Marakusi 6
6
Iesu tiꞌara rapoinálái toNasare
(Mat. 13:53-58; Luk. 4:16-30)
1Hangko ionoꞌ, Iesu hai topeguruNa pohuꞌ hangko i wánuá Kapenau lao i Nasare,#6:1 Kehapiꞌ Iesu mesupaꞌ i Beteleme, Nasare to mewaliꞌ wánuáNa (básá Matiu 2:21-23; Marakusi 1:9,24), onoꞌ miꞌi haneꞌi Ia rauliꞌ “toNasare”. Nasare iti rekeꞌ-rekeꞌna tálu puloꞌna hai rokilómete hangko i wánuá Kapenau. wánuá karapakahileána Iesu. 2I alo penómbáꞌá, Ia lao i támbi penómbáꞌá mopaturoꞌ tauna, hai handaꞌheꞌ ionoꞌ. Kamohádiraꞌ paturoꞌna Iesu iti, tingkáráꞌheꞌ haneꞌi rauliꞌ, “Heáná riꞌi to mopaturoꞌ tauna deꞌe, haneꞌi noꞌonoꞌ kamapándeNa. Kapánde apa to ara i Hia haneꞌi Nabuku mobábehi tandaꞌ kuasaꞌ. 3Tiꞌara paꞌi Ia deꞌe to mobasi peá bágóꞌNa?#6:3 Bágóꞌna Iusupu toámána Maria, basi. (Básá Matiu 13:55.) Biásá umaꞌ mopaguru ánáꞌna bona mouláꞌ bágóꞌna, onoꞌ miꞌi haneꞌi bágóꞌna Iesu woꞌo mobasi. Ia ánáꞌna Maria. ÁdiNaheꞌ Iakobu, Iose, Iudasiꞌ hai Simoꞌ.#6:3 Kehapiꞌ Iusupu umána Iesu tiꞌara rakábelái ieneꞌ, babilaꞌ tueꞌ mani. (Básá Iohane 6:42.) Iakobu ádina Iesu to mewaliꞌ tadulako toSarani i Ierusale, (básá Galatia 1:19) hai ia to moukiꞌ Surana Iakobu. Babilaꞌ Iudasiꞌ to moukiꞌ Surana Iudasiꞌ. (Básá Iudasiꞌ 1:1.) Simoꞌ iti tiꞌara Simoꞌ Peturuꞌ. Hai tiꞌara paꞌi ádiNaheꞌ towawine araheꞌ woꞌo hingkakani hai kitaꞌ ieneꞌ?” Onoꞌ miꞌi haneꞌi mosápuákaheꞌ laluitana Iesu.
4Hangko ionoꞌ, Nahángáꞌáheꞌ, “Hadua nabiꞌ rabiláꞌ iumbá peá kalaoána. Agáiáná ane i wánuána haduduána ba i támbina, ba i oloꞌraꞌ halaluna, tiꞌara rabiláꞌ.” 5-6Napotingkáráꞌ Iesu láwiꞌ tiꞌaraheꞌ mepoinálái i Hia. Onoꞌ miꞌi haneꞌi Ia tiꞌara peisá mobábehi handaꞌ tandaꞌ kuasaꞌ ionoꞌ. Ia mampekamaꞌ peá bahangapa tauna to tiꞌara ralalu bona mauriꞌheꞌ.
