Lukasi 8

Towawine to motulungi Pueꞌ Iesu hai topeguruNa

1Tiꞌara marue hangko ionoꞌ, Iesu lao i kótá-kótá hai wánuá-wánuá mopahaweꞌ bámbári to maroꞌa kana i popárentána Pueꞌ Ala. Ia raporángá oaꞌ topeguruNa to hampuloꞌ hai rodua. 2Araheꞌ woꞌo bahangapa towawine to mamporángá Iesu hai topeguruNaheꞌ. Towawine iti to napakauriꞌheꞌ Iesu hangko i hakiꞌraꞌ ba hangko i kanapesuaꞌiraꞌ tokadake. Hangaꞌna to hadua Maria to rauliꞌ woꞌo toMadalena {láwiꞌ ia hangko i wánuá Madala}. Maria iti, to napakauriꞌ Iesu hangkoia i kanapesuaꞌina pitu tokadake. 3Hadua woꞌo ia miꞌi Iohana toinána Kusa, tadulakoraꞌ topohawaꞌ i támbina Datu Herode Antipa. Susana meuláꞌ woꞌo hingkakani hai handaꞌ towawine to ntániꞌna. Upu-upuheꞌ motulungi Iesu hai topeguruNa hangko i dóiꞌraꞌ haduduáraꞌ.

Ngkóráꞌ pándiriꞌ kana i iba pákáꞌna tampoꞌ

(Mat. 13:1-9; Mrk. 4:1-9)

4Handaꞌheꞌ tauna to hangko i wánuá-wánuá lao i Iesu. Kahaweꞌraꞌ tauna to handaꞌ iti, napahaweꞌáheꞌ Iesu hampákáꞌ ngkóráꞌ pándiriꞌ, Nauliꞌ, 5“Ara hadua topohinoe to lao mohawuꞌ i hinoena, {agáiáná hinoena iti, ionoꞌ miꞌi aha: ara to kedui, to matuꞌa, to kewatu pealeꞌ, hai ara woꞌo to maruduꞌ}. Mewaliꞌ, tempóna mohawuꞌ, ara tinudaꞌ to manawoꞌ i tampoꞌ to matuꞌa láwiꞌ paka raporárái tauna. Tinudaꞌ iti rapangka-pangka tauna hai ratilóꞌ woꞌo tádáhi duuꞌna upu. 6Ara woꞌo tinudaꞌ to manawoꞌ i tampoꞌ to kewatu pealeꞌ i wóiꞌna. Tinudaꞌ iti tueꞌ, agáiáná poloꞌ malau láwiꞌ mahábáꞌ peá tampoꞌna. 7Ara woꞌo tinudaꞌ to manawoꞌ i lalu dui. Tinudaꞌ iti tueꞌ hingkakani hai dui, agáiáná kahópóꞌána natóróbumbungi dui duuꞌna mate. 8Ara woꞌo tinudaꞌ to manawoꞌ i tampoꞌ to maruduꞌ. Tinudaꞌ iti maroꞌa katueꞌna duuꞌna mowuaꞌ hangatu kánina kahandaꞌna hangko i tinudaꞌna.”

Roo mopahaweꞌ ngkóráꞌ pándiriꞌ iti, molaluita Iesu Napasimbuku, Nauliꞌ, “Maroꞌa ntepuꞌu ane ara tauna to mopailalu apa to nahádi!”

Iesu mopakanótó lempóna ngkóráꞌ pándiriꞌ kana i iba pákáꞌna tampoꞌ

(Mat. 13:10-23; Mrk. 4:10-20)

9Roo onoꞌ, topeguruNa mekuneꞌ i Iesu apa lempóna ngkóráꞌ pándiriꞌ iti. 10Nahániki Iesu, “Hangkoia, tewuniángi mani paturoꞌ kana i popárentána Pueꞌ Ala. Deꞌe-deꞌe Naweꞌimokou Pueꞌ Ala pekiri bona niꞌisá lempóna paturoꞌ iti. Agáiáná tauna to handaꞌ, Kupaturoꞌheꞌ moliu ngkóráꞌ pándiriꞌ, bona lempóna rawuniángi mani hangko i hira.

‘Kehapiꞌ raita miꞌi apa to Kubábehi,

agáiáná tiꞌara raisá lempóna.

Kehapiꞌ rahádi miꞌi paturoꞌKuꞌ,

agáiáná tiꞌara raisá tunggáiáNgkuꞌ.’#8:10 Hungkuꞌ hibali hai Iesaia 6:9. Básá woꞌo 1 Korintu 2:7-14.

