1 Musa 30
30
1Ukum si Rahel laju dèng ngo oda merdukak. Kernana i gabè cemburu mo ia midah kakana, gabè nina mo taba si Jakob, “Berrè mo bangku anak, kum oda, matè mo aku.”
2Melaga mo si Jakob taba si Rahel, nina mo, “Oda ngo Dèbata aku èn. Ia ngo maing ko nggempus.”
3Nai nina si Rahel mo, “Mula bagi, rebbak meddem mo ko dekket radingku si Bilha èn, asa tubuh-tubuhen ia. Merkitè bagidi, gabè merdukak mo aku merkitèkensa.” 4Nai iberèken mo si Bilha bai sinibalèna, mercampur mo si Jakob dekket naposona i. 5Mengkandong mo si Bilha janah menubuhken sada anak. 6Nai nina si Rahel mo, “Enggo merhukum Dèbata lako bangku. Idengkohken ngo sodipku, janah iberèken sada anak bangku.” Ibaing mo gerarna anak i si Dan. 7Mengkandong nola mo si Bilha janah menubuhken sada anak. 8Nina si Rahel mo, “Enggo mertuhu-tuhu aku mengalo kakangku, janah mennang ngo aku,” kumarna i ibaing mo gerarna anak i si Naptali. 9Ibettoh si Lea mo, ukum ia oda nè merdukak, iberèken mo radingna si Zilpa bai si Jakob. 10Menubuhken sada anak mo si Zilpa. 11Idokken si Lea mo, “Enggo merlaba aku,” nai ibaing mo gerar anak i si Gad. 12Menubuhken sada anak nola ma mo si Zilpa, 13nina si Lea mo, “Sayur ntua ngo aku kuakap!” Kerna i, igerari mo anak i si Asyer.
14Tikan mosin peraniin, laus mo si Ruben mi jampalen, nai dapetsa mo i sidi sada matcam suan-suanen mahan tambar, iembah mo i taba si Lea inangna i. Idokken si Rahel mo mbang si Lea, “Berrè mo bangku cituk suan-suanen mahan tambar sidapet anakmu i.”
15Ialoi si Lea mo, “Oda dèng pulak iakap ko mengerampasi sinibalèngku? Asa bagèndari pè naing bamu dèng ma tambar sidapet anakku.”
Idokken si Rahel mo, “Mula iberrè ko tambar sidapet anakmu bangku rebbak kono pè si Jakob meddem berngin èn.”
16Tikan balik kessa si Jakob cibonna i i jampalen nai isimbaki mo si Jakob ninganna idokken, “Rebbak aku mo ko meddem berngin èn, kerna enggo kutokor i merkitè tambar sidapet anakku.” Nai campur mo si Jakob dekketsa bernginkenna i.
17Iuèi Dèbata ngo sodip si Lea, mengkandong mo ia, itubuhken mo anak pelimaken. 18Nina mo, “Enggo iberrè Dèbata upahku, kumerna kuberèken si Zilpa bai sinibalèngku,” nai ibaing mo gerar anakna i si Isasar. 19Mengkandong nola mo si Lea, nai itubuhken mo anakna peenemken. 20Idokken mo, “Enggo iberèken Dèbata bangku sibasa-basa merandal kalohon. Ukum bagèndari ihargai sinibalèngku mo aku, kumarna enggo kutubuhken ennem kalak anak daholi,” jadi ibaing mo gerar anak i si Zebulon. 21Enggo kessa i, itubuhken si Lea mo sada berru, gerarna si Dina.
22Nai daoh-daoh ariin, ièngèt Dèbata mo si Rahel; iuèi Dèbata ngo sodipna janah ipaduè ia merdukak. 23Mengkandong mo si Rahel itubuhken mo sada anak. Nina si Rahel, “Enggo ipatakken Dèbata kinilèangki. 24Iberèken Jahowa mo nemmu bangku anak giam sada nai.” Kumarna i ibaing mo gerar anakna i si Josep.
