Marakusi 5

Iesu mopakauriꞌ tauna to napesuaꞌi setáꞌ

(Mat. 8:28-34; Luk. 8:26-39)

1Hangko ionoꞌ, Iesu hai topeguruNa haweꞌmoheꞌ i hambali rano i tampoꞌ Gerasa. 2-3Hangko kapendáuluraꞌmoto hangko i duanga, haweꞌ miꞌi hadua tauna to napesuaꞌi tokadake mampohidupaꞌá Iesu. Tauna iti toroꞌ peá i popatawuá#5:2-3 popatawuá: Tempó onoꞌ, tauna ratawu i lalu balamba to rakae hangko i buluꞌ watu. láwiꞌ tiꞌara piꞌi ara to mobuku mohakaꞌ ánti kamaróhóna. 4Handaꞌ kánina bitina hai taena ratimpuku. Kehapiꞌ miꞌi gulaꞌ hai rante, nabuku peá nadepuꞌ-depuꞌ. Onoꞌ miꞌi haneꞌi tiꞌara ara tauna to pebáiꞌ mohakaꞌ. 5Alo-alona hai wengi-wengina, ia molulumao peá i popatawuá hai i wongko buluꞌ, monganga-nganga hai mobebelái wátána hai watu.#5:5 Tunggáiána tokadake, bona tauna rapopeahiahiꞌ hai rapakasusa. Básá woꞌo wátiꞌna ka-13, hai Marakusi 9:20-22. 6Kamoitána peá Iesu hangko karaoꞌ, melangka miꞌi lao medupaꞌ, haneꞌi molingkudu i bitiNa, mobiláꞌ Iesu. 7-8Mantepuꞌu miꞌi Iesu mohuoꞌ tokadake to mampesuaꞌi tauna iti, Nauliꞌ, “Mesuwuꞌmokoꞌ hangko i tauna deꞌe!”

Agáiáná monganga-nganga riꞌi tauna iti napasimbuku, nauliꞌ, “Iesu, Ánáꞌna Pueꞌ Ala to i Surugáꞌ! Apa riꞌi urusiáMu i kódóꞌ? Kupembiáꞌ i lalu hangaꞌna Pueꞌ Ala, ineeꞌaꞌ ina Nupopeahiahiꞌ.”

9Napekuneꞌ Iesu, “Heáná hangaꞌmu?”

Nahániki, “Hangaꞌkuꞌ Legio,#5:9 Legio: Ane tantara toRoma, legio ia miꞌi hantobu surudadoꞌ to tálu sábuna haweꞌ ini sábuna tauna. láwiꞌ handaꞌangkaiꞌ to mesuaꞌ i tauna deꞌe.” Hangaꞌna Legio iti, lempóna: i sábuna. 10Rapembiáꞌ tokadake iti i Iesu bona ineeꞌheꞌ Napopelóhóꞌ hangko i tampoꞌ iti.

11Tiꞌara karaoꞌ hangko ionoꞌ, araheꞌ boeꞌ to handaꞌ harómbóngá, to tangaꞌraꞌ masungkiꞌ-sungkiꞌ i bátána buluꞌ. 12Rapembiáꞌ tokadake iti i Iesu, rauliꞌ, “Nuhuoꞌangkaiꞌ mesuaꞌ i boeꞌheꞌ doꞌo.” 13Napokana Iesu pembiáꞌraꞌ iti, Nauliꞌ, “Laomokou ionoꞌ!” Mewaliꞌ mesuwuꞌ mpuꞌumoheꞌ tokadake iti hai liliuheꞌ mesuaꞌ i boeꞌ. Pesuaꞌraꞌ i boeꞌ, melangkamoheꞌ boeꞌ iti hai manawoꞌheꞌ i pingke lao i lalu rano, álána mateheꞌ humpu. Kahandaꞌraꞌ to mate rekeꞌ-rekeꞌna rosábu báꞌána.

14Karaitána tauna to mokámpái boeꞌ iti#5:1-14 Iti mewaliꞌ i katoroꞌá tauna to tiꞌara toIahudiꞌ láwiꞌ toIahudiꞌ tiꞌara ina mokámpái boeꞌ. Básá Áturá Menómbá 11:7-8; Pohuleki 14:8. apa to pewaliꞌ, liliuheꞌ melangka lao i wánuá-wánuá hai i hinoe to hungkuꞌ mopahaweꞌ apa to raita iti. Onoꞌ miꞌi haneꞌi laomoheꞌ pueꞌ wánuá mampeita apa to pewaliꞌ. 15Kahaweꞌraꞌ i Iesu, raita tauna to napesuaꞌi setáꞌ to handaꞌ ininá, mehoda nodo miꞌi tauna biásá, mewaruꞌ, hai manótó miꞌi pekirina. Onoꞌ miꞌi haneꞌi malááꞌheꞌ. 16Tauna to moita apa to nabábehi Iesu i tempó iti mampodaritaꞌá wopaheꞌ pueꞌ wánuá apa to mewaliꞌ i tauna to napesuaꞌi setáꞌ, hai apa to mewaliꞌ i boeꞌ. 17Kamohádiraꞌ apa to pewaliꞌ iti, rapembiáꞌ pueꞌ wánuá iti bona Iesu pohuꞌ hangko i tampoꞌ Gerasa iti.#5:17 Babilaꞌ pueꞌ wánuá iti malááꞌheꞌ i kuasaꞌna Iesu, ba mabukoꞌheꞌ láwiꞌ mate boeꞌraꞌ hai malááꞌheꞌ apa mani to ina napakarugiꞌ Iesu.

