Marakusi 7

Iesu mokámbáróá toParisi láwiꞌ mouláꞌ peheꞌ ádá toioruraꞌ

(Mat. 15:1-20)

1Hangkani tempó, araheꞌ toParisi hai guru-guru agama toIahudiꞌ to hangko i Ierusale lao mampohidupaꞌá Iesu. 2Tauna iti moitaheꞌ bahangapa topeguruna Iesu mandeꞌ, agáiáná tiꞌaraheꞌ sieruꞌ membahoꞌ mouláꞌ ádáraꞌ toIahudiꞌ.#7:2 ToIahudiꞌ tiꞌara membahoꞌ bona tiꞌaraheꞌ kana hakiꞌ, agáiáná bona tiꞌaraheꞌ kedái mouláꞌ ádáraꞌ. 3ToParisi hai toIahudiꞌ ntániꞌna, maróhó ntepuꞌu pampeuláꞌiraꞌ ádá toioruraꞌ. Rápáꞌna, tiꞌara maniheꞌ mandeꞌ ane tiꞌara maniheꞌ membahoꞌ mouláꞌ ádá, 4hai ane mesuleꞌheꞌ hangko i pobaluꞌ-baluꞌá, hangaa-ngaa membahoꞌheꞌ sieruꞌ. Hai handaꞌ mani ádá to ratarima hangko i toioruraꞌ to rapeuláꞌi mpuꞌu, to nodo ádá pobahoꞌi mangku, kori hai párewá ntániꞌna to rabábehi hangko i tembaga. 5Onoꞌ miꞌi haneꞌi toParisi hai guru-guru agama iti mekuneꞌheꞌ i Iesu, rauliꞌ, “Moapa riꞌi haneꞌi topeguruMu tiꞌaraheꞌ mampeuláꞌi ádáraꞌ toioruntaꞌ? Moapa riꞌi ane mandeꞌheꞌ, tiꞌaraheꞌ sieruꞌ membahoꞌ?”

6Nauliꞌ Iesu, “Ane kómui, peuláꞌmi i Pueꞌ Ala mowongkoi pekou! Toꞌu ntepuꞌu laluitana nabiꞌ Iesaia hangkoia#7:6 Iesaia mate rekeꞌ-rekeꞌna pitu átuna parena hangko tiꞌara mani Iesu rapoánáka. mokana i kómu to manguliꞌ node:

Nauliꞌ Pueꞌ Ala:

‘Taunaheꞌ iti, i humeraꞌ peá mobiláꞌAꞌ,

agáiáná laluraꞌ karaoꞌ hangko i Kódóꞌ.

7Tiꞌara mobunduꞌ penómbáraꞌ i Kódóꞌ,

láwiꞌ paturoꞌraꞌ hangko i tauna peá,

tiꞌara paturoꞌ hangko i Kódóꞌ.’ (Iesaia 29:13)

8Noꞌonoꞌ woꞌo kómu. Maróhó mani potibaaꞌmi ádá haneꞌi pampeuláꞌimi hawaꞌna Pueꞌ Ala.”

9Hangko ionoꞌ, nahángáꞌá wopaheꞌ Iesu, “Kómu, ba nipekiri paꞌi mapánde ntepuꞌukou mopakaraoꞌ hawaꞌna Pueꞌ Ala hangko i katueꞌmi bona mopaioru pekou ádámi haduduámi? 10Rápáꞌna, i lalu Hawaꞌna Musa teukiꞌ node: ‘Hangaa-ngaa nubiláꞌ umámu hai inámu.’#7:10 Básá Pesuwuꞌá 20:12. Hai teukiꞌ woꞌo: ‘Heáná to motundaꞌ umána ba inána, hangaa-ngaa rahuku mate.’#7:10 Básá Pesuwuꞌá 21:17. 11-12Agáiáná kómu mepaturoꞌkou node: Ane haweꞌ tosaemi membiáꞌ tulungi, peisákou manguliꞌ node: ‘Apa to ara i kódóꞌ to ina kupakeꞌ mokádipurákou, upu miꞌi kudándi ina kupopenómbá i Pueꞌ Ala.’ Lempóna, moliu pepaturoꞌmi to noꞌonoꞌ, nikóntó tauna álána tiꞌaraheꞌ motulungi tosaeraꞌ. 13Mewaliꞌ, ngkóráꞌna Pueꞌ Ala to manguliꞌ hangaa-ngaa nibiláꞌ umámi hai inámi, tiꞌara iti to nipeuláꞌi. Ádá to nitarima hangko i toiorumi, iti riꞌi to nipaturoꞌáheꞌ tauna to handaꞌ. Hai handaꞌ mani bábehiámi to noꞌonoꞌ.”

