Lukasi 2

Iesu rapoánáka i Beteleme

(Mat. 1:18-25)

1Tiꞌara marue hangko i karapoánákana Iohane, Datu Mahile Agustu#2:1 Datu Mahile Agustu: Ia mewaliꞌ Datu Mahile pare tálu puloꞌna hai isáꞌ hangko tiꞌara mani Iesu rapoánáka, haweꞌ pare hampuloꞌ hai iba roo karapoánákana Iesu (31sM haweꞌ 14M.) Tempó onoꞌ, toRoma mokuasaꞌi tampoꞌ Sapanio, Perancis, Germani, Italia, Turki, Iunani, Siria, Sáráeliꞌ, hai tampoꞌ Másiriꞌ tándáꞌ i wongko. mopaꞌara hambuaꞌ párentá, bona upu-upu tauna i humalele tampoꞌ to napárentái toRoma, raukiꞌ hangaꞌraꞌ bona raisá kahandaꞌraꞌ. 2Poimbaꞌ tauna to rungu-runguna deꞌe rapaꞌara i tempóna Kireniu mewaliꞌ mágáuꞌ i tampoꞌ Siria. 3Onoꞌ miꞌi haneꞌi upu-upu tauna lao mampopeukiꞌ hangaꞌraꞌ i wánuána toioruraꞌ hadua-hadua.

4-5Noꞌonoꞌ woꞌo, Iusupu pohuꞌ miꞌi hangko i wánuá Nasare i Galilea hingkakani hai Maria to ina mewaliꞌ toinána. Maria iti tangaꞌna miꞌi morodua. Mempanaiꞌheꞌ lao i tampoꞌ Iudá hai liliuheꞌ i wánuá Beteleme,#2:4 Beteleme rekeꞌ-rekeꞌna hangatu kilómete hangko i Nasare kakaraoꞌna. pesupaꞌána Datu Daudiꞌ hangkoia. Ionoꞌ, Iusupu mampopeukiꞌ hangaꞌraꞌ, láwiꞌ ia pemuleꞌánaheꞌ Daudiꞌ. 6Tangaꞌraꞌ mani i Beteleme, haweꞌ miꞌi tempóna Maria ina moánáꞌ, 7hai ia moánáka hadua Ánángkóiꞌ tobaleilo, ánáꞌna to towutuꞌ. Ánángkóiꞌ iti nalempiꞌi báná to maꞌálusuꞌ, haneꞌi naoliꞌ i lalu dulá dimbá, láwiꞌ ionoꞌ tiꞌara piꞌi ara támbi to peisá rakatoroꞌi.

Topoewu hai malaꞌeka

8Hungkuꞌ i wánuá Beteleme, araheꞌ bahangapa topoewu to mokámpái dimbáraꞌ i pádá. 9Wengi pesupaꞌána Iesu, hangkaꞌ-hangkaꞌ perái haweꞌ malaꞌekana Pueꞌ Ala, meángkáꞌ i hintáiꞌraꞌ topoewu hai peawaꞌna Pueꞌ Ala mowangkaꞌiheꞌ, mewaliꞌ malááꞌ ntepuꞌuheꞌ topoewu iti. 10Nauliꞌ malaꞌeka iti, “Ineeꞌkou malááꞌ, láwiꞌ maiaꞌ moánti bámbári to maroꞌa i kómu. Bámbári iti ina mopagóeꞌ laluraꞌ upu-upu tauna. 11Wengi deꞌe i wánuána Datu Daudiꞌ, mesupaꞌ miꞌi Topohómpóꞌ Salaꞌ, Ia miꞌi Kerisitu,#2:11 Kerisitu: Hangko i básá Iunani, lempóna: Datu Topehómpóꞌ to to rabubuhi lana hai ralántiꞌ. I lalu básá Iberani rauliꞌ toMásehi. Pueꞌtaꞌ. 12Deꞌe miꞌi tandaꞌNa: ina nihumba hadua Ánáꞌlei to ralempiꞌi, hai raoliꞌ i lalu dulá dimbá.”

