Matiu 10

Iesu mampoweꞌi kuasaꞌ i topeguruNa to hampuloꞌ hai rodua

(Mrk. 3:13-19; Luk. 6:12-16)

1Iesu mokióꞌheꞌ topeguruNa to hampuloꞌ hai rodua, hai Naweꞌiheꞌ kuasaꞌ mampopesuwuꞌ tokadake hai mopakauriꞌ upu-upu tauna to maduꞌa hai to tiꞌara masilolonga wátáraꞌ. 2-4Deꞌe miꞌi hangaꞌraꞌ to mewaliꞌ surona Iesu to hampuloꞌ hai rodua:#10:2 Iesu mopileꞌi hampuloꞌ hai rodua tauna mewaliꞌ topeguruNa, tandaꞌ kahirana miꞌi to mewaliꞌ toSáráeliꞌ to woꞌu.

Simoꞌ to rauliꞌ woꞌo Peturuꞌ hai Andaria ádina Simoꞌ,

Iakobu ánáꞌna Sebedeu hai Iohane ádina,

Pilipu hai Batolomeu,#10:2-4 Batolomeu - Lempóna: ánáꞌna Talmai. Babilaꞌ hangaꞌna woꞌo Natanaeli. Básá Iohane 1:43-51.

Tómá hai Matiu toperóróꞌ ásele,

Iakobu ánáꞌna Alapeu, hai Tadeu,

Simoꞌ toSeloꞌ,#10:2-4 Simoꞌ ia miꞌi hadua hangko i kolompoꞌ ‘Seloꞌ’ to moewaꞌ popárentá Roma. hai Iudasiꞌ Isikarioꞌ to mampobaluꞌ Iesu i ewáliNaheꞌ.

Iesu mopaturoꞌheꞌ topeguruNa hai mohuoꞌheꞌ lao moánti Ngkóráꞌ Marasa

(Mrk. 6:6b-13; Luk. 9:1-6)

5Iesu mohuoꞌheꞌ to hampuloꞌ hai rodua lao mopahaweꞌ Ngkóráꞌ Marasa. Hangko tiꞌara maniheꞌ pohuꞌ, Napaturoꞌheꞌ, Nauliꞌ node: “Ineeꞌkou lao i wánuáraꞌ to tiꞌaraheꞌ toIahudiꞌ, tepasuaꞌ wánuáraꞌ toSamaria.#10:5 toSamaria: Waheꞌraꞌ mogalo-galo miꞌi - hambikáꞌ toSáráeliꞌ, hambikáꞌ tiꞌara. ToSáráeliꞌ mokáhihiꞌ toSamaria láwiꞌ rarekeꞌheꞌ tauna to tiꞌara piꞌi magasaꞌ. Básá woꞌo to teukiꞌ i Kahirámpuá Laluita. 6Agáiáná laomokou sieruꞌ i hangka toSáráeliꞌtaꞌ, láwiꞌ hira nodoheꞌ dimbá to tiꞌara ara to mampoewu. 7Nipahaweꞌáheꞌ node: ‘Tiꞌara piꞌi marue, Pueꞌ Ala ina mopatongawaꞌ popárentáNa i duniáꞌ!.’#10:7 I lalu básá Iunani: hungkuꞌ miꞌi kadatuána surugáꞌ. 8Nipakauriꞌheꞌ tauna to maduꞌa, nipatueꞌ tauna to mate, nipakauriꞌ tauna to ketánggáꞌ, nipopesuwuꞌ setáꞌ to mampesuaꞌi tauna. Kuweꞌimokou mbero kuasaꞌ mobábehi upu-upuna iti, mewaliꞌ hangaa-ngaa nibábehi woꞌo mbero-mbero.

9Ineeꞌkou moánti dóiꞌ ba buláwá ba peráꞌ i polumaoámi. 10Ineeꞌkou meboku, ineeꞌkou moánti badumi morontau ba sapatuꞌ ba laiꞌ, láwiꞌ hintotoꞌkou molámbiꞌ kaparaluuámi hangko i tauna to nipobámbáriá Ngkóráꞌna Pueꞌ.