Iesu mohuoꞌheꞌ suroNa mopahaweꞌ ngkóráꞌna Pueꞌ
(Mat. 10:5-15; Luk. 9:1-6)
Roo onoꞌ, Iesu hai topeguruNa molumaoheꞌ i wánuá-wánuá to hungkuꞌ i Nasare, hai Iesu mopaturoꞌheꞌ tauna. 7Ia mokióꞌ topeguruNa to hampuloꞌ hai rodua, haneꞌi Nahuoꞌheꞌ rodua-rodua lao moánti Ngkóráꞌna Pueꞌ hai Naweꞌiheꞌ kuasaꞌ mampopesuwuꞌ tokadake. 8Hangko tiꞌara maniheꞌ pohuꞌ, Nahángáꞌáheꞌ Iesu node: “Ineeꞌkou moánti ba apa-apa i polumaoámi, bateꞌna peá laiꞌ. Ineeꞌkou moánti rótiꞌ ba boku ba dóiꞌ.#6:8 Naundeꞌ Iesu bona topeguruNa mehárungáheꞌ i Pueꞌ Ala. 9Peisákou mesapatuꞌ, agáiáná ineeꞌkou moánti badumi morontau.” 10Haneꞌi Nahángáꞌá maniheꞌ, “Ane haweꞌkou i hambuaꞌ wánuá, hai araheꞌ tauna to motarimakou i támbiraꞌ, toroꞌmokou ionoꞌ duuꞌmi pohuꞌ mopaliliu polumaomi lao i wánuá to ntániꞌna. 11Ane ara pueꞌ wánuá to tiꞌarakou motarima ba to tiꞌara moundeꞌ mampehádingi laluitami, nipálehi wánuá iti, hai nitarónta awu to mentakaꞌ i pálántáꞌ bitimi,#6:11 Biásá ane toIahudiꞌ lao i tampoꞌraꞌ tauna to tiꞌara toIahudiꞌ, i pesuleꞌraꞌ, ratarónta awu hangko i bitiraꞌ hai baduraꞌ, láwiꞌ rarekeꞌ tauna iti hai tampoꞌraꞌ kedái. Mewaliꞌ nauliꞌ Iesu, pueꞌ wánuá toIahudiꞌ to tiꞌara motarima Ngkóráꞌ Marasa hibali peheꞌ hai tauna to tiꞌara toIahudiꞌ to tiꞌara moisá Pueꞌ Ala. tandaꞌna hira to ina motarima pehukuna Pueꞌ Ala.”
12Karoona Iesu mopaturoꞌ topeguruNa, pohuꞌ mpuꞌumoheꞌ lao mopaturoꞌ tauna to handaꞌ bona menosoꞌheꞌ hangko i dósáraꞌ.#6:12 Bámbári to rapahaweꞌ topeguruna Iesu hibali hai bámbári to napahaweꞌ Iohane Toperiu (Matiu 3:2) hai Iesu (básá Marakusi 1:15). Iti mobukeki dándina Iesu, ina mewaliꞌheꞌ topodálá tauna (básá Marakusi 1:17). 13Topeguruna Iesu mampopesuwuꞌ handaꞌ setáꞌ to mampesuaꞌi tauna, hai moparirohaheꞌ lana i tauna to tiꞌara ralalu, hai mauriꞌ mpuꞌu miꞌi hakiꞌraꞌ.#6:13 Lana nodo pákupu ba rariroha i wátána tauna to tiꞌara nalalu, agáiáná to natunggái ieneꞌ, hantódiꞌ lana rariro i kirena tauna to tiꞌara nalalu, tandaꞌna Pueꞌ Ala to makuasaꞌ mepakauriꞌ.
Kamatena Iohane Toperiu
(Mat. 14:1-12; Luk. 9:7-9)
14I tempó iti, Datu Herode Antipa#6:14 Datu Herode Antipa: Ia miꞌi ánáꞌna Herode Mahile. Básá to teukiꞌ i Kahirámpuá Laluita. mohádi apa to nabábehi Iesu, láwiꞌ hangaꞌna Iesu tebámbári iumbá-umbá peá. Ara to manguliꞌ, “Iesu iti ia miꞌi Iohane Toperiu to tueꞌ huleꞌ! Onoꞌ miꞌi haneꞌi Nabuku mobábehi handaꞌ tandaꞌ kuasaꞌ.”
