yi va nga txi va ruma ku yi maha.
15Se mfumeli wa Egipta a to womba ka vahefemulisi va Vahebheru (evo mmwani a nga txi dhanwa ku i Sefira, se ditina da mmwani i Fuwa), a txi khene:
16“Nga ti mi txi hefemulisa va sirumbu sa vasikati va Vahebheru, wonisisani vanana va kona. Nga ti i di mfana, dayani; aniko i di mwanana wa dihorana, mlekeni e hanya.”
17Aniko vahefemulisi ngu kuthava Txizimu, kha va maha nga ti mfumeli wa Egipta a nga ti va rumile tona, va to leka vanana va vafana ve hanya. 18Sekoko mfumeli wa Egipta a to dhana vahefemulisi, a txi va gela tiya:
“Ngu kutxani mi leka vanana vavafana ve hanya kani?”
19Se vahefemulisi va to kha vona ka Faro:
“Vavasikati va Vahebheru kha va fani ni vavasikati va Vaegipta; nguko#1:19 Mwendo: va txharihile. vona va tsana, nava sanzi kuta vahefemuliswa, va ti hefemulisa vapune.”
20Ngu mhaka yeto, Txizimu txi katekisile vahefemulisi.
Se vathu va to talelana, ni kumaha va mtamo ngutu. 21Se ku to maheka taku, ngako vahefemulisi va nga txi thava Txizimu, txona txi to katekisa tinyumba tawe. 22#Wona ni ka: Mith. 7:19. Sekoko Faro a to layela ka votshe vathu vakwe, a txi khene:
“Votshe vanana vavafana va no velekwa va dumwateni mnamboni ka Nilo, aniko, vanana vamahorana va lekeni ve hanya.”
Currently Selected:
Eksodha 1: BEC2016
Highlight
Share
Copy
Want to have your highlights saved across all your devices? Sign up or sign in
A Bíblia em Txitxopi © Bible Society in Mozambique, 2016.
