Matiu 12

ToParisi mosalaꞌi Iesu láwiꞌ rauliꞌ topeguruNa mobágóꞌ i alo penómbáꞌá

(Mrk. 2:23-28; Luk. 6:1-5)

1I alo penómbáꞌáraꞌ to Iahudiꞌ,#12:1 alo penómbáꞌáraꞌ to Iahudiꞌ: mantepuꞌu alo Lima támpu alo haweꞌ alo Satu támpu alo. Iesu hai topeguruNa melempóheꞌ i hamboloꞌ hinoe. Marimimoheꞌ, onoꞌ miꞌi haneꞌi mopudókiheꞌ wuaꞌ pare, rapiroroꞌ haneꞌi raꞌandeꞌ. 2I karaitána toParisi apa to rabábehi iti, rahángáꞌá Iesu, “Peita! TopeguruMu moliungiheꞌ áturá ágámántaꞌ. Mobágóꞌheꞌ i alo penómbáꞌá!”#12:2 Mouláꞌ Paturoꞌna Musa, ane melempó i hinoena tauna hai marimi, peisáheꞌ mopudóki wuaꞌ pare bona raꞌandeꞌ (básá Pohuleki 23:25). Agáiáná mouláꞌ toParisi, mopiroroꞌ ba mopinihá pare iti moliungi áturá ágámáraꞌ láwiꞌ rarekeꞌ miꞌi bágóꞌ.

3Mehániꞌ Iesu, “Tiꞌara paꞌi nibásá i Ngkóráꞌna Pueꞌ apa to rabábehi Datu Daudiꞌ hai rángánaheꞌ hangkoia i tempóraꞌ marimi? 4Ia mesuaꞌ i lalu bambaruꞌ penómbáꞌá, haneꞌi mandeꞌheꞌ rótiꞌ to rapopenómbá i Pueꞌ Ala.#12:4 Básá Áturá Menómbá 24:5-9. Mouláꞌ áturá ágámántaꞌ, tadulako-tadulako menómbá peá to peisá mandeꞌ rótiꞌ iti.#12:4 Básá 1 Semueli 21:1-6. {Agáiáná kehapiꞌ Daudiꞌ moliungi áturá ágámántaꞌ, bábehiána iti tiꞌara rasalaꞌi.} 5Hai tiꞌara paꞌi nibásá apa to teukiꞌ i lalu Paturoꞌna Musa: tadulako menómbá i lalu Támbina Pueꞌ Ala, mobágóꞌheꞌ oaꞌ, kehapiꞌ i alo penómbáꞌá,#12:5 Básá Poimbaꞌ 28:9. agáiáná tiꞌaraheꞌ rasalaꞌi. 6Mewaliꞌ Kuhángáꞌákou, i oloꞌmi ara hadua to melumbuꞌ kuasaꞌNa hangko i Támbina Pueꞌ Ala,#12:6 Ara hadua to melumbuꞌ mani kamahilena tueꞌNa hangko i Támbina Pueꞌ Ala: Ina tingkáráꞌ toIahudiꞌ mohádi laluitana Iesu láwiꞌ rapekiri Pueꞌ Ala peá to melumbuꞌ kamahilena kuasaꞌNa. I karahádina laluitana Iesu iti, ina raisá tunggáiáNa mopahibali kuasaꞌNa hai Pueꞌ Ala. 7-8láwiꞌ Ánáꞌ Mánusiá makuasaꞌ mopakanótó apa to peisá rabábehi i alo penómbáꞌá.

I lalu Sura Magasaꞌ, Pueꞌ Ala manguliꞌ node:

‘Tiꞌara binataꞌ to Kuꞌundeꞌ nipopenómbá i Kódóꞌ,

agáiáná to Kuꞌundeꞌ ia miꞌi bona maꞌahiꞌkou i hángká rángámi.’ (Hosea 6:6)

Mewaliꞌ, ane keniꞌisá lempóna laluita iti, ketiꞌarakou mosalaꞌi tauna to tiꞌara masalaꞌ.”

