YAHYA 12

Ruma Isa lua kai mina mengi d̄i Betania

(Mat. 26:6-13, Mrk. 14:3-9)

1Ini nai sawatipu Ainaina Aruraja Paskah, Ruma Isa lao aka Betania. D̄i hid̄i ede ngge'ekai la Lazarus rawa'u kamori mbali b̄a Sia rad̄i madena. 2Ta aka Ruma Isa mbei ao b̄a siad̄oho ngaha ra nono, ro la Marta masadia weana. Lazarus ro dou-dou mamai doho ngaha sama lab̄o Ruma Isa. 3#Luk. 7:37-38 Edempara mai la Maria kai kira-kira sadompo lite mina mengi narwastu ma nggali poda co'ina. Sia luana mina ede d̄i ed̄i Ruma Isa, edempara osana kai honggona. Sara'a uma ede ndad̄i wou mengi b̄a mina mengi ede. 4Pala la Yudas Iskariot, sab̄ua dou ade weki anamori Ruma Isa – ma sawa'u b̄a ede d̄imad̄onggo Sia d̄i dou-dou ma musu-Na – manggahi, 5”B̄ab̄auku mina mengi ede d̄idalanda kai co'i tolu ratu piti salaka, ro pitina d̄i mbei d̄i dou mancoki mori?” 6Nggahi ndedekai la Yudas laina b̄ara sia matio ra ntanda dou mancoki mori, pala b̄ara sia dou mampanga. Sia ntuwura wehana piti d̄i kas rakasamakai rawi'i d̄i sia.

7Pala nggahi Ruma Isa, ”Co'opu dou siwe ede! Sia karawina ake d̄i ru'u b̄a ainaina umbukai Nahu. 8#Ul. 15:11 Dou mancoki mori wara ncau d̄i ade woha nggomid̄oho, pala Nahu wati.”

Mafaka ne'e hade la Lazarus

9Mboto dou Yahudi maringana b̄a one Ruma Isa wara d̄i Betania, ndad̄i siad̄oho laona ta aka. Siad̄oho lao laina b̄ara Ruma Isa mpoa, pala b̄ara siad̄oho mane'e eda rau la Lazarus ma wa'ura kamori mbali rad̄i madena b̄a Ruma Isa. 10B̄ara edana dou-dou mana'ekai imam nane'eku hade la Lazarus rau; 11b̄ara sia makandad̄ina mboto dou Yahudi tu'u wi'ina siad̄oho ro imbi d̄i Ruma Isa.

Ruma Isa lu'u d̄i Yerusalem kai na'e ra ntoruna

(Mat. 21:1-11, Mrk. 11:1-11, Luk. 19:28-40)

12B̄ala ai sanai dou mamboto ma wa'ura mai d̄i kandihakaina Paskah maringana b̄a one Ruma Isa wunga ade lampakaina lao aka Yerusalem. 13#Mzm. 118:26 Ndad̄i siad̄oho wehana ro'o haju palem edempara lao weha aona Sia, ro nggahina salahona, ”D̄ese ra ntasa d̄i ru'u Ruma Hatalla! Taho ra ntai Sia ma mai kai ngara Ruma. Taho ra ntai Sangaji Israel!”

14Ruma Isa rakana sab̄ua keledai ndara, ro nentena. Edempara ndad̄ira ratunti d̄i ade Alkitab:

15 # Za. 9:9 ”Aina dahu, ana dou siwe Sion!

Tiopu Sangajimu mamai,

manente sab̄ua keledai ndara!”

16D̄iwakatu ede anamori Ruma Isa watipu loana ka'ao sara'ana ede. Pala sawa'u b̄a Ruma Isa d̄i kad̄ese ra kantasa kai made-Na, siad̄oho ampona kawaraku b̄a one rakarawi b̄a dou-dou d̄i Sia wa'ura tunti ade Alkitab mab̄oha Sia.