11Deꞌe miꞌi lempóna ngkóráꞌ pándiriꞌ to Kupahaweꞌ ininá: tinudaꞌ to rahawuꞌ iti, lempóna ngkóráꞌna Pueꞌ Ala. 12Araheꞌ tauna to peisá rapándiriꞌ nodo iba pákáꞌna tampoꞌ iti. Ara tinudaꞌ to manawoꞌ i tampoꞌ to matuꞌa. Lempóna: ngkóráꞌna Pueꞌ Ala rahádi, agáiáná Datu Tokadake mopawuli laluraꞌ bona tiꞌaraheꞌ mepoinálái, álána tiꞌaraheꞌ tekábáhá hangko i huku dósáraꞌ. 13Araheꞌ woꞌo tauna to peisá rapándiriꞌ nodo tampoꞌ to kewatu pealeꞌ. Rungu-runguna mohádiheꞌ ngkóráꞌna Pueꞌ Ala, góeꞌ laluraꞌ, mepoináláiheꞌ, agáiáná hampaiꞌ peá láwiꞌ pepoináláiraꞌ iti tiꞌara maróhó, nodo tudaꞌ-tudaꞌ to tiꞌara mokálándá. Onoꞌ miꞌi haneꞌi, ane narampeheꞌ kapári ánti pepoináláiraꞌ i ngkóráꞌna Pueꞌ Ala, mosuliꞌheꞌ hangko i pepoináláiraꞌ. 14Araheꞌ woꞌo tauna to peisá rapándiriꞌ nodo tampoꞌ to kedui. Rahádi ntepuꞌu ngkóráꞌna Pueꞌ Ala, agáiáná mampekiri peheꞌ oaꞌ katueꞌraꞌ i duniáꞌ deꞌe. Mampoinao peheꞌ morámpu peawaꞌ ngkáduniáꞌ, hai raundeꞌ peá mobábehi kagóeꞌ-góeꞌ. Upu-upu iti mopaꞌara peá katiꞌárána maróhó pepoináláiraꞌ, álána ngkóráꞌna Pueꞌ Ala tiꞌara piꞌi mobunduꞌ i lalu katueꞌraꞌ. 15Araheꞌ woꞌo tauna to peisá rapándiriꞌ nodo tampoꞌ to maruduꞌ. Kamohádiraꞌ ngkóráꞌna Pueꞌ Ala, liliu ratarima hai toꞌu-toꞌu rapailalu. Mewaliꞌ tetidaꞌ ntepuꞌuheꞌ i pampeuláꞌiraꞌ ngkóráꞌna Pueꞌ Ala duuꞌna mowuaꞌ i lalu katueꞌraꞌ.”

Ngkóráꞌ pándiriꞌ kana i palita

(Mrk. 4:21-25)

16Iesu mopaliliu wopiꞌi laluitaNa, Nauliꞌ, “Tiꞌara ara tauna to motótó palita haneꞌi nahumbáki ba nawoli i wóiꞌ kóiꞌ. Palita bateꞌna rawoli i kamapángkáꞌána bona pewangkaꞌna raita upu-upu tauna to mesuaꞌ i lalu támbi. 17Noꞌonoꞌ woꞌo, upu-upu paturoꞌKuꞌ {mokana i popárentána Pueꞌ Ala} to tiꞌara mani manótó lempóna, bateꞌna ina rapakanótó. Hai lempóna upu-upu laluitaNgkuꞌ to tewuniángi mani, bateꞌna ina rapatongawaꞌ.

18Onoꞌ miꞌi haneꞌi Kuhángáꞌáꞌákou, nipehádingi maroꞌa ngkóráꞌna Pueꞌ Ala, láwiꞌ tauna to mepoinálái, ina tetámbái apa to raisá kana i ngkóráꞌNa iti. Agáiáná tauna to tiꞌaraheꞌ mepoinálái, kehapiꞌ ara miꞌi hantóiꞌ to rarekeꞌ raisá miꞌi kana i ngkóráꞌna Pueꞌ, bateꞌna tiꞌara mobunduꞌ i lalu katueꞌraꞌ láwiꞌ Pueꞌ Ala ina motuko pekiriraꞌ.”

Inána hai halaluna Iesu

(Mat. 12:46-50; Mrk. 3:31-35)

19Hangkani tempó, inána hai ádinaheꞌ Iesu#8:19 ádina Iesu: Básá Matiu 13:55-56; Marakusi 6:3; Lukasi 8:19-20; Galatia 1:19. haweꞌheꞌ láwiꞌ rapoinao mampohidupaꞌá Iesu, agáiáná tiꞌaraheꞌ peisá ánti kahandaꞌraꞌ tauna to ara ionoꞌ. 20Ara hadua tauna to lao mohángáꞌá Iesu, nauliꞌ, “Guru, ináMu hai ádiMuheꞌ, araheꞌ i rawa. Rapoinao mampohidupaꞌáKoꞌ.”

