1 Musa 31
31
Si Jakob mperrus bai si Laban nai
1Terbertik mo bai si Jakob rana-rana dukak-dukak si Laban bagèen, “Enggo mo ilaum si Jakob karina milik bapanta. Karina kinibèakna i harta bapanta nai ngo.” 2Idah si Jakob ma ngo, ukum si Laban oda nè ramah bagè sidekkah ari tabasa. 3Nai idokken Jahowa mo taba si Jakob, “Balik mo ko mi kuta bapamu, mendahi kadè-kadèmu. Kuondingi pè ko.”
4Enggo kessa i ipasulak si Jakob mo kalakna mendahi si Rahel dekket si Lea asa roh kalak i pejumpa dekketsa i jampalen, i bekkas pulungen kambing bak biri-birina. 5Nai idokken si Jakob mo taba kalak i, “Kuidah ukum kalak puhun oda nè ramah bagè dekkah ari taba aku, tapi iondingi Dèbata nisembah bapangku ngo aku. 6Kènè pè ibettoh kènè ngo, dak mahan bahaen ngo aku tuk gegohku rebbak kalak puhun. 7Tukasi pè bagidi, iakkali ngo aku, gabè moru upahku sipuluh kali lempit. Tapi oda ngo ipadiat Dèbata taki-takina jahat bangku i. 8Tikan idokken kalak puhun, ‘Upahmu ngo kambing mertiktik, nai karina kambing simerdokar,’ mertiktik anakna. Tikan idokken, ‘Kambing ganding mo upahmu.’ Nai karina simerdokar, ganding mo anakna. 9Bagi mo ibaing Dèbata muat pinakan milik kalak puhun lako merèken bangku.
10Tikan mosim mertinokor pinakan-pinakan i, kuidah mo ipas nipingku karina kambing jantan i, mersurar, mertiktik dekket ganding. 11Mengerana ngo Dèbata merupaken malaèkat taba aku ipas nipingku i, bagèen, ‘Alè Jakob.’ Nai kualoi mo, ‘Kadè ngo alè Dèbata.’ 12Idokken malaèkat i mo, ‘Tengen mo, karina kambing jantan simertinokor i surar ngo, kerna enggo Kuidah karina ulah-ulah simatuamu si Laban taba kono. 13#1 Ms. 28:18-22 Aku ngo Dèbata nidahmu i Betel. I sidi tikala i enggo ipèlèken kono sada batu mahan pernèngèten merkitè iarirken kono minak zaitun mi babona. Merjanji ngo kènè tikanna i taba Aku. Bagèndari pè, kebbas mo kono lako balik mi kuta bekkasmu tubuh.’ ”
14Nai ialoi si Lea dekket si Rahel mo, “Oda lot bagian nami i harta bapa nai. 15Ai iètong ngo kami kalak. Enggo mo ipejahèken kami, janah tokor nami sinijalona enggo ikeriken ma. 16Karina kinibèak bapa sienggo ibuat Dèbata situhuna milik nami dekket dukak-dukak nami ngo i. Ulaken mo bakunè pendokken Dèbata taba kono.”
17-18Nai merkebbas-kebbas mo si Jakob lako balik mendahi partuana i nagerri Kanaan. Iampèken mo sinibagesna dekket dukak-dukakna mi babo unta janah iembah mo karina pinakanna dekket karina nicametna i Mesopotamia. 19Tikanna i, i jampalen ngo si Laban menggontingi bukbuk biri-birina, janah tikanna i mo itangko si Rahel gana-gana pengondingi jabu milik bapana. 20Iakkali si Jakob ngo si Laban merkitè oda ibagahken perberkatna i. 21Iembah ngo karina harta milikna janah isudu mo laus. Iseberangi mo laè Efrat ituju mo mi pispis delleng Gilead.
Ijalangi si Laban ngo si Jakob
22Dung pè tellu ari nola asa lot magahken bai si Laban, enggo mperrus si Jakob. 23Nai ipèdèmpu si Laban mo denganna rebbakken mo kalak i mengayaki si Jakob, janah lebbè pitu ari asa dapet terayaki kalak i i pispis delleng Gilead. 24Tikan berngin, roh mo Dèbata ibas nipina, mendokken, “Jaga, ulang iasup ko si Jakob singkebabah kata pè.” 25Nderrangna i, enggo ibahan si Jakob undung-undungna i sada uruk. Nai iuruk sidèban i suak i enggo ma ngo ibahan si Laban dekket denganna i undung-undungna.
26Enggo kessa i, nina si Laban mo taba si Jakob, “Kasa iakkali ko aku janah iembah ko mperrus dukak-dukakku, bagè taban geraha? 27Kasa iakkali ko aku merkitè laus sipsip, oda pella permisi? Ukum ibagahken kono kin ngo, tentu kupeberkat ko ibagasen sampang atè, ipeberkat endè-endè dekket oning-oningen sordam bak kucapi. 28Keppèken dekket ngo naing menanggoh kempu-kempungku pe oda ipadiat ko kira tanda persirangen. Kemotoen ngo nibaingkenmi. 29Otang ndorok ngo kubaing siso kasèa bamu, tapi berngin ndai ipesèngèt Dèbata sinisembah kalak silih partuamu i ngo aku, asa ulang kuasup kono. 30Kubettoh ngo, berkat pè ko kumarna enggo sèkel kalohon ko balik, tapi kasa itangko ko gana-gana terapimku?”
