YAHYA 14
14
Ruma Isa eded̄u ncai d̄i laokai aka Ama
1”Aina darura mena ademu,” nggahi Ruma Isa d̄i siad̄oho. ”Imbipu d̄i Ruma Hatalla, ro imbi raupu d̄i Nahu. 2D̄i uma Ama-Ku mboto hid̄i ngge'ekai. Nahu laoku ta aka d̄imasadia weamu hid̄i d̄i ru'u b̄a nggomid̄oho. Nahu wati d̄imanggahi ndede d̄i nggomid̄oho, nggara watisi ndad̄i ndedena. 3Sawa'u b̄a lao sadia wea b̄a Nahu hid̄i d̄i ru'u b̄a nggomid̄oho, Nahu d̄imamai mbali ro weha aoku nggomid̄oho, loakud̄u tab̄era warakai Nahu, ta ede rau warakai nggomid̄oho. 4Aka hid̄i laokai Nahu nggomid̄oho mab̄adeku ncaina.”
5Edempara nggahi la Tomas d̄i Ruma Isa, ”Ruma, madad̄oho wati b̄adeta tab̄eku d̄i laokai Ruma, b̄uneku d̄i b̄adekai b̄a madad̄oho ncaina?”
6Cambe b̄a Ruma Isa, ”Nahuku ncai d̄ipatakai Ruma Hatalla ro d̄irakakai mori. Wati kone sab̄ua dou rau maloa mai d̄i Ama, nggara watisi kai ncai Nahu. 7Nggomid̄oho mapatasi Nahu, pasti nggomid̄oho mapata rauku Ama Nahu. Ake nggomid̄oho wa'ura patamu Sia, ro wa'ura edamu Sia.”
8Edempara nggahi la Filipus d̄i Ruma Isa, ”Ruma, taturu tei to'ipu d̄i madad̄oho Ama, loakud̄u ncihi ade madad̄oho.”
9Pala cambe b̄a Ruma Isa, ”Wa'ura ntoi poda Nahu wara sama-sama lab̄o nggomid̄oho, ro wati ngge'epu patamu Nahu, Filipus? Dou ma wa'ura eda Nahu, wa'ura edana Ama. B̄uneku loamu nggahi, ’Turu teipu Ama d̄i madad̄oho’? 10Filipus! Sab̄ua wati imbi b̄a nggomi, b̄a one Nahu masab̄ua lab̄o Ama, ro Ama masab̄ua lab̄o Nahu? Au ranggahi b̄a Nahu d̄i nggomi, wati nggahi b̄a Nahura d̄i ade weki ndai-Ku. Ama mangge'empa sab̄ua lab̄o Nahu, Siaku ma karawi sara'ana ede. 11Imbipu d̄i Nahu, b̄ara Nahu masab̄ua lab̄o Ama ro Ama masab̄ua lab̄o Nahu. Atao sakura-kurana, imbipu b̄a one au rawa'u karawi b̄a Nahu. 12Ncihi poda nggahi b̄a Nahu ake: Dou ma imbi d̄i Nahu, d̄imakarawi au rawa'u karawi b̄a Nahu, – mala sia d̄imanaha karawi ma ncewi na'e wali – b̄ara Nahu malao aka Ama. 13Ro au-au raraho b̄a nggomid̄oho kai ngara Nahu, ede d̄i karawi b̄a Nahu d̄i ru'u b̄a nggomid̄oho, loakud̄u Ama d̄i kad̄ese ra kantasa kai ncai Ana. 14Au-aura raho b̄a nggomid̄oho kai ngara Nahu, Nahu d̄imakarawina.”
Ruma Isa masake mbei Roh Allah
15”Nggara nggomid̄oho mameci ra ca'u Nahu, nggomid̄oho makarawiku raparentakai b̄a Nahu. 16Nahu d̄imaraho d̄i Ama, ro Sia d̄imambeina d̄i nggomid̄oho Mabantu makalaina, d̄imangge'e sama lab̄o nggomid̄oho santoi-ntoina. 17Sia eded̄u Roh Allah d̄imakatadana mapoda mab̄oha Ruma Hatalla. Dunia wati loana tarima Sia, b̄ara wati eda atao pata-Na. Pala nggomid̄oho mapataku Sia, b̄ara Sia mangge'e sama lab̄o nggomid̄oho ro d̄imandad̄i sab̄ua lab̄o nggomid̄oho.