17Dou-dou ma wara wakatu Ruma Isa ma'ou la Lazarus losa d̄i ade rade ro kamorina rad̄i madena, manuntu ra nggahi ncau mab̄oha lampa rawi ede. 18B̄ara ndedena dou mamboto ede lao aka Ruma Isa b̄ara siad̄oho maringana b̄a one Siaku ma wa'ura karawi mab̄isa ra guna ede. 19Ndad̄i dou-dou Farisi nggahina d̄i sab̄ua dou lab̄o masab̄uana, ”Ndai wati loata karawi au-au! Tiopu, samenana dunia lao b̄atu Sia!”

Pila-pila dou Yunani mangupa Ruma Isa

20D̄i ade woha dou-dou ma lao aka Yerusalem mane'e lao sambea wakatu ndihakai ede wara rauja pila-pila dou Yunani. 21Siad̄oho mai rakana la Filipus ro nggahina, ”Cina, nggara loasi, nami mane'e eda angi lab̄o Isa.” (Filipus rad̄i Betsaida d̄i Galilea.)

22Edempara la Filipus lao ngoana ede d̄i la Andreas, ro sawa'u b̄a ede siad̄oho d̄uana karonggana d̄i Ruma Isa. 23Nggahi Ruma Isa d̄i siad̄oho, ”Wa'ura raka wakatuna Ana Manusia d̄i kad̄ese ra kantasa. 24Nancihi podaku nggahi b̄a Nahu ake: Nggara sanggini gando watisi nggud̄a d̄i dana ro madena, gando ede nangge'empa sanggini. Pala madesi isi gando ede, ampona wara hasina mamboto gando. 25#Mat. 10:39, 16:25, Mrk. 8:35, Luk. 9:24, 17:33 Dou ma meci ra ca'u morina d̄imambora morina. Pala dou madaca'u morina d̄i dunia ake, d̄imasandaka mori masapodakaina ro ma'ederahid̄i. 26Dou ma ne'e karawi wea Nahu pab̄uaku b̄atuna Nahu; loakud̄u ada Nahu loa sama lab̄o Nahu tab̄era warakai Nahu. Dou ma karawi wea Nahu d̄i horoma b̄a Ama Nahu.”

Ruma Isa nuntu ra nggahi-Na mab̄oha made-Na

27”Darura ade-Ku; auku d̄i nggahi b̄a Nahu ake? Sab̄ua pab̄uaku nggahi b̄a Nahu, ’Ama, horipu Mada rad̄i wakatu ake’? Pala justru d̄ima'iu wakatu susa ra ncoki akeku maikai Mada. 28Ama, d̄ese ra ntasa ngara Ita!” Edempara wara ringa eli rad̄i langi manggahi, ”Nahu wa'ura kad̄ese ra kantasaku Sia, ro Nahu d̄imakad̄ese ra kantasa walina Sia.”

29Dou mamboto ma wara ta ede maringana eli ede. Nggahi siad̄oho, ”Aka karece ai!” Pala wara rauja ma nggahi, ”Laina! Mala'eka manuntu lab̄o Sia!”

30Edempara nggahi Ruma Isa d̄i siad̄oho, ”Ringakaimu eli ede, laina d̄i ru'u pentikai b̄a Nahu, pala d̄i ru'u pentikai nggomid̄oho. 31Ake wa'ura wakatuna dunia d̄i paresa; ake makuasa d̄i dunia ake d̄ikakoa. 32Pala Nahu ake, nggara wa'usi Nahu d̄ikad̄ese ra kantasa ese wawo dunia, Nahu d̄imahinti sara'a dou d̄i Nahu.” 33Nggahi ndedekai Sia d̄i katadakaina b̄uneku carana made-Na.

34 # Mzm. 110:4, Yes. 9:6, Yeh. 37:25, Dan. 7:14 Nggahi dou mamboto ede d̄i Sia, ”Nggahi Buku Hukum madad̄oho, Sangaji Mambei salama d̄imamori santoi-ntoina. B̄uneku loata Ita nggahi b̄a one Ana Manusia pab̄uaku d̄i kad̄ese ra kantasa ese wawo dunia? Couku Ana Manusia ede?”