31Nai ialoi si Jakob mo, “Laus pè aku sipsip, kumarna mbiarku ngo tah bakunè icèkèpi kalak Puhun berruna katèngku ngo. 32Tersèngèt gana-gana nidokken ndènè i, mula bai barang isè nahan terdapet lot bana sinisèn èn, kennah ihukum matè ngo ia. Perèso kènè mo Puhun tah lot barang milik ndènè terèkut. Mula lot buat kènè mo. Janah karina kita menaksiken.” Oda ibettoh si Jakob si Rahel ngo menangko gana-gana i.
33Nai laus mo si Laban mi undung-undung si Jakob, lako memerèso, kessa i mi undung-undung si Lea nola dekket mi undung-undung daberru rading sidua kalak i, tapi oda lot jumpasa gana-gana i. Perpodi laus nola mo ia mi undung-undung si Rahel. 34Ningan bagidi enggo mo iboniken si Rahel gana-gana i mi terruh pelano unta, janah kundul mo ia i babo pelano i. Igeledah si Laban mo karina undung-undung si Rahel, tapi laju ngo oda jumpasa. 35Nai idokken si Rahel mo taba si Laban, “Ulang pella melaga kènè pa, kumerna oda cènder aku lako menimbaki kènè, kerna tupung roh pantang olesku.” Iempet si Laban mo tong mendè menulusi, tapi oda jumpasa gana-gana i.
36Nai melaga mo si Jakob, “Kadè ngo pana kejahaten sikubaing?” nina mo merdengan laga. “Kadè pana kesalahenku asa ijalang-jalang kènè aku puhun? 37Asa bagèndari pè, enggo kessa igeledah kènè karina barangku, lot jupa kènè barang milik ndènè? Mula lot ngo, pacidah kènè mo, janah gamparken kènè i sèn asa karina jelma mengidah, janah menghukum kita isè ngo kita bennar. 38Duapuluh tahun mo aku rebbak kènè. Pinakan kambing dekket biri-biri ndènè enggo merrak-merrik, madèng nung kupangan sada kambing tonggal pè giam ipas pinakan ndènè nai. 39Mula lot pè matè ijerngem binatang, oda nung kuembah taba kènè puhun, tapi aku nola ngo menggancihi. Tah lot pè itangko dèba tikan mahar barang berngin, dak idokken kènè ngo kennah kugancihi. 40Nggati kalohon mukup kuakap tikan mahar, bergohen tikan berngin, janah nggati oda ndorok terpeddem aku, sandok siksa mo kuakap. 41Bagi mo kugongken sidekkah mahan bahaen aku rebbak kènè puhun duapuluh tahun tip. Sipuluh empat tahun dekkahna aku mahan bahaen asa bangku berru ndènè i duana janah ennem tahun nai ma mo asa dapet aku upahku kambing bak biri-biri. Sidekkahna i mo iobah puhun upahku sanga sipuluh kali obah. 42Ukum oda kin dak idengani Dèbata empungku i aku, imo Dèbata sinisembah si Abraham dekket si Isak, katèngku enggo mo ipelaus kènè aku oda merupah. Tapi dak tong ngo idah Dèbata karina kinidersangki dekket ulaen sienggo kuulaken, janah berngin ndaboi enggo mo ibaing keputusenNa.”
Merpadan si Jakob dekket si Laban
43Nai ialoi si Laban mo si Jakob, “Berrungku ngo kalak i duana, dukak-dukak kalak i pè hakku ngo i, bagi ma pinakan biri-biri i, aku ngo sidasa i. Situhunna karinana niidahmu nisèn èn, aku ngo sidasa i. Tapi bakunè mo ningku mencèkèpi dukakku bak kempungku. 44Kumarna i, merpadan mo kita janah sisusun mo batu-batu i mahan pernèngètenta.”
45Ibuat si Jakob mo sada batu, ipecènder mo i mahan pernèngèten. 46Nai idokken mo naposona pepulungken batu, ipetènjun mo batu i. Kessa i rebbak mangan mo kalak i i gembar batu sinipetènjun i. 47Ibaing si Laban mo gerar batu mertènjun i, JegarSahaduta, tapi ukum si Jakob, Galed ngo ibaing gerarna. 48Nina si Laban mo mbang si Jakob, “Batu mertènjun èn mo pernèngèten banta sidua.” Ingo sebabna asa ibaing gerarna Galed. 49Idokken si Laban dèng ma, “Dak ijamoti Jahowa mo kita sidekkah nggelluhta mula pè pedaoh-daoh.” Ima mo kernana bekkas i igerari ma Mispa. 50Nina si Laban dèng ma, “Mula jahat ibaing ko taba dukak-dukakku, barang kabin nola ko taba daberru sidèban tukasi oda lot simemettoh, èngèt mo, iperdimata Dèbata ngo kita. 51En mo batu sienggo kutèmbun, janah èn ma mo batu pernèngèten. 52Barang batu mertènjun èn pè, barang batu pernèngèten èn lako pesèngètken kita magahken, mak ndorok kulausi batu mertènjun èn lako mengkubu kono, janah kono pè mak ndorok kilausi batu mertènjun bang pè batu pernèngèten èn lako mengkubu aku. 53Dèbata sinisembah si Abraham dekket sinisembah bapangku si Nahor, mo perhukum banta.” Nai isumpahken si Jakob mo merkitèken Dèbata sinisembah bapana si Isak, kennah ièngèt padanna i. 54Isembellih mo sada pinakan janah ipèlèken i babo uruk i. Nai idilo mo karina naposona i rebbak mangan. Enggo kessa pul mangan mermalam mo kalak i i babo uruk i. 55Njengkas sibarembenkenna, isanggohi si Laban mo karina berru bak kempuna i tanda mersirang, ipasu-pasu mo kalak i, nai mulak mo ia mi kutana.
Currently Selected:
1 Musa 31: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