ToParisi moliwo mopapate Iesu, láwiꞌ Ia mopakauriꞌ tauna i alo penómbáꞌá

(Mrk. 3:1-6; Luk. 6:6-11)

9Iesu pohuꞌ hangko ionoꞌ lao i támbi penómbáꞌá. 10Ionoꞌ, ara hadua tauna to mate taena hambali. Bahangapaheꞌ tauna molelemata Iesu, mewaliꞌ mekuneꞌheꞌ, rauliꞌ, “Guru, ba peisákeꞌ mopakauriꞌ to tiꞌara nalalu i alo penómbáꞌá?”

11Nahánikiheꞌ Iesu, “Ane rápáꞌna ara hangko i oloꞌmi to ara dimbána to manawoꞌ i lalu taroboꞌ i alo penómbáꞌá, ba ina napatodáhi peá i lalu taroboꞌ, ba ina nahore, kehapiꞌ i alo penómbáꞌá? Hangaa-ngaa nahore. 12Pelumbuꞌna mani tauna, láwiꞌ melumbuꞌ tueꞌraꞌ haneꞌi dimbá, mewaliꞌ hangaa-ngaa tatulungi, kehapiꞌ miꞌi i alo penómbáꞌá.”

13Roo onoꞌ, Iesu mohuoꞌ tauna to mate taena hambali iti, Nauliꞌ, “Ónáꞌ taemu!” Naónáꞌ mpuꞌu miꞌi taena. Kásáliu mauriꞌ hai maróhó huleꞌ nodo taena to hambalina. 14Agáiáná karaitána toParisi apa to pewaliꞌ iti, pohuꞌmoheꞌ hangko i támbi penómbáꞌá, hai mampeliꞌheꞌ rárá bona Iesu rahuku mate.

Iesu ia miꞌi Huoꞌána Pueꞌ Ala

15Iesu moisá kaꞌárána tunggáiáraꞌ toParisi to kadake i Hia, onoꞌ miꞌi haneꞌi Ia pohuꞌ hangko ionoꞌ. Handaꞌ tauna ntániꞌna meuláꞌ woꞌo i Hia, hai Ia mopakauriꞌ upu-upu tauna to maduꞌa. 16Nakóntóheꞌ bona ineeꞌ rapehángáꞌá kaheánáNa. 17Nauliꞌ noꞌonoꞌ bona tebukeki laluitana Pueꞌ Ala to napahaweꞌ nabiꞌ Iesaia hangkoia {mokana i Datu Topehómpóꞌ}. Nauliꞌ Pueꞌ Ala node:

18“Deꞌe miꞌi huoꞌáNgkuꞌ to Kupileꞌi,

to Kupokaꞌahiꞌ, hai to mopagóeꞌ laluNgkuꞌ.

Ina Kuweꞌi InaoNgkuꞌ i Hia.

Ia ina mopahaweꞌ párentáNgkuꞌ to manótó i upu-upu tauna.

19Ia tiꞌara ina mombeheheꞌ, tiꞌara ina monganga-nganga,

hai tiꞌara ina molaluita Napasimbuku i rárá-rárá to mahile.

20Biroꞌ to maluntuꞌ, tiꞌara ina Nadepu,

hai palita to mowáá-wáá peá pewangkaꞌna, tiꞌara ina Napapate.

Noꞌonoꞌ woꞌo ina Napalindó tauna to maledeꞌ pepoináláiraꞌ

hai Ia ina mobágóꞌ oaꞌ duuꞌna tongawaꞌ kamanótóna Pueꞌ Ala.