18Nggomid̄oho wati d̄iwi'i paki kese b̄a Nahu kai dou makasi pahu. Nahu d̄imamai mbali d̄i nggomid̄oho. 19D̄isamporo walimpa dunia wati d̄ima'eda Nahu wali. Pala nggomid̄oho d̄ima'eda Nahu. Ro b̄ara Nahu mori, nggomid̄oho rau d̄imamori. 20Naraka ainaina ede, nggomid̄oho d̄imab̄ade b̄a one Nahu sab̄ua lab̄o Ama, nggomid̄oho sab̄ua lab̄o Nahu, ro Nahu sab̄ua lab̄o nggomid̄oho.
21Dou ma tarima rakaukai b̄a Nahu ro makarawina, siaku ma meci ra ca'u Nahu. Ama-Ku d̄imameci ra ca'una dou ma meci ra ca'u Nahu. Nahu rau d̄imameci ra ca'u dou ede ro makatada weki Nahu d̄i sia.”
22Yudas (laina la Yudas Iskariot) masod̄i d̄i Ruma Isa, ”Ruma, b̄ab̄auku Ruma ngawakaita katada weki d̄i madad̄oho ro laina d̄i dunia?”
23Cambe b̄a Ruma Isa, ”Dou ma meci ra ca'u Nahu, d̄imab̄atu ngoa ra tei b̄a Nahu. Ama-Ku d̄imameci ra ca'una sia. Ama ro Nahu d̄imamai d̄i sia ro ngge'e sama lab̄o sia. 24Dou ma wati meci ra ca'u Nahu, wati b̄atuna ngoa ra tei b̄a Nahu. Ngoa ra tei raringa b̄a nggomid̄oho ede, laina rad̄i Nahu, malaisi rad̄i Ama ma ranggadu Nahu.
25Sara'ana ede nggahi b̄a Nahu d̄i nggomid̄oho salama Nahu mbuipu lab̄o nggomid̄oho. 26Pala Roh Allah, Mabantu d̄i nggadu b̄a Ama kai ngara Nahu, Siaku d̄imangoa ra tei nggomid̄oho sara'ana ro d̄imakawarana nggomid̄oho d̄i sara'ana ma wa'ura ngoa b̄a Nahu d̄i nggomid̄oho.
27Taho ra ntai d̄i wi'i b̄a Nahu d̄i nggomid̄oho. Taho ra ntai ndai Nahu d̄i mbei b̄a Nahu d̄i nggomid̄oho. Rambei b̄a Nahu ede laina b̄une rambei b̄a dunia d̄i nggomid̄oho. Aina darura ademu, aina dahu. 28Nggomid̄oho wa'ura ringamu nggahi Nahu, ’Nahu d̄imalao, pala Nahu d̄imamai mbali d̄i nggomid̄oho’. Nggara nggomid̄oho mameci ra ca'usi Nahu, nggomid̄oho d̄imasana Nahu malao aka Ama, b̄ara Ama mancewi na'e ntewi kaisi Nahu. 29Nahu mangoana ede d̄i nggomid̄oho ake, sawatipu ndad̄i sara'ana, loakud̄u nandad̄isi pea, nggomid̄oho d̄ima'imbi. 30Nahu wati d̄imanuntu ra nggahi mancewi mboto wali lab̄o nggomid̄oho, b̄ara wa'ura wakatuna dou makuasakai dunia ake maina. Pala sia wati ntauna kuasa d̄i weki Nahu. 31Pala sara'ana ede pab̄uaku ndad̄ina loakud̄u dunia kawarana weki b̄a one Nahu mameci ra ca'u Ama ro makarawi sara'ana rakaukai b̄a Ama d̄i Nahu.
Maira ndai talao pesoku weki ta ake.”
Currently Selected:
YAHYA 14: LAIBHP
Highlight
Share
Copy
Want to have your highlights saved across all your devices? Sign up or sign in
@LAI 2001