11Ane haweꞌkou i hambuaꞌ wánuá, nipeliꞌ tauna to bulá laluraꞌ motarimakou i lalu támbiraꞌ. Menóntómokou ionoꞌ duuꞌmi pohuꞌ lao i wánuá to ntániꞌna. 12Ane mesuaꞌkou i lalu támbiraꞌ, nitabeheꞌ haneꞌi nihángáꞌá node: ‘Roꞌa ngkatueꞌ to hangko i Pueꞌ Ala mamporángákou!’ 13Ane bulá laluraꞌ pueꞌ támbi motarimakou, bateꞌna ina nawátiꞌheꞌ Pueꞌ Ala. Agáiáná ane tiꞌara bulá laluraꞌ motarimakou, tiꞌaraheꞌ ina molámbiꞌ pewátiꞌ hangko i Pueꞌ Ala. 14Ane ara pueꞌ támbi ba pueꞌ wánuá to tiꞌara motarimakou ba to tiꞌara moundeꞌ mampehádingi laluitami, nipálehi támbi ba wánuá iti, hai nitarónta awu to mentakaꞌ i pálántáꞌ bitimi,#10:14 nitarónta awu to mentakaꞌ i pálántáꞌ bitimi: ToIahudiꞌ mobábehi tandaꞌ iti ane moliu i tampoꞌraꞌ tauna to tiꞌara toIahudiꞌ láwiꞌ morekeꞌheꞌ tauna hai tampoꞌraꞌ iti kedái. Mewaliꞌ mouláꞌ Iesu, toIahudiꞌ to tiꞌara motarima Ngkóráꞌ Marasa hibali peheꞌ hai tauna to tiꞌara toIahudiꞌ to tiꞌara moisá Pueꞌ Ala. tandaꞌna hira to ina nahuku Pueꞌ Ala. 15Toꞌu ntepuꞌu, hai Kuhángáꞌákou: i alo pobutusi i kahópóꞌána duniáꞌ, ina melumbuꞌ kamatimina pehukuna Pueꞌ Ala i tauna to tiꞌara motarimakou, haneꞌi pehukuNa i upu-upu toSodomo hai toGumora hangkoia.”#10:15 Kadake ntepuꞌuheꞌ toSodomo hai toGumora hangkoia, onoꞌ miꞌi haneꞌiheꞌ nahuku Pueꞌ Ala hai api. Básá Pewaliꞌána 18:17–19:29.

Pepopeahiahiꞌ i alo to ina haweꞌ

(Mrk. 13:9-13; Luk. 12:2-9; 21:12-19)

16“Maingáꞌ-ingáꞌkou, láwiꞌ Kuhuoꞌkou lao i oloꞌraꞌ tauna to kadake. Hangaa-ngaa mapándekou, hai hangaa-ngaa maꞌálusuꞌkou i poántimi.#10:16 I lalu básá Iunani: Ina nodokou dimbá i oloꞌraꞌ serigala. Hangaa-ngaa mapándekou nodo lelótó hai maꞌálusuꞌkou nodo manggebodoꞌ. 17Maingáꞌ-ingáꞌkou i tauna, láwiꞌ ina rahakaꞌkou hai raꞌánti i lindoꞌraꞌ tadulako agama. Ina rahepekou i lalu támbi penómbáꞌá. 18Ánti peuláꞌmi i Kódóꞌ, ina rahuhuꞌkou i lindoꞌraꞌ topopárentá hai datu-datu. I tempó iti, ina raweꞌikou lógá mopahaweꞌ kana pepoináláimi i Kódóꞌ i topopárentá hai i tauna to tiꞌaraheꞌ moisá Pueꞌ Ala.

19Mewaliꞌ ane rahakaꞌkou hai raꞌánti i lindoꞌraꞌ topopárentá, ineeꞌkou malááꞌ ba noumbá pehániꞌmi, láwiꞌ tempó iti, kuasaꞌna Pueꞌ Ala ina mokale i lalumi mopakanótó apa to hangaa-ngaa nihuwárá. 20Tempó iti, apa to nihuwárá iti tiꞌara ina mesupaꞌ hangko i pekirimi, agáiáná laluitami iti ina mentóáꞌ hangko i Inao to Magasaꞌ to naweꞌikou Umámi to ara i surugáꞌ. Ia miꞌi to ina mopakanótóákou apa to hangaa-ngaa niuliꞌ.