21Iumbá-umbá i duniáꞌ, araheꞌ tauna to ina mehárungá i Hia.” (Iesaia 42:1-4)

ToParisi mosalaꞌi Iesu, láwiꞌ rauliꞌ kuasaꞌNa hangko i Datu Tokadake

(Mrk. 3:20-30; Luk. 11:14-23; 6:43-45)

22Roo onoꞌ, ara hadua tauna to raꞌánti lao i Iesu. Tauna iti bilo hai tiꞌara peisá molaluita, láwiꞌ napesuaꞌi setáꞌ. Mewaliꞌ napakauriꞌ Iesu, álána peisá meita hai molaluita. 23Tingkáráꞌheꞌ tauna to moita apa to pewaliꞌ iti, hai mombekuneꞌ-kuneꞌheꞌ, rauliꞌ, “Ba Ia mpuꞌu miꞌi Datu Topehómpóꞌ, pemuleꞌána Datu Daudiꞌ#12:23 pemuleꞌána Datu Daudiꞌ: Básá to teukiꞌ i Kahirámpuá Laluita. to nadándi Pueꞌ Ala hangkoia?”

24Agáiáná karahádina toParisi laluitaraꞌ iti, rauliꞌ, “KuasaꞌNa iti hangko i Belesebu,#12:24 Belesebu: Básá to teukiꞌ i wóiꞌ Matiu 10:25. daturaꞌ upu-upu setáꞌ. Onoꞌ miꞌi haneꞌi tauna doꞌo peisá mampopelóhóꞌ setáꞌ.”

25Agáiáná naisá miꞌi Iesu pekiriraꞌ toParisi iti, onoꞌ miꞌi haneꞌi Nahángáꞌáheꞌ, “Rápáꞌna, ane arai hadua datu, hai tauna to handaꞌ i lalu kadatuána mosisalaꞌheꞌ oaꞌ hai mombeꞌewaꞌheꞌ, kadatuá iti ina magero. Ane tauna to hambánuá ba tauna to hampohalaluá pakaheꞌ mosisalaꞌ, ina magero pohintuwuꞌraꞌ iti. 26Noꞌonoꞌ woꞌo i kadatuá setáꞌ. Ane Datu Tokadake moewaꞌ hangka tokadakena, lempóna setáꞌ moewaꞌ hangka setáꞌna, hai ina magero kadatuáraꞌ setáꞌ iti. 27Niuliꞌ mampopelóhóꞌAꞌ setáꞌ hai kuasaꞌ hangko i Belesebu, agáiáná ara woꞌo topeuláꞌmi to mampopelóhóꞌ setáꞌ. Kuasaꞌ apa to rapakeꞌ? Manótó kuasaꞌ to hangko i Pueꞌ Ala, tiꞌara kuasaꞌna Datu Tokadake. Mewaliꞌ, hangko i bábehiáraꞌ topeuláꞌmi iti, tongawaꞌ miꞌi katiꞌárána toꞌu laluitami to manguliꞌ Kódóꞌ mampopelóhóꞌAꞌ setáꞌ hangko i kuasaꞌna Datu Tokadake. 28Lempóna: mampopelóhóꞌAꞌ setáꞌ hangko i kuasaꞌna Inaona Pueꞌ Ala. Hai iti miꞌi to mopatongawaꞌ Pueꞌ Ala mepárentá miꞌi i oloꞌmi.

29Datu Tokadake peisá rapándiriꞌ nodo hadua tauna to maróhó. Ane mesuaꞌkeꞌ i lalu támbina tauna to maróhó hai mampoinaokeꞌ mamperampaꞌi párewá to ara i támbina, hangaa-ngaa tatimpuku sieruꞌ pueꞌ támbi iti, hangko peisárakeꞌ moala párewána. {Noꞌonoꞌ woꞌo, ane Kódóꞌ mampopelóhóꞌ setáꞌ, lempóna, Kunangi miꞌi Datu Tokadake.}

30Heáná to tiꞌara hingkakani hai Kódóꞌ, ia miꞌi to hingkakani hai Datu Tokadake. Heáná to tiꞌara motulungiAꞌ mampeliꞌ tauna bona mewaliꞌheꞌ taunána Pueꞌ Ala, ia miꞌi to moewaꞌAꞌ. 31-32Mewaliꞌ, bona niꞌisá: upu-upu dósá hai laluita pesápuáka peisá raꞌámpungi. Ane ara tauna to mosápuáka kaKódóꞌna Ánáꞌ Mánusiá, salaꞌ iti peisá mani raꞌámpungi. Agáiáná ane ara tauna to mosápuáka Inao to Magasaꞌ, tiꞌara ara ámpungina, maroꞌa i tempó deꞌe, maroꞌa i alo pobutusi.”#12:31-32 Lempóna, mosápuákaheꞌ Inao to Magasaꞌ. Básá Marakusi 3:28-30; 1 Iohane 5:16.