13Hangkaꞌ-hangkaꞌ perái raita topoewu iti malaꞌeka to handaꞌ hingkakani hai malaꞌeka to rungu-runguna. Motóiáheꞌ Pueꞌ Ala, rauliꞌ:

14“Tatóiá miꞌi Pueꞌ Ala to i surugáꞌ!

Tauna i duniáꞌ to mampokagóeꞌ Pueꞌ Ala

ina molámbiꞌheꞌ roꞌa ngkatueꞌ.”

15I pesuleꞌraꞌ malaꞌeka iti lao i surugáꞌ, molaluitamoheꞌ topoewu iti hadua hai hadua, rauliꞌ, “Laomokeꞌ i Beteleme, mampeita apa to pewaliꞌ to napahaweꞌámokeꞌ Pueꞌ.” 16Mewaliꞌ pohuꞌ mpuꞌumoheꞌ ragagu lao i Beteleme. Mampombelámbiꞌámoheꞌ Maria hai Iusupu, hai Ánáꞌlei to raoliꞌ i lalu dulá dimbá. 17Karaitána Ánáꞌlei iti, rapahaweꞌ apa to nauliꞌ malaꞌeka mokana i Hia. 18Tingkáráꞌheꞌ upu-upu tauna to mohádi laluitaraꞌ topoewu. 19Agáiáná upu-upuna to mewaliꞌ iti napailalu Maria hai napekiri oaꞌ.

20Roo onoꞌ, topoewu iti mesuleꞌmoheꞌ lao i pádá poewuáraꞌ. I tangaꞌ rárá, motóiá hai mampomahileheꞌ Pueꞌ Ala, láwiꞌ upu-upu to rahádi hai to raita, toꞌu-toꞌu mewaliꞌ hintotoꞌ hai apa to napahaweꞌáheꞌ malaꞌeka.

Iesu rahangaꞌ hai rapeweꞌi i Pueꞌ Ala

21Gáná miꞌi haminggu tinuwuꞌNa, Ánángkóiꞌ iti ratileꞌ mouláꞌ ádáraꞌ toIahudiꞌ, hai rahangaꞌ Iesu mouláꞌ popahaweꞌna malaꞌeka hangko tiꞌara mani nakákáleáꞌánga ináNa.

22I tempó popamagasaꞌna Maria hangko i poánáꞌna, hintotoꞌ hai áturá to teukiꞌ i Paturoꞌna Musa,#2:22 Básá Áturá Menómbá 12:1-7. tosaena Iesu moánti Ánáꞌraꞌ iti lao i Támbina Pueꞌ Ala i Ierusale bona rapeweꞌi i Pueꞌ Ala, 23láwiꞌ teukiꞌ miꞌi i lalu Sura Áturána Pueꞌ node: “Upu-upu ánángkóiꞌ tobaleilo towutuꞌ hangaa-ngaa rapeweꞌi i Pueꞌ Ala bona mewaliꞌ taunáNa.”#2:22-24 Básá Pesuwuꞌá 13:2,12,15. 24Hai moántiheꞌ woꞌo popenómbáraꞌ nodo to tepakanótó i lalu Sura Áturána Pueꞌ, ia miꞌi: hamboko tádáhi manggebodoꞌ ba rombaꞌa ánáꞌ tádáhi kokou.#2:22-24 Básá Áturá Menómbá 12:1-8. Popenómbá to naꞌánti tosaena Iesu ia miꞌi popenómbá tauna to meahiahiꞌ tueꞌraꞌ.

Simeoꞌ hai Hana

25-26I Ierusale, ara hadua tauna to rahangaꞌ Simeoꞌ. Ia hadua to manótó hai mengkoruꞌ i Pueꞌ Ala, hai napoinálái kaꞌina haweꞌna tempóna Pueꞌ Ala {ina mohuoꞌ Datu Topehómpóꞌ bona} mampelae toSáráeliꞌ.#2:25-26 I lalu básá Iunani: napegiá tempó toSáráeliꞌ ina tepalindó. Básá Iesaia 49:13; 51:3; 52:9. Hai ia naporángá Inao to Magasaꞌ to mampopaisáꞌá katiꞌárána ina mate ane tiꞌara maniꞌi moita Datu Topehómpóꞌ to nadándi Pueꞌ Ala. 27Inao to Magasaꞌ mokale i laluna Simeoꞌ, haneꞌi ia lao i Támbina Pueꞌ Ala. I tempóraꞌ Iusupu hai Maria moánti Iesu bona rapeweꞌi i Pueꞌ Ala mouláꞌ Paturoꞌna Musa, 28Simeoꞌ moala Ánángkóiꞌ iti, naꞌawi haneꞌi motóiá Pueꞌ Ala, nauliꞌ:

29“Ó Pueꞌ, deꞌe-deꞌe peisámoꞌ mate i katinda lalu,

láwiꞌ Nubukeki miꞌi dándiMu.