21Ina haweꞌ tempóna tauna ina mampehuhuꞌá halaluraꞌ ba ánáꞌraꞌ bona rapapate ánti peuláꞌraꞌ i Kódóꞌ. Ara woꞌo ánángkóiꞌ to ina moewaꞌ tosaeraꞌ hai mampehuhuꞌá bona rapapate. 22Ánti peuláꞌmi i Kódóꞌ, ina rakáhihiꞌkou handaꞌ tauna. Agáiáná tauna to mepoinálái oaꞌ i Kódóꞌ duuꞌna i kahópóꞌána, ina molámbiꞌheꞌ katueꞌ to maroꞌa to tiꞌara mokahópóꞌá. 23Ane rapopeahiahiꞌkou i wánuá hambuaꞌ, pohuꞌkou lao i wánuá to hambuaꞌna. Bona niꞌisá, Kuhángáꞌáꞌákou: hangko tiꞌara manikou roo moánti Ngkóráꞌ Marasa i humalele tampoꞌraꞌ toSáráeliꞌ, Ánáꞌ Mánusiá ina mesuleꞌ.#10:23 Ánáꞌ Mánusiá ina mesuleꞌ: Tiꞌara gaga taisá apa to natunggái Iesu ieneꞌ. 1) Ia ina tueꞌ huleꞌ hangko i kapate. 2) PesuleꞌNa lao i Umána tempóNa teángkáꞌ lao i surugáꞌ. 3) PesuleꞌNa mai i karongkánina. Básá woꞌo Matiu 24:14.

24Toposikolaꞌ tiꞌara melumbuꞌ karabiláꞌna hangko i guruna. Hawiꞌ tiꞌara melumbuꞌ karabiláꞌna hangko i pueꞌna. 25Apa to mewaliꞌ i guru, iti woꞌo to ina mewaliꞌ i topeguruna. Apa to mewaliꞌ i pueꞌ hawiꞌ, iti woꞌo to ina mewaliꞌ i hawiꞌna. Maroꞌa-roꞌakou, láwiꞌ Kódóꞌ deꞌe Pueꞌmi, hai kómu topeguruNgkuꞌ. Mewaliꞌ, ane rápáꞌna Kódóꞌ rauliꞌ Belesebu#10:25 Belesebu: Iti miꞌi woꞌo hangaꞌna Datu Tokadake. Básá woꞌo Matiu 12:24 hai to teukiꞌ i Kahirámpuá Laluita. {daturaꞌ upu-upu setáꞌ}, apa mani kómu to meuláꞌ i Kódóꞌ, ina rasasalaꞌikou woꞌo.

26Mewaliꞌ, kehapiꞌ ara to moewaꞌkou, ineeꞌheꞌ nipokalááꞌ. Upu-upu to tetámbungi ina tebungkáhi, hai upu-upu to tewuniángi ina tongawaꞌ. 27Hai apa to Kuhángáꞌákou to tiꞌara mani rahádi tauna ntániꞌna, hangaa-ngaa nipolaluita i upu-upu tauna. Apa to Kupaturoꞌákou ngkábuni, hangaa-ngaa nipatongawaꞌámoheꞌ. 28Ineeꞌkou mampokalááꞌ tauna to mampoinaoheꞌ mopapatekou, láwiꞌ wátámi peá to peisá rapapate, agáiáná tiꞌaraheꞌ makuasaꞌ mopapate tánuánáꞌmi. To hangaa-ngaa nipokalááꞌ ia miꞌi Pueꞌ Ala, láwiꞌ Ia to makuasaꞌ mohuku wátámi hai tánuánáꞌmi i lalu naraka duuꞌna i rue-ruena.