Bábehiá to kadake mesupaꞌ hangko i laluna tauna

(Mat. 15:10-20)

14Roo onoꞌ, Iesu mokióꞌ wopiꞌi tauna to handaꞌ, Nahángáꞌáheꞌ, “Nipehádingi maroꞌa-roꞌa bona niꞌisá apa katoꞌuána to mopakedái tauna. Tiꞌara pandeꞌ. 15Kehapiꞌ miꞌi mampopengaa to taꞌandeꞌ, tiꞌara iti to mopakedáikeꞌ i peitána Pueꞌ Ala, ngkáliꞌna riꞌi bábehiá to mesupaꞌ hangko i laluntaꞌ, iti to mopakedáikeꞌ i peitána Pueꞌ Ala.#7:15 ToParisi hai guru-guru agama ara handaꞌ áturá mokana apa to peisá raꞌandeꞌ, rárá mandeꞌ, hai apa to mopakedái tauna. Iesu mopaturoꞌ tauna mokana i apa to toꞌu-toꞌu mopakedái tauna i peitána Pueꞌ Ala. [ 16Maroꞌa ntepuꞌu ane ara tauna to mopailalu apa to nahádi!]”

17Hangko ionoꞌ, Iesu mopálehi tauna to handaꞌ, haneꞌi mesuaꞌ i lalu támbi. Mekuneꞌheꞌ topeguruNa i Hia ba apai tunggáiána ngkóráꞌ pándiriꞌ to Napahaweꞌ ininá. 18Nahángáꞌáheꞌ, “Mogalo ripaꞌi woꞌo kómu, tiꞌara niꞌisá lempóna? Tiꞌara pandeꞌ to mesuaꞌ i ngángántaꞌ to mopakedáikeꞌ i peitána Pueꞌ Ala, 19láwiꞌ pandeꞌ tiꞌara mesuaꞌ i laluntaꞌ, mesuaꞌ peá i taꞌintaꞌ, haneꞌi liliu mesuwuꞌ.” Moliu laluita iti, Iesu mopakanótó katiꞌárána piꞌi ara pandeꞌ to rapáliá.#7:19 katiꞌárána piꞌi ara pandeꞌ to rapáliá: Pueꞌ Ala moweꞌi toIahudiꞌ handaꞌ pákáꞌna áturá kana i pandeꞌ to peisá raꞌandeꞌ hai pandeꞌ to rapáliá. (Básá Áturá Menómbá gáláꞌna ka-11 hai Pohuleki 14:1-21.) Agáiáná to nauliꞌ Iesu iti mobungkáhi rárá bona toIahudiꞌ hai to tiꞌara toIahudiꞌ peisáheꞌ mohintuwuꞌ, tiꞌaraheꞌ paraluu mosisalaꞌ mokana i pandeꞌ. (Básá Suro 11:1-18; Básá woꞌo Roma 14:13-23; Galatia 2:11-16; Kolose 2:20-23; 1 Timotiu 4:3-5.) 20Nahángáꞌá wopaheꞌ Iesu, “Agáiáná apa to mesuwuꞌ hangko i laluntaꞌ, iti riꞌi to mopakedáikeꞌ i peitána Pueꞌ Ala, 21láwiꞌ hangko i laluna tauna, mesupaꞌ hinángkáꞌ pekiri to kadake, álána:

araheꞌ to mobábehi bábehiá to metitidiꞌi,

araheꞌ to manako,

to mepapate,

22to mebualosi,

to mampokaelu párewána rángána,

hai to mobábehi mampopengaa to kadake.

Mepakanawoꞌheꞌ,

nakuasaꞌiheꞌ peundeꞌána laluraꞌ haduduáraꞌ,

mahiniꞌheꞌ,

metitibeiheꞌ,

mampepemahileheꞌ,

hai tiꞌaraheꞌ mau rapaturoꞌ.

23Upu-upu bábehiá to kadake iti mesupaꞌ hangko i laluna tauna. Iti miꞌi to mopakedái tauna i peitána Pueꞌ Ala.”

Hadua towawine to tiꞌara toIahudiꞌ membiáꞌ tulungi i Iesu

(Mat. 15:21-28)

24Hangko ionoꞌ, pohuꞌmoheꞌ Iesu hai topeguruNa hangko i tampoꞌ Galilea lao i tampoꞌ to hungkuꞌ i kótá Tiru, hai liliuheꞌ mesuaꞌ i lalu támbi. Tunggáiána Iesu bona tiꞌara raisá tauna kahaweꞌNa, agáiáná kahaweꞌNa iti tiꞌara peisá tewuniángi. 25-26I wánuá iti, ara hadua towawine. Ánáꞌna towawine napesuaꞌi tokadake. Kamohádina peá bámbári kahaweꞌna Iesu, kásáliu lao mampombelámbiꞌá haneꞌi mopalumbá i bitiNa membiáꞌ tulungi, nauliꞌ, “Pueꞌ, Nupopesuwuꞌá wongkódóꞌá setáꞌ to mampesuaꞌi ánáꞌkuꞌ!” Towawine iti tiꞌara toIahudiꞌ, ia iti toPenisia to hangko i tampoꞌ Siria.