18Tangaꞌna Iesu mengkaheꞌ i duanga, tauna to napesuaꞌi setáꞌ ininá membiáꞌ bona meuláꞌ i Hia, 19agáiáná tiꞌara Napaliu. Nahángáꞌá riꞌi, “Mesuleꞌmokoꞌ lao i támbimu, nupolaluita i tauna to hambámbánuámu hai halalumu apa to nabábehi Pueꞌ Ala hai noumbá ahiꞌNa i hio.”#5:19 Haweꞌ tempó onoꞌ, Iesu membiáꞌ bona tauna tiꞌara moánti bámbári kana i to Nabábehi. Babilaꞌ Napatodáhi tauna iti moánti bámbári iti láwiꞌ ia tiꞌara toIahudiꞌ, hai tiꞌara woꞌo ara pekirina to salaꞌ mokana Datu Topehómpóꞌ to ina haweꞌ, nodo pekiriraꞌ toIahudiꞌ. Básá woꞌo to teukiꞌ i wóiꞌ Marakusi 8:31 mokana i pehárungáraꞌ toIahudiꞌ i Datu Topehómpóꞌ. 20Lao mpuꞌu miꞌi tauna iti i tampoꞌ Dekapoli,#5:20 tampoꞌ Dekapoli - Lempóna: “hampuloꞌ kótá”. Dekapoli ia miꞌi hambuaꞌ poropensi to natibaaꞌ popárentá Roma. Tauna to toroꞌ ionoꞌ, kahandaꞌáraꞌ tiꞌara toIahudiꞌ. mopahaweꞌ apa to nabábehi Iesu i hia.#5:19-20 Teukiꞌ i wátiꞌna ka-19: “apa to nabábehi Pueꞌ Ala hai noumbá ahiꞌNa i hio.” I wátiꞌna ka-20 teukiꞌ: “apa to nabábehi Iesu i hia”. Laluita iti mopatongawaꞌ kaꞌIesuna Pueꞌ Ala. Tingkáráꞌheꞌ upu-upu tauna to mohádi bámbári iti.

Iesu mopakauriꞌ hadua towawine to nahumba oaꞌ, hai mopatueꞌ huleꞌ ánáꞌna Iairu

(Mat. 9:18-26; Luk. 8:40-56)

21Iesu hai topeguruNa mengkaheꞌmoheꞌ i duanga, mesuleꞌ wopaheꞌ lao i hambali rano Galilea. I kahaweꞌraꞌ ionoꞌ, handaꞌ tauna to lao motolelingi Iesu. TangaꞌNa mani i wiwi rano, 22haweꞌ miꞌi hadua tauna to rahangaꞌ Iairu. Ia hadua tadulako támbi penómbáꞌáraꞌ toIahudiꞌ.#5:22 tadulako támbi penómbáꞌáraꞌ toIahudiꞌ: Bágóꞌna, mokádipurá támbi penómbáꞌá hai mourusi to mampopolumao bágóꞌna Pueꞌ. Kamoitána peá Iesu, liliu pemiꞌi lao mopalumbá i bitiNa 23membiáꞌ tulungi, nauliꞌ, “Pueꞌ! Ánáꞌkuꞌ towawine tangaꞌna maduꞌa hai hungkuꞌ miꞌi ina mate. Kupembiáꞌ bona laokeꞌ i támbingkuꞌ. Nupekamaꞌ woia, bona limba peá.” 24Mewaliꞌ meuláꞌ mpuꞌu miꞌi Iesu i hia, hai handaꞌ woꞌo tauna to meuláꞌ duuꞌna Iesu tiꞌara piꞌi peisá mokale.

25I oloꞌraꞌ tauna to handaꞌ iti, ara hadua towawine to hampuloꞌ miꞌi hai rompare nahumba oaꞌ, tiꞌara mengkakaroo. 26Handaꞌ kánina membiáꞌ bona rapákupui i sando, duuꞌna upu óntóꞌ támbina napobaluꞌ napopobaiari. Agáiáná tiꞌara ara kamauriꞌána, tetámbái riꞌi hakiꞌna iti. 27-28Kamohádina apa to rapolaluita tauna kana i Iesu, ia mohungkuki Iesu hangko i taleuꞌNa, hai mampetóbóꞌ kumbáNa. 29Kanatóbóꞌna peá, kásáliu mengkaroo waheꞌna. Toꞌu-toꞌu nahádi kamauriꞌna miꞌi hakiꞌna.

