YAHYA 13

Ruma Isa waca weana ed̄i anamorid̄oho-Na

1Sanai sawatipu Ainaina Aruraja Paskah, Ruma Isa nab̄adeku b̄a one wa'ura wakatauna Sia tu'u wi'ina dunia ake d̄ilao mbalikaina aka Ama-Na. Sia nameci ra ca'uku dou-dou ma ndad̄i ntau-Na d̄i dunia, ro Sia nangge'empa meci ra ca'una siad̄oho sampe cumpukaina.

2Ruma Isa ro anamorid̄oho-Na wunga ngaha sambiana. Ibilis wa'ura kalu'una niana ede d̄i ade la Yudas ana la Simon Iskariot d̄id̄onggokaina Ruma Isa d̄i dou-dou ma musu-Na. 3Ruma Isa nab̄adeku b̄a one Ama-Na wa'ura d̄onggo mbeina sara'ana kuasa d̄i Sia. Sia nab̄ade rauku b̄a one Sia ramaina ta Ruma Hatalla ro d̄imadula mbali d̄i Ruma Hatalla. 4B̄ara ndedena Sia kid̄i, runcu jumba-Na, ro d̄ikina kai here loko d̄i loko-Na. 5Sawa'u b̄a ede Sia luana oi d̄i ade sab̄ua basi, edempara tampu'una waca wea ed̄i anamorid̄oho-Na ro kamangona kai here loko rad̄iki d̄i loko-Na. 6Rakara Sia d̄i la Simon Petrus, ma nggahi, ”Ruma, wati lu'ukai b̄a aka Ruma ma waca wea ed̄i mada?”

7Cambe b̄a Ruma Isa, ”Ake nggomi wati loamu ka'ao au rakarawi b̄a Nahu ake, pala peasi nggomi d̄imaloa ka'ao.”

8”Aina, Ruma,” nggahi la Petrus d̄i Ruma Isa, ”Ai to'ina Ruma mawaca wea ed̄i mada!”

Pala cambe b̄a Ruma Isa, ”Nggara watisi waca b̄a Nahu nggomi, nggomi wati wara campo au-aumu lab̄o Nahu.”

9Nggahi la Simon Petrus, ”Nggara ndedesi, Ruma, aina ed̄i mada mpoa, pala rima ro tuta mada rau!”

10”Dou ma wa'ura ndeu, nawa'ura raso sara'ana,” nggahi Ruma Isa d̄i la Petrus. ”Sia wati paraluna d̄i karaso wali; selasi ed̄ina. Nggomid̄oho ake wa'ura raso, pala wati sara'ana.” (11Ruma Isa wa'ura b̄ade couku d̄imad̄onggo Sia d̄i dou-dou ma musu-Na. B̄ara ndedena nggahi Sia, ”Nggomid̄oho ake wa'ura raso, pala wati sara'ana.”)

12 # Luk. 22:27 Sawa'u b̄a Ruma Isa waca weana ed̄i siad̄oho, Sia kani mbalina jumba-Na ro doho mbalina. Edempara nggahi Sia d̄i siad̄oho, ”Sab̄ua maloa ka'ao b̄a nggomid̄oho au rakarawi b̄a Nahu d̄i nggomid̄oho b̄oupu ake? 13Nggomid̄oho oumu Nahu Guru ro Ruma. Ro poda nandedeku. 14Nggara Nahu ake Ruma ro Guru nggomid̄oho mawaca wea ed̄imu, nggomid̄oho pab̄ua raupu waca kali cempe ed̄i angimu. 15Nahu mambei conto mataho ake d̄i nggomid̄oho, loakud̄u nggomid̄oho karawi raumu au rakarawi b̄a Nahu d̄i nggomid̄oho. 16#Mat. 10:24, Luk. 6:40, Yah. 15:20 Nancihi poda nggahi-Ku ake: Sab̄ua dou ada wati ncewi na'ena d̄i rumana, ro sab̄ua dou ranggadu wati ncewi na'ena d̄i dou ma ranggaduna. 17Nggara wa'usi b̄ade b̄a nggomid̄oho sara'ana ake, taho ra ntika nggomid̄oho makarawisi.

18 # Mzm. 41:10 Au ranggahi Nahu ake laina mab̄oha nggomid̄oho sara'ana. Nahu b̄ade cou-cou ma wa'ura kad̄ale b̄a Nahu. Pala au ratunti ade Alkitab, pab̄uaku ndad̄ina, eded̄u ’Dou ma ngaha sama lab̄o Nahu, d̄imad̄onggo Nahu d̄i dou-dou ma musu Nahu.’ 19Lampa rawi ede karongga b̄a Nahu d̄i nggomid̄oho ake, sawatipu ndad̄ina, loakud̄u ndad̄ina lampa rawi ede peasi, nggomid̄oho d̄ima'imbi b̄a one Nahuku Sia ma d̄i pehe kai NAHU WARA. 20#Mat. 10:40, Mrk. 9:37, Luk. 9:48, 10:16 Nancihi podaku nggahi Nahu ake: Cou matarima ao dou ranggadu b̄a Nahu, natarimaku Nahu. Ro cou matarima Nahu, natarimaku Sia ma ranggadu Nahu.”