33Nauliꞌ wopiꞌi Iesu i toParisi, “Ane kau to maroꞌa, maroꞌa woꞌo wuaꞌna. Ane kau to tiꞌara maroꞌa, tiꞌara woꞌo maroꞌa wuaꞌna. Kamaroꞌana ba katiꞌárána maroꞌa kau, taisá hangko i wuaꞌna. 34Kómu tauna to kadake! Tiꞌara mpuꞌukou peisá mohuwárá laluita to maroꞌa ánti kakadakena lalumi, láwiꞌ apa to ara i laluntaꞌ, iti woꞌo to mesuwuꞌ i humentaꞌ. 35Tauna to maroꞌa, bateꞌraꞌ mohuwárá apa to maroꞌa, láwiꞌ laluraꞌ bukeꞌ to maroꞌa. Tauna to kadake, bateꞌraꞌ mohuwárá apa to kadake, láwiꞌ laluraꞌ woꞌo kadake. 36Mewaliꞌ, bona niꞌisá: i alo pobutusi i kahópóꞌána duniáꞌ, upu-upu tauna hangaa-ngaa mopangákuꞌ upu-upu laluitaraꞌ. Kehapiꞌ laluita to tiꞌara mobunduꞌ, hangaa-ngaa rapangákuꞌ. 37Láwiꞌ laluitami haduduámi to ina mopatongawaꞌ kamasalaꞌmi ba kamanótómi.”

ToParisi membiáꞌ bona Iesu mobábehi tandaꞌ kuasaꞌ

(Luk. 11:29-32)

38Roo onoꞌ, bahangapa guru agama hai toParisi membiáꞌ i Iesu bona mobábehi tandaꞌ kuasaꞌ, rauliꞌ, “Guru, kipoinao moita tandaꞌ kuasaꞌ to Nubábehi, bona tongawaꞌ i kaiꞌ kahangko i Pueꞌ Alana kuasaꞌMu.”

39Agáiáná nauliꞌ Iesu, “Kadake ntepuꞌukou! Tiꞌarakou moisá Pueꞌ Ala! {Handaꞌ miꞌi tandaꞌ kuasaꞌ to niꞌita,} agáiáná nipembiáꞌ wopiꞌi. Tiꞌara ara tandaꞌ kuasaꞌ to ina rapopaitaꞌákou, bateꞌna peá tandaꞌ to mewaliꞌ miꞌi i nabiꞌ Iunu hangkoia. 40Nodo Iunu iti tálu alona tálu wengina i lalu taꞌi bouꞌ to mahile, noꞌonoꞌ woꞌo Ánáꞌ Mánusiá ina tálu alona tálu wengina i lalu popatawuá. 41Hangkoia, toNiniwe menosoꞌmoheꞌ hangko i dósáraꞌ i pampehádingiraꞌ laluitana nabiꞌ Iunu.#12:41 Básá Iunu gáláꞌna ka-3. Deꞌe-deꞌe ara miꞌi i oloꞌmi Hadua to melumbuꞌ kamahilena tueꞌNa hangko i nabiꞌ Iunu, agáiáná kómu to tueꞌ deꞌe-deꞌe, tiꞌarakou menosoꞌ hangko i dósámi i kanihádina laluitaNa. Mewaliꞌ i alo pobutusi i kahópóꞌána duniáꞌ, toNiniwe iti ina meángkáꞌ i lindoꞌmi hai ina mosalaꞌikou. 42Hangkoia, datu towawine haweꞌ hangko i tampoꞌna to karaoꞌ, tampoꞌ Seba#12:42 tampoꞌ Seba: iti miꞌi tampoꞌ Etiopia. Básá 1 Datu-datu 10:1-13. láwiꞌ napoinao mampehádingi polaluitana Datu Salomo, láwiꞌ nahádi miꞌi mokana i kamapándena. Deꞌe-deꞌe ara miꞌi i oloꞌmi Hadua to melumbuꞌ kamahilena tueꞌNa hangko i Datu Salomo, agáiáná kómu to tueꞌ deꞌe-deꞌe, tiꞌara nipoinálái laluitaNa. Mewaliꞌ i alo pobutusi i kahópóꞌána duniáꞌ, datu towawine iti ina meángkáꞌ i lindoꞌmi hai ia woꞌo ina mosalaꞌikou.”#12:41-42 ToNiniwe hai datu towawine i tampoꞌ Seba, hira tiꞌaraheꞌ toIahudiꞌ. Mouláꞌ toIahudiꞌ, toIahudiꞌ tiꞌara ina rasalaꞌi i alo pobutusi láwiꞌ taunánaheꞌ Pueꞌ Ala, agáiáná mouláꞌ Iesu, ina rasalaꞌiheꞌ ane tiꞌaraheꞌ mepoinálái i Hia.

