1 Musa 32
32
Si Jakob pejumpa dekket si Esau
1Iterrusken si Jakob mo perdalanenna. Nai roh mo barang piga-piga malaèkat lako mendahisa. 2Idah si Jakob kessa mo kalak i, nina mo, “Isèn ngo Undung-undung Dèbata,” kumarna i ibaing mo gerarna Mahanaim.
3Kessa i ipasulak si Jakob mo utusenna merdalan mengelebbèisa mi Edom lako menjumpai si Esau kakana i. 4Tennah si Jakob taba kalak i, “Bagèen mo dokken taba kakangku si Esau, ‘Aku si Jakob dedahenmu sidekkahna èn rebbak si Laban ngo aku. 5Bagèndari lot ngo lembungku, kalodèngku, biri-biri, kambing dekket naposo pè. Kutengesken berita èn taba kono abang, dekket pengidoen asa sampang atèmu.’ ”
6Balik kessa mo utusen i mendahi si Jakob, idokken kalak i mo, “Enggo laus kami mendahi si Esau kaka ndènè i. Bagèndari enggo i dalan ia lako roh mi sèn menimbaki kènè. Lot ngo empat ratus kalak denganna.” 7Mendengkoh i mbiar bana buradan mo si Jakob. Nai ibagi mo denganna i gabè dua nuhnuhen, bagima pè biri-birina, kambingna, lembuna bak untana pè. 8Dok atèna, “Mula roh si Esau janah ikubu nuhnuhen perlebbè i, tah ndorok giam mperrus nuhnuhen peduaken lako mabaken dirina asa maluah.”
9Kessa i mersodip mo si Jakob, “Ialè Dèbata siniuèen empungku si Abraham dekket bapangku si Isak, dengkohken mo aku. Kono ngo alè Jahowa mendokken aku balik mi nagerringku. Ipadanken kono ma ngo alè Jahowa mengatur karina selloh bangku. 10Situhunna oda patut aku menjalo kelleng atèmu dekket kinituhu sienggo niberèkenmu bangku. Tikan berkat aku meneberangi Laè Jordan, pellin tongket ngo kessa kuembah. Bagendari balik dekket sidua nuhnuhen èn. 11Memmes kupido bamu, paluah mo aku bai kakangku si Esau nai. Mbiar aku, tah bakunè pekirohna i lako mengkubu janah mengeradasken kami karina, bagi bak daberru dekket anak-anak. 12#1 Ms. 22:17 Èngèt mo alè Jahowa bagah-bagahmu ai kono ngo mengatur karina mendè taba aku janah memerèken bangku mbuè pinempar. Sada kalak poda terbaingsa milang kumerna buèna bagè kersik i biding laut.”
13-15Enggo kessa mermalam i sidi, ibuat si Jakob mo dèba pinakan-pinakan i lako merèken bai si Esau. Sinaing berèenkenna, imo: Dua ratus kambing berru-berru, duapuluh kambing tonggal, dua ratus biri-biri berru-berru, duapuluh biri-biri tonggal, tellupuluh unta pesusuken rasken anakna, empatpuluh lembu berru-berru, sipuluh lembu tonggal, duapuluh kalodè berru-berru, dekket sipuluh kalodè tonggal. 16Ibagi-bagi mo pinakan i gabè piga-piga nuhnuhen, janah gennep nuhnuhen ipesakat mendahi sada kalak naposona. Nina mo taba kalak i, “I lebbè mo kènè merdalan janah kennah lot kellangna nuhnuhen sisada mi nuhnuhen sisada nai.” 17Idokken si Jakob mo taba naposona perlebbè, “Mula pejumpa ko dekket kakangku si Esau janah mula ikusoken, ‘Isè tuanmu? Naing mikè ko? Isè sidasa pinakan-pinakan siniarakmi?’ 18Aloi mo bagèen, ‘Milik dèdahenmu si Jakob ngo i. Itengesken ngo èn mahan persembahna taba si Esau kakana. Ukum dèdahenmu si Jakob roh nè mo ipodi nami nai.’ ” 19-20Taba naposona peduaken, petelluken dekket karina sinidokna lako pehèdu-hèduken nuhnuhen i, tong ngo bagi ma pendokkenna. Dokatè si Jakob ndorok ngo ièlèk si Esau merkitèken pemerèkenna i, asa mula jumpa ia nahan tentu malap ngo ukur si Esau midahsa. 21Jadi lebbèen ngo itengesken siberèenkenna i, tapi ukum ia mermalam dèng ngo i undung-undungna.
Si Jakob mergumpil i Pniel
22Bernginkenna i, kèkè mo si Jakob, iarahken mo duana sinibagesna i, dekket sidua kalak radingna i dekket anakna sisipuluh sada kalak i, meneberangi laè Jabok. 23Enggo kessa isuberrangken kalak i karina, molih ngo ukum ia, janah ibakin mo karina hartana mi suberrang kèpar. 24#Hos. 12:3-4 Tapi tading ngo i kèpar sadasa.
Nai roh mo sada kalak anak laki, mergumpil dekket si Jakob soh mi mayak nterrang ari. 25Iakap alona i kessa mo oda ndorok mennang ia i pergumpilen i, mèter itempuk mo tulan tembuk si Jakob, gabè sihit mo tulan tembukna i. 26Nai idokken mo taba si Jakob, “Paluah mo aku; ai sigejap nai mbincar mo mataniari.”
Ialoi si Jakob mo, “Oda kupaluah kono, mula oda ipasu-pasu kono aku.”
27“Isè ngo gerarmu?” nina mengkusoi.
“Si Jakob ngo” nina mengaloi.
28 #
1 Ms. 35:10
Nai idokken nola mo, “Oda nè si Jakob gerarmu. Enggo mergumpil ko dekket Dèbata bang dekket jelma, janah mennang ngo ko; kerna nai gabè si Israel mo gerarmu.”
29 #
Prh. 13:17-18
Nai idokken si Jakob mo, “Bagahken mo gerarmu.” Tapi ialoi kalak i mo, “Oda perlu kusoenmu isè gerarku.” Nai ipasu-pasu mo si Jakob.
30Nai idokken si Jakob mo, “Enggo hadep abè aku dekket Dèbata, janah nggelluh dèng ngo aku.” Kumernaken i ibaing mo gerar bekkas i Pniel. 31Tikan mbincar mataniari, itadingken si Jakob mo Pniel i, janah mekah-ekkah ngo ia kerna kellip tulan tembukna. 32Soh bagèndari pè oda ngo ipangan kalak Israel jukut tulan tembuk, kumernaken itempuk tulan tembuk si Jakob.
Currently Selected:
1 Musa 32: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