15Agáiáná ara woꞌo to manguliꞌ, “Babilaꞌ Iesu ia miꞌi nabiꞌ Eliá {to haweꞌ wopiꞌi}.”#6:15 Eliá tueꞌ i duniáꞌ rekeꞌ-rekeꞌna uwalu átuna lima puloꞌna parena hangko tiꞌara mani Iesu rapoánáka. Ia tiꞌara mate, agáiáná teoreꞌ lao i surugáꞌ. (Básá 2 Datu-datu 2:11.) Pehárungáraꞌ toIahudiꞌ, Eliá ina mesuleꞌ mai i duniáꞌ bona mopatimama rárá i kaꞌina haweꞌna Datu Topehómpóꞌ. (Básá Maleaki 3:1; 4:5-6.)
Hai araheꞌ woꞌo to manguliꞌ, “Ia miꞌi hadua nabiꞌ, to hibali hai nabiꞌ to tueꞌ hangkoia.”
16Kanahádina Datu Herode bámbári iti, nauliꞌ, “Ia hangaa-ngaa Iohane Toperiu! Hangkoia kuhuoꞌ tauna mobóhóki tambólóna. Babilaꞌ deꞌe-deꞌe tueꞌ huleꞌ.”
17-18Kamatena Iohane Toperiu,#6:17-18 kamatena Iohane Toperiu: Mouláꞌ Iosepu, hadua topoukiꞌ daritakáná toIahudiꞌ to tueꞌ tempó onoꞌ, Iohane Toperiu rapapate i bente Makaeru, tándáꞌ i mata alo tahiꞌ Mate, i poropensi Perea. node daritakáná: Datu Herode mobualosi ádina, ia miꞌi Pilipu, láwiꞌ moala Herodia#6:17-18 Herodia: Básá to teukiꞌ i Kahirámpuá Laluita. napotoina. Mewaliꞌ handaꞌ kánina Iohane mokámbáróá Herode ánti bábehiána iti, nauliꞌ, “Tiꞌarakoꞌ peisá mampotoina toinána halalumu! Bábehiámu iti moliungi Hawaꞌna Musa.”#6:17-18 Básá Áturá Menómbá 18:16; 20:21. Onoꞌ miꞌi haneꞌi Herode mohuoꞌ surudadoꞌna lao mohakaꞌ Iohane. Ratimpuku hai rapopesuaꞌ i lalu tarungku. 19I tempó iti, Herodia mokáhihiꞌ Iohane, onoꞌ miꞌi haneꞌi napoinao napapate. Agáiáná tiꞌara tebukeki tunggáiána iti, 20láwiꞌ Herode mohuoꞌheꞌ surudadoꞌna mokámpái Iohane i lalu tarungku. Herode tiꞌara pebáiꞌ mopapate láwiꞌ naisá kaꞌiana tauna to manótó laluna hai magasaꞌ tueꞌna. Ane mampehádingi laluitana Iohane, wuli ntepuꞌu pekirina, agáiáná naundeꞌ woꞌo mampehádingi apa to nauliꞌ Iohane.
21Hangkani, ara tempó to maroꞌa i Herodia mampopolumao tunggáiána. Tempó iti, Datu Herode mobábehi posusa pambuhinaona alo karapoánákana. Handaꞌ tuꞌáná, tadulako-tadulako, hai topebuku to hangko i tampoꞌ Galilea to nakióꞌ lao i posusa iti. 22Tangaꞌraꞌ mosusa, ánáꞌna Herodia towawine mesuaꞌ hai monariꞌ i lindoꞌraꞌ torare.#6:22 Tiꞌara biásá ánáꞌna datu monariꞌ. Biásá towawine to tiꞌara maroꞌa bábehiáraꞌ to rakióꞌ monariꞌ. Góeꞌ ntepuꞌu Datu Herode mampeita ponariꞌna ánáꞌntawine iti, noꞌonoꞌ woꞌo torarena. Nauliꞌ Herode i ánáꞌntawine iti, “Apa to nuꞌundeꞌ? Apa peá to nupembiáꞌ, ina kuweꞌikoꞌ!” 23Ia modándi wopiꞌi i lindoꞌna torarena, nauliꞌ, “Apa peá to nupembiáꞌ, kehapiꞌ miꞌi hantangaꞌ hangko i kadatuángkuꞌ, ina kuweꞌikoꞌ!”