29Peita dena. Rombaꞌa peisá rahóló hampepaꞌ peá dóiꞌ see. Agáiáná kehapiꞌ noꞌonoꞌ, tiꞌara ara hambaꞌa to mate ane tiꞌara peundeꞌána Pueꞌ Ala Umámi. 30Pelumbuꞌna mani kómu. Mogalo riꞌi imbaꞌna weluáꞌmi, naisá Pueꞌ Ala kahandaꞌna. 31Mewaliꞌ, ineeꞌkou malááꞌ i tauna to moewaꞌkou. Melumbuꞌ pekádipurána Pueꞌ Ala i kómu haneꞌi pokádipuráNa dena to handaꞌ.

32Heáná to mopangákuꞌ i lindoꞌraꞌ tauna peuláꞌna i Kódóꞌ, ia woꞌo ina Kupangákuꞌ i UmáNgkuꞌ to ara i surugáꞌ. 33Agáiáná heáná to mosápuákaꞌAꞌ i lindoꞌraꞌ tauna, ia woꞌo ina Kusápuáka i lindoꞌna UmáNgkuꞌ to ara i surugáꞌ.”

Maꞌángkárá meuláꞌ i Iesu

34“Ineeꞌ nihárungá kamaiNgkuꞌ deꞌe bona mopahintuwuꞌAꞌ tauna to i duniáꞌ. Tiꞌara! Ngkáliꞌna riꞌi kamaiNgkuꞌ deꞌe bona moántiAꞌ posisalaꞌ i oloꞌraꞌ tauna. 35-36Ánti kamaiNgkuꞌ deꞌe, tauna to hantámbi ina mosisalaꞌ, láwiꞌ hantángáꞌ ina meuláꞌ i Kódóꞌ, agáiáná hantángáꞌ tiꞌara. Ánáꞌ tobaleilo ina moewaꞌ umána, ánáꞌ towawine ina moewaꞌ inána, mániána ina moewaꞌ pengántiꞌina.

37Heáná to melumbuꞌ pampokaꞌahiꞌna inána ba umána haneꞌi pepokaꞌahiꞌna i Kódóꞌ, tiꞌara hintotoꞌ mewaliꞌ topeuláꞌKuꞌ. Heáná to melumbuꞌ pampokaꞌahiꞌna ánáꞌna haneꞌi pepokaꞌahiꞌna i Kódóꞌ, tiꞌara hintotoꞌ mewaliꞌ topeuláꞌKuꞌ. 38Heáná to tiꞌara timama mantódihá kapári#10:38 Heáná to tiꞌara timama mantódihá kapári - I lalu básá Iunani: Heáná to tiꞌara mau mopáháꞌá kau mombehape. ánti peuláꞌna i Kódóꞌ, tiꞌara hintotoꞌ mewaliꞌ topeuláꞌKuꞌ. 39Heáná to mokábáhá peundeꞌána haduduána ánti peuláꞌna i Kódóꞌ, kehapiꞌ rapapate, ia miꞌi to ina molámbiꞌ katueꞌ to maroꞌa to tiꞌara mokahópóꞌá. Agáiáná heáná to mampeuláꞌi peundeꞌána haduduána, tiꞌara ina molámbiꞌ katueꞌ to maroꞌa to tiꞌara mokahópóꞌá.

40Heáná to motarimakou, hibali miꞌi hai Kódóꞌ to natarima. Noꞌonoꞌ woꞌo, heáná to motarimaꞌAꞌ, hibali miꞌi Pueꞌ Ala to natarima, láwiꞌ Ia miꞌi to mohuoꞌAꞌ mai. 41Heáná to motarima hadua tauna to mopahaweꞌ laluitana Pueꞌ Ala ánti pobágóꞌna, ia ina molámbiꞌ háwángina to hintotoꞌ i tauna to mopahaweꞌ laluitana Pueꞌ Ala. Heáná to motarima hadua tauna to manótó ánti kamanótóna, ia ina molámbiꞌ háwángina to hintotoꞌ i tauna to manótó. 42Heáná to motulungi hadua topeuláꞌKuꞌ to i wóiꞌ tueꞌna ánti peuláꞌna i Kódóꞌ, kehapiꞌ napoweꞌi peá uwai ntooꞌ, ina molámbiꞌ háwángina i alo to ina haweꞌ.”

Currently Selected:

Matiu 10: NTBEP

Highlight

Copy