TEALIAN 37
37
Yusuf tukon utus-utuso
1Yakub tataap doi lipu Kanaan, tamano natampat dungolan, 2tukon naiyamo kotundumo Yakub nakaluargaa:
Doi tempo Yusuf, Yakub napau kona umur songulo pitu kotaun, yana uluse kona mbembe domba tambuno polaing-laing tukon utus-utuso langgongo, doiyamo Bilha tukon Zilpa napau-pau, lua kotamano naboloki piala. Yana pelenggene doi tamano kokokubai-kokubai molokis utus-utuso langgongo nailakukon.
3Yakub seange tuuno Yusuf doi sasaibino kona pau bailon, sabab Yusuf sinuung salataa tamano motuamo. Daano kooloyo meeng yana kubaiyo tuuk doi Yusuf meeng koduba momonondok tuuno. 4Lapa Yusuf utus-utuso langgongo kitayo baikon yanila tamano lobian seange Yusuf, tobikon aki koidan naiyase basilingan mono-monondok tukon yana.
5Daano kopopokee Yusuf olumon, tukon salataa yana basilinganggene kona olumonoo doi utus-utuso langgongo, yanila tosuungimo kona misikitan doi yana. 6Naiyamo Yusuf nabinantil doi yanila, “Soba lengele! 7Yaku olumon kita sasaibino daano doi asi moboboi gandum, maka daku gandum puuto kokondong tuuno. Kopoo gandum puuto boilingiyo daku gandum puuto maka sosubaiyo dokoonggudoo.”
8“Ikoo anggene naikon ikoo teali tomundo tukon balakuasa doi kami?” Utus-utuso langgongo anukene. Maka pololokon yanila misikitene doi yana sabab naolumon-olumon tukon sabab oila kona binantil.
9Doibundu Yusuf olumon koidan, tukon yana bantile doi utus-utuso langgongo, “Yaku olumon koidan, yaku kitayo kooloyo, bituwon tukon songulo meeng kobituwon pauno mososuba doi yaku.”
10Olumonoo yana salitaikene koidan doi tamano, tukon tamano anukene yana, bantile, “Olumon oila doiya? Ikoo pikikene yaku, tinamu tukon utus-utusomu naikon lubat tukon sosuba doi koo?” 11#Kis. R. 7:9 Yusuf utus-utuso langgongo mosikitiyo noa doi yana, bai tamano tataap pikikene doolumonoo.
Yusuf binalukon tukon binaba doi Mesir
12Daano kooloyo meeng Yusuf utus-utuso langgongo taus doi Sikhem tuuk dagaiyo yanila tamano naiyayon tambuno, 13Yakub bantile doi Yusuf, “Tauso doi Sikhem, doi utus-utusomu langgongo natampat badagaiyan naiyayon tambuno konggita.” Yusuf timbiliyo, “Monondok Tama.”
14Tamano bantile, “Kitayo bulaando kona ndondoong doutus-utusomu tukon naiyayon tambuno, maka abali popitoikene doi yaku.” Maka Yusuf sinodiimo taus tinggale ko Hebron Peako.
Aki namalumbit doi bundu Yusuf polongo doi Sikhem. 15Daano yana moampakon dombalaa doisumai doi padang, yana pososuung tukon meeng komian mala-malane momasadai yana, “Oila komu inumbulii?”
16“Utus-utusonggu langgongo. Yanila daanon modagaiyo koiyayon tambuno,” Yusuf timbiliyo, “Kai Tama toiyomo yaando yanila nadaanoan?”
17Mianoo bantile, “Yanila lapamo luwe taus naimbaa. Yaku lengele yanila bantile baikon yanila sio nataus dombalaa Dotan.” Maka Yusuf luwemo tunduwo koutus-utuso langgongo tukon pososuunggene yanila doi Dotan.
18Doi namododoonan yanila lapamo kitayo Yusuf, tukon akiyon yana napolong doi yanila, yanila pomeenggono sulano naakateyo yana. 19Yanila bantile meeng komian doi bailon, “Kitayo, tukang olumonoo lubato. 20Ayo kita akateyo yana tukon sakukene kobajano doi bubung momotuul lalomo. Naapa kita bantile baikon yana iyayon mobarani sokuwomo. Kita kitayo naikon bulaando kona tealian naolumon-olumonoo.”
21Ruben lengele doi yanila nateteloo, maka yana kakaate sulano nasalamatene Yusuf. “Inai poakateyo yana,” nabantilano. 22“Kita sakukenemo doi bubung lalomo nai padang nia lalomo, bai inai naumbase kabai pokolio yana.” Lobodoo yana bantile sabab kona maksud salamatene Yusuf tukon sumboliiyo yana mule doi bonua. 23Salataa Yusuf polong doi utus-utuso langgongo, tukon lokis yanila bukayo Yusuf najubah momonondokoo tuuno. 24Maka yanila lakoyo yana tukon sakukene doi bubungoo lalomo momotuul.
25Salataa yanila daanoon mokaan, sosinggot yanila kitayo komeeng kopadagang tambuno Ismael miano modaano doi naampakonan lalomo luwedoi Gilead taus doi Mesir. Yanila naunta kona muatan lambah-lambah tukon kisimis. 26Maka Yehuda bantile doi utus-utuso, “Oila kotakoso kita moakateyo koutusonggita pioto tukon laasiakanggene mangakateanoo? 27Mai nda balukene yana doi Ismael mianodoo. Mau naaki nda kosokitiyo yana. Mau nabulaando yana kai daano utusonggita pioto.” Utus-utuso loingiyo, 28#Kis. R. 7:9 tukon salataa moi-moiya kopadagang Midian moalon, Yusuf utus-utuso langgongo tobuatene doi bubung lalomodoo maka binalukon doi Ismael mianodoo tukon koolino lua kolono kokoping perak. Doibundu padagang-padagangoo babayo yana doi Mesir.
29Salataa Ruben abali doi bubungoo tukon aki napososuunggene Yusuf idoo, yana bendinge kona pakeyan sabab poloon. 30Yana abali doi utus-utuso tukon bantile, “Paudoo akiyono kai idoo! Oila daku linakukon?”
31Maka yanila mokolot mbembe meeng tukon semeke Yusuf najubah doi mbembedoo sauno. 32Doibundu jubadoo yanila bintekene nabinabakon doi tamanoila tukon teteba, “Duba nia kami pososuunggene. Kai naiya Tama napau koona?”
33Yakub tingoniiyo jubadoo, maka bantile, “Bisa, naiya kupau najubah! Tantu yana iyayon mobarani sokuwomo. Aduh, daku pau Yusuf matemo iyayonoo bending-bendingemo!” 34Yakub bendinge kona pakeyan sabab poloon tukon pakeyo kopakeyan susaan. Samba-samba kooloyo yana kokiiliyo donapau. 35Sasaibino kona pau-pau, mau mala-malane mau boi-boine lubat mohibure yana, bai yana aki naiyase hinibur. Yana bantile, “Polong yaku mate naikon banggadudul kokiiliyo daku pau.” Bunomo doiya yana banggadudul mopoloonggene sabab Yusuf yana napau.
36Daano buno doiya doi Mesir, Midian miano badaang lapamo balukene Yusuf doi Potifar, meeng kopadagai tomundo mojabate kapala pototooli kamali.
Currently Selected:
TEALIAN 37: LAIBGZ
Highlight
Share
Copy
Want to have your highlights saved across all your devices? Sign up or sign in