24Pohuꞌ miꞌi ánáꞌntawine iti lao mekuneꞌ i inána, nauliꞌ, “Inaꞌ, apa to hangaa-ngaa kupembiáꞌ?”
Nauliꞌ inána, “Nupembiáꞌ wuáꞌna Iohane Toperiu!”
25Hangko ionoꞌ, kawiáꞌ pemiꞌi ánáꞌntawine iti lao i datu, haneꞌi nauliꞌ, “Kupembiáꞌ wuáꞌna Iohane Toperiu deꞌe-deꞌe rawoli i wongko bakiꞌ.”
26Kanahádina Herode pembiáꞌna iti, masusa laluna, agáiáná dándina i ánáꞌntawine iti tiꞌara piꞌi peisá nadiiꞌ huleꞌ, láwiꞌ ia modándi miꞌi i lindoꞌraꞌ torarena. 27Onoꞌ miꞌi haneꞌi kásáliu nahuoꞌ hadua surudadoꞌna lao mobóhóki tambólóna Iohane Toperiu. Lao mpuꞌu miꞌi surudadoꞌ iti i tarungku mobóhóki tambólóna Iohane. 28Wuáꞌna nawoli i wongko bakiꞌ haneꞌi lao nahuhuꞌ i ánáꞌntawine iti, hai ánáꞌntawine iti lao mampeweꞌi i hinána. 29Karahádina topeguruna Iohane#6:29 Roo kamatena Iohane Toperiu, topeguruna ara maniheꞌ bahangapa parena. (Básá Suro 18:24-25; 19:1-3.) apa to pewaliꞌ iti, laomoheꞌ moala wátámandoꞌna Iohane haneꞌi ratawu. {Eneꞌ miꞌi daritána kamatena Iohane Toperiu.}
Iesu mopaꞌandeꞌ lima sábuna tauna
(Mat. 14:13-21; Luk. 9:10-17; Ioh. 6:1-13)
30I kapesuleꞌraꞌ suro to nahuoꞌ Iesu lao mopahaweꞌ ngkóráꞌna Pueꞌ Ala, rapodarita miꞌi i Iesu upu-upu to rabábehi hai to rapaturoꞌáheꞌ tauna to handaꞌ. 31I tempó iti, handaꞌ ntepuꞌu tauna mombeháwá-háwá lao i Iesu, duuꞌna Iesu hai topeguruNa tiꞌarapoheꞌ ina nampakaꞌ mandeꞌ. Onoꞌ miꞌi haneꞌi nauliꞌ Iesu i topeguruNa, “Rángintaꞌ pohuꞌ lao mopataniꞌ i katoroꞌá to malaheꞌ hangko i tauna, bona peisákou mengkaroo hampaiꞌ.” 32Mewaliꞌ, mengkaheꞌmoheꞌ i duanga lao i kalaheꞌána.
33Agáiáná tauna to handaꞌ moita kapohuꞌáraꞌ, hai raisá woꞌo iumbá kalaoáraꞌ. Mewaliꞌ handaꞌ tauna hangko i wánuá-wánuá to hungkuꞌ manggaguheꞌ woꞌo lao ionoꞌ mouláꞌ rárá to i wiwi rano, áláraꞌ ioru haweꞌ haneꞌi Iesu hai topeguruNaheꞌ. 34Pendáuluna Iesu hangko i duanga, Ia moita wopaheꞌ tauna to handaꞌ mepegiá. Maꞌahiꞌ laluNa mampeitaheꞌ, láwiꞌ nodoheꞌ dimbá to tiꞌara rapoewu.#6:34 I lalu Pototowiá to Sae, taunána Pueꞌ Ala rapándiriꞌ nodo dimbá, hai Pueꞌ Ala Ia miꞌi Topoewuraꞌ. Rápáꞌna, básá Sura Petóiá 23; Ieheskie 34:11-16. Mewaliꞌ natepuꞌu wopiꞌi Iesu mopaguruheꞌ mampopengaa paturoꞌ.
