Lukasi 7

Iesu mopakauriꞌ hadua hawiꞌna tadulako surudadoꞌ toRoma

(Mat. 8:5-13; Ioh. 4:46-53)

1Karoona Iesu molaluita i tauna to handaꞌ, Ia pohuꞌ miꞌi lao i wánuá Kapenau. 2I wánuá iti, ara hadua tadulako surudadoꞌ toRoma.#7:2 tadulako surudadoꞌ toRoma: Ia motadulakoi hangatu surudadoꞌ. Hawiꞌna tadulako iti rumihi kamaduꞌana, hungkuꞌ miꞌi ina mate, hai ia to napokaꞌahiꞌ ntepuꞌu tadulako surudadoꞌ iti. 3Kanahádina tadulako iti kaꞌárána Iesu i lalu wánuá, ia mohuoꞌmoheꞌ bahangapa totosaeraꞌ toIahudiꞌ lao membiáꞌ tulungi i Iesu, bona lao mopakauriꞌ hawiꞌna. 4Kahaweꞌraꞌ i Iesu, molaluitamoheꞌ, rauliꞌ, “Kipembiáꞌ ntepuꞌu bona Nutulungi hadua tadulako surudadoꞌ, láwiꞌ tauna iti hintotoꞌ ntepuꞌu Nutulungi. 5Ia maꞌahiꞌ ntepuꞌu i kitaꞌ toIahudiꞌ, hai mampeweꞌi miꞌi dóiꞌna rapopoaró támbi penómbáꞌántaꞌ.” 6Hangko ionoꞌ, lao miꞌi Iesu hingkakani hai hira i támbina tadulako surudadoꞌ.

Hungkuꞌmoheꞌ i támbi iti, tadulako surudadoꞌ iti mohuoꞌ wopiꞌi bahangapa rángána lao mampohidupaꞌá Iesu mopahaweꞌ laluitana: “Tuá, tiꞌaraKoꞌ hintotoꞌ mesuaꞌ i lalu támbingkuꞌ {láwiꞌ toRomaꞌaꞌ}.#7:6 ToRoma iti moisá toIahudiꞌ tiꞌara peisá mesuaꞌ i lalu támbina tauna to tiꞌara toIahudiꞌ. Ia woꞌo mengkaiwóiꞌ. 7Hai masandaꞌaꞌ lao i Hio, láwiꞌ tiꞌaraꞌaꞌ hintotoꞌ mampohidupaꞌáKoꞌ. Agáiáná Nuhuwárá peá hantepóꞌ laluita, hawiꞌkuꞌ iti bateꞌna ina mauriꞌ. 8Kuisá Io to makuasaꞌ, láwiꞌ kódóꞌ deꞌe, ara woꞌo to i reá lántiꞌna hangko i kódóꞌ, hai araheꞌ woꞌo to kupohawaꞌá. Ane rápáꞌna kupohawaꞌá hadua surudadoꞌ, kuhángáꞌá, ‘Laokoꞌ!’ hangaa-ngaa lao. Ane kukióꞌ surudadoꞌ to ntániꞌna, ‘Maikoꞌ!’ hangaa-ngaa mai. Ane kuhángáꞌá hawiꞌkuꞌ, ‘Nubábehi iti!’ hangaa-ngaa nabábehi. {Noꞌonoꞌ woꞌo Io Tuá, apa peá to Nuhuwárá, bateꞌna mewaliꞌ.}”

9Tingkáráꞌ Iesu mampehádingi tewáina tadulako iti, onoꞌ miꞌi haneꞌi Ia mampehaileꞌheꞌ tauna to handaꞌ to meuláꞌ i Hia, Nahángáꞌáheꞌ, “Maróhó ntepuꞌu pepoináláina tauna iti! Kehapiꞌ riꞌi i oloꞌraꞌ toSáráeliꞌ, tiꞌara mani haweꞌ hadua to Kulámbiꞌ to maróhó pepoináláina nodo pepoináláina tauna iti.” 10Pesuleꞌraꞌ lao i támbi, tauna to nahuoꞌ tadulako surudadoꞌ iti, ralámbiꞌ riꞌi hawiꞌna iti nalalu miꞌi.