Pengeranaen si Jakob dekket si Laban
25Enggo kessa itubuhken si Rahel anakna si Josep, idokken si Jakob mo ranana taba si Laban, “Paduè mo puhun balik aku mi kutangku. 26Asa kuarahken ma dekket sinibagesku berru ndènè i duana bagi dekket dukak-dukakku. Dapet aku pè kalak i merkitèken mahan bahaen ngo aku rebbak kènè alè Puhun. Idah janah ibettoh kènè ngo, mertuhu-tuhu ngo aku mahan bahaen.”
27Idokken si Laban mo mbangsa, “Dengkohken lebbè aku kèla: Lot ngo gerrek bangku, kemulihken kono ngo asa ipasu-pasu Jahowa aku. 28Bagahken mo kadè katèmu kuberèken bamu.”
29Ialoi si Jakob mo, “Ibettoh kènè ngo puhun, ukum aku mertuhu-tuhu ngo mahan bahaen, janah makin merrak-merrik ngo pinakan ndènè i kumernaken kupermakan. 30Sinderrang madèng aku roh mi sèn, oda ngo pella sadikè harta ndènè, tapi ukum bagèndari enggo mo bèak kènè. Enggo ipasu-pasu Jahowa kènè kumernaken aku. Dok atèngku enggo tikkina aku mahan bahaen lako bai dukak-dukakku.”
31Nina si Laban mo, “Nai kadè mo kuberèken bamu?”
Ialoi si Jakob mo, “Ulang pella iberèken kènè puhun barang kadè. Kupermakan pè pinakan kalak Puhun i, asal mo iuèi kènè pengidoenku èn: 32Paduè kènè mo aku bagèndari asa kuagahi karina pinakan kambing bak biri-biri Puhun i, janah kupejaè karina anak biri-biri mbèrèng, bagi ma dekket kambing si mersurar bak mertiktik. Imo kessa upah kupergeddo. 33Asa ipodi ari mèter murah ibettoh kalak puhun tah bujur pemahanku, barang oda. Tah ndigan roh puhun memerèso upahku, mula idah kènè lot kambing siso mertiktik barang surar, barang pè biri-biri siso mbèrèng, mèter bettohen ndènè mo Puhun, kutangko pinakan i.”
34Ialoi si Laban mo, “Imo tuhu. Sibaing mo bagè sinidokkenmu.” 35Nai sidarinkenna i, isirang si Laban mo karina kambing tonggal mersurar barang ganding dekket karina kambing berru-berru ganding dekket mertiktik, bagi ma mula lot tikas mbulanna; isirang ma mo karina biri-biri mbèrèng. Nai idokken mo dukak-dukakna mermakan pinakan i, 36laus mo kalak i bak pinakan-pinakan i ndaoh bai si Jakob nai, tellu ari merdalan daohna.
Laènkenna imo kambing si Laban, ipermakan si Jakob ma ngo i.
37Nai ibuat si Jakob mo dahan kayu meratah kayu ndulpak, kayu badem dekket kayu sibalik angin, ikiskis mo dèba kolingna i, gabè merganding-ganding. 38Ipenggamparken mo i lebbè kambing i, ibagasen pelangkah perènumenna, ai lako-lako mènum ngo kambing i mertinokor. 39Nai mula mertinokor kambing i ijolo dahan kayu i, gabè surar mo anakna barang pè ganding barang pè mertiktik.
40Ibuat si Jakob mo biri-biri, ipehadepken mo mi kambing surar bak mbèrèng. Merkitè bagidi gabè kambingna mo i janah isirang i kambing si Laban nai.
41Mula pinakan mergegoh tupung mertinokor, mèter igamparken si Jakob mo dahan-dahan kayu sienggo ikupas i mi lebbè pinakan i, ibagasen pelangkah bekkasna mènum. 42Tapi oda ngo igamparken dahan-dahan i i lebbè pinakan ndotè. Jadi karina mo pinakan mbulan i ndotè, idi mo milik si Laban, tapi ukum pinakan mbèrèng, surar bak mertiktik, mergegoh ngo, idi mo milik si Jakob. 43Merkitè bagidi gabè kaya jong mo si Jakob. Mbuè ngo kambing bak biri-birina, untana, kalodè bak hambana pè.
Currently Selected:
1 Musa 30: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