35Ina támpu miꞌi alo, laomoheꞌ topeguruNa i Hia haneꞌi rahángáꞌá, “Guru, katoroꞌá deꞌe tiꞌara ara apa-apa, hai ina támpu miꞌi alo. 36Rángina miꞌi Nuhuoꞌheꞌ tauna to handaꞌ iti lao i wánuá-wánuá to hungkuꞌ bona mohólóheꞌ pandeꞌraꞌ.”
37Agáiáná nauliꞌ Iesu, “Kómu riꞌi to hangaa-ngaa mopaꞌandeꞌheꞌ.”
Rahániki topeguruNa, “Apa miꞌi paꞌi to ina kiweꞌiheꞌ? Mogalo riꞌi rongatu dóiꞌ peráꞌ,#6:37 rongatu dóiꞌ peráꞌ: Imbaꞌna rekeꞌ-rekeꞌna hibali hai sarona hadua tauna ane mobágóꞌ hampare. tiꞌara gáná tapopehóló rótiꞌ tapopopaꞌandeꞌáheꞌ tauna to nodeꞌe kahandaꞌraꞌ.”
38Nauliꞌ Iesu, “Nipeita. Hangapa wuaꞌna rótiꞌ to ara i kómu?”
Karoona rapeita, rauliꞌ, “Lima peá wuaꞌna rótiꞌ hai rombaꞌa bouꞌ.”
39Roo onoꞌ, nahuoꞌmoheꞌ Iesu bona tauna mehodaheꞌ motobu-tobu i wongko pádá to kerumpuꞌ to woꞌu. 40Mewaliꞌ mehodamoheꞌ motobu-tobu. Ara to hangatu kahandaꞌraꞌ, ara woꞌo to lima puloꞌna. 41Roo onoꞌ, Iesu moala miꞌi rótiꞌ to lima wuaꞌna hai bouꞌ to rombaꞌa iti, haneꞌi mengoaꞌ i langiꞌ mekakae i Pueꞌ Ala. Nabiseꞌ-biseꞌ miꞌi rótiꞌ iti, haneꞌi Naweꞌiheꞌ topeguruNa bona ragáláꞌ-gáláꞌáheꞌ tauna to handaꞌ. Noꞌonoꞌ woꞌo, karagáláꞌ-gáláꞌna bouꞌ to rombaꞌa iti. 42Mandeꞌmoheꞌ upu-upu duuꞌraꞌ mabuhu. 43Karooraꞌ mandeꞌ, pelábiána pandeꞌ rarámpu topeguruna Iesu, hampuloꞌ mani hai rongkárándi. 44Kahandaꞌraꞌ tauna to mandeꞌ tempó iti, rekeꞌ-rekeꞌna lima sábuna tobaleilo, {tiꞌara teimbaꞌ towawine hai ánángkóiꞌ}.
Iesu molumao i wongko uwai
(Mat. 14:22-33; Ioh. 6:16-21)
45Roo onoꞌ, Iesu mohuoꞌmoheꞌ topeguruNa moduanga moioru lao tándáꞌ i hambali rano Galilea, lao i wánuá Besaida,#6:45 Besaida iti hambuaꞌ wánuá i wongko, tándáꞌ i mata alo rano Galilea. Handaꞌ topopeká ba topodálá to toroꞌ ionoꞌ. hai Ia mohuoꞌmoheꞌ woꞌo tauna to handaꞌ bona mesuleꞌheꞌ. 46Karoona Iesu mampopesuleꞌ tauna to handaꞌ, Ia pohuꞌ miꞌi woꞌo lao i buluꞌna mekakae. 47Káindi miꞌi, topeguruNa aramoheꞌ i tangaꞌ rano, agáiáná Ia haduduáNa ara mani i lorena. 48I kanaitána Iesu mapári ntepuꞌu rahádi topeguruNa mowose duangaraꞌ, láwiꞌ mampohidupaꞌá wui to rumihi hangko i lindoꞌ, onoꞌ miꞌi haneꞌi hungkuꞌ mabaa, rekeꞌ-rekeꞌna tintiꞌ tálu, Ia molumao i wongko uwai ina lao monóntóhiheꞌ. Natunggáiheꞌ Naliu, 49agáiáná karaitána topeguruNa ara tauna to molumao i wongko uwai, monganga-ngangaheꞌ, rauliꞌ, “Doꞌo maiꞌo tometánuánáꞌ!” 50Upu-upuheꞌ moita ara to molumao i wongko uwai iti, hai malááꞌ ntepuꞌuheꞌ.