Iesu mopatueꞌ huleꞌ hadua ánáꞌntomoane

11Tiꞌara marue hangko ionoꞌ, lao miꞌi Iesu i wánuá to rahangaꞌ Nai. TopeguruNa hai handaꞌ tauna ntániꞌna laoheꞌ woꞌo hingkakani hai Iesu. 12Hungkuꞌmoheꞌ i babaꞌá bente wánuá, moitamoheꞌ hadua tomate to rakowaꞌ lao i rawa wánuá bona ratawu. Tomate iti, hadua ánáꞌntomoane, ánáꞌ saduduána hadua tobembaꞌ. Handaꞌ pueꞌ wánuá lao i popatawuá mamporángá inána. 13Kanaitána peá Pueꞌ Iesu towawine iti, maꞌahiꞌ laluNa, hai Nahángáꞌá, “Inaꞌ, ineeꞌmokoꞌ teriaꞌ!” 14Nahungkukimoheꞌ tauna to mopakowaꞌ tomate iti, hai Napekamaꞌ popakowaꞌá. Tauna to mokowaꞌ to mate iti, mengkarooheꞌ. Nauliꞌ Iesu, “Ánáꞌntomoane! Mearómokoꞌ!” 15Tueꞌ mpuꞌu miꞌi huleꞌ ánáꞌntomoane to mate iti, haneꞌi liliu mehoda hai molaluita. Nauliꞌ Iesu i hinána, “Inaꞌ, deꞌe miꞌi ánáꞌmu.”

16Upu-upu tauna to moita apa to pewaliꞌ iti, rapotingkáráꞌ, hai mantepuꞌuheꞌ motóiá Pueꞌ Ala, rauliꞌ, “Hadua nabiꞌ to makuasaꞌ ntepuꞌu ara i oloꞌtaꞌ! Haweꞌ miꞌi Pueꞌ Ala motulungikeꞌ taunáNa.” 17Apa to nabábehi Iesu iti, tebámbári i upu-upu wánuá to hungkuꞌ hai i humalele tampoꞌ Iudá.

Iesu hai Iohane Toperiu

(Mat. 11:2-19)

18Topeguruna Iohane Toperiu mopahaweꞌ i hia upu-upu to nabábehi Iesu. {Tempó iti, Iohane ara i lalu tarungku.}#7:18 Básá Lukasi 3:20. Onoꞌ miꞌi haneꞌi nakióꞌ Iohane rodua topeguruna, 19nahángáꞌáheꞌ, “Laomokou i Iesu nipekuneꞌ node: ‘Ba Io mpuꞌu miꞌi Datu Topehómpóꞌ to nadándi Pueꞌ Ala, ba ara mani to ntániꞌna to kipegiá?’ ”

20Lao mpuꞌumoheꞌ topeguruna to rodua iti i Iesu, rauliꞌ, “Guru, Iohane mohuoꞌangkaiꞌ mai mekuneꞌ i Hio, ba Io mpuꞌu miꞌi Datu Topehómpóꞌ to nadándi Pueꞌ Ala, ba ara mani to ntániꞌna to hangaa-ngaa kipegiá?”

21I tempó iti woꞌo, Iesu tangaꞌna mopakauriꞌ handaꞌ tauna to maduꞌa. Handaꞌheꞌ tauna to napesuaꞌi tokadake, napakauriꞌ Iesu, noꞌonoꞌ woꞌo handaꞌ tauna tobilo Napakauriꞌ. 22Mewaliꞌ, Iesu molaluita i topeguruna Iohane, Nauliꞌ, “Mesuleꞌmokou, hai nipahaweꞌá Iohane apa to niꞌita hai to nihádi: tobilo meita miꞌi, topaluꞌ molumao, toketánggáꞌ mauriꞌ, tobongoꞌ mehádi, tomate tueꞌ huleꞌ, hai bámbári to maroꞌa rapahaweꞌ i tauna to meahiahiꞌ tueꞌraꞌ.#7:22 Básá to naukiꞌ nabiꞌ Iesaia hangkoia mokana i Datu Topehómpóꞌ. Básá Iesaia 35:5-6; 61:1. Iesaia tueꞌ rekeꞌ-rekeꞌna lima átuna parena hangko tiꞌara mani Iesu rapoánáka. 23Morasiꞌheꞌ tauna to tiꞌara bata-bata laluraꞌ mokana i Kódóꞌ.”

24I pesuleꞌraꞌ huoꞌána Iohane iti, natepuꞌu miꞌi Iesu molaluita i tauna to handaꞌ kana i Iohane, Nauliꞌ, “Apa riꞌi tunggáiámi iaꞌo lao mampeita Iohane Toperiu i pádá loriꞌ? Ba mampoinao pekou moita buloꞌ mpádá to nawui ngkálu soꞌu ngkálu mai? Tiꞌara! 25Mewaliꞌ, apa riꞌi to nipoinao lao nipeita? Ba mampoinao pekou mampeita tauna to mababe waruꞌna? Tiꞌara woꞌo, láwiꞌ tauna to mababe waruꞌraꞌ hai to pebuku toroꞌheꞌ i támbi kadatuá, {tiꞌara i katoroꞌá to tepataniꞌ}. 26Mewaliꞌ, apa riꞌi to nipoinao lao nipeita? Ba mampoinao pekou mampeita hadua nabiꞌ? Ane noꞌonoꞌ tunggáiámi, maroꞌa. Agáiáná Kuhángáꞌákou, melumbuꞌ kamahilena tueꞌna Iohane hangko i nabiꞌ-nabiꞌ to ntániꞌna, 27láwiꞌ Iohane iti to natunggái i lalu Sura Magasaꞌ hangkoia#7:27 Maleaki tueꞌ rekeꞌ-rekeꞌna iba átuna tálu puloꞌna parena hangko tiꞌara mani Iesu rapoánáka. to manguliꞌ node:

‘Deꞌe miꞌi huoꞌáNgkuꞌ

to ina Kuhuoꞌ moioru hangko i Hio.