21Agáiáná nauliꞌ Iesu, “Heáná peá to mampehádingi hai mampeuláꞌi ngkóráꞌna Pueꞌ Ala, hira miꞌi ináNgkuꞌ hai halaluNgkuꞌ.”

Iesu mampopengkaroo wui to rumihi

(Mat. 8:23-27; Mrk. 4:35-41)

22Hangkani tempó, Iesu hai topeguruNa mengkaheꞌheꞌ i duanga. Nahángáꞌáheꞌ Iesu, “Laomokeꞌ tándáꞌ i hambali rano.” Mewaliꞌ lao mpuꞌumoheꞌ. 23Tangaꞌraꞌ moduanga, letaꞌ miꞌi Iesu. Hangkaꞌ-hangkaꞌ perái mampohidupaꞌáheꞌ wui to rumihi. Duangaraꞌ narokaꞌ bálumbá, duuꞌna ina bukeꞌ miꞌi uwai, hai hungkuꞌ miꞌi ina tiri. 24TopeguruNa moruaꞌ Iesu, rahángáꞌá, “Guru! Guru! Ina hurewuꞌkeꞌ!”

Mewaliꞌ, mearó mpuꞌu miꞌi Iesu, haneꞌi mokámbáróá wui hai bálumbá iti, álána mengkaroo ntepuꞌu wui, hai kásáliu tinda rano iti. 25Hangko ionoꞌ, nauliꞌ Iesu i topeguruNaheꞌ, “Moapa riꞌi haneꞌi tiꞌaraꞌAꞌ nipoinálái?”

Upu-upu topeguruNa tingkáráꞌ hai malááꞌheꞌ. Molaluitaheꞌ hadua hai hadua, rauliꞌ, “Heáná ripaꞌi tauna deꞌe, haneꞌi mogalo wui hai bálumbá mouláꞌ hawaꞌNa?”#8:25 Tandaꞌ kuasaꞌ iti mopatongawaꞌ kaꞌIesuna miꞌi Pueꞌ Ala, láwiꞌ Pueꞌ Ala peá to makuasaꞌ i wui hai tahiꞌ. Básá Sura Petóiá 89:10; 107:25,29.

Iesu mampopesuwuꞌ setáꞌ hangko i hadua tauna i Gerasa#8:26 Gerasa: Tauna to toroꞌ ionoꞌ, kahandaꞌáraꞌ tiꞌara toIahudiꞌ.

(Mat. 8:28-34; Mrk. 5:1-20)

26Mewaliꞌ, Iesu hai topeguruNa mopaliliuheꞌ poduangaraꞌ lao i tampoꞌ Gerasa to ara tándáꞌ i hambali rano Galilea. 27-29I tampoꞌ Gerasa iti, ara hadua tauna to napesuaꞌi setáꞌ to handaꞌ. Tauna iti marue miꞌi tiꞌara mewaruꞌ, hai tiꞌara woꞌo toroꞌ i támbi, toroꞌ peá i balamba popatawuá. Handaꞌ kánina napesuaꞌi setáꞌ. Kehapiꞌ ratimpuku miꞌi hai rante hai rakámpái mpakaroꞌa, agáiáná ane tempóna nakuasaꞌi setáꞌ, rante iti nabuku peá nadepuꞌ-depuꞌ, haneꞌi melangka lao mebuni i katoroꞌá to malaheꞌ hangko i tauna.

Mewaliꞌ i kamoitána Iesu mendáulu hangko i duanga, tauna to napesuaꞌi setáꞌ iti lao miꞌi mampohidupaꞌá Iesu. Ia monganga-nganga haneꞌi mopalumbá i bitiNa. Iesu mohuoꞌmoheꞌ setáꞌ iti bona melóhóꞌheꞌ, agáiáná monganga-nganga wopiꞌi tauna iti napasimbuku, nauliꞌ, “Iesu, Ánáꞌna Pueꞌ Ala to i Surugáꞌ! Apa riꞌi urusiáMu i kódóꞌ? Kupembiáꞌ bona ineeꞌaꞌ wongkódóꞌá Nupopeahiahiꞌ!”

30Mekuneꞌ Iesu i tauna iti, “Heáná hangaꞌmu?”