35Cambe b̄a Ruma Isa, ”Cuma ru'u samporompa taroa ede wara d̄i ade woha nggomid̄oho. Ndad̄i, lampapu ntawi taroa ede mbuipu warana, loakud̄u nggomid̄oho aina b̄oha b̄a marindikaina. Dou ma lampa d̄i ade rindikaina wati b̄adena tab̄e laokaina. 36Imbipu d̄i taroa ede, ntawi taroa ede mbuipu warana d̄i nggomid̄oho, loakud̄u nggomid̄oho ndad̄imu ana-ana taroa.”

Dou-dou Yahudi wati imbina

Sawa'u b̄a nggahi ndede Ruma Isa, Sia lao tu'u wi'ina hid̄i ede, ro wati ngawana katada weki d̄i siad̄oho. 37Konena wa'ura mboto rakarawina mab̄isa ra guna rakarawi b̄a Ruma Isa d̄i tando siad̄oho, siad̄oho wati imbina d̄i Sia. 38#Yes. 53:1 Edempara ndad̄ira au ranggahi b̄a Nabi Yesaya,

”Ruma, couku ma imbi d̄i haba madad̄oho?

D̄i couku kuasa Ruma d̄i katadakai?”

39B̄ara ndedena siad̄oho wati ngawana imbi, b̄ara la Yesaya wa'ura nggahi rauna,

”Nggahi Ruma Hatalla,

40 # Yes. 6:10 ’Nahu makambudana mada siad̄oho,

d̄imakaterana ade siad̄oho;

loakud̄u mada siad̄oho wati loana eda,

fiki ra kananu siad̄oho wati loana ka'ao.

Loakud̄u siad̄oho aina mbali d̄i Nahu,

edempara Nahu katahoku supu siad̄oho.’ ”

41Nggahi ndedekai la Yesaya b̄ara sia wa'ura edana na'e kuasa Ruma Isa, ro manuntu ra nggahina mab̄oha Sia.

42Kone ndedena, mboto dou, kone d̄i ade weki dou mana'ekai Yahudi imbi d̄i Ruma Isa. Pala siad̄oho wati disana mangaku ede kai ngoa ntiri, b̄ara siad̄oho nadahuku d̄i dou-dou Farisi kombisi nakantaku lu'u d̄i ade uma sambeakai. 43Siad̄oho na'ipipu ca'una raka roi b̄a manusia ntewi kaisi rakaco'i b̄a Ruma Hatalla.

Nggahi ra eli Ruma Isa d̄imaparesana

44Edempara nggahi Ruma Isa, ”Dou ma imbi d̄i Nahu, laina d̄i Nahu imbikaina, pala d̄i Sia ma ranggadu Nahu. 45Ro dou ma eda Nahu, na'edaku Sia ma ranggadu Nahu. 46Nahu maiku d̄i dunia kai taroa, loakud̄u sara'ana dou ma imbi d̄i Nahu b̄ab̄aina ngge'ena d̄i ade rindikaina. 47Dou ma ringa ra kade'ena ngoa ra tei b̄a Nahu, pala wati b̄atuna – laina Nahu mahukum sia. B̄ara maikai Nahu laina d̄imahukumna dunia ake, pala d̄imakasalamana. 48Dou ma daca'u Nahu ro wati kade'ena nggahi ra eli Nahu, wa'ura wara ma d̄imaparesana. Nggahi ra eli rakarongga b̄a nahu, edeku d̄imaparesana d̄i Ainaina Kiama. 49B̄ara Nahu wati nuntu ra nggahiku d̄i rakane'e ndai-Ku; Ama ma ranggadu Nahu, Siaku ma rakauna d̄i Nahu auku pab̄ua d̄i karawi b̄a Nahu ro d̄i karongga b̄a Nahu. 50Ro Nahu kab̄ade b̄a one parenta-Na ede mambei mori masapodakaina ro ma'ederahid̄i. Ndad̄i Nahu makaronggana b̄une rangoa ra tei b̄a Ama d̄i Nahu.”

Currently Selected:

YAHYA 12: LAIBHP

Highlight

Copy