Ia to ina mopatimama ráráMu.’ ” (Maleaki 3:1)

28Hai nauliꞌ wopiꞌi Iesu, “Nipehádingi maroꞌa: hangko i upu-upu tauna to rapoánáka i lalu duniáꞌ deꞌe, tiꞌara ara haweꞌ hadua to melumbuꞌ kamahilena tueꞌna hangko i Iohane, {láwiꞌ ia to mopahaweꞌ kaꞌina haweꞌna Datu Topehómpóꞌ}. Agáiáná mantepuꞌu deꞌe-deꞌe, morasiꞌ ntepuꞌuheꞌ tauna to mengkoruꞌ i Pueꞌ Ala. Mogalo riꞌi tauna to i wóiꞌ tueꞌraꞌ i lalu popárentána Pueꞌ Ala, melumbuꞌ kamahilena tueꞌraꞌ haneꞌi Iohane, {láwiꞌ raisá mani hira rárá katehómpóꞌ haneꞌi Iohane}.”

29Laluitana Iesu iti rapehádingi handaꞌ tauna, tepasuaꞌheꞌ toperóróꞌ ásele, hai mopangákuꞌheꞌ kamanótóna tunggáiána Pueꞌ Ala. Tongawaꞌ, láwiꞌ roomoheꞌ mampoperiu i Iohane. 30Agáiáná toParisi hai guru-guru agama mosápuákaheꞌ tunggáiána Pueꞌ Ala i hira. Tongawaꞌ, láwiꞌ tiꞌaraheꞌ mampenosoꞌi dósáraꞌ hai tiꞌaraheꞌ woꞌo mampoperiu i Iohane.

31-32Nauliꞌ wopiꞌi Iesu, “Kómu to tueꞌ tempó deꞌe, apa to peisá Kuꞌuliꞌ mokana i katueꞌmi? {Mohádimokou paturoꞌKuꞌ hai paturoꞌna Iohane Toperiu, mewaliꞌ} peisákou rapándiriꞌ nodo ánángkóiꞌ to mowadi i tangabaa to mombekióꞌ-kióꞌ, rauliꞌ:

‘Kiponaniákou nani kagóeꞌ-góeꞌ,

tiꞌarakou mau monariꞌ.

Kiponaniákou nani kawiora,

tiꞌarakou woꞌo mau teriaꞌ.’

33Lempóna: Iohane Toperiu tiꞌara niundeꞌ láwiꞌ kamaina, ia mopuasaꞌ hai tiꞌara mainu to melángui. Nisápuáka oaꞌ, niuliꞌ, ‘Ia napesuaꞌi setáꞌ!’ 34Noꞌonoꞌ woꞌo kahaweꞌna Ánáꞌ Mánusiá. Ia mainu anggoroꞌ hai paka mosusa, agáiáná nisápuáka woꞌo, niuliꞌ, ‘Ia hadua topehioroꞌ, to paka mainu to melángui. Ia paka hingkakani hai toperóróꞌ ásele hai tauna ntániꞌna to tiꞌara maroꞌa!’ 35Roduaꞌangkaiꞌ nisalaꞌi! Agáiáná kehapiꞌ noꞌonoꞌ, kamanótóna rárána Pueꞌ Ala tongawaꞌ i lalu katueꞌraꞌ tauna to mampeuláꞌi peundeꞌáNa.”#7:35 Lempóna, toperóróꞌ ásele hai tauna to rarekeꞌ tiꞌara maroꞌa, manótóheꞌ (bijak) láwiꞌ mampoináláiheꞌ paturoꞌraꞌ Iohane Toperiu hai Iesu.

