Matiu 11

1Karoona Iesu mopaturoꞌheꞌ topeguruNa to hampuloꞌ hai rodua, Ia pohuꞌ miꞌi hangko ionoꞌ, lao mepaturoꞌ hai mobámbári Ngkóráꞌ Marasa i wánuá-wánuá ntániꞌna.

Iesu motóiá Iohane Toperiu

(Luk. 7:18-35)

2I tempó iti, Iohane Toperiu tangaꞌna ratarungku. Kanahádina Iohane apa to nabábehi Kerisitu, nahuoꞌmoheꞌ bahangapa topeguruna lao mekuneꞌ i Iesu node: 3“Ba Io mpuꞌu miꞌi Datu Topehómpóꞌ to nadándi Pueꞌ Ala, ba ara mani to ntániꞌna to hangaa-ngaa kipegiá?”#11:3 Iohane Toperiu moisá miꞌi apa to teukiꞌ hangkoia i Iesaia 42:7; 61:1. ToIahudiꞌ mohárungá Datu Topehómpóꞌ ina mewaliꞌ datu hai mokábáháheꞌ hangko i kuasaꞌraꞌ toRoma. Tiꞌara rapekiri Datu Topehómpóꞌ (toMásehi) ina mepárentá i laluraꞌ tauna bona teámpungiheꞌ hangko i dósáraꞌ. Mewaliꞌ lao mpuꞌumoheꞌ topeguruna Iohane i Iesu.

4Kanahádina Iesu pekuneꞌraꞌ, Nahángáꞌámoheꞌ, “Mesuleꞌmokou, hai nipahaweꞌá Iohane apa to nihádi hai to niꞌita: 5tobilo meita miꞌi, topaluꞌ molumao miꞌi, toketánggáꞌ mauriꞌ miꞌi, tobongoꞌ mehádi miꞌi, tauna to mate tueꞌ miꞌi huleꞌ, hai bámbári to maroꞌa rapahaweꞌ i tauna to meahiahiꞌ tueꞌraꞌ.#11:5 Tandaꞌ kuasaꞌ to nabábehi Iesu iti mopatongawaꞌ kaꞌIana miꞌi Datu Topehómpóꞌ. Básá Iesaia 29:18-19; 35:5-6; 42:7; 61:1. 6Morasiꞌheꞌ tauna to tiꞌara bata-bata laluraꞌ mokana i Kódóꞌ.”

7I pesuleꞌraꞌ topeguruna Iohane Toperiu, natepuꞌu miꞌi Iesu molaluita i tauna to handaꞌ mokana i Iohane, Nauliꞌ, “Apa riꞌi tunggáiámi iaꞌo lao mampeita Iohane Toperiu i pádá loriꞌ? Ba mampoinao mpuꞌukou moita buloꞌ mpádá to nawui ngkálu soꞌu ngkálu mai? Tiꞌara! 8Mewaliꞌ, apa riꞌi to nipoinao lao nipeita? Ba mampoinaokou mampeita tauna to mababe waruꞌna? Tiꞌara woꞌo, láwiꞌ tauna to mababe waruꞌraꞌ toroꞌ peheꞌ i támbina datu. 9Mewaliꞌ, apa riꞌi to nipoinao lao nipeita? Ba mampoinao mpuꞌukou mampeita hadua nabiꞌ? Ane noꞌonoꞌi tunggáiámi, maroꞌa. Agáiáná Kuhángáꞌákou, melumbuꞌ kamahilena tueꞌna Iohane hangko i nabiꞌ-nabiꞌ to ntániꞌna, 10láwiꞌ Iohane iti to natunggái i lalu Sura Magasaꞌ hangkoia to manguliꞌ node:

‘Deꞌe miꞌi huoꞌáNgkuꞌ

to ina Kuhuoꞌ moioru hangko i Hio.

Ia to ina mopatimama ráráMu.’ ” (Maleaki 3:1)