27Agáiáná nahániki Iesu, Nauliꞌ, “Rapatodáhiheꞌ hampaiꞌ ánángkóiꞌ mandeꞌ haweꞌ mabuhu. Tiꞌara maroꞌa moala pandeꞌraꞌ ánángkóiꞌ, haneꞌi raweꞌi ahu.”#7:27 I lalu ngkóráꞌ pándiriꞌ iti, toIahudiꞌ rapándiriꞌ nodo ánángkóiꞌ, hai tauna to tiꞌara toIahudiꞌ rapándiriꞌ nodo ahu. Tunggáiána Iesu tiꞌara bona mopakóiꞌ towawine iti, ngkáliꞌna riꞌi mampehukáꞌ pepoináláina.

28Mehániꞌ towawine iti, nauliꞌ, “Toꞌu ntepuꞌu Pueꞌ, agáiáná ahu to ara i wóiꞌ mejá pandeꞌá, mandeꞌheꞌ woꞌo wutaꞌ, pandeꞌna ánángkóiꞌ to manawoꞌ hangko i wongko mejá.”

29KaNahádina laluitana iti, nauliꞌ wopiꞌi Iesu, “Maroꞌa. Tongawaꞌ hangko i pehániꞌmu, maróhó pepoináláimu. Mewaliꞌ mesuleꞌmokoꞌ, láwiꞌ mesuwuꞌ miꞌi setáꞌ to mampesuaꞌi ánáꞌmu.” 30Mesuleꞌ mpuꞌu miꞌi towawine iti. Haweꞌ i támbina, naita ánáꞌna maturu-turu i paturuána, hai nalalu miꞌi láwiꞌ setáꞌ to mesuaꞌ i ánáꞌna iti mesuwuꞌ miꞌi.

Iesu mopakauriꞌ tauna to bongoꞌ hai tiꞌara peisá molaluita

31Hangko ionoꞌ, Iesu hai topeguruNa mopálehimoheꞌ roboꞌ Tiru mopaliliu polumaoraꞌ, hai moliuheꞌ i kótá Sido.#7:31 Kótá Sido iti rekeꞌ-rekeꞌna iba puloꞌna kilómete tándáꞌ i wongko hangko i Tiru. Mesuleꞌ wopaheꞌ lao i rano Galilea, haweꞌ i tampoꞌ Dekapoli.#7:31 Tampoꞌ Dekapoli telámbiꞌ tándáꞌ i mata alo hai i wóiꞌ tándáꞌ i mata alo rano Galilea. Tempó iti karongkánina Iesu lao ionoꞌ. (Básá Marakusi 5:1-20.) 32Ionoꞌ, ara hadua tauna to bongoꞌ hai tiꞌara peisá molaluita. Ia raꞌánti tauna lao i Iesu hai rapembiáꞌ bona Napekamaꞌ. 33Iesu mopataniꞌ tauna iti hangko i oloꞌraꞌ tauna to handaꞌ. Karoona Napataniꞌ, Napopesuaꞌ miꞌi karaweꞌNa i lalu talingana tauna to bongoꞌ iti, haneꞌi metinudu, hai motóbóꞌ woꞌo lilaꞌna tauna iti. 34Roo onoꞌ, Iesu mengoaꞌ miꞌi i langiꞌ, mobusá peinaoNa, haneꞌi Nauliꞌ, “Tebungkáhi miꞌi!” I lalu básáraꞌ toIahudiꞌ, node laluitaNa: “Efata!” 35Kásáliu mehádi mpuꞌu miꞌi tauna iti, hai maledeꞌ miꞌi lilaꞌna. Maroꞌa miꞌi polaluitana. 36Hangko ionoꞌ, Nakóntóheꞌ Iesu tauna to handaꞌ bona ineeꞌ rapolaluita i heáná peá apa to mewaliꞌ. Agáiáná kehapiꞌ noꞌonoꞌ kaNakóntóraꞌ, bámbári iti rapahaweꞌ peá oaꞌ. 37Tauna to handaꞌ mokamaleá ntepuꞌuheꞌ moita apa to mewaliꞌ, onoꞌ miꞌi haneꞌi rauliꞌ, “Upu-upu to Nabábehi, maroꞌa. Tauna to bongoꞌ, mehádimoheꞌ! Tauna to tiꞌara peisá molaluita, molaluitamoheꞌ!”#7:37 Bábehiána Iesu deꞌe mopatongawaꞌ kaꞌIana miꞌi Datu Topehómpóꞌ to rapegiá toIahudiꞌ. Básá Iesaia 29:18-19; 35:3-6a; 42:6-7; 61:1.

Currently Selected:

Marakusi 7: NTBEP

Highlight

Copy