Hadua towawine molánái bitina Iesu

36Ara hadua toParisi to rahangaꞌ Simoꞌ, mokióꞌ Iesu lao mandeꞌ i támbina, mewaliꞌ lao mpuꞌu miꞌi Iesu. KahaweꞌNa i támbi iti, mehodamoheꞌ láwiꞌ ina mandeꞌheꞌ. 37I lalu wánuá iti, ara woꞌo hadua towawine to tiꞌara maroꞌa bábehiána hangkoia. Kamohádina Iesu ara mandeꞌ i támbina toParisi, ia lao mampohidupaꞌá hai moánti habutoloꞌ mina-mina to mawongi hai masuliꞌ ntepuꞌu hólóna. Butoloꞌ iti rabábehi hangko i watu to bulá.#7:37 watu to bulá: I lalu básá Indonesia: pualam. Óntóꞌna butoloꞌ iti masuliꞌ, hai butoloꞌ woꞌo masuliꞌ láwiꞌ hangko i tampoꞌ Másiriꞌ. 38Kahaweꞌna towawine ionoꞌ, ia meángkáꞌ i taleuꞌna Iesu i hintáiꞌ bitiNa#7:38 Ane toIahudiꞌ mandeꞌ, biásá hantangaꞌ maturu. haneꞌi teriaꞌ. Bitina Iesu nabahoꞌi hai uwai mátána, naumpáhi hai weluáꞌna haneꞌi naꞌángki. Roo onoꞌ, mina-mina to mawongi iti nabubuha i bitina Iesu.

39Kanaitána Simoꞌ apa to nabábehi towawine iti, nauliꞌ i laluna, “Ane toꞌu-toꞌu tauna deꞌe hadua nabiꞌ, hangaa-ngaa Naisá noumbá katueꞌna towawine to mai molánái bitiNa iti, hai hangaa-ngaa Naisá woꞌo, ia tauna to tiꞌara maroꞌa.”

40Onoꞌ miꞌi haneꞌi Iesu molaluita i toParisi iti, Nauliꞌ, “Simoꞌ, ara to Kupoinao Kuhángáꞌákoꞌ.”

Nauliꞌ Simoꞌ, “Peisánto, Guru.”

41Nauliꞌ Iesu, “Ara rodua tauna to mebolo dóiꞌ. Indána hadua lima átuna dóiꞌ peráꞌ, hai to haduána lima peá puloꞌna dóiꞌ peráꞌ. 42Ánti katiꞌárána rabuku mampopesuleꞌ dóiꞌ to rapebolo iti, nahángáꞌámoheꞌ tauna to mampoweꞌiheꞌ dóiꞌ iti, ‘Tiꞌara piꞌi paraluu nibaiari indámi. Tewoe miꞌi.’ Mewaliꞌ, hangko i tauna to rodua iti, heáná to ina melumbuꞌ ahiꞌna i tauna to mampoweꞌiheꞌ dóiꞌ to rapebolo?”

43Nahániki Simoꞌ, “Mouláꞌ polámbiꞌkuꞌ, tauna to handaꞌ indána.”

Nauliꞌ Iesu, “Toꞌu to nuꞌuliꞌ.” 44Roo onoꞌ, Iesu motótói towawine iti haneꞌi molaluita i Simoꞌ, Nauliꞌ, “Peita towawine deꞌe. KahaweꞌKuꞌ i támbimu, tiꞌaraꞌAꞌ nupopatimamaꞌá uwai pobahoꞌiána bitiNgkuꞌ mouláꞌ ádántaꞌ ane arai torare. Agáiáná towawine deꞌe mobahoꞌi bitiNgkuꞌ hai uwai mátána, haneꞌi naumpáhi hai weluáꞌna. 45Io, tiꞌaraꞌAꞌ nutabe ba nuángki mouláꞌ ádántaꞌ ane arai torare. Agáiáná towawine deꞌe moángki oaꞌ bitiNgkuꞌ mantepuꞌu i kahaweꞌKuꞌ ininá. 46Io, tiꞌara nulánái wuáꞌKuꞌ hai lana mouláꞌ ádántaꞌ ane arai torare. Agáiáná towawine deꞌe molánái bitiNgkuꞌ hai mina-mina to mawongi hai masuliꞌ hólóna. 47Mewaliꞌ Kuhángáꞌáꞌákoꞌ Simoꞌ, dósána to handaꞌ teámpungi miꞌi. Tongawaꞌ hangko i kamahilena ahiꞌna i Kódóꞌ. Agáiáná tauna to hantóiꞌ peá peámpungina, hantóiꞌ peá woꞌo ahiꞌna.”

48Roo onoꞌ, nauliꞌ Iesu i towawine iti, “Teámpungi miꞌi dósámu.”

49Onoꞌ haneꞌi molaluitamoheꞌ tauna to mandeꞌ hingkakani, rauliꞌ hadua hai hadua, “Heáná ripaꞌi tauna deꞌe, haneꞌi Nabuku woꞌo moámpungi dósá? {Pueꞌ Ala peá to peisá!}”

50Hangko ionoꞌ, nauliꞌ Iesu i towawine iti, “Ánti pepoináláimu i Kódóꞌ, onoꞌ miꞌi haneꞌi tekábáhámokoꞌ hangko i huku dósámu. Mesuleꞌmokoꞌ i lalu roꞌa ngkatueꞌ.”

Currently Selected:

Lukasi 7: NTBEP

Highlight

Copy