Nahániki, “Legio.” Legio, lempóna “i sábuna”#8:30 Legio: Ane tantara toRoma, legio ia miꞌi hantobu surudadoꞌ to tálu sáburaꞌ haweꞌ ini sáburaꞌ tauna. láwiꞌ handaꞌ ntepuꞌu setáꞌ to mesuaꞌ. 31Setáꞌheꞌ iti, rapembiáꞌ ntepuꞌu i Iesu bona ineeꞌheꞌ Napasuaꞌ i lalu pingke pohukuáraꞌ setáꞌ.#8:31 pingke pohukuáraꞌ setáꞌ: Básá Matiu 25:41; Pampetudeꞌá 11:7; 20:1-3.

32Tiꞌara karaoꞌ hangko ionoꞌ, araheꞌ boeꞌ to handaꞌ harómbóngá to tangaꞌraꞌ masungkiꞌ i buluꞌ. Rapembiáꞌ setáꞌ iti bona napaliuheꞌ Iesu mesuaꞌ i boeꞌ iti. Napokana Iesu pembiáꞌraꞌ iti, 33mewaliꞌ mesuwuꞌmoheꞌ setáꞌ hangko i tauna iti, hai liliuheꞌ mesuaꞌ i boeꞌ. Pesuaꞌraꞌ i boeꞌ, melangkamoheꞌ boeꞌ iti hai manawoꞌheꞌ i pingke lao i lalu rano, álána mateheꞌ humpu.#8:33 Ara rekeꞌ-rekeꞌna rosábu báꞌáraꞌ boeꞌ. Básá Marakusi 5:13.

34Karaitáraꞌ tauna to mokámpái boeꞌ apa to pewaliꞌ iti, melangkamoheꞌ lao i wánuá hai i hinoe to hungkuꞌ, mopahaweꞌ apa to raita. 35Roo onoꞌ, pueꞌ wánuá laomoheꞌ i Iesu láwiꞌ mampoinaoheꞌ moita apa to pewaliꞌ. Kahaweꞌraꞌ i Iesu, moitamoheꞌ tauna to napesuaꞌi setáꞌ ininá mehoda hungkuꞌ i bitina Iesu, mewaruꞌ, hai manótó miꞌi pekirina. Onoꞌ miꞌi haneꞌi malááꞌmoheꞌ, {láwiꞌ raisá Iesu tauna to makuasaꞌ}. 36Tauna to moita apa to nabábehi Iesu ininá, mampodarita i tauna to haweꞌheꞌ iti, noumbá Iesu mopakauriꞌ tauna to napesuaꞌi setáꞌ ininá. 37Onoꞌ miꞌi haneꞌi handaꞌ pueꞌ wánuá membiáꞌ i Iesu bona pohuꞌ hangko i tampoꞌ Gerasa iti, láwiꞌ malááꞌ ntepuꞌuheꞌ. Mewaliꞌ mengkaheꞌ wopaheꞌ Iesu hai topeguruNa i duanga ina mesuleꞌheꞌ {lao i tampoꞌ Galilea}.

38Tangaꞌna Iesu mengkaheꞌ i duanga, tauna to napesuaꞌi setáꞌ ininá membiáꞌ bona meuláꞌ woꞌo. Agáiáná tiꞌara napaliu Iesu. Nahángáꞌá, 39“Mesuleꞌmokoꞌ lao i támbimu hai nupodaritaꞌámoheꞌ tauna to hambámbánuámu apa to nabábehi Pueꞌ Ala i hio.” Mesuleꞌ mpuꞌu miꞌi tauna iti mopahaweꞌ i humalele wánuána apa to nabábehi Iesu.

Iesu mopatueꞌ huleꞌ ánáꞌna Iairu, hai mopakauriꞌ hadua towawine to mampetóbóꞌ kumbáNa

(Mat. 9:18-26; Mrk. 5:21-43)

40I pesuleꞌna Iesu hangko tándáꞌ i hambali rano, góeꞌmoheꞌ tauna to handaꞌ mampohidupaꞌá, láwiꞌ marue miꞌi rapegiá. 41I tempó onoꞌ, haweꞌ miꞌi woꞌo hadua tadulako támbi penómbáꞌá.#8:41 tadulako támbi penómbáꞌá: Bágóꞌna, mokádipurá támbi penómbáꞌá hai mourusi to mampopolumao bágóꞌna Pueꞌ. Hangaꞌna Iairu. Kamoitána Iesu, molingkudu miꞌi motóngkóꞌ i bitiNa, membiáꞌ bona Iesu lao i támbina, 42láwiꞌ ánáꞌna towawine to haduduána maduꞌa hai hungkuꞌ miꞌi ina mate. Tinuwuꞌna ánáꞌna iti hampuloꞌ hai rompare.