Kásáliu nahángáꞌáheꞌ Iesu, “Pakaróhó lalumi! Ineeꞌkou malááꞌ! Kódóꞌnto.”#6:50 Kódóꞌnto: Laluita to napakeꞌ Iesu ieneꞌ i lalu básá Iunani peisá woꞌo molempónga “KÓDÓꞌ ARA MIꞌI AMI”, hibali hai Yahweh (YHWH), hangaꞌna Pueꞌ Ala i lalu básá Iberani. (Básá Pesuwuꞌá 3:14.) Babilaꞌ iti to natunggái Iesu, bona raisá topeguruNa kaꞌIana Pueꞌ Ala to makuasaꞌ. 51Kapengkaheꞌna Iesu i duangaraꞌ topeguruNa, wui kásáliu mengkaroo. Tingkáráꞌ ntepuꞌuheꞌ 52láwiꞌ kehapiꞌ tiꞌara maniheꞌ marue moita tandaꞌ kuasaꞌ i tempóNa mopaꞌandeꞌ tauna to handaꞌ, tiꞌara mani manótó i pekiriraꞌ kaheánána Iesu iti. Bateꞌna mani bata-bata laluraꞌ mepoinálái i Hia.#6:52 Upu-upu tandaꞌ kuasaꞌ to nabábehi Iesu mopatongawaꞌ kaꞌIana Pueꞌ Ala.
Iesu mopakauriꞌ handaꞌ tauna to maduꞌa i Genesare
(Mat. 14:34-36)
53Kahaweꞌraꞌ Iesu hai topeguruNa i hambali rano Galilea, mengkarooheꞌ i tampoꞌ to rauliꞌ Genesare. 54Pendáuluraꞌ hangko i duanga, pueꞌ wánuá moita kaꞌIesuna miꞌi to haweꞌ i tampoꞌraꞌ. 55Melangkamoheꞌ lao i wánuá-wánuá to hungkuꞌ, hai upu-upu rángáraꞌ to maduꞌa rakowaꞌ raꞌánti lao i Iesu. Iumbá peá rahádi kaꞌárána Iesu, ionoꞌ raꞌánti rángáraꞌ to maduꞌa. 56Iumbá peá kalaoána Iesu, ba i wánuá to mahile ba i wánuá to kókóiꞌ, moántiheꞌ rángáraꞌ to maduꞌa, rawoli i kahirámpuá tauna to handaꞌ, hai rapembiáꞌ i Iesu bona Napaliuheꞌ mampetóbóꞌ hubaꞌ wuntu kumbáNa peá. Upu-upu tauna to mampetóbóꞌ kumbáNa, kásáliu mauriꞌ mpuꞌu hakiꞌraꞌ.#6:56 mauriꞌ mpuꞌu hakiꞌraꞌ: Básá to teukiꞌ i wóiꞌ Marakusi 2:10.
Currently Selected:
Marakusi 6: NTBEP
Highlight
Share
Copy
Want to have your highlights saved across all your devices? Sign up or sign in
Bahasa Behoa Shorter Bible © Indonesian Bible Society, 2015.