11Nauliꞌ wopiꞌi Iesu, “Toꞌu-toꞌu iti to nabábehi Iohane, hai Kuhángáꞌáꞌákou: hangko i upu-upu tauna to rapoánáka i lalu duniáꞌ deꞌe, tiꞌara ara haweꞌ hadua to melumbuꞌ kamahilena tueꞌna hangko i Iohane Toperiu, {láwiꞌ ia to mopahaweꞌ kahaweꞌna miꞌi Datu Topehómpóꞌ}. Agáiáná mantepuꞌu deꞌe-deꞌe, morasiꞌ ntepuꞌuheꞌ tauna to mengkoruꞌ i Pueꞌ Ala. Mogalo riꞌi tauna to i wóiꞌ tueꞌraꞌ i lalu popárentána Pueꞌ Ala, melumbuꞌ kamahilena tueꞌraꞌ haneꞌi Iohane {láwiꞌ hira moisá maniheꞌ rárá katehómpóꞌ haneꞌi Iohane}. 12Hangko i tempóna Iohane Toperiu mantepuꞌu mopahaweꞌ Ngkóráꞌ Marasa haweꞌ deꞌe-deꞌe, tauna to kadake mopári-pári mokuasaꞌi taunána Pueꞌ Ala.#11:12 tauna to kadake mopári-pári mokuasaꞌi taunána Pueꞌ Ala - Peisá woꞌo ralempónga: tauna mopári-pári mesuaꞌ i lalu popárentána Pueꞌ Ala. 13Hangko i hawaꞌ to naukiꞌ Musa hai apa to rapahaweꞌ nabiꞌ-nabiꞌ, tepasuaꞌ woꞌo Iohane, upu-upuheꞌ mopahaweꞌ apa to ina mewaliꞌ deꞌe-deꞌe i tempóna Pueꞌ Ala mantepuꞌu mepárentá i laluraꞌ tauna. 14Mewaliꞌ, ane niundeꞌ motarima laluita deꞌe, Iohane iti miꞌi to natunggái nabiꞌ Maleaki hangkoia tempóna mopahaweꞌ kaꞌina haweꞌna hadua nabiꞌ to nodo nabiꞌ Eliá.#11:14 Básá Maleaki 4:5-6; Matiu 17:10-13. Básá woꞌo to teukiꞌ i wóiꞌ Matiu 3:4. 15Maroꞌa ntepuꞌu ane ara tauna to mopailalu apa to nahádi!

16Kómu to tueꞌ tempó deꞌe, apa to peisá Kuꞌuliꞌ mokana i katueꞌmi? {Mohádimokou paturoꞌKuꞌ hai paturoꞌna Iohane Toperiu, mewaliꞌ} peisákou rapándiriꞌ nodo ánángkóiꞌ to mombekióꞌ-kióꞌheꞌ i pobaluꞌ-baluꞌá. 17Rauliꞌ:

‘Kiponaniákou nani kagóeꞌ-góeꞌ,

tiꞌarakou mau monariꞌ.

Kiponaniákou nani kawiora,

tiꞌarakou woꞌo mau teriaꞌ.’

18Lempóna: Iohane Toperiu tiꞌara niundeꞌ hai Kódóꞌ woꞌo tiꞌaraꞌAꞌ niundeꞌ. Kamaina Iohane, ia paka mopuasaꞌ hai tiꞌara mainu to melángui. Nisápuáka oaꞌ, niuliꞌ node: ‘Ia napesuaꞌi setáꞌ!’ 19Deꞌe-deꞌe haweꞌ miꞌi Ánáꞌ Mánusiá. Ia mainu anggoroꞌ hai paka mosusa, agáiáná nisápuáka woꞌo, niuliꞌ, ‘Ia hadua topehioroꞌ to paka mainu to melángui. Ia paka hingkakani hai toperóróꞌ ásele hai tauna ntániꞌna to tiꞌara maroꞌa!’ Roduaꞌangkaiꞌ nisalaꞌi! Agáiáná kehapiꞌ noꞌonoꞌ, kamanótóna rárána Pueꞌ Ala tongawaꞌ i lalu katueꞌraꞌ tauna to mampeuláꞌi peundeꞌáNa.”#11:19 Lempóna, toperóróꞌ ásele hai tauna to rarekeꞌ tiꞌara maroꞌa, morasiꞌheꞌ láwiꞌ mampoináláiheꞌ paturoꞌraꞌ Iohane Toperiu hai Iesu.

Iesu mosalaꞌi toIahudiꞌ i Galilea to tiꞌaraheꞌ mepoinálái

(Luk. 10:13-15)