30Kuita mpuꞌu miꞌi Ánángkóiꞌ deꞌe,

Datu Topehómpóꞌ to Nuhuoꞌ mai,

31to Nupatimama bona mohómpóki upu-upu tauna

hangko i huku dósá.

32Datu Topehómpóꞌ deꞌe nodo pewangkaꞌ

láwiꞌ Ia ina mopakanótó apa to toꞌu mokana i Hio

i tauna to tiꞌara toSáráeliꞌ

bona raisáKoꞌ, Pueꞌ.

Hai ánti kaꞌIana,

taunáMu toSáráeliꞌ ina rapomahile.”

33Tingkáráꞌheꞌ Maria hai Iusupu mohádi laluitana Simeoꞌ kana i Ánáꞌraꞌ. 34Roo onoꞌ, Simeoꞌ mowátiꞌheꞌ hai mampolaluitaꞌá Maria,

“Ánti kahaweꞌna miꞌi Ánáꞌmu deꞌe,

handaꞌ toSáráeliꞌ ina molámbiꞌ pehuku,

agáiáná handaꞌ woꞌo tauna ina molámbiꞌ katehómpóꞌ.

Ia miꞌi to napileꞌi hai nahuoꞌ mai Pueꞌ Ala

{bona motudeꞌá i tauna apa to toꞌu},#2:34 I lalu básá Iunani: Ia ina mewaliꞌ tandaꞌ.

agáiáná Ia ina raewaꞌ handaꞌ tauna,

35bona ina tongawaꞌ apa to ara i lalu pekiriraꞌ.

Hai io Maria,

kawiorana lalumu ina nodo to natohuꞌ pihoꞌ to mataru.”

36-37I Támbina Pueꞌ Ala, ara woꞌo hadua nabiꞌ towawine to rahangaꞌ Hana. Ia miꞌi ánáꞌna Panueli, pemuleꞌána Asere.#2:36 Asere: Hadua hangko i kahampuloꞌ hai rodua ánáꞌna Iako. Pemuleꞌánaheꞌ rauliꞌ toAsere. Hana iti, uwalu miꞌi puloꞌna hai iba parena tinuwuꞌna. Hangkoia ara toámána, agáiáná pitu peá parena hambokoheꞌ, mate miꞌi toámána. Mantepuꞌu i tempó iti, ia bembaꞌ hai alo-alona lao menómbá i Támbina Pueꞌ Ala. Alo-alona hai wengi-wengina Hana mekakae hai mopuasaꞌ.#2:36-37 Ane toIahudiꞌ mopuasaꞌ, mampopengaa rárá. Básá to teukiꞌ i Kahirámpuá Laluita i taleuꞌ. 38I kamoitána Iesu i Támbina Pueꞌ Ala, ia motóiá Pueꞌ Ala, hai napolaluita woꞌo kana i Ánángkóiꞌ iti i upu-upu tauna to mampegiá karakábáhána toIerusale hangko i ewáliraꞌ, {iamoheꞌ toRoma}.#2:38 ewáliraꞌ to i Ierusale: I tempó iti, Ierusale hai upu-upu tampoꞌ Sáráeliꞌ napárentái Roma. ToSáráeliꞌ mampegiá oaꞌ Datu Topehómpóꞌ to ina mokábáháheꞌ hangko i kuasaꞌraꞌ toRoma.

