TEALIAN 38
38
Yehuda tukon Tamar
1Uga-ugaate doi tempodoo Yehuda natinggalano koutus-utuso tukon dungol polaing Hira, meeng komalane moluwe doi kota Adulam. 2Idoo Yehuda potoikono tukon meeng koboine Kanaan, Sua napau, maka yanila pokila. 3Yanila napau tumbeno mamalane, tamano beena sambu Er. 4Napau koluano, malane koidan, sinombuikon Onan. 5Napau kotoluno malane koidan, tukon sinombuikon Syela. Doi tempo Syela nasinuungan Yehuda daano doi Kezib.
6Yehuda osowaanggene Er, napau langgongo tukon Tamar. 7Er nakalakuan lokis tuuno, tobikon Temeneno nggimoliiyo yana tukon akateyo. 8Maka Yehuda bantile doi Onan Er utuso pioto, “Taus doi utusomu langgongo baluno, tukon pokooloi doi yana. Lakukenemo komu kuajiban doi yana, sabab ikoo nalakai utuso pioto; tukon buno doiya utusomu langgongo moola malaat katulunan.” 9Bai Onan toiyo baikon naikon kona pau-pau aki nateali koona. Jadi, samba luunggon yana ponikai tukon utuso langgongo balunodoo, sodiikene kona mani tokundang doi tonggulung sulano utuso langgongo aki namalaat katulunan. 10Nakokubaidoo tealikene ko Temeneno nggimal, tukon Temeneno akateyo yana koidan. 11Doibundu Yehuda bantile doi Tamar namoniananoo, “Abalimo doi muorangtua nabonua tukon dungolo idoo salaku balu polong kupau Syela tealimo babasal.” Yana bantile buno doiya sabab matakut inai-inai Syela Temeneno naakateyo kai, buno utuso langgongo luaila. Maka mulemo Tamar doi naolantua nabonua.
12Bubula kotempo doi bundu Yehuda naboloki mate. Lapa kabus kotempo napoloongganano, Yehuda uange kotulano Hira, doi Adulamoo, taus doi Timna, tampat nadomba-domba naginuntingan kobullono. 13Tamar malaat bilita baikon Yehuda namonianan naikon lubat doi Timna sulano naguntinge kona domba-domba bullono. 14Maka yana soboliyo balu napakeyan tukon pakeyan bailon. Koduduso yana tonggupiyo tukon kokudung, maka yana osulang doi kota Enaim tataapono, motalaat doi loloon mololoiyo ko Timna. Tamar toiyo tuuno baikon Syela, Yehuda napau pioto, babasalo, bai yana kiyoon kai nainosowaanggon tukon malanedoo.
15Salataa Yehuda kitayo Tamar, yana sangkayo boinedoo meeng komian mobalolowa, sabab koduduso tosunggupi. 16Maka Yehuda koolaniyo doi loloon bibilodoo tukon bantile, “Bulaa komu kinabi?” Yana aki natoiyo baikon boinedoo namonianan susuungo.
Tamar timbiliyo, “Terserah doi Tuan.”
17Yehuda bantile koidan, “Yaku naikon beekene doi koo meeng kombembe mongula.”
Tamar timbiliyo, “Moola asal daano kodaminan, polong Tuan kapatuwo dombembedoo.”
18“Oila kodaminano?” Yehuda sadaiyo.
Tamar timbiliyo, “Beena doi yaku Tuan nasaap tukon aloso tukon koidan tongkat modaano doi Tuanoo.” Yehuda beekene dolobo-lobodoo doi yana, maka yanila ponikai, tukon Tamar teali tianan. 19Tamar mule doi nabonua tukon bukayo kotoik posunggupi duduso, maka konoikene kona pakeyan balu koidan.
20Bubula kotempo doi bundu Yehuda bintekene Hira, sulano naantekene dombembedoo tukon kabiyo dolobo-lobodoo nainabalinggon molapamo bineekon salaku daminan, bai Hira aki napososuunggene boinedoo. 21Hira masa-masadaikene doi Enaim miano, “Naando domianoo mobiasa balolowa mototiili doi loloon bibilodoo?”
“Akiyo komian mobalolowa dimbaa,” yanila timbiliyo.
22Maka Hira abalimo doi Yehuda tukon bantile, “Yaku aki kupososuunggene boinedoo. Menurut mian badaang imbali akiyo komian mobalolowa idoo.”
23Yehuda bantile, “Sodiikenemo lobo-lobodoo tuuk yana, asal kai kita aki ndamalaat maa. Yaku lapamo kakaate sulano kubeale, bai ikoo aki mupososuunggene yana.”
24Uga-ugaate tolu kobituwon doi bundu Yahuda malaat bilita baikon Tamar namonianan lapamo balengganggon salaku mian balolowa tukon tianano.
Maka Yehuda maparentakene, “Alayomo yana tukon suayo polong mate!”
25Daano Tamar mobinaba tobuat, yana makapatu teteba doi namonianan tamano, bantile, “Yaku lapamo tinianan luwedoi lobo-lobo nia tumbuno. Palesayomo indee kotumbuno nasaapia tukon aloso tukon natongkatia.”
26Yehuda tingoniiyo dolobo-lobodoo tukon bantile, “Boinedoo akiyo kona sala. Yaku aki kulakukene daku kuadiban tuuk doi yana; sio kai yaku osowaanggene yana tukon daku pau Syela.” Yehuda akimo naponikai tukon Tamar.
27Salataa laate kotempono Tamar namosuungan, tokita yana naikon mosuung pau pinga. 28Daano yana mosuung, dopau pingadoo meeng tobuatene kolimano, maka dosandoloo taaniyo tukon boboiyo banang memela, nabantilano, “Napaunia sinuung lolukon.” 29Bai dopaudoo kibute kolimano koidan, tukon dopaudoo momeeng koidan komo sosuung lolukon. Doibundu sandol bantile, “Jadi bunomo doiya komu cara badesaak tobuat!” Maka pau mosinuung tumbenodoo sinombuikon Peres. 30Lapa doiya maka nasodo sinuung koutuso pioto kolimano daano kobanang momemela. Yana binee sambu Zerah.
Currently Selected:
TEALIAN 38: LAIBGZ
Highlight
Share
Copy
Want to have your highlights saved across all your devices? Sign up or sign in
