1 Musa 29
29
Si Jakob soh mi bages si Laban
1Iterrusken si Jakob mo perdalanenna mi kebincaren tanoh Kanaan. 2Sintempu mèter idah mo sada telaga i jampalen janah mergempangen i gembarna tellu mpulguk kambing biri-biri dak ncemmal kin iberrè mènum i sidi. Tapi itutup ngo telaga i dekket batu mbellen. 3Mula enggo karina kambing biri-biri pulung i bekkas i, igoling permakan i mo batu i, nai iberrè mo kambing biri-biri i mènum. Kessa pul i, itutup permakan i nola mo talaga i.
4Nai ikusoi si Jakob mo permakan ni sidi, “Kènè alè dengan, i dikè nai ngo kènè?”
“I Haran nai ngo,” nina kalak i mengaloi.
5Nai ikusoi si Jakob dèng ma, “Itandai kènè ngo si Laban anak si Nahor?”
“Kutandai kami ngo,” nina kalak i mengaloi.
6“Bakunè ngo ia bagèndari?” nina si Jakob.
“Njuah-njuah ngo ia,” nina kalak i. “Tengen mo, adoi ngo berruna mergerar si Rahel. Mermakan kambing biri-biri bapana ngo ia.”
7Idokken si Jakob, “Ndates dèng ngo ari, madèng dapet tikkina kambing biri-biri i pekandang. Kasa oda iberrè kè mènum pinakan-pinakan i, nai iembah kènè nola lako menggagat?”
8Ialoi kalak i mo, “Lebbè pulung mo karina biri-biri isèn janah lebbè tergulang ngo batu i, nai ipè asa kuberrè kami biri-biri i mènum.”
9Tikan mengerana dèng si Jakob dekket kalak i, roh mo si Rahel rebbak dekket kambing biri-birina. 10Idah si Jakob kessa mo si Rahel dekket nipermakanna i, laus mo si Jakob mi sumur i, iongkam mo batu tutupna i, janah iberrè mo mènum pinakanna i. 11Kessa i isalam mo si Rahel ninganna terèluh kerna nteddohna. 12Nina mo taba si Rahel, “Anak si Rebekka turang bapamu ngo aku.”
Nai mèter lojang mo si Rahel mi bagesna lako magahken i bai bapana. 13Ibettoh si Laban kessa mo berita tersèngèt si Jakob beberèna i, lojang mo ia mendahisa. Idakep si Laban mo si Jakob, isanggohi mo, iarahken mo mi bagesna. Ibagahken si Jakob kessa mo tersèngèt dirina taba si Laban, 14nina si Laban mo, “Tuhu ngo beberèngku ndessing kalohon ngo ko.”
Nai merian i bages i mo si Jakob, dom sebulan.
Ipengulaken si Laban ngo si Jakob asa bana si Rahel bak si Lea
15Tikan sidari idokken si Laban mo ranana taba si Jakob, “Oda ngo selloh, mula mahan bahaen ko rebbak aku oda merupah, mula pè beberèngku kono. En pè sadikè mo upahmu dok atèmu?” 16Lot ngo dua berru si Laban, sikèdèken mergerar si Rahel. 17Ukum sibelgahen imo si Lea, merandal ngo matana, tapi si Rahel selloh dagingna janah mberru rupana.
18Ngkelleng ngo atè si Jakob midah si Rahel, kerna i ialoi mo si Laban, “Uè ngo aku mahan bahanmu pitu tahun asal mo ipaduè kono alè Puhun bangku impalku si Rahel.”
19Nina si Laban mo, “Lotiin mo kupejahèken ia bamu daripada bai sidèban; jadi isèn mo ko merian.” 20Nai mahan bahaen mo si Jakob pitu tahun dekkahna, asa bana si Rahel, tapi sigejap ngo iakap sipitu tahun i, kumarna ngkelleng atèna midah simerbaju impalna i.
21Nai enggo kessa i idokken si Jakob mo taba si Laban, “Enggo ngo lebbih pitu tahun; kerna i paduè mo Puhun asa ambong belagen aku dekket berru ndènè i.” 22Nai ibaing si Laban mo pèsta merbayo, janah idilo ngo karina pengisi kuta i. 23Tapi ibernginkenna ambong belagen i, oda ngo si Rahel itaruh mi jabu si Jakob, tapi si Lea ngo, janah campur mo si Jakob dekket si Lea. 24(Iberèken si Laban dèng ma ngo rading si Lea, mergerar si Zilpa). 25Sibarembenkenna, tahu mo si Jakob, si Lea ngo keppè nikabinenna i. Nai idahi si Jakob mo si Laban, idokken mo, “Kasa bagi ibaing kènè puhun taba aku? Mahan bahaen aku otang si Rahel kin ngo ningin upahku? Kasa iakkal-akkali kènè aku Puhun?”
26Ialoi si Laban mo, “Mengèkutken adat i sèn, oda ndorok pengeranjangen berru, gabè lebbèen nola sikèdèken sijahè asa situaen. 27Pèma mo lebbè pul pèsta merbayo sipitu ari, nai kuberèken ma mo bamu si Rahel, asal mo uè kono mahan bahaen rebbak aku pitu tahun nai ma.”
28Uè ngo si Jakob. Asa enggo kessa pul merbayo i, iberèken si Laban ma mo berruna si Rahel gabè sinibages si Jakob. 29( Iberèken si Laban ma ngo naposona si Bilha mahan rading si Rahel). 30Campur ma mo si Jakob dekket si Rahel, janah kellengen ngo atè si Jakob midah si Rahel daripada si Lea. Nai mahan bahaen mo si Jakob rebbak si Laban pitu tahun nai.
Dukak-dukak si Jakob
31Idah Jahowa kessa mo oda bagè kelleng atèna midah si Lea, nai tubuhen anak mo si Lea kerna ijin Jahowa, tapi ukum si Rahel tong ngo oda merdukak. 32Mengkandong mo si Lea janah itubuhken mo sada anak. Nina mo, “Enggo idah Jahowa kesusahenki, ukum bagèndari ngkelleng mo atè sinibalèngku midah aku.” Nai ibaing mo gerar anakna i si Ruben. 33Mengkandong nola mo si Lea, janah itubuhken sada dukak daholi. Idokken si Lea ma mo, “Enggo iberèken Jahowa nola ma bangku anak èn, kerna idengkoh oda ikekelengi aku.” Nai ibaing mo gerar anak i si Simeon. 34Mengkandong nola mo si Lea janah menubuhken sada anak. Idokken si Lea mo, “Ukum bagèndari bakunè pè merian mo rebbak aku sinibalèngku i, kumarna enggo kutubuhken tellu anak.” Ibaing mo gerar anak i si Lewi. 35Nai mengkandong nola mo si Lea, janah itubuhken mo sada anak daholi. Idokken si Lea mo, “Sikali èn kupoji mo Jahowa.” Ibaing mo gerar anakna i si Jehuda. Kessa i oda nè mo merdukak si Lea i.
Currently Selected:
1 Musa 29: LAIBTD
Highlight
Share
Copy
Want to have your highlights saved across all your devices? Sign up or sign in
@ LAI 1998 Indonesian Bible Society (Lembaga Alkitab Indonesia)
@LAI 2022 Indonesian Bible Society (Lembaga Alkitab Indonesia)