Ruma Isa ngoa ra kawarana mab̄oha dou d̄imad̄onggo Sia d̄i dou-dou ma musu-Na

(Mat. 26:20-25, Mrk. 14:17-21, Luk. 22:21-23)

21Sawa'u b̄a nggahi ndedena Ruma Isa, Sia na'ipiku lalai ade-Na. Edempara Sia nggahina, ”Ncihi poda nggahi-Ku ake: Sab̄ua dou d̄i ade weki nggomid̄oho d̄imad̄onggo Nahu d̄i dou-dou ma musu Nahu.”

22Anamori-Na ntanda angi menana kai mbora mena akana b̄ara wati b̄adena couku makasu ede. 23Anamori ma ipi meci ra ca'u b̄a Ruma Isa doho d̄i kompe Ruma Isa. 24La Simon Petrus mambei isara d̄i sia, loakud̄u sia masod̄i d̄i Ruma Isa couku makasu-Na.

25Ndad̄i anamori ede doho peduna d̄i Ruma Isa, ro sod̄ina, ”Couku sia, Ruma?”

26Cambe b̄a Ruma Isa, ”Dou d̄i mbei b̄a Nahu roti rad̄eta b̄a Nahu ade mangko, siaku douna.” Edempara Ruma Isa wehana sadompo roti, d̄etana d̄i ade mangko; edempara mbeina d̄i la Yudas ana la Simon Iskariot. 27Sawa'u b̄a la Yudas tarimana roti ede, Ibilis lu'una d̄i adena. Edempara nggahi b̄a Ruma Isa d̄i sia, ”Karawi rocipu au d̄i ne'e karawi b̄a nggomi.” 28Wati kone sab̄ua dou d̄i ade weki siad̄oho ma doho ngaha ra nono ta ede maloa ka'ao b̄ab̄auku Ruma Isa nggahi ndedekaina d̄i la Yudas. 29Wara ma kacai Ruma Isa makau la Yudas weli au-au d̄i paralu d̄i ngaha ndihakai ede, atao mbei piti d̄i ru'u b̄a dou mancoki mori – b̄ara la Yudas eded̄u dou manenti piti kas siad̄oho.

30Sawa'u b̄a la Yudas tarimana roti ede, sia losa lalona. Ai wa'ura rindi.

Lampa rawi ma b̄ou

31Sawa'u b̄a lao la Yudas, nggahi Ruma Isa, ”Ake Ana Manusia d̄i kadese ra kantasa, ro Ruma Hatalla d̄i kad̄ese ra kantasa kai ncai Sia. 32Nggara Ruma Hatalla d̄i kad̄ese ra kantasa kai ncai Sia, Sia rau d̄i kad̄ese ra kantasa b̄a Ruma Hatalla kai weki ndai-Na. Mala Ruma Hatalla d̄imakad̄ese ra kantasa rocina Sia. 33#Yah. 7:34 Ana-ana-Ku, Nahu wati d̄imangge'e ntoi wali lab̄o nggomid̄oho. Nggomid̄oho d̄imangupa Nahu, pala b̄une rawa'u nggahi b̄a Nahu d̄i dou-dou mana'ekai Yahudi, ndede rau d̄i nggahi b̄a Nahu d̄i nggomid̄oho; aka hid̄i d̄i laokai b̄a Nahu, nggomid̄oho wati loamu maikai. 34#Yah. 15:12, 17, 1Yah. 3:23, 2Yah. 5 Lampa rawi b̄ou d̄i mbei b̄a Nahu nggomid̄oho: Meci ra ca'upu d̄i sab̄ua lab̄o masab̄uana. Sama b̄une Nahu mameci ra ca'u nggomid̄oho, ndede rauja nggomid̄oho pab̄uaku meci ra ca'u kali cempe angimu. 35Nggara nggomid̄oho macua meci ra ca'usi angimu, samenana dou d̄imab̄ade b̄a one nggomid̄oho anamori Nahu.”

Ngoa b̄a Ruma b̄a one la Petrus d̄imarungka sakena d̄i Ruma Isa

(Mat. 26:31-35, Mrk. 14:27-31, Luk. 22:31-34)

36”Ruma, Ruma mane'e lao tab̄eku?” sod̄i b̄a la Simon Petrus d̄i Ruma Isa. Cambe b̄a Ruma Isa, ”Tab̄era laokai Nahu, nggomi wati loamu lao b̄atu ake. Nggomi d̄imab̄atu kento Nahu.”

37”Ruma, b̄ab̄auku mada wati loaku b̄atu Ita ake?” sod̄i b̄a la Petrus wali. ”Mada karela made d̄i ru'u b̄a Ruma!”

38Cambe b̄a Ruma Isa, ”Sab̄ua poda nggomi marela made d̄i ru'u b̄a Nahu? D̄ib̄ademu, sawatipu koko janga peasi, nggomi wa'ura tolu kali nggahimu b̄a one nggomi wati patamu Nahu!”

Currently Selected:

YAHYA 13: LAIBHP

Highlight

Copy