30I tempó iti woꞌo, nahádi Iesu ara kuasaꞌ pepakauriꞌ to mesuwuꞌ hangko i wátáNa. Mehaileꞌ miꞌi i tauna to handaꞌ haneꞌi Napekuneꞌ, “Heáná to motóbóꞌ kumbáNgkuꞌ?”

31Rauliꞌ topeguruNa, “Guru. Handaꞌ ntepuꞌu tauna to mombegihiꞌ-gihiꞌ mogaguKoꞌ. Moapa riꞌi haneꞌi Nupekuneꞌ heáná to motóbóꞌ kumbáMu?” 32Agáiáná Iesu mehaileꞌ mampeliꞌ heáná tauna to mampetóbóꞌ kumbáNa.

33Naisá towawine iti apa to mewaliꞌ i wátána. Moridiꞌ miꞌi ánti kamalááꞌna,#5:25-33 Hakiꞌ towawine iti metitidiꞌi i toIahudiꞌ. Mouláꞌ ágámáraꞌ, rarekeꞌ kedái, haneꞌi tiꞌara peisá mohintuwuꞌ hai tauna ntániꞌna. Básá Áturá Menómbá 15:19-30. haneꞌi ia lao mopalumbá i bitina Iesu hai mopangákuꞌ apa to nabábehi. 34Nauliꞌ Iesu i towawine iti, “ÁnáꞌKuꞌ! Ánti pepoináláimu i Kódóꞌ, mauriꞌmokoꞌ. Mesuleꞌmokoꞌ i lalu roꞌa ngkatueꞌ. Tekábáhámokoꞌ hangko i pantódihámu.”

35Tangaꞌna mani Iesu molaluita, haweꞌmoheꞌ bahangapa tauna hangko i támbina Iairu mohángáꞌá Iairu, rauliꞌ, “Tuá, ánáꞌmu mate miꞌi. Ineeꞌmokoꞌ mopakasusa Guru.”

36Kanahádina peá Iesu apa to rauliꞌ tauna iti, Nahángáꞌá Iairu, “Ineeꞌkoꞌ malááꞌ! Mepoináláimokoꞌ!” 37Napaliliu miꞌi Iesu polumaoNa agáiáná tiꞌaraheꞌ Napaliu tauna to handaꞌ meuláꞌ i Hia, ngkáliꞌna riꞌi Peturuꞌ, Iakobu hai Iohane ádina Iakobu. 38Kahaweꞌraꞌ i támbina Iairu, naita Iesu handaꞌ tauna to mahewo, teriaꞌ metatangi.#5:38 Ane ara tauna to mate, ara tauna to rasaro bona motadulakoi tauna metatangi. Biásá ara to momusiꞌ, ara woꞌo to teriaꞌ. Hangaa-ngaa handaꞌheꞌ láwiꞌ ánáꞌna tadulako támbi penómbáꞌá to mate. 39PesuaꞌNa i lalu támbi, Nahángáꞌáheꞌ, “Moapa riꞌi haneꞌi mahewokou hai rumihi kateriaꞌmi? Ia tiꞌaranto mate, agáiáná letaꞌ peá.”#5:39 I Pueꞌ Ala, kapate nodo peá tauna to letaꞌ. Básá woꞌo Iohane 11:11-14; 1 Tesalonika 4:13-14; 5:10. 40Agáiáná rapatawai riꞌi. Hangko ionoꞌ, nahuoꞌmoheꞌ Iesu upu-upu tauna mengkairawa, haneꞌi mesuaꞌ miꞌi i lintuꞌna ánángkóiꞌ iti hingkakani hai inána, umána, hai topeguruNa to tálu iti. 41-42Tinuwuꞌna ánángkóiꞌ iti hampuloꞌ hai rompare. Natibaaꞌ miꞌi Iesu taena,#5:41-42 Ane tauna motibaaꞌ tomate, rarekeꞌ kedái mouláꞌ áturáraꞌ toIahudiꞌ. Básá Poimbaꞌ 19:11-22. haneꞌi Nahángáꞌá, “Mearómokoꞌ, ánáꞌKuꞌ!” I lalu básáraꞌ toIahudiꞌ, node laluitaNa: “Talita kum!” Mearó miꞌi ánángkóiꞌ iti hai liu-liu molumao. Tingkáráꞌ ntepuꞌuheꞌ upu-upu tauna to manginta. 43Agáiáná Iesu mokóntó ntepuꞌuheꞌ bona ineeꞌ rapolaluita apa to Nabábehi iti, hai Nahuoꞌheꞌ bona ánángkóiꞌ iti rapaꞌandeꞌ.

Currently Selected:

Marakusi 5: NTBEP

Highlight

Copy