TEALIAN 39
39
Yusuf tukon Potifar baboloki
1Yusuf lapamo Ismael miano babayo doi Mesir, tukon binalukon doi Potifar, meeng kosuludadu kapalano pototooli kamali. 2#Kis. R. 7:9 Temeneno tulungiyo Yusuf tobikon yana sidutu daano kohasilo doi sasaibino kona limang. Yana dungol doi natuan nabonua, Mesiroo miano. 3Kona tuan kitayo baikon Temeneno tulungiyo Yusuf tukon sabab doiya Yusuf kona hasil monondok doi sasaibino kona linimang. 4Potifar sanaang doi Yusuf tukon oduduke teali peleleani doi nabonua lalomo; maka Yusuf binee limang mouluse kona bonua lalomo tukon sasaibino komo ano doi yana. 5Tambuun doiya kotempono demi Yusuf, Temeneno balakaatiyo ko Mesir miano nabonua lalomo tukon oila sasaibino komo daano doi yana mau modoi bonua mau modoi asi. 6Sasaibino kolobo moano doi Potifar kinuasaikono doi Yusuf. Tukon buno doiya Potifar akimo natoiyo toiyo ulusan nabonua kaliangano, tolongo nalangge kinaan.
Yusuf tambongan tukon monondok. 7Tolongo bubula kotempo, Potifar naboloki tambuuno momootiyo doi Yusuf, maka yana uange malanedoo mopokooloi. 8Yusuf aki naiyase tukon bantile, “Maaf, Nyonya, tuan Potifar lapamo kuasaikene doi yaku sasaibino komo daano doi ya na. Yana akimo napalaluu pikikene oioila kai nai bonua nia. 9Dimbaa daku kuasa pokakana kona kabasal tukon nakuasa. Akiyo komeeng moaki nakuasaikene doi yaku, alaasene Nyonya. Bulaando kona tealian yaku lakukene kokokubai molokisoo tukon baladosa doi Mian Bisa?” 10Mau kai Potifar naboloki naoluliyo Yusuf samba kooloyo, malanedoo tataap aki naiyase pokoloi.
11Daano kooloyo meeng salataa Yusuf usok doi bonua lalomo tuuk lakukanggene kona limang, akiyo komeeng komian moano idoo. 12Potifar naboloki biite Yusuf doi najubah tukon bantile, “Maimo nda pokoloi,” Yusuf balitason tukon tosodii, maka yana obulen tobuat, bai kona jubah totinggal doi boinedoo limano. 13Salataa Potifar naboloki kitayo baikon Yusuf obuleno tukon najubah totinggal, 14yana uange kona peleleani tukon bantile, “Soba kitayo! Ibrani miano kulakai nabinabadoo nai bonua nia, totulaiyo kita. Yana usok doi kukombiang lalomo tukon yase perkosayo yaku, bai yaku wookon kakabukuan. 15Tempo lengele daku wookonan, yana obulen tobuat tukon totinggal konajuba.”
16Maka Potifar naboloki abese jubadoo polong nalakai mule. 17Salataa nalakai abali, yana mosobit salitaikene salitadoo doi nalakai, kona bantilano, “Ibranidoo miano ikoo babayo doisumai, usok doi kukombiang lalomo tuuk totulaiyo yaku. 18Bai salataa yaku wookon, yana obulen tobuat tukon totinggal konajuba.”
19Potifar teali nggimal tuuno. 20Tukon yana monggiparentakene sulano Yusuf namosobit linako tukon inusokon doi talunggu lalomo, tampat tomundo natahanan-tahanan nakinulungan. 21#Kis. R. 7:9 Bai Temeneno tulungiyo Yusuf tukon banggadudul seseange, tobikon kapala talunggudoo yase yana. 22Yana kuasaikene kotahanan-tahanan bailonggon doi Yusuf, tukon Yusuf komo binee tanggung jawab sasaibino kolimang moilakukon doi talunggudoo lalomo. 23Talunggudoo kapalano akimo kai naawasio sasaibino mokinuasaikon doi Yusuf, sabab Temeneno tulungiyo yana tobikon yana nabalahasil doi sasaibino kona limang.
Currently Selected:
TEALIAN 39: LAIBGZ
Highlight
Share
Copy
Want to have your highlights saved across all your devices? Sign up or sign in