Iusupu hai Maria mesuleꞌ lao i Nasare

39Karooraꞌ Iusupu hai Maria mampeuláꞌi upu-upu áturá to teukiꞌ i lalu Áturána Pueꞌ, mesuleꞌmoheꞌ lao i wánuá Nasare i tampoꞌ Galilea. 40Ánáꞌraꞌ iti kamahile-hileá hai kamaróhó-róhóá. Manótó ntepuꞌu laluNa, hai nawátiꞌ Pueꞌ Ala.

Iesu i Támbina Pueꞌ Ala

41Pare-parena, inána hai umána Iesu laoheꞌ i Ierusale bona mouláꞌheꞌ Alo Posusa Paska,#2:41 Alo Posusa Paska: Uwalu alona kamaruena, toSáráeliꞌ mambuhinao noumbá rárána Pueꞌ Ala mokábáháheꞌ hangko i karapohawiꞌraꞌ i tampoꞌ Másiriꞌ. Tempó iti, malaꞌekana Pueꞌ Ala moánti kapate i upu-upu ánáꞌ towutuꞌ tobaleilo toMásiriꞌ, agáiáná támbiraꞌ toSáráeliꞌ naliu asalaꞌ ara waheꞌ dimbá i babaꞌ. Básá Pesuwuꞌá 12:21-27. alo mahileraꞌ toIahudiꞌ. 42Gáná miꞌi hampuloꞌ hai rompare tinuwuꞌna Iesu,#2:42 Babilaꞌ iti rungu-runguna Iesu lao i Ierusale mouláꞌ Posusa Paska, láwiꞌ toSáráeliꞌ rarekeꞌ manginaomoheꞌ ane tinuwuꞌraꞌ hampuloꞌ miꞌi hai rompare. laomoheꞌ tosaeNa i posusa iti nodo kabiásáꞌáraꞌ, hai Iesu woꞌo raꞌánti. 43Kaupuraꞌ mouláꞌ alo mahile iti, pohuꞌmoheꞌ ina mesuleꞌ lao i Nasare wánuáraꞌ, agáiáná Iesu tiꞌara meuláꞌ i hira. Ia ara mani i Ierusale, agáiáná tiꞌara raisá tosaeNa. 44Rapekiri peá aranto hingkakani hai rángáraꞌ hampopolumaoá. Hangaloámoheꞌ molumao hangko lao riꞌi rapeliꞌ i rángáraꞌ hai halaluraꞌheꞌ. 45Ánti katiꞌárána ralámbiꞌ, mesuleꞌ wopaheꞌ lao i Ierusale mampeliꞌ oaꞌ Iesu. 46I katáluna alona karapeliꞌNa hangko ralámbiꞌ riꞌi i tangabaa Támbina Pueꞌ Ala. Iesu tangaꞌNa mehoda i oloꞌraꞌ guru-guru agama, mampehádingi polaluitaraꞌ, hai mekuneꞌ woꞌo i hira. 47Tingkáráꞌheꞌ upu-upu tauna to mohádi polaluitaNa hai rauliꞌ, “Mapánde ntepuꞌu Ánángkóiꞌ iti. Handaꞌ to Naisá!” 48Karaitána peá iti Iesu, tingkáráꞌmoheꞌ ináNa hai umáNa. Nauliꞌ ináNa, “Ánáꞌkuꞌ, moapa riꞌi haneꞌi noꞌonoꞌ bábehiáMu? Kódóꞌ hai umáMu, mapári kihádi mampeliꞌKoꞌ!”

49Agáiáná nahániki Iesu, Nauliꞌ, “Moapa riꞌi haneꞌiAꞌ nipeliꞌ? Tiꞌara paꞌi niꞌisá, Kódóꞌ hangaa-ngaa araꞌAꞌ i lalu támbina UmáNgkuꞌ?” 50Agáiáná tiꞌara raisá tunggáiána laluitana Iesu iti.

51Roo onoꞌ, mesuleꞌmoheꞌ hingkakani lao i Nasare, hai Iesu mengkoruꞌ i hira. Upu-upu to mewaliꞌ iti, napailalu peá ináNa. 52Iesu kamahile-hileá, hai kamanótó-nótóá laluNa. Ia napokagóeꞌ Pueꞌ Ala, hai rapokagóeꞌ woꞌo tauna.

Currently Selected:

Lukasi 2: NTBEP

Highlight

Copy