Ngkóráꞌ pándiriꞌ kana i hadua setáꞌ to mesuleꞌ huleꞌ

(Luk. 11:24-26)

43Iesu molaluita wopiꞌi i toParisi, Nauliꞌ, “Ane tokadake to rapopesuwuꞌ miꞌi hangko i tauna, tokadake iti lao i pádá loriꞌ mampeliꞌ katoroꞌá. Ánti katiꞌárána ara to nalámbiꞌ, 44onoꞌ miꞌi haneꞌi nauliꞌ, ‘Rángina miꞌi mesuleꞌ peaꞌ lao i katoroꞌá to kupálehi iaꞌo.’ I pesuleꞌna, naita tauna iti nodo támbi to ragenggáhi hai tiꞌara mani ara to mokatoroꞌi. 45Onoꞌ miꞌi haneꞌi lao mokióꞌ pitu hangka tokadakena to melumbuꞌ kakadakeraꞌ hangko i hia. Lao mpuꞌumoheꞌ upu-upu mesuaꞌ i tauna iti. Kahópóꞌána, tetámbái miꞌi kamapárina tueꞌna tauna iti hangko i rungu-runguna. Noꞌonoꞌ woꞌo kómu to tueꞌ deꞌe-deꞌe.”#12:45 Lempóna, ina melumbuꞌ ntepuꞌu kahurewuꞌna tauna to tiꞌara nakatoroꞌi Inao to Magasaꞌ.

Tauna to mobábehi peundeꞌána Pueꞌ Ala rapándiriꞌ nodo inána hai halaluna Iesu

(Mrk. 3:31-35; Luk. 8:19-21)

46Tangaꞌna mani Iesu molaluita hai tauna to handaꞌ, haweꞌmoheꞌ ináNa hai ádiNa.#12:46 ádiNa: Básá Matiu 13:55-56; Marakusi 6:3. Meángkáꞌheꞌ i rawa támbi, rapoinao ina mampolaluitaꞌá Iesu. 47Ara hadua tauna to lao mohángáꞌá Iesu, “Guru, ináMu hai ádiMuheꞌ, araheꞌ i rawa. Rapoinao mampohidupaꞌáKoꞌ.”

48Nahániki Iesu, “Heáná ináNgkuꞌ? Heáná halaluNgkuꞌ?” 49Haneꞌi Iesu motudoꞌheꞌ tauna to meuláꞌ i Hia, Nauliꞌ, “Ane ináNgkuꞌ hai halaluNgkuꞌ, hira miꞌi deꞌe, 50láwiꞌ heáná peá to mampeuláꞌi peundeꞌána UmáNgkuꞌ to ara i surugáꞌ, hira miꞌi ináNgkuꞌ hai halaluNgkuꞌ.”

Currently Selected:

Matiu 12: NTBEP

Highlight

Copy