Eksodha 3

Txizimu txi womba-womba ni Mosi

1Mosi a ti ti dyisa mtxhambi wa tinvuta ta Jetro, msade wakwe, mphaxeli wa Midhiyani. A to gola mtxhambi wa tinvuta e ti yisa txiwulani, aha a nga ya hoka Horebhi mmangoni ka Txizimu. 2#Wona ni ka: Mith. 7:30-34. Ngelozi ya Mkoma yi to woneka ka Mosi ngu mu ka m'dhikila wa mndilo, hagari ka txipopo. Mosi a to txi wonisisa, e wona ti to txipopo txa tura ngu mndilo, kambe txipopo kha txi gumi ngu kuhya. 3Se Mosi a to khene: “Na nga tenderuka, ni txi wona txiwoniso txiya txo xamalisa: Ngu kutxani txipopo txi si hyiko txi tshokoma kani?”

4 Mkoma a woni ti to Mosi wa tenderuka kasiku eya wona. Se Txizimu txi to m'dhana txi txi kha txona:

“Mosi! Mosi!”

Ene a to khene: “Niho hawa.”

5Txizimu txi ti kha txona:

“U nga tshukete hawa; ambula tikathula mikondoni kwako, nguko wukhalo wu u ku ka wona, mafu o sawuleka.”

6 Mkoma a to engeta a txi khene: “Ani ngani Txizimu txa vatate vako, Txizimu txa Abrahamu, Txizimu txa Isaake ni Txizimu txa Jakobe.”

Konako Mosi a to fenengeta khohe, nguko a ti thava kuwona Txizimu.

7Se Mkoma a to khene:

“Ni woni kuxupheka ka ngamu yangu, ayi yi ku ditikoni ka Egipta, ni engisile kudila kwawe ngu mhaka ya vaxuphi vawe; nguko ani na ziva kupandiseka kwawe. 8Ngu mhaka yeto ni relete kasiku ni txi va thusa mu manzani ka Vaegipta, ni txi va humisa ka ditiko donedo, va txi ya ka ditiko da dinene, da hombe, ditiko di di khulungako masi ni wulombe, wukhalo wa Vakanana, wa Vaheti, wa Vaamori, wa Vaferezi, wa Vahevhi ni wa Vajebhuzi. 9Konkuwa, huwa ya vanana va ka Israyeli yi hokile kwangu, se kambe ni wona sixaniso si Vaegipta va va xuphako ngu sona. 10Na kuruma, tsula ka Faro, u txi ya humisa vathu vangu, vanana va ka Israyeli, ditikoni ka Egipta.”

11Sekoko Mosi a to khene ka Txizimu:

“No va mani ani wa kusikota kuya ka Faro, ni txi ya humisa vanana va ka Israyeli ditikoni ka Egipta kani?”

12Txizimu txi ti kha txona:

Ngu ditshuri ani ni na va ni nawe; ngu txiya txikombiso txi no komba ti to ani ni kurumile: Ngako u di humisile vathu vangu ngu Egipta, anu mi nata khozela Txizimu ka mmango wuwa.

13 # Wona ni ka: Eks. 6:2-3. Sekoko Mosi a to khene ka Txizimu:

“Ngako ani ni txi tsula ka vanana va ka Israyeli ni txi ya khani: Txizimu txa vatate vanu txi ni rumile kuta kwanu; se vona va txi ni wotisa va txi kha vona: Ditina da txona i mani kani? Ni na womba ni txi khani txani kani?”

14 # Wona ni ka: Mtu. 1:4,8. Se Txizimu txi ti kha txona ka Mosi:

“ANI NGANI I KU ANI.”

Txizimu txi to kha txona kambe:

U na ya womba tiya ka vanana va ka Israyeli: “ANI NGANI, a ni rumile kwanu.” 15Se Txizimu txi to kha txona ka Mosi: “U na ya womba ka vanana va ka Israyeli u txi khawe: Mkoma Txizimu txa vatate vanu, Txizimu txa Abrahamu, Txizimu txa Isaake ni Txizimu txa Jakobe txi ni rumile kwanu. Adiya nditina dangu ngu hawa ku si gwitiko, di na va txialakanyiso txangu ka liveleko ni liveleko.”

16Tsula u txi ya tshanganisa madhota a ka Israyeli, u txi va gela tiya:

Mkoma, Txizimu txa vatate vanu, Txizimu txa Abrahamu, Txizimu txa Isaake, ni Txizimu txa Jakobe, a wonekile kwangu, a txi ni gela tiya: Ngu ditshuri ni mi endete, ni woni ti mi mahwako kona Egipta. 17Ngu mhaka yeto, ani ni khani: Ni na mi thusa mu kuxuphekani ka Egipta mi txi ya ditikoni da Vakanana, Vaheti, da Vaamori, da Vaferezi, da Vahevi ni da Vajebhusi ka ditiko di di khulungako masi ni wulombe.

18Se vona va na engisa dipswi dako; u na tsula awe ni madhota a ka Israyeli ka Faro, mfumeli wa Egipta, u txi ya m'gela tiya: Mkoma, Txizimu txa Vahebheru, a tile kwathu. Konkuwa hi leke hi txi teka dipfhumba da masiku mararu hi txi tsula txiwulani, kasi hi txi ya phaxa ka Mkoma Txizimu txathu. 19Ani na tiziva ti to Faro, mfumeli wa Egipta, kha na mbi mi leka mi txi tsula, hahanze ko kurumetwa ngu dianza da mtamo. 20Ngu mhaka yeto, ni na nawuluta dianza ni txi peka ngu dona ditiko da Egipta, ngu sixamaliso sotshe ni no si maha kwawe; msana ka toneto ngu kona ene a no mi leka mi txi tsula.

21Ni na maha ti to vathu vava ve mana kateko masoni ka Vaegipta; ngako mi txi huma, kha mi na mbi tsula mi si nga ni txilo. 22Nguko wamsikati mmwani ni mmwani a na kombela ka mwakelani wakwe ni ka mmuyi wakwe,#3:22 Mwendo: sa lisima. siya sa silivhela ni siya sa nzalama, hambi ni syambalo si mi no ambeka vanana vanu va majaha ni vanana vanu vamahorana; se mi na handa Egipta.

Currently Selected:

Eksodha 3: BEC2016

Highlight

Copy