Pohuꞌ mpuꞌu miꞌi Iesu ina lao i támbina Iairu, agáiáná i polumaoáNa, handaꞌ tauna mombegihiꞌ-gihiꞌ. 43I oloꞌraꞌ tauna to handaꞌ iti, ara hadua towawine to hampuloꞌ miꞌi hai rompare nahumba oaꞌ, tiꞌara mengkangkaroo,#8:43 Básá Áturá Menómbá 15:19-33 kana i ádáraꞌ toIahudiꞌ ane towawine nahumba. Hakiꞌ towawine iti hakiꞌ to rapokatidiꞌ. [hai upu miꞌi dóiꞌna mobaiari sando]. Kehapiꞌ handaꞌ miꞌi kánina rapákupui, tiꞌara ara kamauriꞌána. 44Towawine iti lao mohungkuki Iesu hangko i taleuꞌNa bona mampetóbóꞌ wuntu kumbáNa. Kanatóbóꞌna peá, kásáliu mengkaroo hakiꞌna iti.

45Mekuneꞌ Iesu, “Heáná to mampetóbóꞌAꞌ?”

Tiꞌara ara to mangákuꞌ, onoꞌ miꞌi haneꞌi nauliꞌ Peturuꞌ, “Guru, handaꞌ ntepuꞌu tauna mombegihiꞌ-gihiꞌ, onoꞌ miꞌi haneꞌi hangaa-ngaa araKoꞌ to morumpa.”

46Nauliꞌ Iesu, “Bateꞌna ara tauna to motunggái motóbóꞌAꞌ, láwiꞌ Kuhádiá ara kuasaꞌ mepakauriꞌ to mesuwuꞌ hangko i wátáNgkuꞌ.” 47Naisá miꞌi towawine iti kanaisána Iesu bábehiána, onoꞌ miꞌi haneꞌi ia lao mopalumbá i bitiNa, hai moridiꞌ ánti kamalááꞌna. Napolaluita i lindoꞌraꞌ tauna to handaꞌ tunggáiána motóbóꞌ kumbána Iesu, hai kamauriꞌna miꞌi hakiꞌna. 48Iesu molaluita i towawine iti, Nauliꞌ, “ÁnáꞌKuꞌ, ánti pepoináláimu i Kódóꞌ, mauriꞌmokoꞌ. Mesuleꞌmokoꞌ i lalu roꞌa ngkatueꞌ.”

49Tangaꞌna mani Iesu molaluita, haweꞌ miꞌi hadua tauna hangko i támbina Iairu lao mohángáꞌá Iairu, “Tuá, ánáꞌmu mate miꞌi. Tiꞌara piꞌi ara bunduꞌna membiáꞌkoꞌ tulungi i Guru.”

50Kanahádina Iesu laluitana tauna to rahuoꞌ iti, molaluita miꞌi i Iairu, Nauliꞌ, “Ineeꞌkoꞌ malááꞌ. Ane nupoináláiAꞌ, ánáꞌmu ina tueꞌ huleꞌ.”

51Kahaweꞌraꞌ i támbina Iairu, tauna to handaꞌ tiꞌaraheꞌ napaliu Iesu mesuaꞌ i lintuꞌna ánángkóiꞌ iti; ngkáliꞌna peá Peturuꞌ, Iohane, Iakobu hai tosaena ánángkóiꞌ iti to peisá mesuaꞌ. 52Upu-upu tauna to ara ionoꞌ moteriahiheꞌ ánángkóiꞌ to mate miꞌi iti, agáiáná nauliꞌ Iesu, “Ineeꞌmokou teriaꞌ. Ánángkóiꞌ deꞌe tiꞌaranto mate, agáiáná letaꞌ peá.”

53Karahádina laluitaNa, rapatawai riꞌi, láwiꞌ raisá ánángkóiꞌ iti mate miꞌi. 54Roo onoꞌ, Iesu motibaaꞌ taena ánángkóiꞌ iti, Nahángáꞌá, “ÁnáꞌKuꞌ, mearómokoꞌ!” 55Ánángkóiꞌ iti meinao miꞌi huleꞌ, hai liliu mearó. Roo onoꞌ, Iesu mohángáꞌáheꞌ bona ánángkóiꞌ iti rapopandeꞌ. 56Tingkáráꞌ ntepuꞌuheꞌ tosaena ánángkóiꞌ iti, agáiáná nakóntóheꞌ Iesu bona ineeꞌ rapolaluita i heáná peá apa to pewaliꞌ ininá.

Currently Selected:

Lukasi 8: NTBEP

Highlight

Copy