20Hangko ionoꞌ, Iesu mosalaꞌi toIahudiꞌ to toroꞌheꞌ i bahangapa kótá i tampoꞌ Galilea, láwiꞌ kehapiꞌ handaꞌ tandaꞌ kuasaꞌ to Nabábehi i wánuáraꞌ, tiꞌara mpuꞌuheꞌ mampenosoꞌi bábehiáraꞌ to kadake. 21Nauliꞌ Iesu, “Hurewuꞌmokou toKorasi! Hurewuꞌmokou toBesaida!#11:21 Korasi hai Besaida: Iti miꞌi wánuá tándáꞌ i wongko rano Galilea, hungkuꞌ i wánuá Kapenau (wátiꞌna ka-23). Marue miꞌi Iesu mopahaweꞌ ngkóráꞌna Pueꞌ Ala ionoꞌ, agáiáná tiꞌaraheꞌ handaꞌ to mepoinálái. Handaꞌ ntepuꞌu tandaꞌ kuasaꞌ to Kubábehi i wánuámi, agáiáná tiꞌarakou mampenosoꞌi dósámi. Ane rápáꞌna tandaꞌ kuasaꞌ iti Kubábehiꞌi i kótá Tiru hai Sido,#11:21 Tiru hai Sido: Ia miꞌi kótá to mahile to rakatoroꞌi tauna to tiꞌara toIahudiꞌ. Marue ntepuꞌuheꞌ mosápuáka Pueꞌ Ala haneꞌiheꞌ nahuku Pueꞌ Ala. Básá Iesaia gáláꞌna ka-23; Ieheskie gáláꞌna ka-26; Amosi 1:9-10. bateꞌna maruemoheꞌ menosoꞌ hangko i dósáraꞌ, kehapiꞌ hira tiꞌaraheꞌ toIahudiꞌ. Kemoalamoheꞌ waruꞌ ngkasusa rapowaruꞌ, hai moawuiheꞌ tutuꞌ wuáꞌraꞌ tandaꞌ katebálikina miꞌi laluraꞌ. 22Mewaliꞌ, bona niꞌisá: i alo pobutusi i kahópóꞌána duniáꞌ, ina melumbuꞌ kamatimina pehukuna Pueꞌ Ala i kómu haneꞌi pehukuNa i toTiru hai toSido.

23Hai kómu woꞌo to Kapenau!#11:23 Kapenau: Katoroꞌána Iesu. Ba niuliꞌ riꞌi ina naꞌángkáꞌkou Pueꞌ Ala haweꞌ i surugáꞌ? Tiꞌara! Ngkáliꞌna riꞌi ina Natibekou i lalu naraka! Ane rápáꞌna tandaꞌ kuasaꞌ to Kubábehi i wánuámi, Kubábehi i kótá Sodomo hangkoia, kótá iti ketiꞌara naropuꞌ Pueꞌ Ala, hai keara mani duuꞌna deꞌe-deꞌe. 24Mewaliꞌ, bona niꞌisá: i alo pobutusi i kahópóꞌána duniáꞌ, ina rumihi mani pehukuna Pueꞌ Ala i kómu haneꞌi pehukuNa i toSodomo hangkoia.”

Iesu mekakae hai mokióꞌ tauna to ina meuláꞌ i Hia

(Luk. 10:21-22)

25I tempó iti, mekakae miꞌi Iesu, Nauliꞌ, “Ó Umaꞌ, Pueꞌ langiꞌ hai duniáꞌ hai upu-upu óntóꞌna! KutóiáKoꞌ, láwiꞌ upu-upu to tewuniángi hangkoia, Nupopaisáꞌámoheꞌ tauna to mengkaiwóiꞌ, agáiáná Nuwuniángiáheꞌ tauna to mampekiri hira miꞌi to mapánde. 26Ó Umaꞌ. Upu-upuna iti Nubábehi láwiꞌ iti miꞌi peundeꞌáMu.”

27Roo onoꞌ, nauliꞌ wopiꞌi Iesu, “Upu-upu naweꞌiMoꞌ UmáNgkuꞌ. Tiꞌara ara haweꞌ hadua to moisá kaKódóꞌna Ánáꞌna Pueꞌ Ala, bateꞌna peá UmáNgkuꞌ to moisá ntepuꞌuAꞌ. Noꞌonoꞌ woꞌo, tiꞌara ara haweꞌ hadua to moisá UmáNgkuꞌ, bateꞌna peá Kódóꞌ ÁnáꞌNa, hai heáná peá to Kupopaisáꞌáheꞌ kaheánána UmáNgkuꞌ.#11:27 Básá woꞌo Iohane 3:35; 10:15.

28Kómu to maꞌángkárá pehádimi {láwiꞌ hangaa-ngaa mampeuláꞌikou upu-upu hawaꞌ to matimi, agáiáná tiꞌara nibuku}! Maikou! Maimokou i Kódóꞌ, hai ina Kukábáhákou hangko i kamapárimi. 29Mohintuwuꞌmokou hai Kódóꞌ. Mempaisaremokou i Kódóꞌ, hai megurukou hangko i Kódóꞌ apa peundeꞌána Pueꞌ Ala. Ane nibábehi noꞌonoꞌ, ina tinda lalumi, láwiꞌ pambiáráNgkuꞌ maꞌálusuꞌ hai mengkaiwóiꞌAꞌ. 30PaturoꞌKuꞌ tiꞌara maꞌángkárá nipeuláꞌi, hai bágóꞌ to ina Kuweꞌikou tiꞌara matimi.”#11:30 I lalu básá Iunani: pásángáNgkuꞌ maroꞌa hai kilingáNgkuꞌ manangkoꞌ.

Currently Selected:

Matiu 11: NTBEP

Highlight

Copy